काठमाडौं – जडीबुटी उत्पादन तथा प्रशोधन कम्पनी लिमिटेड नेपालका उत्पादनलाई विश्वमा नै चिनाउने कम्पनी हो। कम्पनीले उत्पादन गर्दै आएको सञ्चो नेपाली बजारमा लोकप्रिय हुनुका साथै विदेशमा पनि निर्यात हुँदै आएको छ। मुलुककै गर्वका रुपमा रहेको उक्त कम्पनीमा गत शुक्रबार राजावादी समर्थकहरुले तोडफोड तथा आगजनी गर्दा करिब २८ करोड बराबरको क्षति भएको प्रारम्भिक विवरण निकालिएको छ। आगजनीबाट केन्द्रका १३ वटा गाडी, ६ वटा मोटसाइकल, लाखौंको पर्ने तयारी औषधि तथा कच्चापदार्थमा समेत जलेर नष्ट भएका थिए। कम्पनीका महाप्रबन्धक संगीता यादवका अनुसार विश्व स्वास्थ्य संगठनको मापदण्ड अनुसारको असल उत्पादन अभ्यास (जीएमपी)मा आधारित भवन तथा सञ्चो बनाउने अत्याधुनिक मेसिनमा क्षति पुग्दा हाल उत्पादन कार्य अगाडि बढ्न सकेको छैन। ल्याबमा तथा प्रशासनिक भवनमा क्षति पुग्दा हालसम्म उत्पादन कार्य अगाडि बढ्न नसकेको महाप्रबन्धक यादवको भनाइ छ। ‘उत्पादन रोक्न हुँदैन भनेर हामीले फेरि सुरु गर्ने योजना त बनाएका छौं, त्यसका लागि अल्पकालीन तथा दीर्घकालीन योजना बनाएर जसरी पनि उत्पादनलाई बजारमा ल्याउने तयारी तर्फ लागेका छौं, ‘उनले भनिन् सरकारलाई क्षतिबारे प्रारम्भिक विवरण बुझाइसकेका छौं, चाँडै सहयोग पाउनेमा विश्वस्त छु।’२०३८ सालमा स्थापना भएको उक्त कम्पनीले सञ्चो, सञ्चोबाम, बाम तेल, सञ्चो जटा केश तेल, सञ्चो पेन रिलिफ ओयल लगायतका उत्पादन बजारमा ल्याइरहेको छ। यीमध्ये सञ्चो प्रख्यात र बजारले रुचाएको उत्पादन हो। कम्पनीको लोकप्रिय सञ्चो उत्पादनले मात्रै वार्षिक ६० लाख बराबर आर्जन गर्दै आइरहेको थियो। महाप्रबन्धक यादवका अनुसार हाल कम्पनीले ५ र १० मिलिलिटरमा सञ्चो बजारमा आउने गरेको छ। कम्पनीले बच्चाहरुका लागि सञ्चो बाम निकाल्दै आएको छ। कपाल झर्ने समस्यालाई कम गर्नका लागि सञ्चो जटा तेल उत्पादन गर्दै आइरहेको छ। उनले थपिन्–‘यसै साता सन्चो मह नामक नयाँ उत्पादन बजारमा ल्याउने तयारी थियो, उत्पादन र प्याकिङको काम पनि भइसकेको छ, लन्च गर्न बाँकी थियो, आकस्मिक रुपमा दुर्घटना हुन पुग्यो।’नेपाल सरकारको कम्पनी भएपनि जडीबुटी उत्पादन प्रशोधन कम्पनी लिमिटेड ऐनअनुसार कम्पनी सञ्चालनमा छ। यो आफैं कमाएर पालिने संस्था हो। कम्पनीमा स्थायी, करार तथा ज्यालादारीमा कर्मचारी कार्यरत छन्। सरकारले कम्पनीलाई पुन सञ्चालनमा ल्याउनका लागि अल्पकालीन तथा दीर्घकालीन दुवै योजना बनाएर अगाडि बढ्नुपर्ने उनको सुझाव छ। बजारमा तत्कालै कम्पनीका उत्पादन ल्याउन नसकेको अवस्थामा विदेशी कम्पनीको उत्पादन बजारमा आउनसक्ने उनी बताउँछिन्। कम्पनीका उत्पादनलाई जतिसक्दो चाँडो बजारमा ल्याउन सके देश, जनता तथा कम्पनीलाई समेत त्यसले लाभ दिने उनको तर्क छ। सबैको सामुहिक प्रयासले कम्पनीलाई लागेको घाउ निको गराउन सकिनेमा उनी आशावादी छन्।
सामाग्री श्रोत :
swasthyakhabar
