एडटेक अर्थात् शैक्षिक प्रविधि सम्बन्धी ‘राउन्डटेबल’ हुँदै, अनलाइनबाटै सहभागी हुन सकिने

काठमाडौँ । नेपालको शैक्षिक विकासमा नयाँ आयाम थप्ने उद्देश्यले नोट स्विफ्ट प्रालिले कञ्चनपुरमा ‘एड-टेक राउन्ड टेबल’ आयोजना गर्ने भएको छ । ‘फर दि फ्युचर अफ एजुकेसन इन नेपाल’ भन्ने मूल नाराका साथ २५ चैतका दिन कञ्चनपुरको महेन्द्रनगरमा यस्तो कार्यक्रम हुन लागेको हो ।

यो नै एडटेक सम्बन्धी नेपालकै पहिलो राउन्ड टेबल हुने दाबी आयोजकले गरेको छ । शनिवार आयोजित पत्रकार सम्मेलनमा नोट स्विफ्टले ग्रामीण शिक्षा प्रणालीमा विद्यमान चुनौतीहरू पहिचान गरी नवीन प्रविधिमैत्री समाधानहरू खोज्न यो राउन्ड टेबल आयोजना गर्न लागेको जानकारी दिएको छ ।

कार्यक्रममा नेपालभरका १० जना प्रतिष्ठित शिक्षाविद्हरूको सहभागिता रहने र त्यसले ग्रामीण क्षेत्रको शैक्षिक अवस्थामा सुधार ल्याउने विषयमा गहन छलफल गर्ने बताइएको छ । नोट स्विफ्टका संस्थापक विकास पाण्डेयले यो कार्यक्रम प्रत्यक्ष दर्शकबिना डिजिटल माध्यममा प्रसारण गरिने र यसले नीति निर्माताहरू र शिक्षा प्रवर्द्धकलाई शिक्षा क्षेत्रमा सकारात्मक परिवर्तन ल्याउन प्रेरित गर्ने लक्ष्य राखेको सुनाए ।

उनले नेपालको ग्रामीण शिक्षा प्रणाली प्रविधिबाट अछुतो रहेको र प्रविधिको सहायताले यी खाडलहरू पूर्ति गर्न सकिने बताए । “हाम्रो मुख्य उद्देश्य ग्रामीण क्षेत्रमा शिक्षाको पहुँच बढाउन र गुणस्तर सुधार गर्न प्रविधिको प्रयोगलाई प्रोत्साहन गर्नु हो,” पाण्डेयले भने, “यो राउन्ड टेबलले नीति निर्माता, शिक्षाविद, र प्रविधि विशेषज्ञहरूलाई एकसाथ ल्याएर शिक्षा क्षेत्रमा नवीन समाधानहरू खोज्न मद्दत गर्नेछ।”