काठमाडौं । माइक्रोसफ्टको एआई च्याटबट कोपाइलटले अब प्रयोगकर्ताका लागि वेब प्रयोग गरिदिने भएको छ । ५० औं वार्षिक उत्सवको अवसरमा माइक्रोसफ्टले आफ्ना प्रयोगकर्ताका लागि शुक्रबार यस्तो फिचर घोषणा गरेको हो ।
माइक्रोसफ्टका अनुसार अब तपाईंले सामान्य प्रम्प्टको आधारमा च्याटबटलाई विभिन्न काम लगाउन सक्नुहुन्छ । खासगरी अनलाइनबाट कुनै रेस्टुरेन्ट बुक गर्न, कार्यक्रमको टिकट बुक गर्नेदेखि सामान खरिद गर्नेसम्मका काममा यस टुलले सघाउनेछ ।
बुकिङ डटकम, एक्सपेडिया, कायाक, ट्रिपएड्भाइजर, स्काई स्क्यानर लगायतका यात्रा तथा घुमफिरसँग सम्बन्धित सेवा दिने प्लेटफर्ममा कोपाइलटको प्रयोग गर्न सकिनेछ । यसलाई कम्पनीले एक्सन फिचरको नाम दिएको छ । कम्पनीले यो टुलले प्रायः सबै वेबसाइटमा काम गर्ने दाबी गरेको छ ।
एक्सन फिचर प्रयोग गरी कोपाइलटलाई अनलाइनमा आफ्ना विभिन्न काम गर्न लगाउन सकिन्छ नै साथै त्यसले एआई पोडकास्ट बनाउनेदेखि तपाईंका लागि उपयुक्त हुने प्रडक्ट खोजेर खरिद गरिदिनेसम्मका काम गरिदिन सक्छ । यसको रोचक फिचर त के छ भने तपाईंले क्यामेरामा जे देखाउनु भयो त्यसैका आधारमा यसले अन्तरक्रिया गर्न सक्छ ।
सुरुवाती चरणमा माइक्रोसफ्टले यो नयाँ फिचरले केकस्ता काम गर्न सक्छ भन्ने विषयमा विस्तृतमा जानकारी दिएको छैन । यद्यपि कम्पनीले घोषणा गरेको जस्तो फिचर अन्य एआई प्रदायकले उपलब्ध गराइरहेका छन् ।
अमेजनले नोभा एक्ट एआई एजेन्ट नामक एआई एजेन्ट टुल मार्चमा सार्वजनिक गरेको थियो । यसले पनि ब्राउजर सर्च गर्नेदेखि, अनलाइनमा सामान खरिद गर्ने र स्क्रिनमा देखिएका जानकारीका आधारमा प्रश्न सोध्ने अनि जवाफ दिने काम गर्छ । ओपनएआईले ठ्याक्कै अपरेटर नामको फिचर ल्याएको थियो । यता गुगलले ‘प्रोजेक्ट मेरिनर’ र एन्थ्रोपिकले ‘कम्प्युटर युज’ फिचर ल्याएको थियो ।
ती समान एआई एजेन्ट धेरै हदसम्म विकास हुने क्रममा छन् । यसको विपरित माइक्रोसफ्टले कोपाइलटको एक्सन फिचरको प्रारम्भिक संस्करण शुक्रबारदेखि नै सुरु भएको छ । यो फिचर अन्य प्लेटफर्म र भाषामा आगामी सातादेखि विस्तार हुने कम्पनीले उल्लेख गरेको छ ।
पछिल्लो अध्यावधिक: चैत २३, २०८१ १७:१२
सामाग्री श्रोत :
टेक पाना
