काठमाडौं । नेपाली कांग्रेसका महामन्त्री गगन थापाले सूचना प्रविधि (आईटी) क्षेत्रमार्फत लाखौँ रुपैयाँ आम्दानी गर्न सकिने सम्भावना रहेको बताएका छन् । कीर्तिपुरको डाँडाबाट महिनामा दुई/चार लाख कमाउन सकिन्छ भन्ने आफ्नो अघिल्लो अभिव्यक्तिको सन्दर्भ स्मरण गराउँदै देशका अरू डाँडाहरूमा पनि त्यही सम्भावना दोहोरिन सक्ने उल्लेख गरे ।
“कीर्तिपुरको डाँडामात्र होइन, त्यस्ता थुप्रै डाँडाहरूमा साथीहरूले दुई/चार लाख रुपैयाँ कमाएको स्थिति हामी बनाउन सक्छौँ,’ उनले भने, ‘त्यो पोटेन्सियल हामीसँग छ । तर त्यसका लागि सोच्नुपर्छ । सोही दिशा तय गरेर काम गर्नुपर्छ ।”
शनिबार काठमाडौंमा आयोजित ‘एनसेल–बाह्रखरी गल्फ तथा आर्थिक परिसंवाद’ कार्यक्रममा बोल्दै थापाले आईटी क्षेत्रले आर्थिक संकटमा आशाको किरण देखाएको उल्लेख गरे ।
“नेपालले फिनटेकबाहेक अन्य क्षेत्रमा खासै प्रगति गर्न सकेको छैन,” उनले भने, “तर डिजिटल नेपाल फ्रेमवर्कलाई प्रभावकारी रुपमा लागु गर्न सके सूचना प्रविधि नै आर्थिक विकासको प्रमुख क्षेत्र बन्न सक्छ ।”
उनले आईटी शिक्षामा पाठ्यक्रम परिमार्जनको खाँचो औँल्याउँदै नेपालमा धेरै युवाले पढेको कुरा व्यवहारमा उपयोग नहुने स्थिति रहेको बताए । “नेपालमा आईटीमा पढेका ५० प्रतिशतले आफूले पढेको कोर्स काम नलाग्ने बताएका छन्,” उनले भने, “त्यसैले अब हामीले कोर्स परिमार्जन गर्ने, आवश्यक संरचनागत र नीतिगत सुधार ल्याउने समय आएको छ ।”
थापाले सरकार, निजी क्षेत्र र अन्य सरोकारवालाबीच सहकार्यको खाँचो पनि औंल्याए । “अब कसको भागको काम भन्ने होइन, जो जहाँ छ, त्यहाँबाट जिम्मेवारी निर्वाह गर्ने हो,” उनले भने, “यसलाई अवसरको रूपमा लिऔं, सहकार्य गरेर अघि बढौं ।”
आईटीसँगै सेवा र उत्पादन क्षेत्रलाई पनि समन्वय गर्दै अघि बढ्नुपर्नेमा उनले जोड दिए । उनले भने, “अबको ८/१० वर्षभित्र नेपाली युवाले देशमै बसेर राम्रो आम्दानी गर्ने वातावरण बन्न सक्छ, त्यो दिशा हामीले लिनैपर्छ ।”
थापाले विज्ञान र प्रविधिको क्षेत्रमा नेपालमा आवश्यक पोषण अर्थात् ‘न्युट्रिसन’को अभाव रहेको उल्लेख गरे । उनले भारतको ‘मेक इन इन्डिया’ अभियानले पनि अपेक्षित रोजगारी सिर्जना गर्न नसकेको भन्दै नेपालका लागि चुनौती अझै गम्भीर रहेको बताए । “हामीले यो सेक्टरका लागि आवश्यक न्युट्रिसन दिन सक्यौँ भने विश्वभर सेवा बिक्री गरेर देशको आम्दानीमा ठूलो योगदान गर्ने सेक्टर हो यो,” उनले भने ।
पछिल्लो अध्यावधिक: चैत २३, २०८१ २३:३६
सामाग्री श्रोत :
टेक पाना
