रौतहट –नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले देशमा राजा ल्याए बर्बाद हुने बताएका छन् । राजा महाराजाको कुनै काम नभएको भन्दै उनले जनताभन्दा माथि कोही नरहेको पनि दाबी गरे ।
रौतहटको गरुडामा बिहीबार पार्टीको नवौँ जिल्ला अधिवेशनको उद्घाटन गर्दै उनले राजवादीको तीनकुने आन्दोलन हिंस्रक भएको जिकिर गरे । उनले राजावादीद्वारा आफ्नो पार्टी कार्यालय तोडफोड, नागरिकका सम्पत्तिमा आगजनी, मानिस मार्ने, चोरी गर्ने र सार्वजनिक सम्पत्ति जलाउनेलगायतका कार्य गरेको उल्लेख गरेका छन् ।
‘चैत १५ गते राजावादीले तीनकुनेमा जताततै कार्यालय तोडफोड गरे, पसल चोरी गर्ने काम गरे, आगजनी, मानिस मार्ने काम गरे यसले देश बर्बाद हुनेवाला छ । अव राजामहाराजाको कुनै काम छैन । अव जनता नै सबैथोक हो । हामी सबैको सामु भनिरहेका छौँ । हामी जनताको सेवामा लागिरहेका छौँ । समाज परिवर्तनमा लागिरहेका छौँ,’ पूर्वप्रधानमन्त्री समेत नेपालले भने ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
सामाग्री श्रोत :
नेपाललाइभ
