एसईई नतिजापछि हौसिए ओली- ‘मेरै पहलमा डेढ लाख विद्यार्थीलाई निःशुल्क अनलाइन पढाइएको थियो’

काठमाडौं । २०८१ को माध्यमिक शिक्षा परीक्षा (एसईई) को नतिजामा ६१.८१ प्रतिशत विद्यार्थी उत्तीर्ण भएपछि प्रधानमन्त्री केपी शर्मा ओली हौसिएका छन् । शनिबार प्रतिनिधि सभा बैठकलाई सम्बोधन गर्दै प्रधानमन्त्री ओलीले विगतको वर्षभन्दा नतिजामा १४ प्रतिशत वृद्धि भएकोमा खुसी व्यक्त गरे । 

“यसै सदनबाट भनेको थिएँ मैले, यसपल्ट ६० प्रतिशतभन्दा बढी पुऱ्याइनेछ । सबैको सहयोग भयो भने ७० प्रतिशतसम्म पनि पुऱ्याउने सम्भावना हुन्छ,” उनले भने ।

उनले आफ्नो व्यक्तिगत पहल र आग्रहमा डेढ लाख विद्यार्थीलाई निःशुल्क अनलाइन कक्षा सञ्चालन गराएको पनि सुनाए । “व्यक्तिगत रुपमा मैले आग्रह गरेर डेढ लाख विद्यार्थीहरुलाई निःशुल्क अनलाइन पढाइएको छ । मैले भनेको थिएँ कि यस कुराले सकारात्मक प्रभाव पार्छ नै,” उनले भने ।

उनले यो अभियानमा २५० भन्दा बढी युवा शिक्षक र प्राविधिकहरूले स्वयंसेवी रूपमा काम गरेको जानकारी दिए । अभियानमा शिक्षक र मेन्टरहरूले ल्यापटप र मोबाइलको प्रयोग गरेको तथा फोरजी सेवा नपुगेका ठाउँमा नेपाल दूरसञ्चार (नेपाल टेलिकम)ले इन्टरनेट सेवा पुऱ्याएर सहयोग गरेको समेत उल्लेख गरे ।

नतिजा प्रकाशनपछि कतिपयले अंक थपेर पास गराइएको भन्दै गरेको टिप्पणीप्रति आक्रोश व्यक्त गर्दै प्रधानमन्त्री ओलीले त्यस्ता आरोपले विद्यार्थीको मेहनतको अपमान गरेको धारणा राखे । “विद्यार्थीहरुले मेहनत गरेर यो नतिजा ल्याएका छन् । म सबैलाई ढुक्क हुन आग्रह गर्न चाहन्छु,” उनले भने, “यस नतिजालाई, विद्यार्थीको मेहनतलाई अपमान नगर्न म आग्रह गर्न चाहन्छु ।”

सम्बोधनका क्रममा प्रधानमन्त्री ओलीले यो निःशुल्क अनलाइन कक्षाको कार्यक्रमलाई निरन्तरता दिने घोषणा समेत गरे । उनले भने, “यो सेवा मौका परीक्षा दिनेहरुका लागि भोलिबाटै सुरु हुनेछ । र अर्को वर्षको एसईईको लागि तुरुन्तै सुरु हुनेछ ।” उनले आगामी वर्ष एसईईको नतिजा ६५ देखि ७० प्रतिशत पुऱ्याउने लक्ष्य राखेको समेत बताए ।

पछिल्लो अध्यावधिक: असार १४, २०८२ १३:५९