काठमाडौं । सरकारी सेवालाई नागरिकको पहुँचमा सहज बनाउने उद्देश्यले विकास गरिएको नागरिक एपमा झन्डै दुई दर्जन सेवा उपलब्ध छन् । यी सेवामध्ये पछिल्लो समय धेरै प्रयोग भइरहेको सेवा हो, डिजिटल लाइसेन्स । खासगरी नेपाली मोटोभ्लगरका भिडिओमा नागरिक एप ड्राइभिङ लाइसेन्सका लागि कति प्रभावकारी भइरहेको छ भन्ने कुरा देख्न सकिन्छ ।
सवारी नियम उल्लङ्घनमा नागरिक एपबाटै जरिवाना तिर्दा समस्या हुने गरेको केही प्रयोगकर्ता गुनासो छ । यद्यपि, चालक ड्राइभिङ लाइसेन्स धारक व्यक्ति हो भन्ने पहिचान गर्न ट्राफिक प्रहरीलाई नागरिक एप प्रभावकारी विकल्प बनेको छ ।
त्यसबाहेक, बैंक खाता खोल्न जाँदा नागरिक एपबाट बैंकले उपलब्ध गराएको क्यूआर कोड स्क्यान गरी डेटाको पहुँच प्रदान गरेमा बैंकका लागि आवश्यक पर्ने तपाईँको विवरण बैंकको प्रणालीमा पुग्छ । यसबाट बैंकलाई तपाईंको जानकारी प्रमाणीकरण गर्न सहज हुनुका साथै यो काम क्षणभरमै सकिन्छ ।
सबै प्रक्रिया पुगेमा नागरिक एपबाट प्यान नम्बर केही सेकेन्डमै तयार हुन्छ । प्यान नम्बर आवश्यक परेको समयमा एप खोली प्यानको अप्सनभित्र रहेको प्यान कार्डबाट ‘प्यान’ मा ट्याप गर्यो भने नम्बर कपी हुन्छ । र, तपाईंले त्यसलाई प्रयोग गर्न सक्नुहुन्छ ।
सिंहदरबार पास, नजिकका प्रहरी कार्यालयको जानकारी, प्रहरी रिपोर्ट, श्रम स्वीकृतिको कार्ड हेर्न पनि सकिन्छ । यी सेवाबाहेक नागरिकता, राष्ट्रिय परिचयपत्र, मतदाता परिचयपत्र आदि नागरिक एपबाटै हेर्न सकिन्छ ।
आगामी दिनमा एपबाटै श्रम स्वीकृति लिने व्यवस्था मिलाउन सूचना प्रविधि विभागले काम गरिरहेको छ । विभागले आफ्नो तर्फबाट सबै सिस्टम तयार भइसकेको दाबी गरेको छ भने अब यसमा श्रम मन्त्रालयको भूमिका आवश्यक छ ।
यदि तपाईं इन्टरनेटको पहुँचमा हुनुहुन्न भने एपको बटम बारमा रहेको डकुमेन्ट सेक्सनबाट ती कागजात अफलाइनमा पनि हेर्न सकिन्छ । तर, तपाईंले ती कागजात पहिले नै लिङ्क गरेको हुनुपर्छ । यी कागजात देखाएन र तपाईंले डेटा नै अन गर्नुपर्ने अवस्था आयो भने के गर्ने ? अनि तपाईंसँग प्याक पनि छैन भने झन् फसाद पर्ला ! त्यस्तोमा पनि चिन्ता लिनु पर्दैन ।
नागरिक एपले नेपाल टेलिकम र एनसेलसँग सहकार्य गरेर बिना डेटै नागरिक एप चल्ने बनाएको छ । नागरिक एपको व्यवस्थापक सूचना प्रविधि विभागका अनुसार यो फिचर तीन वर्ष अघिदेखि नै सुरु भएको हो । तर केही प्रयोगकर्तालाई नागरिक एप बिना डेटा नेपाल टेलिकम र एनसेलको नेटवर्कमा चल्छ भन्ने थाहा नहुन सक्छ । एनसेलको सधैं अन सेवा लिनुभएको छ भने तपाईंको ब्यालेन्स कट्दैन । तर, नेपाल टेलिकम प्रयोग गरिरहनु भएको ब्याकग्राउन्ड डेटा अफ गर्नुपर्ने हुन्छ ।
पछिल्लो अध्यावधिक: चैत १९, २०८१ १५:६
सामाग्री श्रोत :
टेक पाना
