काठमाडौं । नेपालमा प्रोटोनको पहिलो विद्युतीय गाडी ‘प्रोटोन ई.मास ७’ (Proton e.MAS7) सार्वजनिक भएको छ । शुक्रबार आयोजित एक समारोहमा जगदम्बा मोटर्सले यो गाडी नेपाली बजारमा ल्याएको घोषणा गरेको हो ।
डिसेम्बर २०२४ मा मलेसियामा सार्वजनिक भएपछि नेपालमा पनि यसको प्रतीक्षा गरिएको थियो । कम्पनीका अनुसार प्रोटोन ई.मास ७ मा नवीनतम प्रविधि र फाइभ-स्टार सेफ्टी फिचर समावेश छन् ।
यो इलेक्ट्रिक गाडी प्लाटिनम सिल्भर, टर्क्वाइज ग्रीन, स्लेट ग्रे, क्वार्ट्ज रोज, मोयु ब्ल्याक र लिथियम ह्वाइट गरी ६ विभिन्न रंगमा उपलब्ध छ ।
गाडीमा ग्लोबल मोडुलर आर्किटेक्चर (जीएमए) प्लेटफर्म, १२-इन-१ इन्टेलिजेन्ट इलेक्ट्रिक प्रोपल्सन सिस्टम, सेल-टु-बडी (सीटीबी) ब्याट्री आर्किटेक्चर र एजिस सर्ट-ब्लेड ब्याट्री प्रविधि समावेश छन् । १६० किलोवाट मोटर पावर रहेको गाडीमा ३२० एनएम टर्क छ, जसले ६.९ सेकेन्डमा शून्यदेखि १०० किलोमिटर प्रतिघण्टाको गति लिन सक्छ ।
प्रोटोन ई.मास ७ नेपाली बजारमा प्राइम र प्रिमियम गरी दुई भेरियन्टमा उपलब्ध छ । प्राइम मोडेलले एक पटकको चार्जमा ३४५ किलोमिटर रेञ्ज प्रदान गर्छ भने यसमा ४९.५२ किलोवाट आवरको ब्याट्री रहेको छ ।
प्रिमियम मोडेलले एक पटकको फुल चार्जमा ४१० किलोमिटर रेञ्ज दिने दाबी गरिएको छ, जसमा ६०.२२ किलोवाट आवरको ब्याट्री छ । गाडीले डीसी फास्ट चार्जिङलाई सपोर्ट गर्छ, जसअनुसार २० मिनेटमा ३० देखि ८० प्रतिशतसम्म चार्ज गर्न सकिन्छ भने १० मिनेटको चार्जमा १३५ किलोमिटर रेञ्ज थप्न सकिन्छ ।
गाडीमा भेन्टिलेटेड सिट, स्टोरेज कम्पार्टमेन्ट, १६ ओटा स्पीकरसहितको साउन्ड वेभ सिस्टम, २५६-कलर एम्बियन्ट लाइटिङ र १५.४ इन्चको टचस्क्रिन डिस्प्ले रहेको छ ।
जगदम्बा मोटर्सका प्रबन्ध निर्देशक साहिल अग्रवालले प्रोटोन ई.मास ७ नेपालमा ल्याउन पाउँदा उत्साहित भएको बताए । उनले नेपाली ग्राहकहरूको अपेक्षा पूरा गर्ने र सरकारको स्वच्छ ऊर्जा नीतिलाई समर्थन गर्ने लक्ष्य रहेको उल्लेख गरे ।
कम्पनीले यो विद्युतीय गाडी खरिद गर्न चाहने ग्राहकका लागि ४.९९ प्रतिशत ब्याजदरमा फाइनान्स सुविधा, न्यूनतम किस्तामा खरिद विकल्प, एक वर्षको सडक कर छुट, निःशुल्क चार्जिङ प्याक, ६ वर्षको वारेन्टी तथा सुरुवाती १०० ग्राहकलाई ५० हजार रुपैयाँ बराबरको उपहार प्रदान गर्ने योजना ल्याएको छ ।
प्रोटोन ई.मास ७ को मूल्य प्राइम मोडेलका लागि ५६ लाख ९९ हजार रुपैयाँ र प्रिमियम मोडेलका लागि ६७ लाख ९९ हजार रुपैयाँ तोकिएको छ । कम्पनीले देशभर चार्जिङ स्टेसन विस्तार गर्ने र सर्भिस सेन्टरको सञ्जाल बनाउने योजना पनि बनाएको छ ।
पछिल्लो अध्यावधिक: चैत ९, २०८१ ९:३८
सामाग्री श्रोत :
टेक पाना
