काठमाडौं । अमेरिकी प्रविधि कम्पनी अमेजनले चर्चित भिडिओ शेयरिङ एप टिकटकको सम्पूर्ण स्वामित्व खरिद गर्ने प्रस्ताव गरेको छ । अमेरिकी सरकारले चिनियाँ स्वामित्वबाट टिकटक अलग गर्ने वा प्रतिबन्ध लगाउने अन्तिम म्याद नजिकिँदै गर्दा अमेजनले अप्रत्याशित रूपमा यस्तो प्रस्ताव अघि सारेको हो ।
टिकटक खरिद प्रक्रियामा संलग्न विभिन्न पक्षहरूले भने अमेजनको प्रस्तावलाई गम्भीर रूपमा नलिएको जनाएका छन् । प्रस्ताव अमेरिकी उपराष्ट्रपति जेडी भान्स र वाणिज्य सचिव हावर्ड लुटनिकलाई सम्बोधन गरिएको पत्रमार्फत गरिएको जनाइएको छ ।
टिकटकको स्वामित्वलाई लिएर वाशिङ्टनमा कूटनीतिक तथा राजनीतिक तहमा अन्तिम समयमा छलफल तीव्र भएको छ । अमेरिकी नीतिनिर्माताहरूले टिकटकको चिनियाँ स्वामित्वलाई राष्ट्रिय सुरक्षाका दृष्टिकोणले गम्भीर मान्दै आएका छन् । यहीकारण गत वर्ष अमेरिकी संसदले टिकटकलाई बिक्री गर्नुपर्ने कानुन पारित गरेको थियो, जुन यस वर्षको जनवरीदेखि लागू हुने तय गरिएको थियो ।
राष्ट्रपति डोनाल्ड ट्रम्पले भने राष्ट्रिय सुरक्षाका चिन्ताका बाबजुद टिकटकलाई जोगाउने प्रतिबद्धता व्यक्त गर्दै आएका छन् । सर्वोच्च अदालतले कानुनलाई सर्वसम्मत रूपमा अनुमोदन गरेपछि पनि ट्रम्पले त्यसको कार्यान्वयनलाई यसै शनिबारसम्म स्थगित गरेका छन् ।
अमेजनले टिकटक खरिद प्रस्तावबारे कुनै आधिकारिक प्रतिक्रिया दिएको छैन । टिकटकले पनि हालसम्म कुनै प्रतिक्रिया जनाएको छैन ।
टिकटक खरिद प्रक्रियामा अरू अमेरिकी लगानीकर्ताहरूको पनि चासो देखिएको छ । राष्ट्रपति ट्रम्पले बुधबार ह्वाइटहाउसका उच्च अधिकारीहरूसँग टिकटकको भविष्यबारे छलफल गरेका थिए । छलफलमा अमेरिकी प्रविधि कम्पनी ओर्याकल र निजी इक्विटी फर्म ब्ल्याकस्टोनसहितका लगानीकर्ताहरूलाई संलग्न गराउने प्रस्ताव पनि अघि सारिएको थियो । तर, यस्तो संरचनाले संघीय कानुनका सर्तहरू पूरा गर्ने वा नगर्ने भन्ने विषय भने अझै स्पष्ट छैन ।
अमेजनको टिकटकसँग केही व्यावसायिक सम्बन्ध रहेका छन् । टिकटक हाल अमेरिकामा १७ करोड प्रयोगकर्तासहित रिटेल शपिङको प्रमुख माध्यम बन्दै गएको छ । जहाँ प्रभावशाली व्यक्तिहरूले आफ्ना दर्शकलाई उत्पादनहरू सिफारिस गर्छन् । अमेजनमार्फत सामान बिक्री गर्दा टिकटकका प्रभावशाली व्यक्तिहरूले कमिसनसमेत प्राप्त गर्छन् ।
यसअघि अमेजनले आफ्नै एपभित्र टिकटक जस्तै ‘इन्स्पायर’ नामक सुविधा ल्याएको थियो । तर, उक्त पहल असफल भएको भन्दै कम्पनीले यसै वर्ष हटाइसकेको छ ।
टिकटक खरिदमा चासो देखाउने अमेजन पहिलो रिटेलर भने होइन । सन् २०२० मा माइक्रोसफ्ट र वालमार्टले पनि टिकटक खरिदका लागि संयुक्त रूपमा प्रस्ताव राखेका थिए ।
हाल टिकटक खरिदबारे विभिन्न पक्षहरूबाट अन्तिम समयमा नयाँ प्रस्तावहरू आउन थालेका छन् । बुधबारमात्र ‘ओन्लीफ्यान्स’ संस्थापक संलग्न कम्पनी ‘जुप’ ले क्रिप्टोकरेन्सी फाउन्डेसनसँग मिलेर टिकटकको अमेरिकी कारोबार खरिद गर्न प्रस्ताव गरेको थियो ।
तर, टिकटकले आफू बिक्रीमा नरहेको बताउँदै आएको छ । कम्पनीका अनुसार चिनियाँ सरकारले बिक्री प्रक्रिया रोक्ने सम्भावना रहेको छ ।
द न्यु योर्क टाइम्सबाट ।
पछिल्लो अध्यावधिक: चैत २२, २०८१ १०:४
सामाग्री श्रोत :
टेक पाना
