काठमाडौं । युट्युबले चाँडै नै आफ्नो शर्ट भिडिओ एडिटरमा नयाँ तथा एड्भान्स फिचर ल्याउने भएको छ । यो नयाँ एडिटरमा क्रियटरले जुम गर्ने, क्लिपलाई स्न्याप गर्ने, रि-अरेन्ज गर्ने र डिलिट गर्ने जस्ता सुविधा पाउनेछन् ।
यसबाट भिडिओ एडिटिङ पहिलेभन्दा निकै सटीक तथा सहज हुनेछ । अब प्रयोगकर्ताले भिडिओमा समयको आधारमा टेक्स्ट राख्न सक्नेछन् । साथै एडिटरभित्रै म्युजिक समेत समावेश गर्न सक्नेछन् । अहिलेसम्म यस्तो एडिटिङका लागि क्रियटरहरूले थर्ड पार्टी एपको सहारा लिनुपर्ने बाध्यता रहेको थियो ।
तर अब भने यो नयाँ फिचरले भरिपूर्ण इन-एप एडिटरले त्यस किसिमको निर्भरता कम गराउने अपेक्षा गरिएको छ । यस अलावा युट्युब शर्टसका लागि अन्य टुलहरू समेत जारी गरिने बताइएको छ, जसमा एआई स्टिकर समेत समावेश छन् ।
जसअनुसार प्रयोगकर्ताले अब चाँडै नै म्युजिकको बिटमा भिडिओ सिंक गर्न सक्नेछन् । थर्ड-पार्टी एपमा यो सुविधा पहिलेदेखि नै उपलब्ध भए पनि अब भने युट्युब शर्ट्स आफैँले यो फिचर दिनेछ ।
यसको सहयोगमा एडिटर आफैँले क्रियटरले छानेका भिडिओ क्लिपलाई म्युजिक बिट्सको साथमा स्वचालित तवरमा सिंक्रोनाइज गरिदिनेछ । नयाँ अपडेट पश्चात् प्रयोगकर्ताले कुनै पनि भिडिओमा आफ्नो फोनको ग्यालरीको कुनै पनि तस्विरलाई स्टिकरको रूपमा प्रयोग गर्न सक्नेछन् । यस अलावा टेक्स्ट प्रोम्टको माध्यमबाट पनि प्रयोगकर्ताले एआई स्टिकर बनाउन सक्नेछन् ।
पछिल्लो अध्यावधिक: चैत २३, २०८१ ९:१९
सामाग्री श्रोत :
टेक पाना
