पपुवा न्यु गिनीमा ६.९ म्याग्निच्युडको भूकम्प, सुनामीको चेतावनी

एजेन्सी –पपुवा न्यु गिनीको न्यु ब्रिटेन क्षेत्रको तटमा ६.९ म्याग्निच्युडको शक्तिशाली भूकम्प गएको छ । स्थानीय समय अनुसार शनिबार बिहान भूकम्प गएको हो । युरोपेली–भूमध्यसागरीय भूकम्प विज्ञान केन्द्र (ईएमएससी) ले यसबारे जानकारी दिएको छ ।

भूकम्पको केन्द्रबिन्दु किम्बे शहरबाट १९४ किलोमिटर पूर्वमा रहेको अमेरिकी भूगर्भ सर्वेक्षण (यूएसजीएस) ले उल्लेख गरेको छ ।

ईएमएससीका अनुसार भूकम्पको गहिराइ ४९ किलोमिटर रहेको छ । अमेरिकी सुनामी चेतावनी केन्द्रले पपुवा न्यु गिनीको तटीय क्षेत्रमा सुनामी लहर आउन सक्ने चेतावनी जारी गरेको छ । साथै, छिमेकी सोलोमन टापुहरूका लागि ३ मिटरसम्मको साना लहरहरूको चेतावनी पनि जारी गरिएको छ ।

भूकम्पबाट क्षतिको विवरण भने अहिले सम्म आएको छैन । तर किम्बे जस्ता नजिकैका क्षेत्रमा भूकम्पको धक्का महसुस गरिएको स्थानीय सञ्चारमाध्यमले जनाएका छन् । अधिकारीहरूले स्थिति नजिकबाट नियालिरहेको उल्लेख गर्दै थप जानकारी संकलन गरिरहेको जानकारी दिएका छन् ।