साइप्रस-नेपाल
२० नोभेम्बर / लिमासोल
साईप्रसमा स्थापित नेपाली सामाजिक संघ संस्थाहरुलाई अवैतनिक वाणिज्य दूतावासमा सूचिकृत हुन नेपाली राजदूतावास इजरायलले सूचना जारी गरेको छ ।
आगामी २० डिसेम्बर २० १९ सम्मको समय सिमा भित्र नेपाली संघसंस्थाहरुको विवरण सहित निकोसिया स्थित अवैतनिक वाणिज्य दूतावास मार्फत नेपाली दूतावासमा इजरायल सूचिकृत हुनु पर्ने बताइएको छ । सूचिकृत संस्थालाई मात्र दूतावास तथा अवैतनिक वाणिज्य दूतावासबाट मान्यता प्रदान गरी सोहि अनुसार अभिलेख राखिने दुतावास द्वारा जारी सुचनामा भनिएको छ ।
सुचिकृत हुन संघसंस्थाले आफ्नो साधारण सभाबाट पारित भएको संस्थाको विधान र वर्तमान पदाधिकारीहरुको पूर्ण विवरण सहित संस्थाले विधानको उद्देश्यसँग मेल खाने कार्यक्रमहरु संचालन गरेको सो को विवरण पेश गर्नु पर्ने छ । साथै संस्थाको नाममा कुनै बैंक खाता भए या नभएको जानकारी तथा बैंक विवरण भएको भए आर्थिक कारोबारको लागि जिम्मेवार व्यक्तिको विवरण र संस्थाको हालसम्मको मौज्दात बारे जानकारी पनि दिनु पर्ने बताइएको छ ।
संस्थाबाट कार्यक्रम तर्जुमा गर्दा राष्ट्रहित तथा समुन्नतिमा सहयोग पुग्ने, नेपाल र साईप्रसबीचको सम्बन्ध अझ प्रगाढ बनाउन सहयोग पुग्ने, नेपालको पर्यटन प्रवर्द्धन हुने, नेपालको भाषा, संस्कृति र परम्परा संरक्षण र प्रवर्द्धन हुने खालका कार्यक्रम बनाउन अनुरोध गर्दै सन् २०२० मा संस्थाबाट सन्चालन गरिने कम्तिमा २ वटा प्रस्तावित कार्यक्रमको विवरण उपलब्ध गराउन भनिएको छ ।
साइप्रसमा सामाजिक, वैचारिक र जातीय गरि १५ भन्दा बढी संघसस्था भए पनि आंसिक मात्र सक्रिय छन् ।
