आफुलाई नयाँ भन्नेहरुको असली अनुहार चैत १५ गते देखिइसकेको छ – प्रधानमन्त्री ओली

झापा – प्रधानमन्त्री तथा नेकपा एमालेका अध्यक्ष केपी शर्मा ओलीले नयाँ भइरहेको हल्लाका पछि नलाग्न आग्रह गरेका छन् ।

झापाको दमकमा नेकपा एमालेले आयोजना गरेको जनजागरण सभालाई सम्बोधन गर्दै उनले नयाँका नाममा आएकाहरु कोही सहकारी ठग, कोही साहुमारा भएको टिप्पणी गरे । उनले नयाँ राजनीतिक दल र राजसंस्थाको पक्षमा भइरहेका गतिविधिलाई लक्षित गर्दै यस्तो बताएका हुन् ।

‘यस्ताको पछि लागेर हुँदैन । उनीहरुको असली अनुहार चैत १५ गते देखिइसकेको छ ।’ उनले भने । प्रधानमन्त्री ओलीले नयाँको हालत देखिएको र उनीहरुको पछाडि लाग्न नहुने बताए । देश अहिले अस्थिरताबाट हटेर स्थिरतातर्फ लम्किएको उनको भनाइ छ ।

उनले भने, ‘अब सरकार स्थिर छ । नयाँ नयाँ योजना र कार्यक्रम लिएर आउँछ । अब रोकिएका आयोजनाहरु अगाडि बढ्छन् । देशमा, यस जिल्लामा र नगरमा नयाँ नयाँ योजना आउनेछन् । त्यहीअनुसारको बजेट आउनेछ ।’