भेरीगङ्गा (सुर्खेत)। कर्णाली प्रदेशसभाको दोस्रो कार्यकालको पाँचौँ अधिवेशनबाट सात वटा विधेयक पारित भएको छ। प्रदेशसभा सचिवालयका अनुसार हिउँदे अधिवेशनबाट विभिन्न सातवटा विधेयक पारित भएको हो।

कर्णाली प्रदेशको विद्युत् सम्बन्धमा व्यवस्था गर्न बनेको विधेयक, कर्णाली प्रदेश सवारी तथा यातायात सम्बन्धमा व्यवस्था गर्न बनेको विधेयक २०८१, आर्थिक कार्यविधि तथा वित्तीय उत्तरदायित्व सम्बन्धमा व्यवस्था गर्न बनेको विधेयक सभाबाट पारित भएको प्रदेशसभा सचिवालयका सचिव जीवराज बुढाथोकीले जानकारी दिए।

यस्तै, कर्णाली प्रदेश प्रहरी सेवा सम्बन्धमा व्यवस्था गर्न बनेको विधेयक, कर्णाली प्रदेश निजामती सेवा (पहिलो संशोधन) विद्येयक २०८१ दलित समुदायको सशक्तिकरण र जीवनस्तर प्रवर्द्धन गर्ने सम्बन्धमा व्यवस्था गर्न बनेको विधेयक र कर्णाली प्रदेश बीउ, बिजनसम्बन्धी व्यवस्था गर्न बनेको विधेयक पारित भएको बुढाथोकीले जानकारी दिए।

सरकारले कर्णाली प्रदेश खेलकुद विकास ऐन २०७६ लाई संशोधन गर्न बनेको विधेयक भने फिर्ता लिएको छ। केही अपुग रहेको भन्दै यो विधेयक फिर्ता लिइएको सरकारले जनाएको छ। योसँगै प्रदेशसभाको पाँचौँ अधिवेशन रातिदेखि अन्त्य गरिएको छ।

सभामुख नन्दा गुरूङले प्रदेश प्रमुखले पठाएको पत्र वाचन गर्दै अधिवेशन अन्त्य गरिएको घोषणा गरे। ‎‎पाँचौँ अधिवेशनको पहिलो बैठक माघ ७ गते बसेको थियो भने यो अधिवेशनमा ३१ वटा बैठक बसेका थिए।

काठमाडौं । एसिया प्यासिफिक टेलिकम्युनिटी वायरलेस ग्रुप (एडब्लूजी) को बैठक सोमबारदेखि राजधानीमा सुरु भएको छ । सञ्चार तथा सूचना प्रविधिमन्त्री पृथ्वीसुब्बाले गुरुङले राजधानीको होटल याक एन्ड यतिमा सो बैठकको उद्घाटन गरेका हुन् ।

४ अप्रिलसम्म चल्ने यो बैठक दक्षिण एसियामै पहिलो पटक आयोजना गरिएको हो । यो बैठक नेपालका लागि समेत स्पेक्ट्रम व्यवस्थापन र प्रविधिको उपयोगमा महत्त्वपूर्ण हुने मन्त्री गुरुङले बताए । “एपीटीबाट फ्रिक्वेन्सी इफिसेन्सी, फाइभजी सेवाको सुरुवात, स्याटलाइट, आईओटी, स्पेक्ट्रम इफिसेन्सी तथा हार्मोनाइजेसन र स्पेक्ट्रमको वैज्ञानिक प्रयोगको विषयमा नेपालले आवश्यक सुझावको अपेक्षा समेत गरेको छ,” उनले भने ।

कार्यक्रममा एपीटीका महासचिव मासानोरी कान्दोले यो बैठक वायरलेस सञ्चारका चुनौतीहरूमा केन्द्रित रहने बताए । “एपीटीका लागि स्पेक्ट्रम हार्मोनाइजेसन र डिजिटल कनेक्टिभिटी महत्त्वपूर्ण विषय हो,” उनले भने, “त्यसका साथै सिक्सजीलाई लिएर समेत छुट्टै वर्कशप आयोजना हुनेछ ।”

कार्यक्रममा सञ्चार तथा सूचना प्रविधि मन्त्रालयकी सचिव राधिका अर्यालले यो बैठक यस क्षेत्रका देशहरूले सामना गरिरहेका चुनौती र समाधानका लागि अपनाइरहेका उपायहरू आदानप्रदान गर्ने महत्त्वपूर्ण मञ्च हुने विश्वास व्यक्त गरिन् । “नेपालको भौगोलिक बनावटले गर्दा समेत वायरलेस सञ्चार नेपालका लागि निकै महत्त्वपूर्ण विषय हो,” उनले भनिन् ।

नेपाल सरकार नयाँ प्रविधि आत्मसाथ गर्ने सहजताका लागि दूरसञ्चार नीति, दूरसञ्चार ऐन र डिजिटल नेपाल फ्रेमवर्क लगायतमा समसामयिक परिमार्जनको क्रममा रहेको समेत सचिव अर्यालले सुनाइन् ।

नियामक नेपाल दूरसञ्चार प्राधिकरणका अध्यक्ष भूपेन्द्र भण्डारीले नेपालका मोबाइल सेवा प्रदायकले निरन्तर रूपमा आम्दानी गुमाउँदै गइरहेको भन्दै बैठक त्यसलाई सामना गर्न विश्व विज्ञहरूबाट सिक्ने अवसर समेत भएको चर्चा गरे ।

एपीटीको आयोजनामा सुरु भएको यो बैठकको व्यवस्थापन सञ्चार तथा सूचना प्रविधि मन्त्रालय र नेपाल दूरसञ्चार प्राधिकरणले संयुक्त रूपमा व्यवस्थापन गरिरहेका छन् । भौतिक र अनलाइन गरी हाइब्रिड मोडेलमा चलिरहेको कार्यक्रममा ३८ भन्दा बढी देशका ४०० हारहारीको सहभागिता रहेको छ ।

पछिल्लो अध्यावधिक: चैत १९, २०८१ १२:५३

काठमाडौं– नेपाल विद्युत् प्राधिकरणको कार्यकारी निर्देशकबाट हटाइएका कुलमान घिसिङ र नवनियुक्त हितेन्द्रदेव शाक्य दुवैको रिट हेर्दाहेर्दैमा राखिएको छ ।

सर्वोच्चका न्यायाधीशद्वय कुमार चुडाल र नित्यानन्द पाण्डेयको मंगलबारको इजलासमा दुवैका रिटमाथि सुनुवाइ भएको थियो ।

तर, सुनुवाइ नसकिएपछि दुवै रिट हेर्दाहेर्दैमा राखिएको छ । घिसिङ र शाक्यको रिटमा आइतबार पनि पेशी तोकिएको थियो । तर, सुनुवाइ हुन सकेको थिएन ।

घिसिङले आफ्नो पदाधिकार बाँकी छँदै सरकारले बदनियतपूर्वक हटाएको भन्दै थमौतीको अन्तरिम आदेश माग गर्दै रिट दायर गरेका हुन् ।

शाक्यले भने चार वर्षअघि आफूलाई निकालेर घिसिङको नियुक्ति नै गलत भएको भन्दै त्यतिबेला रिट दायर गरेका थिए । सो रिटमा कुनै निर्णय नभई चार वर्ष बितेपछि उनले हालको कुलमानको निवेदनमा सुनुवाइ गर्न नमिल्ने जिकिर गर्दै अर्को रिट दायर गरेका हुन् ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। राष्ट्रिय प्रजातन्त्र पार्टी (राप्रपा)ले आफ्नो पार्टीका वरिष्ठ नेता एवं प्रतिनिधिसभा सदस्य दीपक बोहराको निधनप्रति दुःख व्यक्त गर्दै तीन दिन शोक मनाउने भएको छ।

आज पार्टीको केन्द्रीय पदाधिकारीको आकस्मिक बसेको बैठकले वरिष्ठ नेता एवं प्रतिनिधिसभा सदस्य बोहराको निधनप्रति गहिरो दुःख व्यक्तसहित भावपूर्ण श्रद्धाञ्जली अर्पण गर्दै तीन दिन शोक मनाउने निर्णय गरेको सो पार्टीका प्रवक्ता एवं प्रचार विभाग प्रमुख मोहनकुमार श्रेष्ठले जानकारी दिए।

उनले भने, ‘वरिष्ठ नेता बोहराको निधनपश्चात आज बैठक बसीशोक प्रकट गर्न तीन दिन पार्टीको केन्द्रीय कार्यालय, जिल्ला र कमिटिगत कार्यालयमा पार्टीको झण्डा आधा झुकाउने तथा तीन दिन कुनै पनि औपचारिक कार्यक्रम नगर्ने निर्णय भएको हो।’

बैठकमा वरिष्ठ नेता बोहराको निधनबाट राप्रपा र नेपालको राष्ट्रवादी आन्दोलनलाई ठूलो क्षति पुगेको तथा राप्रपा निर्माणमा उनको योगदान सदैव स्मरण गरिने र पार्टीले शोकाकूल परिवारमा समवेदना प्रकट गरिएको प्रवक्ता श्रेष्ठले बताए।

यसैगरी वरिष्ठ नेता बोहराको पार्थिव शरीरलाई अन्तिम श्रद्धाञ्जलीका लागि भोलि चैत २० गते बुधबार दिउँसो २ बजेदेखि पार्टी केन्द्रीय कार्यालयमा राखिने र स्व बोहराको बुधबार नै पशुपति आर्यघाटमा अन्तिम संस्कार गरिने सो पार्टीले जनाएको छ।

काठमाडौं । निजी दूरसञ्चार सेवाप्रदायक एनसेलको ‘रिन्युअल सधैं अन’ प्याक प्रयोग गर्ने ग्राहकको संख्या दुई लाख कटेको छ । सामाजिक सञ्जालमा पोस्ट राख्दै कम्पनीले एक महिनामै यो आँकडा पूरा भएको जानकारी दिएको हो ।

‘सधैं ON Renewal परिवार दिनदिनै बढ्दै गइरहेको छ र हामी यहाँहरूलाई स्वागत गर्न पाउँदा अत्यन्तै उत्साहित छौं । आजसम्म परिवारमा दुई लाखभन्दा बढी ग्राहकहरू समावेश भइसक्नुभएको छ र हजुरलाई पनि यो परिवारमा स्वागत गर्न तयार भएर बसेका छौं,” एनसेलले भनेको छ । 

‘सधैं अन’ प्याकको सफलतापछि कम्पनीले रिन्युअल प्याक सञ्चालनमा ल्याएको हो । यस प्याकमार्फत कम्पनीका ग्राहकले महिनाभरका लागि आफ्नो बजेट अनुसार विभिन्न अनलिमिटेड सेवा लिन सक्छन् ।

यसको उद्देश्य तुलनात्मक रूपमा महँगो पर्ने ‘पे एज यु गो’ र बारम्बार लिनुपर्ने स-साना प्याकहरूमाथिको निर्भरता हटाएर सधैं अन अर्थात् कनेक्टेड रहन सक्षम बनाउनु रहेको कम्पनीले जनाएको छ ।

सधैं अन रिन्युअल प्याक हरेक महिना अर्थात् प्रत्येक ३० दिनमा नवीकरण हुने गर्छ । जसमा साधारण सधैं अन प्याकको (२८ दिन) को तुलनामा थप दुई दिन बढीको समयावधि रहेको छ ।

यी प्याकमा अनलिमिटेड युट्युब भिडिओ स्ट्रिमिङ र रातको समयमा इन्टरनेट ब्राउजिङ तथा विभिन्न सामग्रीहरू डाउनलोड गर्न अनलिमिटेड नाइट डेटाको सुविधा रहेको छ । केही प्याकमा महिनाभर अनलिमिटेड कल गर्न मिल्ने अल-नेपाल टक टाइमको सुविधा समेत छ । 

पछिल्लो अध्यावधिक: चैत १९, २०८१ १४:३८

बर्दिया— बारबर्दिया नगरपालिकाका प्रमुख प्रशासकीय अधिकृत दिपक आचार्यले कार्यालय समयमा मदिरा खाई अभद्र व्यवहार गरेको आरोपमा प्रहरीले मंगलबार नियन्त्रणमा लिएको छ । 

उनलाई मापसे जाँच गरी बेलुकी छाडेको जिल्ला प्रहरी कार्यालय, बर्दियाका सूचना अधिकारी एवं डीएसपी ऋषीराम घर्तीमगरले जनाए । 

मेयर छविलाल थारुले प्रशासकीय अधिकृत मापसे गरी उपमेयरको कक्षमा पुगेर अभद्र व्यवहार गरेपछि प्रहरीलाई बोलाएको बताए । 

उनलाई प्रहरीले पक्राउ गरी इलाका प्रहरी कार्यालय, जयनगरमा लगेको थियो । उनीमाथि विभागीय कारबाहीका लागि सम्बन्धित निकायमा पत्राचार गरिने बारबर्दिया नगरले जनाएको छ ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं रक्षा मन्त्रालय र नेपाली सेनाको सहकार्यमा यही चैत ३ गतेदेखि सैनिक कमाण्ड तथा स्टाफ कलेज शिवपुरीमा सञ्चालन भएको उच्चस्तरीय राष्ट्रिय सुरक्षा तालिम आज सम्पन्न भएको छ।

तालिममा विभिन्न मन्त्रालय, संवैधानिक निकाय, विश्वविद्यालय, सञ्चार जगत्, नेपाली सेना, नेपाल प्रहरी, सशस्त्र प्रहरी बल, नेपाल एवं राष्ट्रिय अनुसन्धान विभागबाट गरी २९ जना सम्मिलित थिए।

तालिमको समापन समारोहमा रक्षामन्त्री मानवीर राईले नेपालको संविधानले निर्देशित गरेको स्वतन्त्रता, भौगोलिक अखण्डता र राष्ट्रिय एकतालाई अक्षुण्ण राख्दै राष्ट्रिय सुरक्षा प्रणालीलाई विकास गर्नुपर्नेमा जोड दिए। उनले बहुजाति, धर्म, भाषा, संस्कृति र सम्प्रदायहरूमा पारस्परिक सद्भाव, सहिष्णुता र ऐक्यबद्धता कायम गर्दै सुरक्षा प्रणालीलाई सुदृढ गर्नुपर्ने आवश्यकता औँल्याए।

प्रधानसेनापति अशोकराज सिग्देलले यस किसिमको तालिमबाट राष्ट्रिय सुरक्षाका क्षेत्रमा विभिन्न निकायबीच सहकार्य र समन्वय भई एकीकृत प्रयासमा साझा धारणा निर्माण हुने उल्लेख गरे। उनले तालिमबाट सुरक्षा नीतिहरूको सफल कार्यान्वयन गर्न गराउन महत्वपूर्ण भूमिका निर्वाह हुने विश्वास व्यक्त गरे।

सैनिक कमाण्ड तथा स्टाफ कलेजका शिक्षाध्यक्ष उपरथी चोकबहादुर ढकालको स्वागत मन्तव्यबाट सुरु भएको समापन समारोहमा पूर्व प्रदेश प्रमुख, पूर्वप्रधानसेनापति, विभिन्न मन्त्रालयका सचिव, बलाधिकृत रथी, बलाध्यक्ष रथी, रथीवृन्द, अन्य सुरक्षा निकायका प्रतिनिधिहरू, अधिकृत तथा सञ्चारकर्मीहरूको उपस्थिति रहेको थियो।

तालिमका क्रममा चैत १४ गते राज्य सञ्चालनमा सू–शासनका संयन्त्रहरू र नेपालको वर्तमान अवस्था विषयक राष्ट्रियस्तरको एक दिवसीय उच्चस्तरीय सेमिनारसमेत सञ्चालन गरिएको थियो। राष्ट्रिय सुरक्षा र बृहत्तर राष्ट्रिय हितका आयामहरूबारे ज्ञान र बुझाइमा एकरुपता कायम होस् भन्ने उद्देश्यले विसं २०७२ देखि सुरु भएको यस तालिमबाट हालसम्म २५२ जना प्रशिक्षित भइसकेका छन्।

काठमाडौं । नेपाल क्लियरिङ हाउस लिमिटेड (एनसीएचएल) ले सोमबारदेखि नेपाल पेमेन्ट स्विच अन्तर्गत ‘नेपाल पे कार्ड’ सञ्चालनमा ल्याएको छ । यो नेपालको आफ्नै भुक्तानी कार्ड प्रणाली हो, जसले बैंक तथा ग्राहक दुवैका लागि खर्च कम गर्ने र कारोबारलाई द्रुत तथा सुरक्षित बनाउने उद्देश्य राखेको छ ।

नेपाल राष्ट्र बैंकको आफ्नै भुक्तानी प्रणाली विकास गर्ने रणनीति अनुसार एनसीएचएलले नेपाल पे कार्डको सुरुवात गरेको हो । विभिन्न चरणका छलफल र स्वीकृतिपछि राष्ट्र बैंकले एनसीएचएललाई यसको कार्यान्वयनको जिम्मेवारी दिएको थियो । आवश्यक पूर्वाधार तयारी पूरा भइसकेपछि बैंक तथा वित्तीय संस्थाहरूको स्विच इन्टिग्रेसनको कार्य अघि बढ्ने बताइएको छ । 

के हो डोमेस्टिक कार्ड स्किम (नेपाल पे कार्ड)

एटीएममा पैसा झिक्न जाँदा सम्पूर्ण विवरण प्रविष्ट गरिसकेपछि पैसा निस्किन केही समय लाग्छ । त्यो समय के को लागेको होला ? हाल नेपालका बैंक तथा वित्तीय संस्थाहरूले अन्तर्राष्ट्रिय कार्ड उपलब्ध गराइरहेका छन् । यसले गर्दा तपाईं एटीएममा गएर पैसा झिक्दा केही समय लाग्छ अन्तर्राष्ट्रिय डेटा राउटिङका कारण ।

अर्थात् तपाईंले पैसा प्राप्त गर्नुभन्दा अगाडिको जुन ५-६ सेकेन्ड समय छ, त्यो समयमा तपाईंले प्रविष्ट गरेको डेटा तपाईंको बैंक हुँदै तपाईंले बोकेको कार्डको डेटा सर्भर भएको देशसम्म पुगेर फर्कन्छ । जसले गर्दा पैसा निस्किन समय लाग्छ । यो प्रक्रिया अन्तर्राष्ट्रिय कार्ड स्किमभित्र पर्दछ ।

अब यही प्रक्रियालाई डोमेस्टिक कार्ड स्किमको रूपमा बुझ्दा, हामीले एटीएममा गएर आफ्नो विवरण प्रविष्ट गरिसकेपछि जुन डेटा विदेश घुमेर आउँथ्यो, अब त्यो नेपालभित्रै एनसीएचएलको सर्भरमा घुम्नेछ ।

अर्थात्, नेपालको डेटा नेपालमै रहनेछ । अर्को कुरा, यो स्किम अन्तर्गत तपाईंले कुनै एउटा बैंकको एटीएम अन्य बैंकको एटीएमहरूमा पनि प्रयोग गर्न सक्नुहुनेछ । जसरी अहिले आफ्नो बैंकको कार्ड अन्य बैंकको एटीएममा पनि प्रयोग गरिरहनु भएको छ । सोही अनुरूप यो कार्ड पनि सम्पूर्ण नेपाली बैंकहरूको नेटवर्कमा काम गर्नेछ । त्यसैले पनि यसलाई डोमेस्टिक कार्ड स्किम भनिन्छ ।

यस प्रणालीको महत्त्वपूर्ण पक्ष भनेको, यसअन्तर्गत हुने कारोबारको डेटा स्थानीय स्तरमै नियन्त्रण हुनु हो । यही अवधारणा अनुरूप नेपाल पे कार्ड तयार गरिएको हो । राउटिङ, क्लियरिङ र सेटलमेन्ट नेपालभित्र नै हुनेछ । यसलाई विश्वस्तरमा हेर्ने हो भने हाल छिमेकी देश भारतसँगै विश्वका विभिन्न देशले अन्तर्राष्ट्रिय कारोबारको सुविधासहित डोमेस्टिक कार्ड स्किम सञ्चालन गरिरहेका छन् ।

नेपाल पे कार्डले केके काम गर्छ ? 

अहिले हामीले जसरी हाम्रो बैंकहरूबाट डेबिट वा क्रेडिट कार्ड पाउँछौं, त्यसैगरी नेपाल पे कार्ड पनि डेबिट, क्रेडिट, प्रिपेड र भर्चुअल कार्डका रूपमा उपलब्ध हुनेछ । यसमा अनलाइन भुक्तानीदेखि लिएर अन्तरआबद्ध भएका बैंकको एटीएमबाट पैसा झिक्न पनि मिल्नेछ ।

हाल यो सुरुवाती चरणमा नै भएकाले, देशभित्र मात्र यो कार्ड प्रयोग गर्न सकिनेछ । तर, यसलाई अन्तर्राष्ट्रिय स्तरमा पनि प्रयोगमा ल्याउनका लागि काम भइरहेको एनसीएचएलका कार्यकारी अध्यक्ष निलेशमान सिंह प्रधान बताउँछन् । यस्तै, छिट्टै नै नेपाल पे डलर कार्डका लागि पनि काम भइरहेको उनको भनाइ छ । 

कुनकुन बैंकमा उपलब्ध छ ? 

सोमबार नेपाल पे कार्ड सञ्चालन गर्नका लागि एनसीएचएलले नौ ओटा विभिन्न बैंकहरूसँग सम्झौता गरेको छ । एनसीएचएलले सिटिजन्स बैंक, गुडविल फाइनान्स लिमिटेड, हिमालयन बैंक, माछापुच्छ्रे बैंक, मुक्तिनाथ विकास बैंक, एनएमबी बैंक, प्रभु बैंक, सांग्रिला डेभलपमेन्ट बैंक र सिद्धार्थ बैंकसँग नेपाल पे कार्डको सञ्चालन सम्बन्धी सम्झौतामा हस्ताक्षर गरेको छ ।

यीमध्ये हिमालयन बैंकले भने सोमबारदेखि नै एटीएम वितरण सुरु गरेको छ । यसको अर्थ हो, अब विस्तारै हिमालयन बैंकले आफ्ना ग्राहकलाई नेपाल पे कार्ड उपलब्ध गराउनेछ । तर, बैंकहरू नेपाल पे कार्डमा स्विच नभइसक्दाको हकमा पनि ग्राहकले हाल प्रयोग गरिरहेको कार्डको डेटालाई नेपाल पेमेन्ट स्विचमार्फत नै सञ्चालन गर्न सकिने कम्पनीको भनाइ छ ।

पछिल्लो अध्यावधिक: चैत १९, २०८१ १८:२५

काठमाडौं– हाल प्रदर्शनरत चलचित्र ‘लाज शरणम’ मा महत्वपूर्ण भूमिका निभाएका १५ वर्षीय बालक विकास केसीको कुपोषणबाट निधन भएको छ । उनले चलचित्रमा पनि कुपोषित बालककै भूमिकामा अभिनय गरेका थिए ।

विकास वास्तविक जीवनमै पनि कुपोषणबाट ग्रसित थिए । चलचित्रको सुटिङपछि तत्काल निर्माण पक्षले उनलाई उपचारका लागि ग्रीन सिटी अस्पताल ल्याएको थियो ।

सो अस्पतालले कान्ति बाल अस्पताल रिफर गर्यो । कान्ति बाल अस्पतालले जटिल खालको कुपोषणको उपचार सम्भव भएको जनाउँदै फिर्ता गरेको थियो ।

सुटिङ समयमा विकासको स्याहार र परिवारको सहजताका लागि खानेकुरा, लत्ता कपडा र सञ्चारका लागि मोबाइल उपलब्ध गराइएको कलाकार अर्जुन घिमिरे पाँडेले बताए ।

निर्माण पक्षसँग उनलाई भेट गराउने, उपचारका लागि ल्याउने–लैजानेसहित पारिवारिक दायित्व निर्वाह गीतकार–संगीतकार वसन्त उदासले गरेका थिए ।

वि. सं. २०६६ साल साउन १ गते जन्मेका विकासको आज निधन भएको घिमिरेले जानकारी गराए । उपचार सम्भव नभएपछि विकासलाई कर्णाली फर्काइएको थियो । घरमै उनको निधन भएको खबर आएको घिमिरेले जानकारी दिए । उनको परिवारमा बुवा, आमा दिदी र भाइ छन् । भाइ पनि कुपोषित छन् ।
कर्णालीमा ५२ हजार बालबालिका कुपोषणबाट पीडित छन् ।

लाजशरणमा कर्णालीको दुखलाई चित्रण गरिएको चलचित्र हो । एक महिना अगाडि प्रदर्शनमा आएको चलचित्र अहिले पनि हलहरुमा चलिरहेको छ ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।