आफ्नो लागि आफैं बनाउनुहोस् शक्तिशाली कम्प्युटर, यस्ता छन् आवश्यक पार्टपुर्जा

काठमाडौँ । यदि तपाईं आफ्नो आवश्यकताअनुसारको शक्तिशाली कम्प्युटर (पीसी) बनाउने सोचमा हुनुहुन्छ भने यो सामग्री तपाईंको लागि उपयोगी हुन सक्छ । चाहे तपाईं गेमिङको सौखिन हुनुहोस् वा व्यावसायिक भिडिओ एडिटिङ जस्ता काम गर्नुहुन्छ, सही पार्टपुर्जाको छनोटले तपाईंको अनुभवलाई उत्कृष्ट बनाउन सक्छ ।

टेकपानाले आफ्नो कार्यालयको लागि एउटा यस्तै शक्तिशाली र बहुउपयोगी पीसी बिल्ड गरेको छ । काठमाडौंको न्युरोडस्थित ‘हुकुट स्टोर’को सहकार्यमा निर्माण गरिएको यो पीसीले गेमिङदेखि फोरके भिडिओ एडिटिङसम्मका काम सहजै गर्न सक्छ । आउनुहोस्, यो पीसी निर्माणमा प्रयोग भएका पार्टपुर्जा र तिनको विशेषता बारे विस्तृतमा जानौँ:

पीसी निर्माणका लागि छानिएका पार्टपुर्जा

१. प्रोसेसर (सीपीयू):

पीसीको मुटु मानिने प्रोसेसरका लागि ‘Intel Core Ultra 7’ मोडल छानिएको छ । विशेषज्ञका अनुसार, यो प्रोसेसर गेमिङ र भिडिओ एडिटिङ जस्ता कार्यका लागि उत्कृष्ट प्रदर्शन दिन सक्षम छ । यसमा तापक्रम व्यवस्थापन (Thermal Management) पनि राम्रो भएकाले लामो समयसम्म काम गर्दा पनि पीसी तात्ने समस्या कम हुन्छ ।

२. ग्राफिक्स कार्ड (जीपीयू):

उत्कृष्ट ग्राफिक्स र गेमिङ अनुभवका लागि ‘Gigabyte GeForce RTX 5070’ ग्राफिक्स कार्ड प्रयोग गरिएको छ । यसमा ४०-सिरिजको तुलनामा ५०-सिरिजमा डीएलएसएस फोर, रे ट्रेसिङ र फ्रेम जेनेरेसन जस्ता नयाँ प्रविधि छन्, जसले लगभग उस्तै मूल्यमा राम्रो प्रदर्शन दिने हुकुटका प्राविधिकले जानकारी दिए ।

३. मदरबोर्ड:

सबै पार्टपुर्जालाई जोड्ने मुख्य आधार मदरबोर्डका लागि ‘Gigabyte Z890 Eagle WiFi 7’ रोजिएको छ । यो मदरबोर्ड अल्ट्रा सेभेन प्रोसेसरसँग पूर्ण रूपमा मिल्ने (कम्प्याटिबल) र भविष्यमा आउने नयाँ प्रविधिका लागि पनि तयार (फ्युचर प्रुफ) छ । यसमा वाईफाई-सेभेनको सुविधा पनि उपलब्ध छ ।

४. र्‍याम र एसएसडी:

मल्टीटास्किङ र छिटो कार्यसम्पादनका लागि 32GB (16GBx2) DDR5 V-Color र्‍याम जडान गरिएको छ । यसको स्पिड ६८०० मेगाहर्ज रहेको छ । स्टोरेजका लागि 1TB Lexar NVMe SSD प्रयोग गरिएको छ, जसले फाइलहरू खोल्न र लोड हुन लाग्ने समयलाई निकै कम गर्छ ।

५. लिक्विड कुलर (Liquid Cooler):

पीसीलाई चिसो राख्न र आकर्षक देखाउन ‘ASUS Prime LC 360 ARGB’ लिक्विड कुलर जडान गरिएको छ । तीन ओटा फ्यान भएको यो कुलरले उच्च क्षमतामा काम गर्दा पनि प्रोसेसरलाई तात्ने समस्याबाट जोगाउँछ ।

६. पावर सप्लाई (PSU):

सबै पार्टपुर्जालाई स्थिर बिजुली आपूर्ति गर्न ‘Thermaltake Toughpower GF 850W’ (80 Plus Gold) पावर सप्लाई प्रयोग गरिएको छ । यो शक्तिशाली बिल्डका लागि ८५० वाट न्यूनतम आवश्यक मानिन्छ । यसमा १० वर्षको वारेन्टीसमेत उपलब्ध छ ।

७. केसिङ (Casing):

यी सबै पार्टपुर्जालाई आकर्षक र सुरक्षित राख्न ‘Acegeek Mercury R425 Pro’ केसिङ छानिएको छ, जसमा आरजीबी फ्यानहरूले यसलाई थप आकर्षक बनाएको छ ।

पर्फर्मेन्स र परीक्षण के पाइयो ?

पीसी तयार भएपछि यसको परीक्षण गर्दा उत्कृष्ट नतिजा देखिएको थियो । पब्जी र गड अफ वार जस्ता गेमहरू उच्च सेटिङ्समा खेल्दा २०० भन्दा माथि एफपीएस  प्राप्त भयो । यसले गेमिङ अनुभवलाई निकै सहज बनायो । त्यस्तै, एडोबी प्रिमियर प्रोमा १० मिनेट लामो फोरके भिडिओलाई रेन्डर (Export) गर्दा मात्र २ मिनेट १० सेकेन्डको समय लाग्यो ।

मूल्य र उपलब्धता

हुकुट स्टोरका अनुसार, यी सबै पार्टपुर्जासहितको पीसीको आधिकारिक मूल्य रु. ३,००,००० रहेको छ । तर, टेकपानाका दर्शकका लागि विशेष छुटको व्यवस्था गरिएको छ । ‘TechPana25000’ प्रोमो कोड प्रयोग गर्दा यो पीसी रु. २,७५,००० मा प्राप्त गर्न सकिनेछ ।

हुकुट गिगाबाइट र थर्मलटेलको आधिकारिक वितरक भएकाले मदरबोर्ड र ग्राफिक्स कार्डमा तीन वर्ष तथा पावर सप्लाईमा १० वर्षको वारेन्टी पाइनेछ । साथै, हुकुटले लाइफटाइम फ्री सर्भिसिङको सुविधा पनि प्रदान गर्ने बताएको छ । 

हेर्नुहोस् भिडिओ

पछिल्लो अध्यावधिक: असार १४, २०८२ १७:६