काठमाडौं । अमेरिकी राष्ट्रपति डोनाल्ड ट्रम्पले फेरि एक पटक कर लगाउने आफ्नो कुरा दोहोर्याएका छन्। यसमा उनले विश्वका देशहरूमा ‘रेसिप्रोकल ट्यारिफ’ लगाउने कुरा गरेका छन्।
“व्यापारमा पारदर्शिताको लागि मैले पारस्परिक शुल्क लगाउने निर्णय गरेको छु,” उनले एक्समा लेखे “यसको अर्थ कुनै देशले अमेरिकामा जस्तो किसिमको कर लगाउँछ हामी पनि त्यो देशमा त्यही किसिमको शुल्क लगाउनेछौं। न कम न बढी।”
“यो सबैका लागि निष्पक्ष हुनेछ,” ट्रम्पले भने “कुनै पनि देशले यसबारे गुनासो गर्न सक्दैन। कतिपय अवस्थामा, यदि कुनै देशलाई अमेरिकाले धेरै उच्च शुल्क लगाइरहेको छ भन्ने लाग्छ भने त्यो देशले अमेरिका विरुद्ध लगाइँदै गरेको शुल्क घटाउनु वा हटाउनु पर्नेछ।”
“यदि तपाईंका उत्पादनहरू अमेरिकामा बनेका छन् भने, तिनीहरूमा कुनै शुल्क लाग्नेछैन,” ट्रम्पले लेखे।
वास्तवमा, अमेरिकी राष्ट्रपति डोनाल्ड ट्रम्पले फेब्रुअरी १३ मा एक ज्ञापनपत्रमा हस्ताक्षर गरेका थिए, जसमा पारस्परिक करको योजना बनाउन आदेश दिइएको थियो।
यस विषयमा ह्वाइट हाउसले भन्यो, “राष्ट्रपति डोनाल्ड ट्रम्पले निष्पक्ष, स्वतन्त्र, पारस्परिक व्यापारको योजना घोषणा गर्नुभएको छ।”
ट्रम्पले भनेका छन् “संयुक्त राज्य अमेरिकाले अब अर्को देशले गरेको अत्यधिक मूल्य निर्धारण सहन सक्दैन। संयुक्त राज्य अमेरिकासँग संसारको सबैभन्दा खुला अर्थतन्त्रहरू मध्ये एक छ, तैपनि हाम्रा व्यापारिक साझेदारहरूले अमेरिकी निर्यातका लागि आफ्नो बजार बन्द राख्छन्।”
श्रोत : www.dcnepal.com
