राजतन्त्रको पक्षमा नाराबाजी गर्ने क्रममा पक्राउ परेका अमेरिकी नागरिकलाई डिपोर्ट गरिँदै

काठमाडौं –राष्ट्रिय प्रजातन्त्र पार्टी (राप्रपा) ले काठमाडौंको माइतीघर मण्डलमा गरेको प्रदर्शनको क्रममा पक्राउ परेका एक अमेरिकी नागरिकलाई डिपोर्ट गर्ने निर्णय गृह मन्त्रालयले गरेको छ ।

नेपाल विद्युत प्राधिकरणबाट कुलमान घिसिङलाई बर्खास्त गर्ने सरकारको निर्णयविरूद्ध चैत १४ गते राप्रपाले माइतीघरमा प्रदर्शन गरेको थियो ।

उक्त प्रदर्शनमा सहभागी भएका अमेरिकी नागरिक ५८ वर्षीय जुलियन क्रिपा ब्लिसलाई प्रहरीले नियन्त्रणमा लिएको थियो । प्रहरीले उनीमाथि थप अनुसन्धानको लागि अध्यागमन विभागमा पठाएको थियो ।

अध्यागमन विभागले उनीमाथि अनुसन्धान गरेर अहिले डिपोर्ट गर्ने प्रक्रियामा अघि बढेको निर्देशक तथा सूचना अधिकारी टीकाराम ढकालले जानकारी दिए ।

‘अनुसन्धान गरेर गृह मन्त्रालयमा पठाएका थियौं । हिजो गृहबाट पनि जबाफ आएपछि अब प्रक्रिया अघि बढेको छ,’ ढकालले भने । उनका अनुसार ब्लिसलाई अब दुई वर्ष नेपाल आउन प्रतिबन्ध गरिएको छ । उनी भिजिट भिसामा नेपाल आएका थिए । 

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।