काठमाडौँ । काठमाडौँ महानगरपालिकाका वडाध्यक्षहरूको ‘घुस’ सम्वाद भनिएको भिडिओ फुटेज बाहिरिएपछि हटाइएको सीसीटिभी क्यामेरा पुनः जोडिएको छ । महानगरका प्रवक्ता नवीन मानन्धरले हटाइएका सीसीटिभी क्यामेरा बिहीबार पुनः जडान गरिएको जानकारी दिए ।
बुधबारमात्रै मेयरको सचिवालय बैठक, प्रमुख प्रशासकीय अधिकृतको कार्यकक्ष र विभागीय प्रमुखहरूको कार्यकक्षबाट सीसीटिभी क्यामेराहरू झिकिएको थियो । हटाउनेहरू आफैँले नै बिहीबार ती क्यामेराहरू राखेको प्रवक्ता मानन्धरले बताए ।
“किन निकालिएको हो र पुनः किन राखियो, मलाई त्यति धेरै थाहा भएन,” उनले भने, “तर, हटाइएका सबै सीसीटिभी क्यामेराहरू पुनः जडान भइसकेका छन् ।” काठमाडौँ महानगरपालिकामा प्रमुख प्रशासकीय अधिकृत सरोज गुरागाईं र मेयर बालेन शाहबिच केही महिनादेखि द्वन्द्वको स्थिति देखिएको छ ।
पुरानो बसपार्कमा बनिरहेको भ्यु टावर सहितको संरचनाको नक्सापास/स्वीकृतिको विषयलाई लिएर मेयर बालेनले प्रमुख प्रशासकीय अधिकृतमाथि अनियमितताको आरोप लगाउँदै आएका छन् । प्रमुख प्रशासकीय अधिकृतलाई जबर्जस्ती कार्यकक्षमा प्रवेश गराएपछि बाहिरिएको वडाध्यक्षहरूको भिडिओ सोही विषयमा ठेकेदार कम्पनीसँग सम्बन्धित भएको चर्चा छ ।
पछिल्लो अध्यावधिक: चैत २८, २०८१ १९:१५
सामाग्री श्रोत :
टेक पाना
