काठमाडौं । जडिबुटीस्थित उत्पादन तथा प्रशोधन कम्पनी लिमिटेडको भवनमा आगजनी गरेको आरोपमा सिन्धुपाल्चोकका कुमार तामाङ पक्राउ परेका छन् । सामाजिक सञ्जालमा सार्वजनिक भएको भिडिओ फुटेजको आधारमा प्रहरीले २७ वर्षीय तामाङलाई पक्राउ गरेको हो ।
उपत्यका अपराध अनुसन्धान कार्यालयका प्रहरी वरिष्ठ उपरीक्षक (एसपी) अंगुर जीसीले सोमबार बिहान जडिबुटी चोकबाट तामाङलाई पक्राउ गरिएको जानकारी दिए । भिडिओ विश्लेषणकै आधारमा तामाङ सोही दिन तीनकुनेको ट्राफिक लाइट तोडफोड घटनामा संलग्न रहेको खुलेको एसपी जीसीले बताए ।
पेशाले डेलिभरी भ्यान चालक रहेका तामाङ केही वर्षदेखि काठमाडौं बस्दै आएका थिए । प्रारम्भमा घटनामा संलग्नता अस्वीकार गरेपनि तोडफोड र आगजनीको भिडिओ देखाएपछि उनले आफ्नो संलग्नता रहेको स्वीकार गरेको प्रहरीले जनाएको छ ।
विस्तृत अनुसन्धानका लागि उनलाई जिल्ला प्रहरी परिसर काठमाडौंमा बुझाइएको एसपी जीसीले जानकारी दिए ।
पछिल्लो अध्यावधिक: चैत २५, २०८१ १८:१९
सामाग्री श्रोत :
टेक पाना
