काठमाडौँ | प्रहरी हिरासतमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेको तस्बिर अहिले सामाजिक सञ्जालमा भाइरल बनेको छ। तस्बिर सार्वजनिक भएपछि रास्वपाका समर्थकहरूले लामिछानेमाथि दुर्व्यवहार भएको आरोप लगाउँदै सरकारको आलोचना गरिरहेका छन्।
यसै क्रममा, नागरिक उन्मुक्ति पार्टीकी अध्यक्ष रन्जिता श्रेष्ठले पनि प्रतिक्रिया जनाएकी छिन्। उनले आफ्ना श्रीमान् रेशम चौधरीलाई प्रहरी नियन्त्रणमा राखिएका बेला अस्पतालको शय्यामा फलामको शिक्री बाँधिएको तस्बिर सेयर गर्दै अहिलेको कारागारमा धेरै सुविधा रहेको टिप्पणी गरेकी छिन्।
रन्जिता श्रेष्ठले लेखेकी छिन्, “रेशम चौधरी यसरी बस्नु हुन्थ्यो, अहिले त धेरै सुख–सुविधा हुने रहेछ कारागारमा। पूर्व गृहमन्त्री माननीय रवि ज्यूको फोटो भाइरल भैरहेको अवस्थामा हामीमाथि भने विभेद भएकै हो जस्तो लाग्यो।”
रेशम चौधरी टिकापुर घटनामा दोषी ठहर भई सांसद रहेका बेला पक्राउ परेका थिए। त्यसबेला खुट्टामा शिक्री बाँधिएको अवस्थाको तस्बिरले व्यापक चर्चा पाएको थियो।
श्रेष्ठले चौधरीमाथि भएको व्यवहारलाई विभेदपूर्ण बताउँदै, आफ्नो पार्टी नागरिक उन्मुक्ति पार्टीका जन्मदाता चौधरीलाई पनि जननिर्वाचित सांसदकै रूपमा सम्मान पाउनुपर्ने धारणा राखेकी छिन्।
समाचार र भिडियो हेर्न तल का लिंकहरु मा क्लिक गर्नुहोस् :
श्रोत : साझासबल मिडिया
