काठमाडौँ | यो वर्षको सुरुवातमा भारतीय अर्बपति मुकेश अम्बानीका छोराको भव्य बिहेले संसारभर चर्चा कमायो। मुम्बईदेखि इटलीको रिभिएरासम्म ७ महिना लामो यो उत्सवमा पाहुनाहरूलाई मनोरञ्जन गराउन रिहान्नादेखि जस्टिन बिबरसम्मलाई बोलाइएको थियो। अनुमानित ६० करोड डलर खर्च भएको यो बिहेले भारतका महाधनीहरूको आत्मविश्वास झल्काएको थियो। तीव्र गतिमा विस्तार भइरहेको अर्थतन्त्रले उनीहरूको सम्पत्ति थप वृद्धि गरिरहेको आभास गराएको थियो।
तर, ६ महिनापछि परिदृश्य बदलिएको छ। भारतका दुई ठूला अर्बपति, रिलायन्स इन्डस्ट्रिज लिमिटेडका प्रमुख मुकेश अम्बानी र अदानी ग्रुपका संस्थापक गौतम अदानी, दुबै चुनौतीहरूको सामना गरिरहेका छन्। यी समस्याहरूले उनीहरूको व्यवसाय र व्यक्तिगत सम्पत्तिमा ठूलो असर पारेका छन्।
गौतम अदानीले अमेरिकी सरकारको भ्रष्टाचारको आरोप खेपिरहेका छन्। यसअघि, हिन्डेनबर्ग रिसर्चले अदानीका कम्पनीहरूमाथि ठगी र आर्थिक अपचलनका आरोप लगाएपछि उनको समूहलाई ठूलो धक्का लागेको थियो। लगानीकर्ताको विश्वास जित्ने प्रयास गरिरहेका अदानीमाथि नयाँ आरोपले समस्या थपेको छ।
अदानीले यी आरोपहरूको खण्डन गर्दै कानूनी रूपमा सामना गर्ने प्रतिवद्धता जनाएका छन्। यद्यपि, यी घटनाले अदानी समूहको सेयर मूल्यमा नकारात्मक प्रभाव पारेको छ। हिन्डेनबर्गको आरोपअघि १२२.३ अर्ब डलर रहेको अदानीको सम्पत्ति अहिले घटेर ८२.१ अर्ब डलरमा झरेको छ।
एसियाका सबैभन्दा धनी व्यक्तिमा गनिएका मुकेश अम्बानीको सम्पत्ति पनि गत जुलाईमा १२०.८ अर्ब डलरबाट घटेर डिसेम्बरमा ९६.७ अर्ब डलरमा झरेको छ। उनको उर्जा र खुद्रा व्यवसाय कमजोर देखिएको छ। साथै, भारतका ठूला सहरहरूमा प्रतिस्पर्धीहरूको व्यापारले अम्बानीलाई चुनौती दिएको छ।
जसका कारण अदानी र अम्बानी दुवै “१०० अर्ब डलर क्लब” बाट बाहिरिएका छन्।
अम्बानीले आफ्नो ध्यान डिजिटल प्लाटफर्म, खुद्रा ब्रान्ड, र नवीकरणीय उर्जामा केन्द्रित गरेका छन्। यद्यपि, उनका व्यवसायिक मोडलमा अझै धेरै चुनौती बाँकी छन्। त्यसमाथि, इलोन मस्कको स्तारलिंक(Starlink) भारतमा प्रवेश गर्न खोजिरहेको छ, जसले अम्बानीको डिजिटल र टेलिकम व्यवसायलाई असर पार्न सक्छ।
समाचार र भिडियो हेर्न तल का लिंकहरु मा क्लिक गर्नुहोस् :
श्रोत : साझासबल मिडिया
