काठमाडौँ । के तपाईँ आफ्नो अनलाइन व्यवसाय वा ई-कमर्स व्यवसाय छिटो अनि प्रभावकारी ढङ्गले अगाडि बढाउन चाहनु हुन्छ ? अर्डर लिनेदेखि डेलिभरीसम्मको काम म्यानुअल्ली एक एक गरी गर्दा ढिलाई भएर ग्राहकहरू तपाईँको सेवाबाट असन्तुष्ट भइरहेका पो छन् कि ? 

अब चिन्ता नगर्नुहोस्,  यिनै समस्याहरूलाई नै समाधान गर्न ईआरपी सफ्टवेयर ओडूमा पाउन सक्नुहुन्छ अटोमेसन इन ई-कमर्स (Automation in ecommerce) । जसमा तपाईँले अर्डर र डेलिभरी दुवैको अटोमेसन सुविधा पाउन सक्नुहुन्छ । 

यसबाट अनलाइन व्यवसायलाई पूर्ण रूपमा स्वचालित गरेर सजिलो, छरितो र स्मार्ट बनाउन सकिन्छ, अर्थात् सबै कुरा स्वचालित हुन्छ । ग्राहकले ओडू पावर्ड स्टोर (Odoo powered store) बाट अर्डर गरेपछि तपाईँको सेल्स अर्डर, उपलब्ध स्टकदेखि लिएर डेलिभरी प्रोसेस ढिलाई बिना नै सुरु हुन्छ । 

यो प्रणालीमा क्याश अन डेलिभरी (Cash on Delivery-COD) छनोट गर्ने ग्राहकको भुक्तानी नभएसम्म पेन्डिङको रूपमा राखिन्छ र भुक्तानी प्राप्त भएको पुष्टि भएपछि बैँक खातामा मिलान गरिन्छ । जसले गर्दा तपाईँको अकाउन्टिङ, आम्दानी लगायत सबै महत्त्वपूर्ण कुराहरू यथार्थ परक रूपमा ट्य्राक हुन्छन् । 

यति मात्रै होइन, ग्राहकको बिल सोझै ग्राहकको ई-मेलमा जान्छ र तपाईँको अकाउन्टिङ सिस्टममा स्वतः रेकर्ड भएर बस्छ । त्यसैले म्यानुअल काम बिना नै कम्पनीले मानव संसाधन तर्फको अतिरिक्त खर्च जोगाउन सक्छन् । 

यसरी तपाईँले स्मार्ट तरिकाले ओडूको ई-कमर्स अटोमेसन प्रणालीबाट आफ्नो व्यवसाय सञ्चालन गर्नु भयो भने प्रभावकारी रूपमा काम हुनुका साथै समय बचत हुन्छ । यति मात्र होइन, मानवीय त्रुटिबाट जोगिनुका साथै ग्राहकको सन्तुष्टि समेत बढाउन सघाउँछ । यसरी अन्ततः तपाईँको व्यवसायलाई नै फाइदा पुग्छ । यो सेवा ओडूको स्थानीय साझेदार कम्पनीले नेपालमा उपलब्ध गराउँदै आएको छ । 

पछिल्लो अध्यावधिक: असार १, २०८२ १६:४५

काठमाडौं– नेपाल आयल निगमले पेट्रोलियम पदार्थको मूल्य वृद्धि गरेको छ।

इण्डियन आयल कर्पाेरेशनबाट मूल्य बढेर आएपछि नेपालमा पनि निगमले समायाेजन गरेकाे हाे। यससँगै अब पेट्राेलकाे पहिलाे वर्गमा प्रतिलिटर १५७.५०, दाेस्राेमा १५९ र तेस्राेमा १६० रुपैयाँ पुगेकाे छ।

बढेकाे मूल्य आजै रातिदेखि लागू हुने निगमले जनाएकाे छ।



 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

जलेश्वर । विगत केही दिनदेखि एक्कासी गर्मी बढेपछि महोत्तरीको बर्दिवास नगरपालिकाले आफ्नो नगर क्षेत्रका विद्यालय तीन दिनका लागि बन्द गरेको छ।

बर्दिवास नगरपालिकाले एक सूचना जारी गर्दै आजदेखि लागू हुने गरी नगरक्षेत्रभित्रका सबै सामुदायिक, संस्थागत तथा धार्मिक विद्यालयमा तीन दिनका लागि पठनपाठन बन्द गरेको छ।

नगरपालिकाका प्रमुख प्रशासकीय अधिकृत एवं उपसचिव रेवतीप्रसाद पराजुलीद्वारा हस्ताक्षरित सूचनामा विगत केही दिनदेखि बढ्दै गएको अत्यधिक गर्मी तथा तातो हावाका कारण मौसम प्रतिकूल भएको हुँदा विद्यार्थीको स्वास्थ्य अवस्थालाई मध्यनजर गर्दै शैक्षिक सत्र २०८२ को बर्षे बिदाबाट कट्टा हुने गरी असार १ गतेदेखि ३ गतेसम्मको लागि विद्यालयको पठनपाठन बन्द गर्न गराउन सूचना जारी गरिएको उल्लेख गरिएको हो।

महोत्तरीमा करिब दुई सातादेखि तापक्रम ४० डिग्रीदेखि ४२ डिग्रीसम्म बढेपछि स–साना बालबालिकाहरु बढी प्रभावित हुन थालेपछि बर्दिवास नगरपालिकाले तीन दिनसम्म सम्पूर्ण विद्यालयको पठन पाठन बन्द गरेको हो ।

काठमाडौँ । अस्ट्रेलियाबाट सर्भर सञ्चालन गरेर राजस्व आयकर छली गरेको ठहर गर्दै राजस्व अनुसन्धान विभागले नेपाल क्यान मुभ प्रालिका सञ्चालकविरुद्ध उच्च अदालत पाटनमा मुद्दा दायर गरेको छ । कूल १ अर्ब ३६ करोड रुपैयाँभन्दा बढी रकम बिगो माग दाबी गर्दै विभागले ६ जनाविरुद्ध आइतबार मुद्दा दायर गरेको हो । 

कम्पनीका प्रमुख सञ्चालक सुदिप आचार्य, जीवन ज्ञवाली, गंगाबहादुर थापा, मनिषप्रसाद आचार्य, मिठु पौडेल र उप-कार्यकारी निर्देशक संगम पौडेलविरुद्ध एक अर्काको मिलेमतोमा अस्ट्रेलियाबाट सर्भर सञ्चालन गरेर कर छलि गरेको आरोपमा राजस्व चुहावट (अनुसन्धान तथा नियन्त्रण) ऐनअनुसार मुद्दा दायर गरिएको हो । मुलुकी फौजदारी कार्यविधि संहिता २०७४ अनुसार मुद्‍दा दायर गर्दै सबै प्रतिवादीबाट क्षतिपूर्ति भराउनुपर्ने माग विभागले गरेको छ । 

विभागका अनुसार काठमाडौँको तीनकुनेस्थित नेपाल क्यान मुभको कार्यालयले कर छली गरेको गोप्य सूचना पाएपछि छापा मारेर त्यहाँको portal.nepalcanmove.com पोर्टल नियन्त्रणमा लिइएको थियो । उक्त पोर्टलबाट आर्थिक वर्ष २०७६/०७७ देखि २०८१/८२ को फागुन मसान्तसम्मको ट्रायल ब्यालेन्स प्रिन्ट गरेर ल्याइएको थियो । साथै, अन्य कागजातहरू तथा डिजिटल प्रमाणहरू पनि बरामद गरिएका थिए ।

विभागको अनुसन्धानअनुसार कम्पनीले सर्भर अस्ट्रेलियामा राखेर  कारोबार विवरण आन्तरिक राजस्व विभागबाट लुकाउँदै आएको देखिएको छ । उक्त पोर्टलमार्फत भएका विक्रीहरूलाई तोडमोड गरेर वास्तविक विवरणमा नदेखाइ म्यानुअल बिलिङ प्रणाली अपनाएर कर छली गरिएको पुष्टि भएको विभागले जनाएको छ । 

अनुसन्धानका क्रममा कम्पनीका प्रमुख सेयरधनी रूपन्देहीका सुदिप आचार्य (५५.३३%) र गुल्मीका जीवन ज्ञवाली (१६%) लाई विभागको पटक पटकको ताकेता गर्दा पनि उपस्थित नभएर फरार भएको बताइएको छ । कम्पनीले ७८ करोड २८ लाख ४६ हजार रुपैयाँ बराबरको सेवा विक्री लुकाएको ठहर गर्दै विभागले मूल्य अभिवृद्धि कर ऐनको दफा २९(२) अनुसार कर, जरिबाना र ब्याज गरेर २६ करोड ७ लाख ५० हजार ५१५ रुपैयाँ जरिबाना ठहर गरेको छ ।

साथै, सेवा विक्रीलाई आयकर विवरणमा नदेखाई आय लुकाएको ठहर गर्दै  ४२ करोड ३६ लाख ५५ हजार २४५ रुपैयाँ जरिबाना गरेर ६८ करोड ४४ लाख ५ हजार ७६० रुपैयाँ बिगो कायम गरिएको छ । उक्त रकममा शतप्रतिशत जरिबाना थपेर १ अर्ब ३६ करोड रुपैयाँभन्दा बढी सरकारलाई हानी पुर्‍याएको आरोप लगाउँदै विभागले अभियोग पत्र पेस गरेको हो ।

पछिल्लो अध्यावधिक: असार १, २०८२ १९:१४

काठमाडौँ– परराष्ट्रमन्त्री डा आरजुराणा देउवाले इजरायल र इरानबीच पछिल्ला तीन दिनदेखि विकसित घटनाक्रमका सन्दर्भमा सो क्षेत्रमा रहेका नेपाली नागरिकको सुरक्षाका विषयमा चासो व्यक्त गर्दै उच्च प्राथमिकतामा राखेर काम गर्न सम्बन्धित मुलुकका नेपाली राजदूतलाई निर्देशन दिएकी छन्।

मन्त्री डा राणाले इजरायलको तेल अभिभ र कतारको दोहास्थित नेपाली राजदूतहरुलाई टेलिफोन सम्पर्क गरी नेपालीको सुरक्षालाई उच्च प्राथमिकतामा राखेर काम गर्न, निरन्तर सम्पर्कमा रहन र सम्बन्धित मुलुकले जारी गरेका सुरक्षा सतर्कतासम्बन्धी अद्यावधिक सूचना नियमित रुपमा प्रवाह गरी नेपालीलाई निरन्तर सुसूचित गर्न निर्देशन दिएकी छन् ।

हाल इजरायलमा करिब पाँच हजार ५०० र इरानमा करिब १२ जना नेपालीहरु रहेको र उनिहरु सबैजना सुरक्षित रहेको जानकारी प्राप्त भएको मन्त्रालयले जनाएको छ । इजरायल र इरानबीच विकसित उक्त घटनाक्रमलाई नेपाल सरकारले नजिकबाट नियालिरहेको र त्यहाँ रहेका नेपालीहरुको हित सुनिश्चित गर्न आवश्यकताअनुसार उपयुक्त कदम चालिने मन्त्रालयको भनाइ छ । 

मन्त्रालयले नेपाली राजदूतावास, तेल अभिभमा नियोग उप-प्रमुख/प्रवक्ता कुमारबहादुर श्रेष्ठलाई फोन नं +९७२–५३५३६०७४८, ०३५१००१११ र इ-मेलः [email protected] र नेपाली राजदूतावास, दोहामा मिनिष्टर काउन्सेलर÷नियोग उप-प्रमुख कुमार राईलाई फोन नं +९७४-५५६१६०४०, +९७४-४४६७५६८१, ४४६७५६८३, ४४१७१९६२ र इ-मेलः [email protected] मा सम्पर्क गर्न सकिने जनाएको छ ।

 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । परराष्ट्रमन्त्री डा. आरजुराणा देउवाले इजरायल र इरानबीच पछिल्ला तीन दिनदेखि विकसित घटनाक्रमका सन्दर्भमा सो क्षेत्रमा रहेका नेपाली नागरिकको सुरक्षाका विषयमा चासो व्यक्त गर्दै उच्च प्राथमिकतामा राखेर काम गर्न सम्बन्धित मुलुकका नेपाली राजदूतलाई निर्देशन दिएका छन्।

मन्त्री डा. राणाले इजरायलको तेल अभिभ र कतारको दोहास्थित नेपाली राजदूतहरुलाई टेलिफोन सम्पर्क गरी नेपालीको सुरक्षालाई उच्च प्राथमिकतामा राखेर काम गर्न, निरन्तर सम्पर्कमा रहन र सम्बन्धित मुलुकले जारी गरेका सुरक्षा सतर्कतासम्बन्धी अद्यावधिक सूचना नियमित रुपमा प्रवाह गरी नेपालीलाई निरन्तर सुसूचित गर्न निर्देशन दिएका छन्।

हाल इजरायलमा करिब पाँच हजार ५०० र इरानमा करिब १२ जना नेपालीहरु रहेको र उहाँहरु सबैजना सुरक्षित रहेको जानकारी प्राप्त भएको मन्त्रालयले जनाएको छ। इजरायल र इरानबीच विकसित उक्त घटनाक्रमलाई नेपाल सरकारले नजिकबाट नियालिरहेको र त्यहाँ रहेका नेपालीहरुको हित सुनिश्चित गर्न आवश्यकताअनुसार उपयुक्त कदम चालिने मन्त्रालयको भनाइ छ।

मन्त्रालयले नेपाली राजदूतावास, तेल अभिभमा नियोग उप-प्रमुख/प्रवक्ता कुमारबहादुर श्रेष्ठलाई फोन नं +९७२–५३५३६०७४८, ०३५१००१११ र इ-मेलः nepalembassy@012.net.il र नेपाली राजदूतावास, दोहामा मिनिष्टर काउन्सेलर/नियोग उप-प्रमुख कुमार राईलाई फोन नं +९७४-५५६१६०४०, +९७४-४४६७५६८१, ४४६७५६८३, ४४१७१९६२ र इ-मेलः eondoha@mofa.gov.np मा सम्पर्क गर्न सकिने जनाएको छ।

काठमाडौँ । डिजिटल युगमा सामाजिक सञ्जाल केवल सम्पर्कको माध्यम मात्र रहेन, यो आपराधिक जाल बुन्ने मैदान पनि बन्न थालेको छ । राजधानी काठमाडौँमा हालै भएको एउटा घटना यसैको एउटा उदाहरण हो, जहाँ सामाजिक सञ्जालबाट सुरु भएको ‘सम्बन्ध’ यौन शोषणको धम्की र करोडौँ रुपैयाँको फिरौतीमा परिणत भयो ।

यो घटना प्रविधिको दुरुपयोगबाट कसरी मानिसको जीवन धरापमा पर्न सक्छ भन्ने एउटा तितो यथार्थको ज्वलन्त उदाहरण बनेको छ । कथा सुरु हुन्छ, राज चौलागाईं (नाम परिवर्तन) लाई ‘आँचल चौगुठी’ नामक फेसबुक आईडीबाट आएको एक फ्रेन्ड रिक्वेस्टबाट । युवतीको रिक्वेस्ट देखेर राजले तत्काल स्वीकार गरे । त्यसले दुवै जनाबिच कुराकानीको बाटो खोल्यो । यसै क्रममा आँचलले राजलाई भेट्न महाराजगन्ज बोलाइन् ।

२०८१ चैत २३ गते महाराजगन्जको बगर हाउस पुगेका राजको आँचल र उनको साथमा आएकी ममता तामाङसँग पहिलो पटक भेट भयो । फोन नम्बर आदानप्रदान गरेर त्यस दिन उनीहरू छुट्टिए ।

तीन दिनपछि, २०८१ चैत २६ गते आँचल र ममताले राजलाई ठमेलस्थित होलिडे रिजेन्सी होटेलमा बोलाए । तीनै जनाले होटेलको कोठामा खाजासँगै मादक पदार्थ पनि सेवन गरे । तर आफू भने त्यसक्रममा ‘अचेत’ हुन पुगेको कुरा राजले जाहेरीमा खुलाएका छन् । यही मौकामा ममता तामाङले आँचल र राजबिच भएका ‘किस’ लगायत नग्न फोटो तथा भिडिओ मोबाइलबाट खिचिन् ।

घटनाको एक महिनापछि, २ जेठ २०८२ का दिन राजलाई मेसेन्जरमा सम्पर्क गरी आँचलले ती संवेदनशील फोटो तथा भिडिओहरू पठाइन् । त्यससँगै राजविरुद्ध यौन शोषणको मुद्दा हालेको भनी निवेदनको फोटोसमेत पठाइएको थियो । यद्यपि उक्त निवेदन नक्कली थियो । यदि काठमाडौँमा घर र चार आना जग्गा नदिए यौन शोषणको मुद्दा लगाउने धम्की राजलाई दिन थालिन् । मानसिक दबाबमा राखेर उनीहरूले केही रकम हात पारे । 

त्यसपछि राजलाई अनामनगरको टिम्बुर रेस्टुरेन्टमा बोलाए । त्यहाँ आँचल र ममतासँगै यस अपराधका मुख्य योजनाकार मानिएका दीपक विष्ट र राजेन्द्र विष्ट पनि आएका थिए । उनीहरूले ‘केस मिलाउन’ भन्दै ७० लाख रुपैयाँ माग अघि सारे । रकम नदिए मुद्दा चलाउने धम्की दिएपछि दबाबमा परेका राजले ८ जेठ २०८२ को मिति राखेर प्राइम कमर्सियल बैंकमा रहेको आफ्नो खाताबाट आँचल चौगुठीको नाममा ५ लाख रुपैयाँको चेक काटिदिए । तर बाँकी रकम पछि दिनुपर्ने भन्दै राजमाथि उनीहरूले मानसिक यातना भने दिइरहे । 

यसरी मानसिक यातना र धम्की आएपछि राजले ७ जेठ २०८२ का दिन प्रहरीमा उजुरी दिए र तत्काल अनुसन्धान अघि बढ्यो । सोही दिन प्रहरीले आँचल चौगुठी र ममता तामाङलाई पक्राउ गर्न सफल भयो । उनीहरूको साथबाट ५ लाख रुपैयाँको चेक, दुई ओटा मोबाइल फोन लगायतका सामग्री बरामद गरिएका छन् । 

प्रहरी समक्ष बयान दिँदै दुवै महिलाले आफ्नो संलग्नता स्वीकारेका छन् । आँचल चौगुठीले राजेन्द्र विष्टको निर्देशनमा राजको नग्न फोटो र भिडिओ बनाएको र त्यसबाट आर्थिक लाभ लिने उद्देश्य रहेको बयान दिएकी छिन् । ३४ वर्षीय आँचल भक्तपुर-१७ घर भई हाल काठमाडौँ ५ हाँडीगाउँ र ३४ वर्षकी ममता चाहिँ कैलाली, गोदावरी-१० घर भई हाल काठमाडौँ-५ कालोपुल बस्दै आएकी थिइन् । 

कञ्चनपुरको साबिक सुडा-३ घर भई हाल काठमाडौँ-५ कालोपुल बस्ने ३६ वर्षीय दिपक विस्ट र कञ्चनपुरकै  पिपलाडी घर भएका दिपक राजेन्द्र विष्ट भने फरार रहेको भन्दै अदालतबाट पक्राउ पुर्जीको माग गरिएको छ । पक्राउ परेका आँचल र ममता विरुद्ध एक्सटर्सन (आपराधिक लाभ) लिन नहुने कसुरमा अदालतमा मुद्दा सुरु भएको छ । 

पछिल्लो अध्यावधिक: असार १, २०८२ २०:३९

काठमाडौं– आइतबार पनि इजरायलमा विस्फोटका आवाज सुनिएका छन् । इरानले हाइफा र तेल अभिभ लगायतमा क्षेत्रमा गरेको क्षेप्यास्त्र प्रहारबाट १३ जना इजरायली नागरिकको मृत्यु भएको छ ।

इजरायली सञ्चारमाध्यम दि जेरुसेलम पोस्टका अनुसार आक्रमणमा कम्तीमा २७० जना घाइते भएका छन् । शुक्रबारयता इजरायलले गरेको आक्रमणबाट इरानमा भने २७० भन्दा धेरैको मृत्यु भइसकेको छ भने ८०० जना घाइते भएका छन् ।

जेरुसेलम पोस्टले समाज कल्याण मन्त्रालयलाई उदृत गर्दै इरानी आक्रमणका कारण कम्तीमा ७२४ जना सर्वसाधरण घरबारविहीन भएको उल्लेख गरेको छ । एबीसी न्युजका अनुसार दुई रातमा इरानले दुई सय ब्यालेस्टिक मिसाइल इजरायलतर्फ प्रहार गरेको थियो ।

सीएनएनले इजरायली डिफेन्स फोर्सले इरानी आक्रमण रोक्न सुरक्षा प्रणाली सक्रिय रहेको बताउँदै नागरिहरुलाई सुरक्षित स्थानमा बस्न निर्देशन दिएको जनाएको छ । तेलअभिभस्थित सीएनएन संवाददाताहरुले सहरमा खतराको संकेत जनाउने साइरन बजिरहेको बताएका छन् ।

इरानमा पनि आइतबार दिउँसो इजरायली आक्रमण भएको छ । सीएनएनले स्थानीयलाई उदृत गर्दै तेहरानमा दिउँसो नयाँ विस्फोटले सहरमा कम्पन उत्पन्न भएको उल्लेख गरेको छ । इरानी सरकारी मिडियाले आवासीय क्षेत्र भएको सहरको पश्चिमी भागमा विस्फोटका आवाज सुनिएको र धूवाँको मुस्लो आकाशमा देखिएको उल्लेख गरेका छन् । तर यो विस्फोटमा कति मानवीय क्षति भयो भन्ने उल्लेख भइसकेको छैन । विस्फोटका आवाज आइरहेका बेला इजरायली सेनाले पत्रकार सम्मेलन गरिरहेको थियो । इजरायली डिफेन्स फोर्सका प्रवक्ता इफी डेफ्रिनले भने, ‘हामी एक्कैछिन पनि आक्रमण राेक्दैनौँ । हामीले तेहरानमा एकपछि अर्को आक्रमण जारी राख्नेछौँ ।’

शुक्रबार इरानविरुद्ध इजरायलले आक्रमण गरेयता दुई देशबीच एक अर्काविरुद्ध मिसाइल आक्रमणको शृंखला जारी छ । शनिबार मध्यराति पनि इजरायलले इरानको तेल प्रशोधन केन्द्र लक्षित गरी आक्रमण गरेपछि इरानले जवाफी आक्रमण सुरु गरेको हो ।

इजरायलमा करिब ५ हजार ५०० र इरानमा रहेका १२ नेपाली विभिन्न सेवा क्षेत्रमा कार्यरत छन् । आइतबार परराष्ट्रमन्त्री राणा देउवाले तेल अभिभ र दोहास्थित नेपाली राजदूतहरुलाई टेलिफोन गरी नागरिकको सुरक्षा र उनीहरुसँग निरन्तर सम्पर्कमा रहन निर्देशन दिएकी छिन् । इजरायल र इरानबीच विकसित घटनाक्रमलाई नेपाल सरकारले नजिकबाट नियालिरहेको र त्यहाँ रहेका नेपालीको हित सुनिश्चित गर्न आवश्यक उपयुक्त कदम चालिने परराष्ट्रले जारी गरेको विज्ञप्तिमा उल्लेख छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।