काठमाडौँ । एप्पलले सोमबार आफ्नो वार्षिक वर्ल्डवाइड डेभलपर्स कन्फरेन्समा आईओएस २६, वाचओएस २६ देखि केही नयाँ आर्टिफिसियल इन्टेलिजेन्स फिचरहरू घोषणा गर्यो । तर, यस घोषणासँगै प्रतिस्पर्धी सामसङले एप्पललाई गिज्याएको छ ।
एप्पलले अहिले ल्याएका फिचर आफ्ना डिभाइसमा पहिलेदेखि नै रहेको भन्दै सामसङ मोबाइलको अमेरिकी शाखाले सामाजिक सञ्जाल एक्समा एकपछि अर्को पोस्ट राखेको छ ।
एप्पलका अपरेटिङ सिस्टमहरूमा यूआई रिडिजाइन भएपछि सामसङले पहिलो पटक यो बहस सुरु गरेको थियो । एप कस्टमाइजेसनको विकल्प, फ्लोटिङ बार, स्लिक ग्लास यूआई आफूले पहिल्यै उपलब्ध गराएको सामसङको संकेत छ ।
त्यसपछि सामसङले लाइभ ट्रान्सलेसन (प्रत्यक्ष अनुवाद) फिचरबारे पनि एप्पललाई गिज्यायो । उसले आफ्ना ग्यालेक्सी डिभाइसहरूमा टेक्स्ट र स्पिचलाई वास्तविक समयमा अनुवाद गर्ने सुविधा धेरै समयदेखि उपलब्ध रहेको बताएको छ ।
एप्पल वाचका लागि प्रस्तुत गरिएका एआई सुविधाहरू पनि सामसङको खिल्लीबाट उम्कन सकेनन् । सामसङले एप्पलले भर्खरै ल्याएका यी एआई सुविधाहरू आफ्ना उत्पादनमा पहिलेदेखि नै रहेको भन्दै एप्पलको मजाक उडाएको हो ।
स्मार्टफोन निर्माताहरूबिच यसरी एक-अर्कालाई गिज्याउनु सामान्य नै हो । एप्पलले पनि कहिलेकाहीँ यसो गर्छ । तर यसपटक सामसङले एकपछि अर्को व्यङ्ग्य गरेको छ । जे होस्, यसले प्रविधिप्रेमीहरूलाई भने केही मनोरञ्जन दिएको छ ।
पछिल्लो अध्यावधिक: जेठ २८, २०८२ ११:५६
सामाग्री श्रोत :
टेक पाना
