काठमाडौं । कूटनीतिक सम्बन्ध स्थापना भएको ६५ वर्षपछि नेपालको पहिलो औपचारिक भ्रमण गर्नका लागि मंगलबार प्रधानमन्त्री केपी शर्मा ओली थाइल्याण्ड पुगे । थाइल्याण्डमा भइरहेको बिमस्टेक शिखर सम्मेलनमा सहभागी हुन पुगेका उनलाई राम्रै आतिथ्यता पनि मिल्यो ।
त्यहाँ उनले बुधबार थाई राजा महा वजिरालङ्कोर्न र समकक्षी पेथोङ्थान शिनावात्रासँग भेटवार्ता गरे ।
विशेषगरी ओलीको थाइल्याण्ड भ्रमणमध्ये प्रधानमन्त्री शिनावात्रासँग भेटवार्ता र सम्झौतापत्रमा हस्ताक्षर समारोहका भिडिओहरू शिनावात्राका नाममा खुलेका फ्यान पेजहरूमा सार्वजनिक छन् । ती भिडिओहरू अहिले टिकटक लगायतका सामाजिक सञ्जालमा भाइरल छन् ।
‘Ingshinawatra_forever’ नामको शिनावात्राको फ्यानपेज टिकटक अकाउन्टमा प्रधानमन्त्री ओलीसँगको भिडिओहरू सार्वजनिक भएका छन् । १३ लाख फलोअर्स रहेको उक्त आईडीमा प्रधानमन्त्री ओली र शिनावात्रका पाँच ओटा भिडिओ अपलोड भएका छन् । जसमा लाखौँ भ्युज छ ।
ती पोस्टमा आएका अधिकांश कमेन्ट नेपाली प्रयोगकर्ताको छ । जसमा प्रायले प्रधानमन्त्री ओलीलाई विभिन्न उपनाम दिँदै गाली गरेका छन् ।
‘ingshinawatra.fan’ नामको ८३ हजारभन्दा बढी फलोअर्स रहेको अर्को फ्यान पेजमा पनि विभिन्न देशका सरकार प्रमुखहरूसँग भएका भेटको भिडिओ अपलोड भएका छन् । उक्त अकाउन्टमा सार्वजनिक भिडिओमा जहाँ-जहाँ नेपालका प्रधानमन्त्रीको भिडिओ छ, त्यहाँ नकारात्मक कमेन्ट बढी गरिएको छ ।
‘susielovezuma’ नामको चार लाख पाँच हजारभन्दा बढी फलोअर्स भएको टिकटक अकाउन्टमा पनि नेपाल र थाई प्रधानमन्त्रीबिचको भेटवार्ताको भिडिओ राखिएको छ । दुई लाख १० हजारभन्दा धेरैपटक हेरिसकिएको उक्त भिडिओमा नेपालीहरूले कमेन्ट गर्न भ्याएका छन् ।
टिकटकमा भाइरल भएका यी भिडिओहरूमा केही नेपालीले भने दुई राष्ट्रबिच सकारात्मक सम्बन्ध स्थापनाको कामना गरेका छन् । र, प्रधानमन्त्री ओलीको बारेमा सकारात्मक कुरा लेख्न शब्द खर्चेका छन् । तर, अधिकांशले प्रधानमन्त्री ओलीको बारेमा नकारात्मक कमेन्ट गरेको देखिन्छ । यस्तो नकारात्मक प्रतिक्रिया देख्दा मित्र राष्ट्रका नागरिकले नेपालको नेतृत्व र जनताबारे के सोच्लान् भन्ने विषयमा पनि बहस हुन थालेको छ ।
पछिल्लो अध्यावधिक: चैत २२, २०८१ १८:१०
सामाग्री श्रोत :
टेक पाना
