काठमाडौं । राष्ट्रिय आविष्कार केन्द्रका अध्यक्ष महावीर पुनको जीवन कथामा आधारित पुस्तक ‘महावीर पुन- सम्झना, सपना र अविरल यात्रा’ अडिओ भर्सनमा पनि आउने भएको छ । शुक्रबार सामाजिक सञ्जालमा पोस्ट राख्दै पुनले छिट्टै आफ्नो जीवन कथाको अडिओबुक सार्वजनिक हुने जानकारी दिएका हुन् ।
पुनका अनुसार पुस्तकको अडिओ रेकर्ड गर्न उनलाई दुई दिन लागेको छ । कूल ११ घण्टाको उक्त अडिओ पुनले म्युजिक नेपालको स्टुडियोमा रेकर्ड गरेका छन् ।
“पहिलो दिन ३ घण्टा र दोस्रो दिन पूरा ८ घण्टा गरी जम्मा ११ घण्टा जतिमा म्युजिक नेपालको स्टुडियोमा बसेर मैले मेरो आत्मकथाको किताबको अडिओबुक (सुन्ने किताब) रेकर्ड गरेँ । देश विदेशमा बस्नुहुनेहरूले अनलाइन बाट अडिओबुक किन्न सक्नुहुनेछ ।”
उनका अनुसार यो अडिओबुक युट्युबमा उपलब्ध हुनेछैन । सुन्न चाहनेले म्युजिक नेपालले उपलब्ध गराउने प्लेटफर्मबाट खरिद गर्नुपर्नेछ । हालसम्म यस अडिओबुकको मूल्य र यो सार्वजनिक हुने मिति तय गरिएको छैन । उनले थपेका छन्, “अडिओबुकको मूल्य अहिले नै तोकिएको छैन। यो अडिओबुक युट्युबमा आउँदैन । अनलाइन किन्नु पर्छ पढ्नेले ।”
मूल्य ७५० रुपैयाँ तोकिएको जीवन कथा एक लाख ८० हजार प्रति बिक्री गरिएको दाबी पुनले गरेका छन् । विगत एक वर्षदेखि देशका ४० बढी जिल्लामा भौतिक रूपमा उपस्थित भएर पुनले आफ्नो जीवन कथा बिक्री गर्दै आएका छन् ।
जीवन कथाबाट आएको सम्पूर्ण रकम वीरगञ्जको कृषि औजार कारखाना मर्मतमा खर्च गर्ने प्रतिवद्धता पुनले लिएका छन् ।
पछिल्लो अध्यावधिक: चैत ३०, २०८१ १०:३
सामाग्री श्रोत :
टेक पाना
