काठमाडौँ– उपभोक्ता अदालतले चिकित्सकीय अभ्याससम्बन्धी मुद्दामा गरेको क्षतिपूर्तिको फैसलाप्रति असहमति जनाउँदै नेपाल चिकित्सक संघले आज देशभरका अस्पताल तथा स्वास्थ्य संस्थामा आकस्मिक बाहेकका सम्पूर्ण सेवा बन्द गरेको छ।
संघले देशभरका चिकित्सक तथा स्वास्थ्यकर्मीहरूलाई यही असार १७ गतेदेखि कालोपट्टी बाँधेर सेवा दिन आह्वान गरेकामा आजदेखि आकस्मिक बाहेकका सेवा ठप्प पारेको हो।
आन्दोलनका कारण बिरामीको बिचल्ली भएको छ। वीर अस्पतालमा पनि आन्दोलनको असर परेको छ।
आकस्मिक बाहेकका सेवा बन्द भएपछि उपचारका लागि अस्पताल पुगेका बिरामीहरू फर्कन बाध्य भएका छन्।ओपीडी बन्द हुँदा टाढा टाढाबाट आएका बिरामी बढी समस्यामा परेका छन्।
उनीहरूलाई खान-बस्नकै समस्या भएको छ। आन्दोलन कहिलेसम्म चल्ने टुङ्गो नहुँदा उनीहरू अन्योलको स्थितिमा छन्।
चिकित्सकीय अभ्यास सम्बन्धी मुद्दामा उपभोक्ता अदालतले गरेको फैसलाले मेडिकल काउन्सिलको क्षेत्राधिकारमाथि हस्तक्षेप भएको उनीहरूको भनाइ छ। विभिन्न अस्पतालविरुद्ध परेको मुद्दामा उपभोक्ता अदालतले अस्पताल र उपचारमा संलग्न चिकित्सकलाई क्षतिपूर्ति भराउन आदेश दिएको थियो।
उक्त आदेशको विरोध गरेको भन्दै संघका महासचिवलाई समेत अवहेलना गरेको मुद्दामा कारण देखाऊ भएको थियो। त्यसपछि संघले चरणबद्ध आन्दोलनको घोषणा गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौँ– अशोक राई नेतृत्वको जनता समाजवादी पार्टी (जसपा) का मधेस प्रदेश अध्यक्ष अशोक यादवले मधेस आज नभए भोलि अलग हुने अभिव्यक्ति दिएका छन्।
नेपाल प्रहरीको खोजी सूचीमा रहेका यादवले एक भिडियो सन्देश जारी गर्दै सो कुरा बताएका हुन्।
उनले नेपालका शासकमा नश्लीय चिन्तन रहेको आरोप लगाएका छन्। मधेशीलाई दोस्रो नागरिकको दर्जा दिइएको भन्दै उनले मधेश अलग हुन आवश्यक रहेको भनेर आफूले पटक-पटक सोंचेको बताएका छन्।
पूर्वसांसद यादवले भिडियो सन्देश सार्वजनिक गर्दै भनेका छन्, ‘मधेश कुनै न कुनै समय अलग हुन्छ। म रहुँ वा नरहुँ।’
‘जय बिहार, जय नेपाल, जय भारत’ भनेर भिडिओ सन्देश सुरु गरेका यादवले आफूलाई पक्राउ गर्नबाट जोगाउन भारतीय प्रहरी अधिकारीहरुसँग याचना पनि गरेका छन्।
उनले बिहारका सम्पूर्ण जनता, बिहारका सबै राजनीतिक दलका जनप्रतिनिधिहरू, नेतागण, बिहारका सम्पूर्ण प्रहरी अधिकारी र प्रहरीकर्मी प्रशासनलाई अपिल गरेका छन्।
उनले भनेका छन्– ‘भारतमा नेपालका आन्दोलनकारीहरूलाई शरण मिल्दै आएको छ। सुरुदेखि नै हरेक विभिन्न किसिमका आन्दोलन भए। र आन्दोलनकारी कोही अपराधी वा हत्यारा होइनन्। तर स्थानीय स्तरमा सर्लाहीका एसपी र डीएसपी गुण्डागर्दी गर्दै भारतीय सेवा क्षेत्रमा, सीमावर्ती इलाकाका मानिसहरूलाई गलत आरोप लगाएर हामीले गलत काम गर्यौँ, हाम्रा आफन्तहरू‘ मेरा आफन्तका घरमा गएर छापा मारे। र छापा मारिरहेका छन् अहिलेसम्म। अतः म बिहार सरकारसँग आग्रह एवं बिहारका सबै मानिसहरू तथा जनप्रतिनिधि र प्रहरी प्रशासनसँग आग्रह गर्दछु कि यो विदेशको मामला हो र राजनीतिक मामला हो। र हामीहरू आन्दोलनको लडाइँ अहिलेसम्म लडिरहेका छौँ। जनताको लडाइँ लडिरहेका छौँ। भारतमा हाम्रो शरण स्थल छ। भारतको हामीलाई समर्थन मिल्नुपर्छ, मिलेको छ।’
प्रहरी स्रोतका अनुसार यादव भारततर्फ फरार भइसकेका छन्। यद्यपि, आइतबार उनले सामाजिक सञ्जालमार्फत आफू फरार नभएको र छोराको उपचारको लागि आएको दाबी गरेका थिए। सोमबार उनले अर्को भिडियो सन्देश जारी गरेका छन्। उनले यसमा बिहारका सम्पूर्ण जनता, बिहारका सबै राजनीतिक दलका जनप्रतिनिधिहरू, नेतागण, बिहारका सम्पूर्ण प्रहरी अधिकारी र प्रहरीकर्मी प्रशासनलाई अपिल गरेका छन्।
सर्लाही जिल्ला प्रहरी कार्यालयका प्रमुख (एसपी) योगेन्द्रकुमार खड्कालाई गालीगलौज गरेको अडियो भाइरल भएपछि यादव फरार भएका छन्। मधेस प्रदेश प्रहरीका प्रमुख डीआईजी उमाप्रसाद चतुर्वेदीका अनुसार अदालतबाट पक्राउ पुर्जी जारी भएपछि यादवको तीव्र रूपमा खोजीकार्य भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौँ । सामाजिक सञ्जाल प्लेटफर्म एक्सले कानुनी मागको कारण देखाउँदै बन्द गरेको समाचार एजेन्सी रोयटर्सको अकाउन्ट भारतमा पुनः सञ्चालनमा आएको छ । शनिबारदेखि निलम्बित उक्त अकाउन्ट आइतबारदेखि सञ्चालनमा आएको हो ।
यसअघि भारतमा रहेका एक्स प्रयोगकर्ताले रोयटर्सको ह्यान्डल खोल्ने क्रममा कानुनी मागका कारण उक्त अकाउन्ट बन्द भएको सूचना देखिएको थियो । तर, कुन कानुनी माग भन्ने स्पष्ट खुलाइएको थिएन ।
एक्सले रोयटर्सलाई पठाएको ईमेलमा पनि भारतमा अकाउन्ट बन्द गर्नुमा आफ्नो कुनै हात नभएको उल्लेख गरेको छ । “यस समयमा हामीले भारतमा तपाईँको अकाउन्टमाथिको पहुँचलाई रोक लगाएका छैनौँ,” रोयटर्सलाई पठाएको ईमेलमा भनिएको छ । रोयटर्सका अनुसार एक्सले यसबारे थप विवरण भने दिएको छैन ।
त्यस्तै भारत सरकारले पनि एक्स ह्यान्डल बन्द गर्नुमा सरकारको संलग्नता नभएको स्पष्ट पारेको छ । हिन्दुस्तान टाइम्सका अनुसार सरकारका प्रवक्ताले पनि सरकारले रोयटर्सको ह्यान्डल बन्द गर्नुपर्ने कुनै कारण नभएको बताएका छन् । “भारत सरकारलाई रोयटर्सको एक्स ह्यान्डल बन्द गर्नु केही आवश्यक छैन । समस्या समाधान गर्न हामी एक्ससँग मिलेर काम गरिरहेका छौँ,” हिन्दुस्तान टाइम्सले सरकारका प्रवक्ताको भनाइ राखेको छ ।
विश्वभर दुई करोड ५० लाखभन्दा बढी फलोअर भएको रोयटर्सको मुख्य अकाउन्ट शनिबार रातिदेखि भारतमा ब्लक गरिएको थियो । समाचार एजेन्सीद्वारा सञ्चालित अर्को एक्स अकाउन्ट ‘रोयटर्स वर्ल्ड’ पनि आइतबार राति पुनः सञ्चालनमा आएको छ ।
रोयटर्सका अनुसार १६ मेमा एक्सले ‘अपरेसन सिन्दुर’लाई लिएर समाचार एजेन्सीलाई ईमेल पठाएको थियो । त्यसमा भारतको ‘सूचना प्रविधि ऐन, २०००’ अन्तर्गत एक्सको ह्यान्डलमा प्रतिबन्ध लगाइएको जानकारी दिएको थियो ।
तर रोयटर्सले त्यो ईमेल एक्सको अकाउन्ट शनिबार भारतमा बन्द हुनुसँग सम्बन्धित थियो वा थिएन भन्ने यकिन गर्न नसकिएको उल्लेख गरेको छ । यस्तै कुन सामग्री हटाउन माग गरिएको थियो र उजुरी दिने निकाय कुन हो भन्नेबारे पनि रोयटर्सले स्पष्ट जानकारी दिएको छैन । अकाउन्ट बन्द हुने निकाय रोयटर्स, प्लेटफर्म एक्स र भारत सरकार तीनै पक्ष यस विषयमा अनविज्ञ हुनुले अकाउन्ट बन्द हुनुको वास्तविक कारण बाहिर आएको छैन ।
पछिल्लो अध्यावधिक: असार २३, २०८२ १२:५१
सामाग्री श्रोत :
टेक पाना
काठमाडौँ– राष्ट्रपति रामचन्द्र पौडेलले नेपालीमा बढ्दो क्रिकेट खेलप्रतिको क्रेज र पछिल्लो समय नेपाली खेलाडीले पाएको सफलता प्रशंसनीय भएको बताएका छन्।
एसीसी यू-१६ इस्ट जोन कप क्रिकेट प्रतियोगिताको विजेता नेपाली टोलीलाई आज शीतल निवासमा बधाई दिँदै राष्ट्रपति पौडेलले क्रिकेटमा नेपालीले हात पारेको सफलता खेलाडीको खेलप्रतिको समर्पण, लगाव र मेहिनतको प्रतिफल भएको बताएका हुन्।
सिंगापुरसँग भएको फाइनलमा एसफसी यू-१६ इस्ट जोन कप क्रिकेट प्रतियोगिताको उपाधि जितेर मुलुकको प्रतिष्ठा उँचो बनाएको भन्दै यसले नेपाल र नेपालीको इज्जत, प्रतिष्ठा बढाएको उनको भनाइ छ।
राष्ट्रपति पौडेलले हामीले हाम्रा परम्परागत खेललाई पुरष्कृत, विकास र विस्तार गर्दै अन्तरराष्ट्रिय प्रतियोगितामा समावेश गराउन सके देशको इज्जत र प्रतिष्ठा बढाउन सकिने उल्लेख गरे। उनले देशभित्रै खेलकुदका लागि आवश्यक पूर्वाधार तथा प्रतियोगिता र प्रशिक्षण बढाएर देश विदेशमा प्रतिस्पर्धा गर्न सक्ने दक्ष खेलाडी उत्पादनमा हामी सबैको ध्यान जान आवश्यक रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
अछाम– सुदूरपश्चिम प्रदेशको अछाम जिल्लास्थित साँफेबगरमा रहेको बयालपाटा अस्पतालको सञ्चालन र व्यवस्थापन अब प्रदेश सरकारले गर्ने भएको छ। भाद्र १ गतेदेखि लागू हुने गरी भएको सम्झौतापछि यसअघि न्याय हेल्थ नेपालद्वारा सञ्चालित यो अस्पताल प्रदेश सरकारको मातहतमा आएको हो।
आइतबार धनगढीस्थित सामाजिक विकास मन्त्रालयमा भएको द्विपक्षीय सम्झौतामा मन्त्रालयका तर्फबाट सचिव डा हेमराज रेग्मी र न्याय हेल्थ नेपालका अध्यक्ष कुन्द दीक्षितले १७ बुँदे सम्झौतामा हस्ताक्षर गरे। सम्झौतासँगै अस्पतालले प्रयोग गरेको जग्गा, १० करोडभन्दा बढी मूल्यका नयाँ भवन, उपकरण, औषधि र औषधिजन्य सामग्रीहरू न्याय हेल्थ नेपालले प्रदेश सरकारलाई हस्तान्तरण गरेको छ।
सुदूरपश्चिम प्रदेश सरकारले आर्थिक वर्ष २०८२/८३ को नीति तथा कार्यक्रमको बुँदा नम्बर ६७ र बजेट वक्तव्यको बुँदा नम्बर १४५ मा बयालपाटा अस्पताललाई आफ्नो मातहतमा ल्याएर सञ्चालन गर्ने र त्यसका लागि बजेट विनियोजन गर्ने उल्लेख गरेको थियो। सुरुमा साउन १ गतेदेखि सञ्चालन गर्ने घोषणा भए पनि आवश्यक तयारी नपुगेको भन्दै प्रदेश सरकारले न्याय हेल्थ नेपाललाई एक महिना थप व्यवस्थापन गर्न आग्रह गरेको थियो।
बयालपाटा अस्पताल स्थापनादेखि नै नमुना अस्पतालको रूपमा परिचित छ, जहाँ पर्चीसहित सम्पूर्ण सेवा, औषधि, शल्यक्रिया र बिरामीलाई खाना निःशुल्क उपलब्ध गराइन्छ। न्याय हेल्थ नेपालको व्यवस्थापनमा सञ्चालित यो अस्पतालले सुदूरपश्चिम र कर्णाली प्रदेशका १ लाखभन्दा बढी नागरिकलाई वार्षिक रूपमा निःशुल्क गुणस्तरीय स्वास्थ्य सेवा प्रदान गर्दै आएको छ।
हालसम्म १५ लाखभन्दा बढी नागरिकले यहाँबाट सेवा लिइसकेका छन्। सामाजिक विकास मन्त्री मेघराज खड्काले १७ वर्षदेखि निःशुल्क गुणस्तरीय सेवा प्रदान गर्दै आएको न्याय हेल्थ नेपालको प्रशंसा गर्दै अस्पतालको सेवा र पारदर्शितालाई उदाहरणीय भएको बताए। उनले भने, ‘बयालपाटाको जति प्रशंसा गरे पनि कम हुन्छ। म यहाँको स्थानीय नागरिक भएको नाताले पनि यो अस्पताललाई थप राम्रो बनाउन मेरो दायित्व छ।’ उनले आगामी दिनमा पनि न्याय हेल्थ नेपालबाट सहयोगको अपेक्षा गरे।
न्याय हेल्थ नेपालले २०६५ देखि भग्नावशेष अवस्थामा रहेको अस्पताललाई पुनर्जन्म दिई निःशुल्क सेवा सञ्चालन गरेको थियो। कोभिड महामारीपछि आर्थिक संकट झेल्दै आएको न्याय हेल्थले प्रदेश सरकारसँग वार्षिक ८ देखि १० करोड सहयोग माग्दै आए पनि अपेक्षित सहयोग नपाएपछि अस्पताल हस्तान्तरण गर्न बाध्य भएको हो। न्याय हेल्थ नेपालका अध्यक्ष कुन्द दीक्षितले अस्पतालले प्रदान गर्दै आएको गुणस्तरीय सेवा र उपचारलाई निरन्तरता दिन प्रदेश सरकारसँग आग्रह गरे। उनले १७ वर्षदेखि कार्यरत कर्मचारीलाई प्राथमिकतामा राखेर सञ्चालन गर्न सुझाव दिए।
मन्त्रालयका सचिव डा. हेमराज रेग्मीले बयालपाटा अस्पताललाई नमुना अस्पतालकै रूपमा सञ्चालन गर्न प्रदेश सरकार प्रतिबद्ध रहेको बताए। उनले भने, ‘स्वस्थ जनशक्तिबिना देश विकास सम्भव छैन। प्रचलित कानुनको आधारमा अस्पताल सञ्चालन गर्छौं।’
अस्पताल सञ्चालनको विधि र प्रक्रिया टुंगो नलागे पनि भाद्र १ देखि ५० शय्याको यो अस्पताल सरकारी चिकित्सक र कर्मचारीमार्फत सञ्चालन हुनेछ। प्रदेश सरकारले कर्मचारी भर्ना गर्दा १७ वर्षदेखि कार्यरत कर्मचारीलाई प्राथमिकता दिनुपर्नेमा जोड दिएको छ। कर्मचारीहरूले पनि आफूहरूलाई प्राथमिकतामा राखेर सेवा सञ्चालन गर्नुपर्ने माग राखेका छन्।
सामाग्री श्रोत :
swasthyakhabar
एजेन्सी– खर्बपति व्यापारी तथा कुनै समयका निकट मित्र एलन मस्कले नयाँ राजनीतिक दल खोलेको विषयमा अन्ततः अमेरिकी राष्ट्रपति डोनाल्ड ट्रम्पले प्रतिक्रिया दिएका छन्। ‘मलाई लाग्छ कि तेस्रो पार्टी खोल्नु भनेको वाहियात कुरा हो।’
आइतबार एयर फोर्स वनमा चढ्नुअघि पत्रकारहरूसँग बोल्ने क्रममा ट्रम्पले भनेका थिए। अमेरिकामा सधैँ दुई दल मात्रै भएको अनि तेस्रो दल सुरु गर्नु भनेको द्विविधा थप्नु मात्रै हुने उनले बताए। पछिल्लो पाँच हप्तायता मस्क पूर्ण रूपमा पटरीबाट झरेर अनियन्त्रित रेल जस्तै भएको भन्दै उनले यो देखेर आफूलाई दुःख लागेको बताए।
मस्कले अब अमेरिकामा तेस्रो राजनीतिक दल सुरु गर्न चाहेको यो अमेरिकी इतिहासमा कहिल्यै सफल नभएको समेत उनको भनाइ छ। ट्रम्पले भनेका छन्, ‘अमेरिकाको प्रणाली त्यस्ता दलहरूको लागि बनेको होइन।
तेस्रो दलहरूको एक मात्र काम अव्यवस्था र अराजकता फैलाउनु हो। र हामीसँग पहिले नै पर्याप्त अराजकता छ, जुन कट्टरपन्थी वामपन्थी डेमोक्रेटहरूले फैलाइरहेका छन्।’
मस्कले शनिबार अमेरिकामा नयाँ राजनीतिक दल गठनको घोषणा गरेका थिए। उनले यसलाई अमेरिका पार्टी नाम दिएका छन्। मस्कले बारम्बार अमेरिकाको राष्ट्रिय कर्जा बढाउने सरकारी नीतिको आलोचना गर्दै आएका थिए।
यसैबिच ट्रम्पसँग उनको सम्बन्ध तिक्त भयो। मस्कले आइतबार आफ्नो सामाजिक पोस्टमा अमेरिकामा नयाँ पार्टी चाहिन्छ कि चाहिँदैन भनेर सर्वेक्षण चलाएका थिए। यसमा सहभागीमध्ये ६६ % ले नयाँ राजनीतिक दल चाहेको बताएका थिए।
सो सर्वेक्षणको नतिजापछि मस्कले नयाँ राजनीतिक दल पाउने भन्दै अमेरिकाले अब २ दलीय प्रणालीबाट मुक्ति पाउने बताएका थिए। देशलाई बर्बाद गर्ने र भ्रष्टाचार गर्नेमा उनले अमेरिकाका दुवै दल रिपब्लिकन र डेमोक्रेटको नाम लिएका थिए।
अमेरिकीहरूले स्वतन्त्रता फिर्ता पाउन भनेर अमेरिका पार्टी नामको राजनीतिक दलको गठन हुन लागेको पनि उनले पोस्टमै भनेका थिए। मस्कले अमेरिकाको स्वतन्त्रता दिवस पारेर जुलाई ४ मा माइक्रो ब्लगिङ वेबसाइट एक्समा एउटा सर्वेक्षण चलाएका थिए।
यसमा उनले सोधे कि के तपाईं दुई–दलीय प्रणालीबाट स्वतन्त्रता चाहनुहुन्छ ? के हामीले अमेरिका पार्टी बनाउनुपर्छ ? भन्ने प्रश्न सोधेका थिए। सर्वेक्षणको नतिजामा ६५ दशमलव ४ प्रतिशतले चाहिन्छ र ३४ दशमलव ६ प्रतिशतले चाहिँदैन भनेका थिए।
चुनाव लड्न पाउँदैनन् मस्क
अमेरिकी संविधानअनुसार अमेरिकामा जन्मेको व्यक्तिले मात्र चुनाव लड्न सक्छ। मस्क दक्षिण अफ्रिकामा जन्मेका थिए। यस्तोमा उनी अमेरिकामा चुनाव लड्न सक्दैनन्। तर मस्कले आफ्ना उम्मेदवारहरू खडा गर्न सक्छन्।
२०२६ नोभेम्बर मा प्रतिनिधिसभाको सबै ४३५ सिट र सिनेटको १०० मध्ये ३४ सिटको लागि चुनाव हुनेछ। मस्कको योजना प्रतिनिधिसभाको ८–१० सिट र सिनेटको ३–४ सिट जित्ने छ। यसो भयो भने उनी ‘किङ्गमेकर’ बन्न सक्नेछन्।
२०२४ को राष्ट्रपति चुनावमा मस्कले ट्रम्पको चुनावी अभियानलाई करोडौं डलर दान दिएका थिए। ट्रम्पले मस्कलाई सङ्घीय सरकारको खर्च घटाउने नयाँ विभाग डजको प्रमुख बनाएका थिए।
कार्यकाल बाँकी रहँदै मस्क त्यसबाट अलग भएर ट्रम्पको ‘बिग ब्युटिफूल’ विधेयकको विरोध गर्न थाले। त्यसयता दुवैको सम्बन्ध बिग्रिएको छ।
के हो अमेरिकाको दुई–दलीय प्रणाली ?
पछिल्लो १५० वर्षदेखि अमेरिकाको राजनीतिमा केवल दुई दल डेमोक्रेटिक र रिपब्लिकनले प्रभुत्व जमाएका छन्। देशमा राष्ट्रपति चुनावदेखि राज्य सभाहरूसम्म यी दुई दलहरूको प्रभुत्व छ। यो दुई–दलीय प्रणालीलाई अमेरिकी लोकतन्त्रको स्थिरताको कारण पनि मानिन्छ।
डेमोक्रेटिक पार्टी सन् १८२८ मा एन्ड्रयू ज्याक्सनको युगमा सुरु भएको थियो। यसलाई सुरुमा किसान र आम जनताको पार्टी मानिन्थ्यो। २० औँ शताब्दीमा यो सामाजिक कल्याण, नयाँ सम्झौता र नागरिक अधिकारजस्ता आर्थिक सुधारहरूको वकालत गर्ने पार्टी बन्यो।
त्यही समयमा दासत्वको विरोधमा १८५४ मा रिपब्लिकन पार्टी गठन भएको थियो र अब्राहम लिङ्कन यसको पहिलो राष्ट्रपति बने। २० औँ शताब्दीमा यो व्यापार र कर कटौतीलाई समर्थन गर्ने पार्टी बन्यो।
किन सफल भएनन् तेस्रो दल ?
अमेरिकामा तेस्रो दल त धेरै पटक गठन भए, तर तिनीहरू सफल हुन सकेनन्। १९१२ मा राष्ट्रपति थियोडोर रुजवेल्टले बुल मूस पार्टी गठन गरे र ८८ इलेक्टोरल भोटहरू प्राप्त गरे। यद्यपि, पार्टी अर्को चुनावसम्म पनि टिक्न सकेन।
१९९२ मा, रस पेरोटले १९% लोकप्रिय मत प्राप्त गरे, तर एउटै इलेक्टोरल भोट प्राप्त गरेनन्। यी दलहरूले मिडियामा कोष, सङ्गठन र ठाउँ पाउँदैनन्। मतदाताहरूले तिनीहरूलाई भोट कट्टर पनि मान्छन्।
यही कारणले गर्दा लिबर्टेरियन वा ग्रिन पार्टी जस्ता दलहरूले अहिलेसम्म राष्ट्रपति चुनावमा ३–४% भन्दा बढी मत प्राप्त गर्न सकेका छैनन्। अमेरिकामा तेस्रो पार्टीहरूको असफलताको मुख्य कारण यसको निर्वाचन प्रणाली हो।
यहाँको निर्वाचन संरचनाले दुई दलीय प्रणालीलाई समर्थन गर्दछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौं । बाध्यतावस हुने वैदेशिक रोजगारीलाई अन्त्य गर्ने उद्धेश्यले नै नेपाल सरकारले आन्तरिक रोजगार प्रवद्र्धनको दशक सुरु गरेको श्रम, रोजगार तथा सामाजिक सुरक्षा मन्त्री शरतसिंह भण्डारीले बताएका छन् । यसका लागि श्रम मन्त्रालयले अन्तरिक रोजगार शाखा नै स्थापना गरेको उनले बताए ।
वैदेशिक रोजगारीबाट फर्केर नेपालमा उद्यम गरेका उद्यमीहरुलाई राष्ट्रिय पुरस्कार तथा सम्मान कार्यक्रममा बोल्दै मन्त्री भण्डारीले नेपालमा केहि दशकयता वैदेशिक रोजगारको विषय नै प्राथमिकतामा परेको भन्दै अव आन्तरिक रोजगारीलाई प्रवद्र्धन गर्ने कुरामा केन्द्रीत हुनु आवश्यक रहेको बताए । उनले वैदेशिक रोजगारमा रहेकाहरुलाई स्वदेश फर्काएर उद्यममा संलग्न गराई रोजगारी सिर्जना गर्नु सरकारको अहिलेको प्राथमिकता भएको जानकारी दिए ।
सो अवसरमा बोल्दै श्रम सचिव डा. कृष्णहरि पुष्करले वैदेशिक रोजगारीमा जानु पलायन नभएको भन्दै गलत भाष्य निर्माण गरिएको तर्क गरे । उनले वैदेशिक रोजगारमा गएकाहरुले आर्जन गरेको ज्ञान, सीप, पुँजी र हिम्मतबाट राज्यले लाभ लिनुपर्ने बताए ।
८ जना पुरस्कृत श्रम रोजगार तथा सामाजिक सुरक्षा मन्त्रालयले वैदेशिक रोजगारीबाट फर्केर नेपालमा उद्यम गरेका उद्यमीहरुलाई हरेक बर्ष प्रदान गर्दै आएको सर्वोकृत्ष्ट राष्ट्रिय पुरस्कारबाट यस बर्ष झापा, दमकका रविन पोखरेल पुरस्कृत भएका छन् । उनलाई १ लाख ५० हजार नगद सहित प्रशंसापत्र र दोसल्ला ओढाएर सम्मान गरिएको थियो ।
यसैगरी जनही ७५ हजार नगद सहितको राष्ट्रिय पुरस्कारबाट राजीव खड्का (कोसी), शंकर सिम्खडा (मधेस), कुमार श्रेष्ठ (बागमति), बसन्त बहादुर खड्का (गण्डकी), शोभाकर पौडेल (लम्बिनी), लक्ष्मीप्रसाद ढकाल (कर्णाली) र तर्क सिंह विष्ट (सुदुरपश्चिमाञ्चल) पुरस्कृत भएका छन् । मन्त्रालयले प्रदान गर्ने सो पुरस्कारका लागि मुलुकभरीबाट ५६ जनाले आवेदन दिएका थिए ।
सामाग्री श्रोत :
deshparadesh
काठमाडौँ । शनिबारको घमाइलो दिउँसो । दर्जनौं मानिसहरू घरपछाडिको बगैँचाको घाँसमा बसेका थिए । त्यहाँ बनाइएको एउटा मञ्चमा प्रविधि स्टार्टअपका संस्थापक बन्न चाहनेहरू आफ्ना आइडियाबारे कुरा गरिरहेका थिए । भिडमा रहेका मानिसहरू ल्यापटप चलाइरहेका थिए, कोही भेप तानिरहेका थिए भने कोही स्ट्रबेरी फ्रापुचिनो पिइरहेका थिए । माथि आकाशमा एउटा ड्रोन घुमिरहेको थियो । घरभित्र, भान्सामा लगानीकर्ताहरूले उद्यमीहरूका योजना (आइडिया पिच) सुनिरहेका थिए ।
यो हेर्दा सिलिकन भ्याली जस्तो देखिन्थ्यो । तर यो चीनको दक्षिणी सहर हाङ्जाउको एक शान्त उपनगर लियाङ्जु थियो । यो ठाउँ सस्तो भाडा र अलिबाबा, डिपसिक जस्ता प्रविधि कम्पनीहरूको निकटताले गर्दा उद्यमी र प्राविधिक प्रतिभाहरूका लागि आकर्षणको केन्द्र बनेको छ ।
“मानिसहरू यहाँ आफ्नो सम्भावना खोज्न आउँछन्,” यो कार्यक्रम आयोजना गरेका फेसबुक र अलिबाबाका पूर्व कर्मचारी ३६ वर्षीय फेलिक्स ताओले भने ।
लगभग ती सबै सम्भावनाहरू आर्टिफिसियल इन्टेलिजेन्स (एआई) सँग सम्बन्धित छन् । प्रविधिमा श्रेष्ठताका लागि चीन र अमेरिकाबिच प्रतिस्पर्धा चलिरहँदा हाङ्जाउ चीनको एआई उन्मादको केन्द्र बनेको छ ।
एक दशकअघि प्रान्तीय र स्थानीय सरकारहरूले हाङ्जाउमा नयाँ कम्पनीहरूलाई अनुदान र कर छुट दिन थाले । जसले सयौं स्टार्टअपहरूलाई जन्माउन मद्दत गर्यो । अहिले विकेन्ड (सप्ताहन्त)मा बेइजिङ, सांघाई र सेन्जेनबाट मानिसहरू प्रोग्रामरहरू खोज्न यहाँ आउँछन् ।
तीमध्ये धेरै ताओको घरपछाडिको बगैँचामा भेटिन्छन् । उनले २०२२ मा आफ्नै कम्पनी ‘माइन्डभर्स’ सुरु गर्नुअघि अलिबाबामा एउटा एआई अनुसन्धान प्रयोगशाला स्थापना गर्न मद्दत गरेका थिए । अहिले ताओको घर लियाङ्जुमा बस्ने कोडरहरूको केन्द्र बनेको छ । जसमध्ये धेरै २० देखि ३० वर्ष उमेरका छन् । उनीहरू आफूलाई ‘गाउँले’ भन्छन्, दिनमा कफी पसलहरूमा कोड लेख्छन् र राति सँगै गेम खेल्छन् । र, एआईको प्रयोग गरेर आफ्नै कम्पनीहरू बनाउने आशा राख्छन् ।
हाङ्जाउले अलिबाबा र डिपसिक मात्र नभई नेटइज र हिकभिजन जस्ता शक्तिशाली प्रविधि कम्पनीहरूलाई पनि जन्म दिइसकेको छ ।
गत जनवरीमा डिपसिकले एउटा एआई प्रणाली सार्वजनिक गरेर प्रविधि जगतमा हलचल मच्चायो । कम्पनीले उक्त प्रणाली सिलिकन भ्यालीका कम्पनीहरूले खर्च गरेको भन्दा निकै कम लागतमा बनाएको बताएको थियो । त्यसबेलादेखि डिपसिक र अलिबाबाले बनाएका प्रणालीहरू विश्वका शीर्ष प्रदर्शन गर्ने ओपन सोर्स एआई मोडेलहरूमध्येमा परेका छन् । अर्थात् जो कोहीले पनि यसमा आधारित भएर नयाँ कुरा बनाउन सक्छन् । डिपसिकका संस्थापकले पढेको हाङ्जाउको झेजियाङ विश्वविद्यालयका स्नातकहरू चिनियाँ प्रविधि कम्पनीहरूमा खोजिने कर्मचारी बनेका छन् ।
चिनियाँ मिडियाले डिपसिकको टोलीका एक मुख्य सदस्यलाई इलेक्ट्रोनिक्स कम्पनी साओमीले आफ्नो कम्पनीमा लगेको खबरलाई नजिकबाट पछ्याएको थियो । लियाङ्जुमा, धेरै इन्जिनियरहरूले भने कि उनीहरू बाइटडान्स जस्ता ठुला कम्पनीहरूसँग गरेको ‘प्रतिस्पर्धा नगर्ने सम्झौता’ को अवधि सकिने प्रतीक्षामा समय बिताइरहेका छन्, ताकि उनीहरू आफ्नै स्टार्टअप सुरु गर्न सकून् ।
डिपसिक सहरका ती छ एआई र रोबोटिक्स स्टार्टअपहरूमध्ये एक हो, जसलाई चिनियाँ मिडियाले ‘हाङ्जाउका छ बाघहरू’ भन्ने गर्छन् ।
गत वर्ष ती छ मध्येको एक- गेम साइन्सले चीनको पहिलो ठुलो बजेटको भिडिओ गेम ब्ल्याक मिथ: वुकोङ (Black Myth: Wukong) सार्वजनिक गर्यो, जुन विश्वव्यापी रूपमा हिट भयो । अर्को फर्म, युनिट्रीले जनवरीमा चिनियाँ सरकारी टेलिभिजनको वार्षिक कार्यक्रममा आफ्ना रोबोटहरूलाई मञ्चमा नचाएर सबैको ध्यान खिच्यो ।
हालसालै एआई-युक्त चस्मा बनाउने हाङ्जाउको स्टार्टअप रोकिडका संस्थापक मिङमिङ झुले ती छ जना संस्थापकहरूलाई आफ्नो घरमा रात्रीभोजका लागि बोलाए ।
“यो पहिलो पटक थियो जब हामी सबैजना प्रत्यक्ष भेटेका थियौं,” झुले भने । उनी जस्तै, ती छ जनामध्ये धेरैले झेजियाङ विश्वविद्यालयमा पढेका थिए वा अलिबाबामा काम गरेका थिए ।
“जब हामीले सुरु गर्यौं, हामी साना माछा थियौं,” झुले भने, “तर त्यतिबेला पनि सरकारले मद्दत गर्यो ।” उनले भने कि सरकारी अधिकारीहरूले उनलाई रोकिडका सुरुवाती लगानीकर्ताहरूसँग जोड्न मद्दत गरेका थिए, जसमा अलिबाबाका संस्थापक ज्याक मा पनि थिए ।
हाङ्जाउको प्रविधि क्षेत्रलाई सरकारको समर्थनले केही लगानीकर्ताहरूलाई तर्साएको छ । नाम नबताउने शर्तमा धेरै कम्पनीका संस्थापकहरूले आफूहरूलाई विदेशी लगानी कम्पनीहरूबाट कोष आकर्षित गर्न गाह्रो भएको र यसले गर्दा चीन बाहिर विस्तार गर्ने योजनामा बाधा पुर्याएको धारणा राखेका छन् ।
सबैभन्दा खराब अवस्था टिकटकको चिनियाँ अभिभावक कम्पनी बाइटडान्सले भोगेको उनीहरूको बुझाई छ । बाइटडान्सका कार्यकारीहरूलाई चिनियाँ सरकारसँगको सम्बन्धबारे अमेरिकी संसदमा सोधपुछ गरिएको थियो ।
संस्थापकहरूले आफ्ना कम्पनीहरूको वृद्धिका लागि दुई ओटा बाटो रोज्नुपर्ने बताए: सरकारी कोष लिने र आफ्नो उत्पादनलाई चिनियाँ बजारअनुसार बनाउने वा विदेशी लगानीकर्ताहरूलाई आकर्षित गर्न सिंगापुर जस्ता देशमा कार्यालय स्थापना गर्न आफैं पर्याप्त पैसा जुटाउने । धेरैका लागि, पहिलो बाटो मात्र सम्भव विकल्प थियो ।
अर्को अनिश्चितता एआई प्रणाली सञ्चालन गर्ने एडभान्स्ड कम्प्युटर चिपहरूको पहुँच हो । वासिङ्टनले चिनियाँ कम्पनीहरूलाई यी चिपहरू किन्नबाट रोक्न वर्षौंदेखि प्रयास गरिरहेको छ । अर्कोतर्फ ह्वावे र सेमिकन्डक्टर म्यानुफ्याक्चरिङ इन्टरनेशनल कर्प जस्ता चिनियाँ कम्पनीहरू आफ्नै चिप उत्पादन गर्ने दौडमा छन् ।
अहिलेसम्म, चीनमा बनेका चिपहरूले बाइटडान्स जस्ता कम्पनीहरूलाई चीनमा केही एआई सेवाहरू प्रदान गर्न मद्दत गर्न पर्याप्त काम गरेका छन् । वासिङ्टनको नियन्त्रणका बावजुद धेरै चिनियाँ कम्पनीहरूले एनभिडिया चिपहरूको भण्डार बनाएका छन् । तर यो आपूर्ति कति लामो समयसम्म रहनेछ वा चीनका चिप निर्माताहरूले आफ्ना अमेरिकी प्रतिस्पर्धीहरूलाई कति चाँडो भेट्टाउन सक्छन् भन्ने स्पष्ट छैन ।
हाङ्जाउमा एउटा अवधारणा विकास भइरहेको छ । त्यो हो- ‘एजेन्टिक एआई’ अर्थात् यस्तो आर्टिफिसियल इन्टेलिजेन्स प्रणाली जसलाई आफैं काम गर्न निर्देशन दिन सकिन्छ ।
हाङ्जाउका अर्का उद्यमी कियान रोयले युवाहरूका लागि एआई-इनेबल्ड डिजिटल साथी विकास गरेका छन् । जसले चीनका युवाहरूमाझ लोकप्रिय मायर्स-ब्रिग्स व्यक्तित्व परीक्षणको जानकारीको आधारमा उनीहरूको मुडअनुसार प्रतिक्रिया दिन्छ । उनको टोलीले आफ्नो एप ‘अल टाइम’ सार्वजनिक रूपमा उपलब्ध एआई प्रणालीहरू प्रयोग गरेर प्रोग्राम गरेको हो, जसमा डिपसिक, अलिबाबा र अमेरिकी स्टार्टअप एन्थ्रोपिकद्वारा बनाइएका प्रणालीहरू समावेश छन् ।
बगैँचाको कार्यक्रम आयोजना गर्ने ताओको सह-स्थापनामा बनेको कम्पनी ‘माइन्डभर्स’ ले एउटा यस्तो उत्पादनमा काम गरिरहेको छ, जसले मानिसहरूलाई आफ्नो जीवन व्यवस्थापन गर्न एआई प्रयोग गर्न मद्दत गर्नेछ । उदाहरणका लागि, यसले सहकर्मीहरूलाई दैनिक सहयोगी ईमेलहरू पठाउन सक्छ, वा आमाबाबुलाई पारिवारिक बिदाको सम्झना दिलाउँदै नियमित टेक्स्ट मेसेजहरू पठाउन सक्छ ।
“म एआईले केवल काम मात्र गरोस् भन्ने चाहन्न, बरु यसले तपाईंलाई मानसिक रूपमा थप ठाउँ दियोस् । ताकि तपाईं तनावमुक्त हुन सक्नुहोस्,” ताओले भने ।
ताओको बगैँचामा उपस्थित धेरैले हाङ्जाउको वातावरणले आफ्नो रचनात्मकतालाई बढावा दिएको बताएका छन् । जुन एक तालको किनारमा अवस्थित छ र पुस्ताैंदेखि चिनियाँ कवि र चित्रकारहरूको प्रेरणाको स्रोत बनिरहेको छ ।
लिन युआनलीनले झेजियाङ विश्वविद्यालयमा पढ्दा आफ्नो कम्पनी, ‘जेबर’ सुरु गरे । उनको कम्पनीले ‘भाइबकोडिङ’ (vibecoding) अर्थात् गहिरो सफ्टवेयर ज्ञान बिना नै एआई टुलहरू प्रयोग गरेर एप र वेबसाइट बनाउने मानिसहरूलाई ब्याक-इन्ड प्रणालीहरू प्रदान गर्दछ ।
“लियाङ्जु मेरो उत्पादनको परीक्षणको लागि उत्तम ठाउँ हो,” लिनले भने । उनी कफी पसलमा कसैको छेउमा गएर वा छिमेकीको बैठक कोठामा पुगेर उनीहरूलाई आफ्नो स्टार्टअपका लागि कस्तो सहयोग चाहिन्छ भनेर सोध्न सक्छन् । लिन यति धेरै लियाङ्जु जान थाले कि उनी त्यहीँ बसाइँ सरे ।
लियाङ्जुका गाउँलेहरूले फिल्म प्रदर्शन कार्यक्रमहरू आयोजना गर्दै आएका छन् । उनीहरू हालसालै ‘द म्याट्रिक्स’ हेर्न भेला भएका थिए । त्यसपछि, उनीहरूले यो फिल्म अनिवार्य रूपमा हेर्नै पर्ने निर्णय गरे ।
“लियाङ्जुमा रहेका संस्थापक बन्न चाहनेहरू, शीर्ष विश्वविद्यालयहरूमा नगएकाहरू पनि विश्वास गर्छन् कि उनीहरूले अर्को विश्व परिवर्तनकारी प्रविधि कम्पनी सुरु गर्न सक्छन्,” ताओले भने ।
उनले थपे, “उनीहरूमध्ये धेरै जना आफ्नो बाटो आफैं खोज्ने निर्णय गर्न निकै साहसी छन्, किनकि चीनमा त्यो जीवन बिताउने सामान्य तरिका होइन ।”
द न्युयोर्क टाइम्सको सहयोगमा
पछिल्लो अध्यावधिक: असार २३, २०८२ १०:२४
सामाग्री श्रोत :
टेक पाना
काठमाडौं – उपभोक्ता अदालतले चिकित्सकीय अभ्याससम्बन्धी पछिल्ला मुद्दामा सुनाएको फैसलाले नेपाल मेडिकल काउन्सिलको क्षेत्राधिकारमाथि हस्तक्षेप भएको भन्दै नेपाल चिकित्सक संघले आज देशभर आकस्मिक बाहेकका सेवा रोकेको छ।
देशभरका चिकित्सक तथा स्वास्थ्यकर्मीहरूलाई असार १७ गतेदेखि कालोपट्टी बाँधेर सेवा दिन आह्वान गरेको संघले आज आकस्मिक बाहेकका सेवा रोकेको हो।
संघले कानुन संशोधनमार्फत चिकित्सकीय मुद्दा हेर्ने अधिकार मेडिकल काउन्सिलमा मात्रै सीमित गरिनुपर्ने माग गर्दै आवश्यक परे थप कडा आन्दोलनका कार्यक्रम ल्याउने चेतावनीसमेत दिएको छ।
केही साता यता उपभोक्ता अदालतले उपचारमा लापरवाही गरेको मुद्दामा बिरामीका आफन्तको पक्षमा फैसला गरेको थियो। उपभोक्ता अदालतले ओम अस्पतालले ५० लाख ७० हजार, हिमाल अस्पताल र उपचारमा सम्लग्न चिकित्सकले १ करोड ४५ लाख रुपैयाँ र ग्राण्डी सिटी अस्पताल र त्यहाँ उपचारमा कार्यरत चिकित्सकले ५७ लाख रुपैयाँ क्षतिपूर्ति बिरामी पक्षका परिवारलाई तिर्नुपर्ने फैसला गरेको थियो।
संघले शुक्रबार शाखा कार्यालयहरुद्वारा सम्बन्धित जिल्ला प्रशासन कार्यालयहरुमा प्रमुख जिल्ला अधिकारीलाई ज्ञापनपत्र बुझाएको थियो।
संघको घोषित कार्यक्रम अन्तरगत असार २२, आइतबार आ-आफ्नो कार्यस्थलमा पहिलो एक घण्टा धर्ना दिने थियो। असार २३ गते सोमबार देशभरका स्वास्थ्य संस्थाहरूमा आकस्मिक सेवा बाहेक सम्पूर्ण सेवा बन्द गर्ने, चिकित्सकहरूबाट हस्ताक्षर तथा मेडिकल काउन्सिलको प्रमाणपत्र संकलन गरी संघको केन्द्रीय कार्यालय बुझाउने कार्यक्रम छ।
असार २४, मंगलबार चिकित्सकहरूले नेपाल मेडिकल काउन्सिलको प्रमाणपत्र काउन्सिलमा बुझाउनेलगायत कार्यक्रम तय गरेका छन्।
आन्दोलनमा एसोसिएसन अफ प्राइभेट मेडिकल एण्ड डेन्टल कलेज, अफिन, एपोन, केमसन, नेपाल नर्सिङ एसोसिएसन, नेपाल फिजियोथेरापी एसोसिएसन, नेपाल भेटेरिनरी एसोसिएसन, एनाभीएमआईए, एनपीएचओ ऐक्यबद्धता जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौं, नेपाल राष्ट्र बैंकले आज (सोमबार) का लागि विदेशी मुद्राहरुको विनिमयदर निर्धारण गरेको छ। सो अनुसार साउदी अरेवियन रियाल एकको खरिद दर ३६ रुपैंयाँ ३६ पैसा तथा विक्रीदर ३६ रुपैंयाँ ५२ पैसा तोकिएके छ । यसैगरी युएई दिराम एकको खरिददर ३७ रुपैंयाँ १द्द पैसा तथा विक्रि दर ३७ रुपैंयाँ २८ पैसा रहेको छ ।
कतारी रियाल एकको खरिददर ३७ रुपैया ३० पैसा तथा विक्री दर ३७ रुपैंयाँ ४७ पैसा तोकिएको छ । मलेसियन रिंगिट एकको खरिददर ३२ रुपैयाँ ३० पैसा तथा विक्रि दर ३२ रुपैयाँ ४४ पैसा तोकिएको छ ।
यसैगरी कुबेती दिनार एकको खरिददर ४४७ रुपैयाँ १६ पैसा र बिक्रीदर ४४९ रुपैयाँ १३ पैसा छ। हिजो कुबेती दिनार एकको खरिददर ४४६ रुपैयाँ ६७ पैसा र बिक्रीदर ४४८ रुपैयाँ ६४ पैसा थियो।
आज बहराइन दिनार एकको खरिददर ३६१ रुपैयाँ ६४ पैसा र बिक्रीदर ३६३ रुपैयाँ २४ पैसा छ। हिजो बहराइन दिनार एकको खरिददर ३६१ रुपैयाँ ६७ पैसा र बिक्रीदर ३६३ रुपैयाँ २६ पैसा थियो।
यसैगरी नेपाल राष्ट्र बैंकका अनुसार आज अमेरिकी डलर एकको खरिददर १३६ रुपैयाँ ३४ पैसा र बिक्रीदर १३६ रुपैयाँ ९४ पैसा छ। हिजो र अस्ती पनि अमेरिकी डलरको विनिमयदर यही थियो। गएको माघ २५ गते अमेरिकी डलर एकको खरिददर एक सय ३९ रुपैयाँ ८३ पैसा र बिक्रीदर एक सय ४० रुपैयाँ ४३ पैसा थियो। नेपाली बजारमा अमेरिकी डलरको यो मूल्य अहिलेसम्मकै सबैभन्दा महँगो हो।
त्यसैगरि आज युरो एकको खरिददर १६० रुपैयाँ ५९ र बिक्रीदर १६१ रुपैयाँ ३० पैसा छ। हिजो युरो एकको खरिददर १६० रुपैयाँ ५८ र बिक्रीदर १६१ रुपैयाँ २९ पैसा थियो।
यो विनिमयदर आवश्यकतानुसार जुनसुकै समयमा पनि संशोधन गर्न सकिने राष्ट्र बैंकले जनाएको छ। वाणिज्य बैंकले तोक्ने विनिमयदर भने फरक हुनसक्ने र अद्यावधिक विनिमयदर केन्द्रीय बैंकको वेबसाइटमा उपलब्ध हुने राष्ट्र बैंकले जनाएको छ।
सामाग्री श्रोत :
deshparadesh
