काठमाडौं । गत १५ चैतमा राजधानीको तीनकुनेमा राजावादी समर्थकले गरेको प्रदर्शनका क्रममा भएको झडपसँग सम्बन्धित भ्रामक फोटो, भिडिओ तथा समाचारहरू सामाजिक सञ्जालमा फैलिएको भन्दै नेपाल प्रहरीले आपत्ति जनाएको छ । सोमबार जिल्ला प्रहरी परिसर, काठमाडौँका सूचना अधिकारी प्रहरी उपरीक्षक अपिलराज बोहोराको हस्ताक्षरमा जारी विज्ञप्तिमा अफवाह नफैलाउन आग्रह गरिएको हो ।
“१५ चैतमा दुर्गा प्रसाईं लगायतका समूहले तीनकुनेमा आयोजना गरेको कार्यक्रममा भएको तोडफोड, आगजनी, लुटपाट र प्रहरी कारबाहीका सम्बन्धमा यस परिसर तथा तालुक कार्यालयबाट समेत छानबिन तथा अनुसन्धान भइरहेको सन्दर्भमा कतिपय सामाजिक सञ्जालमा विभिन्न अनर्गल फोटो, भिडिओ र समाचारको प्रकाशनले यस कार्यालयको गम्भीर ध्यानाकर्षण भएको छ,” विज्ञप्तिमा उल्लेख छ ।
प्रहरीले यस्ता प्रचारप्रसारले जनमानसमा अन्योल र गलत धारणा सिर्जना गर्न सक्ने भन्दै जिम्मेवार बन्न आग्रह गरेको छ । यसैबिच अनुसन्धानमा सहयोग पुग्ने सूचना, फोटो वा भिडिओ भए जिल्ला प्रहरी परिसर, काठमाडौँको आधिकारिक फेसबुक पेज वा ईमेल [[email protected]] मा उपलब्ध गराउन वा प्रवक्ताको सम्पर्क नम्बर ९८५११२६९८३ मा जानकारी दिन आग्रह गरिएको छ ।
पछिल्लो अध्यावधिक: चैत १९, २०८१ १०:५४
सामाग्री श्रोत :
टेक पाना
