काठमाडौं । काठमाडौं महानगरपालिकाले महानगरभित्र बिक्री-वितरण गरिने कुकुर र बिरालोलाई अनिवार्य रूपमा माइक्रोचिप लगाउन आग्रह गरेको छ । बुधबार गोरखापत्रमा सूचना प्रकाशित जारी गर्दै महानगरले माइक्रोचिप लगाएर वडा कार्यालयमा दर्ता गर्न अनुरोध गरेको हो ।
महानगर अन्तर्गतको कृषि तथा पशुपन्छी विभागका प्रमुख नुरनिधि न्यौपानेले घरपालुवा जनावरहरूको सूचीकरणको लागि उक्त सूचना जारी गरिएको जानकारी दिए ।
कुकुर र बिरालोको घाटीमा माइक्रोचिप राखेपछि त्यसलाई विद्युतीय उपकरणको सहायताले पढ्न सकिन्छ । उक्त चिपबाट जनावरको मालिक, उमेर र स्वास्थ्य अवस्थासम्मका विवरण विद्युतीय डिभाइसको माध्यमबाट थाहा पाइन्छ ।
“घरपालुवा जनावरलाई सडकमा फाल्ने चलन सामान्य भएको छ । तर, जनावरलाई आफ्नो घरको सदस्य मानेर पाल्नु र त्यसको उचित हेरचाह गर्नु आवश्यक छ । यसका लागि माइक्रोचिप अनिवार्य गर्न लागिएको हो,” उनले भने ।
माइक्रोचिप लगाउँदा कुकुर र बिरालो चोरी वा हराउने सम्भावना कम हुने महानगरपालिकाको विश्वास छ ।
पछिल्लो अध्यावधिक: चैत २१, २०८१ १८:३८
सामाग्री श्रोत :
टेक पाना
