चितवन। नारायणगढ-मुग्लिन सडकखण्डमा वर्षायाममा हुनसक्ने पहिरोको समस्या पहिचान गरी समाधानका काम सुरु गरिएको छ। गत वर्षको असारमा सिमलतालमा दुई वटा बस पहिरोले बगाएपछि त्यस खालको समस्या नआओस् भन्नका लागि सावधानी अपनाइएको छ।

डिभिजन सडक कार्यालय भरतपुरका प्रमुख इञ्जिनिएर नारायण लामिछानेका अनुसार संवेदनशील ठाउँहरुमा पहिरो नियन्त्रणका काम भएका छन्। गत वर्ष घटना भएको सिमलतालको माथिल्लो भागमा लेदो बगेर नआओस् भन्नका लागि ससाना ‘चेक ड्याम’ निर्माण गरिएको उनले बताए। यस्तै मौरी खोला पुलको माथिल्लो भागमा पनि चेक ड्याम र खोल्सो बनाउने (लाइनिङ) को काम भएको छ।

कालीखोलालगायतका जोखिमयुक्त ठाउँहरुमा पनि आवश्यकताअनुसार पहिरो रोकथामका काम भएको उनले बताए। उनले भने, “यो वर्ष पहिरोले दुःख नदेला भन्ने अपेक्षा गरौं।” पहिरो आइहालेमा तत्काल पन्छाउने गरी व्यवस्थापन गरिएको उनी बताउँछन्।

कार्यालयले सडकखण्डको सेतीदोभान क्याम्पमा ब्याकुलोडर, ट्रक, स्काभेटर, लोडर, मिनी टिपरसहितका उपकरण राखिएको उनले जानकारी दिए। यसैगरी भरतपुरको कार्यालयमा पनि यस्ता उपकरण तयारी अवस्थामा राखिएको छ।

प्रमुख जिल्ला अधिकारी प्रकाश पौडेलले पहिरो नियन्त्रण र पहिरो खसिहालेमा तत्काल पन्छाउनका लागि आवश्यक तयारी गरिएको बताए। उनका अनुसार डिभिजन सडक र सुरक्षा निकायका अधिकारीहरुको बीचमा यसअघि छलफल गरी तयारीको काम सुरु गरिएको छ। गत वर्षको असार २८ गते दुई वटा रात्रि बस बगाउँदा ६२ जना हाराहारीलाई बगाएको थियो। तीमध्ये कतिपय अझै बेपत्ता छन्। ती दुई बस समेत फेला परेका छैनन्।

सिमलतालमा बेपत्ता बसका ३९ यात्रु अझै भेटिएनन्

गत वर्षको असार २८ गते राति दुई वटा बस एकै ठाउँबाट पहिरोसँगै त्रिशूलीमा खसेका बसका यात्रुमध्ये ३९ जना अझै बेपत्ता भएका छन्। नारायणगढ-मुग्लिन सडकखण्डको सिमलतालमा दुई बसमा ६२ जना यात्रु थिए। तीमध्ये तीन जना जीवित, २० जनाको शव भेटिएको थियो भने बाँकी अझै बेपत्ता छन्।

दुवै बस अहिलेसम्म भेटिएको छैन। जिल्ला प्रहरी कार्यालय चितवनका प्रमुख प्रहरी उपरीक्षक गोविन्द पुरीका अनुसार बा प्र ०३–००६ ख १५१६ नम्बरको एञ्जल्स डिलक्स बसमा २६ जना यात्रु थिए। तीमध्ये १० जना मृत फेला परेको र अन्य १६ जना अझै बेपत्ता छन्। तीमध्ये सात जना भारतीय यात्रु रहेकोमा दुई जना मृत फेला परेका थिए भने चार जना अझै बेपत्ता छन्।

त्यस्तै बा प्र ०३-००१ ख २४९५ नम्बरको गणपति डिलक्समा ३६ जना यात्रु रहेका थिए। तीमध्ये तीन जना जीवित, १० जनाको शव फेला परेको र २३ जना अझै बेपत्ता रहेको उनले जानकारी दिए। तीमध्ये भारतीय चार जना थिए । तीन जना मृत फेला परेका थिए भने एक जना बेपत्ता छन्।

लेदोसहितको पहिरोले वीरगञ्जबाट काठमाडौं जाँदै गरेको एन्जल डिलक्स र काठमाडौंबाट रौतहटको गौरका लागि छुटेको बागमती गणपति डिलक्स बसलाई त्रिशूलीमा खसालेको थियो।

उक्त समयमा नेपाली गोताखोरले मात्र नसकेपछि विदेशबाट समेत गोताखोर मगाइएको थियो। तर गोताखोरले पनि बेपत्ता यात्रु र बस बस फेला पार्न सकेका थिएनन्। त्रिशूलीमा बाढी आएपछि लामो समय खोजी कार्य गरिएको भए पनि बेपत्ता यात्रु र बस फेला नपरेका हुन्। कतिपय शव त्रिशूली र नारायणीका विभिन्न क्षेत्रबाट फेला परेका थिए। दुई वटा शव भारतमा फेला परेका थिए।

काठमाडौं । मेक्सिकोले अमेरिकी युट्युबर जिम्मी डोनाल्डसन ऊर्फ मिस्टर बिस्टमाथि प्राचीन माया पिरामिडको दुरुपयोग गरेको आरोप लगाएको छ । मिस्टर बिस्टले व्यावसायिक लाभका लागि माया पिरामिडको भिडिओ बनाएको भन्दै सरकारले उनको भिडिओ निर्माता कम्पनी ‘फुल सर्कल मिडिया’सँग क्षतिपूर्ति माग गरेको हो ।

बिस्टले १० मे २०२५ मा ‘मैले २००० वर्ष पुरानो प्राचीन मन्दिरको अन्वेषण गरेँ’ शीर्षकको भिडिओ अपलोड गरेका थिए । मेक्सिको सरकारका अनुसार उनले सो भिडिओ अनुमति लिएर खिचेका थिए । भिडिओमा मिस्टर बिस्ट प्राचीन माया सहरहरू घुमेको देखाइएको छ । तर, एक हप्तामा छ करोडभन्दा बढी पटक हेरिएको उक्त भिडिओको एक अंशमा उनले आफ्नो चकलेटलाई ‘माया डेजर्ट’ भन्दै प्रचार गरेका छन् ।

बीबीसीका अनुसार मेक्सिकाका अधिकारीले पुरातात्त्विक स्थलमा छायाङ्कनको अनुमति दिए पनि त्यसलाई व्यावसायिक वा नाफामूलक प्रयोजनका लागि प्रयोग गर्न अनुमति नदिएको स्पष्ट पारेका छन् । मिस्टर बिस्टका एक प्रतिनिधिले भने उक्त आरोप अस्वीकार गर्दै आईएनएएच (राष्ट्रिय मानवशास्त्र तथा इतिहास संस्थान) ले निरीक्षण गरिएका कुनै पनि पुरातात्विक स्थलमा विज्ञापन सामग्री छायाङ्कन नगरिएको दाबी गरेका छन् । “आईएनएएचले निरीक्षण गरेका कुनै पनि पुरातात्त्विक स्थलमा विज्ञापन सामग्री छायाङ्कन गरिएको थिएन,” ती प्रतिनिधिले बीबीसीलाई भने ।

उनका अनुसार चकलेटको प्रचार युट्युबरको क्याम्पिङ स्थलमा खिचिएको थियो भने भिडिओको उद्देश्य ‘मेक्सिकोका बहुमूल्य माया स्थललाई उजागर गर्नु’ थियो ।

मेक्सिकोकी राष्ट्रपति क्लाउडिया शिनबाउमले छायाङ्कन अनुमति दिँदाका सर्तहरूबारे अनुसन्धान गर्न गत बुधबार निर्देशन दिएकी थिइन् । मिस्टर बिस्टले भिडिओको क्याप्सनमा मेक्सिकाली पर्यटन तथा सरकारी अधिकारीलाई धन्यवाद दिँदै आफ्नो चकलेट उत्पादनको लिङ्क पनि समावेश गरेका छन् ।

भिडिओमा मिस्टरबिस्ट र उनको टिमले कालाकमुल र चिचेन इत्जा जस्ता माया सहरका प्रतिबन्धित क्षेत्रमा घुमेको, हेलिकप्टरबाट पिरामिडमा ओर्लिएको र प्राचीन प्रि-हिस्पानिक मास्क समातेको देखाइएको छ । एक ठाउँमा उनले ‘सरकारले हामीलाई यो गर्न दिइरहेकोमा म विश्वास गर्न सक्दिनँ’ समेत भनेका छन् ।

तर, आईएनएएचले यी दाबीलाई ‘गलत’ र ‘युट्युबरको नाटकीयता’ को संज्ञा दिएको बीबीसीले उल्लेख गरेको छ । सो संस्थानका अनुसार मिस्टरबिस्टले कहिल्यै वास्तविक प्रि-हिस्पानिक मास्क समातेका थिएनन् र हेलिकप्टरको दृश्य जस्ता अंशहरू एडिट गरी थपिएका हुन् ।

मेक्सिकोकी संस्कृति सचिव क्लाउडिया कुरिएल डे इकाजाले छायाङ्कनको अनुमति दिए पनि गलत सूचना प्रकाशन वा सम्पदा स्थलका फोटोको ट्रेडमार्क विज्ञापनका लागि प्रयोग गर्न कहिल्यै अधिकार नदिएको बताइन् । उनले बीबीसीलाई भनिन्, “पुरातात्विक स्थलहरूको मूल्यलाई विकृत गर्ने कुनै पनि व्यावसायिक गतिविधिलाई हामी अस्वीकार गर्दछौं जुन हाम्रा आदिवासी संस्कृतिहरूको विरासत र हाम्रो राष्ट्रको गौरव पनि हो ।”

उनले आईएनएएचले अनुमति लिने कम्पनी ‘फुल सर्कल मिडिया’ विरुद्ध ‘प्रशासनिक प्रतिबन्ध’ लगाउनेबारे विचार गरिरहेको जानकारी दिइन् । ‘युट्युबका बादशाह’ उपनामले चिनिने मिस्टरबिस्टका प्लेटफर्ममा ३९ करोड ५० लाखभन्दा बढी फलोअर छन् । विवादित माया पिरामिड सम्बन्धी भिडियो यो सामग्री तयार पार्दासम्म छ करोड ८६ लाख बढी भ्युज छ ।

पछिल्लो अध्यावधिक: जेठ ५, २०८२ १२:३

काठमाडौं– नेपाल आईसीसी टी–२० महिला विश्वकपको ग्लोबल क्वालिफायरमा छनोट भएको छ। 

थाइल्याण्डको बैंककमा जारी एसिया क्षेत्र छनोट अन्तर्गत सुपर थ्रीमा संयुक्त अरब इमिरेट्स (यूएई)लाई हराउँदै नेपाल एक खेल अगावै ग्लोबल क्वालिफायरमा छनोट भएको हो। 

बैंककस्थित टर्डथाई क्रिकेट मैदानमा टस हारेर ब्याटिङ गर्दै यूएईले दिएको ११५ रनको लक्ष्य नेपालले १९ दशमलव २ ओभरमा पाँच विकेट गुमाउँदै पूरा गर्‍यो।

नेपालका लागि कप्तान इन्दू वर्माले सर्वाधिक ३३ रन बनाइन्। उनको कप्तानी इनिङ्समा नेपालले ग्लोबल क्वालिफायरमा स्थान बनाउन सक्यो।

त्यसअघि पहिले ब्याटिङको निम्तो पाएको यूएईले निर्धारित २० ओभरमा ७ विकेट गुमाउँदै ११४ रन बनाएको थियो।

यूएईका लागि इसा रोहित ओजाले सर्वाधिक ३९ रन बनाइन्। यस्तै त्रीथा सतिशले २१, हीना हरिस होट्चन्दानीले २० र लाभण्या केनीले १२ रन बनाइन्।

नेपालका लागि मनिषा उपाध्याले सर्वाधिक चार विकेट लिइन्। चार ओभरमा २० रन खर्चिँदै उनले चार विकेट लिएकी हुन्। यस्तै कविता कुँवर दुई र राजमती ऐरीले एक विकेट लिए।

जित्नै पर्ने दबाबपूर्ण खेलमा नेपालले शानदार पाँच विकेटको जित निकाल्यो। अब बाँकी थाइल्याण्डसँगको खेल हारे पनि नेपाललाई कुनै असर नपर्ने भएको छ। यूएई भने सुपर थ्रीमा दुबै खेल हार्दै प्रतियोगिताबाटै बाहिरिएको छ।

एसिया छनोटको ‘सुपर थ्री’मा आइतबार युएईलाई ५४ रनले पराजित गर्दै थाइल्यान्डले ग्लोबल छनोटमा आफ्नो स्थान सुरक्षित गरिसकेको छ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । गाजाका केही भागहरूमा जारी इजरायली सैन्य कारबाहीको बीचमा गाजामा हमासद्वारा सञ्चालित स्वास्थ्य मन्त्रालयले उत्तरी गाजाका तीनवटै सार्वजनिक अस्पतालहरूले काम नगरेको बताएको छ।

हमासद्वारा सञ्चालित स्वास्थ्य मन्त्रालयले आइतबार भनेको छ, “इजरायली सेनाले बेइत लाहियामा रहेको इन्डोनेसियाली अस्पताललाई घेरेको छ र भारी गोलीबारी गरिरहेको छ, जसले गर्दा बिरामी, डाक्टर र आवश्यक सामग्रीहरूको पहुँचमा अवरोध पुगेको छ।”

मन्त्रालयका अनुसार यो अस्पताल उत्तरी गाजामा अझै पनि सञ्चालनमा रहेको अन्तिम अस्पताल थियो। शनिबार, इजरायली सेनाले गाजामा ‘अपरेशन गिदोन्स चेरियथ’ सुरु गर्ने घोषणा गर्‍यो।

अर्कोतर्फ, युद्धविरामको बारेमा इजरायल र हमासका प्रतिनिधिहरू बीच कतारमा अझै पनि वार्ता जारी छ।

शनिबारको वार्तापछि एक प्यालेस्टिनी अधिकारीले बीबीसीलाई बताएअनुसार हमासले ६० दिने युद्धविराम र प्यालेस्टिनी कैदीहरूको रिहाइको बदलामा नौ बन्धकहरूलाई रिहा गर्ने प्रस्ताव गरेको छ।

तर इजरायली प्रधानमन्त्री बेन्जामिन नेतान्याहूले सबै बन्धकहरूलाई रिहा गर्ने र हमासले आफ्ना हतियारहरू आत्मसमर्पण गर्ने र निर्वासनमा जाने बखत आफू युद्ध अन्त्य गर्न तयार रहेको बताएका छन्।

आइतबार, हमासद्वारा सञ्चालित स्वास्थ्य मन्त्रालयले भन्यो: “बेइत हानौन र कमल अदवान अस्पतालहरूको विनाश र इन्डोनेसियाली अस्पताल सेवाबाट बाहिरिएपछि, उत्तरी गाजा पट्टीमा अब कुनै पनि कार्यरत सार्वजनिक अस्पतालहरू छैनन्।”

काठमाडौँ । काठमाडौँ महानगरपालिकाले सञ्चालन गर्न लागेको सीप मेलामा ४२ पेशाका लागि तालिम उपलब्ध हुने भएको छ । इच्छुकले जेठ ५ गते अर्थात् आजसम्म अनलाइन आवेदन दिन सक्नेछन् । महानगरले यसअघि सूचना 

प्रविधि समूहमा तय गरिएका पाँच पेशामा सात नयाँ पेशा थप गर्दै १२ पेशा बनाएको छ । हालै थपिएका पेशामा साइबर सेक्युरिटी, मल्टिमिडिया, डट नेट, जाभा, पीएचपी, ग्राफिक्स डिजाइन लगायत छन् । पहिलेबाटै डिजिटल मार्केटिङ, ड्रोन, रोबोटिक्स, फाइबर अप्टिक्स टेक्निसियन, एआई र यसको प्रयोग रहेका छन् ।

त्यस्तै ब्युटिसियन (सौन्दर्य) क्षेत्रमा ‘विक्स’ पेशा थपिएको छ । यससँगै सौन्दर्य समूहमा अब पाँच पेशा भएका छन् ।  अन्य १० समूहका ३४ पेशामा भने क्षेत्रीय विस्तार नगरिएको महानगरले जनाएको छ । पेशागत संख्या ८ थपिएपछि अहिले कुल ४२ पेशामा तालिम सञ्चालन गरिनेछ ।

कार्यान्वयन समितिका संयोजक इञ्जिनियर शैलेन्द्र झाले रोजगारदाताको माग अनुसार तालिम पेशा र कक्षा थप गरिएको जानकारी दिए । अनलाइन आवेदन प्रक्रिया र सहायता कक्ष तालिममा सहभागी हुन चाहनेले यहाँ क्लिक गरी विवरण भरी फाराम पेश गर्न सक्नेछन् ।

अनलाइन आवेदन गर्न नसक्नेका लागि आज राष्ट्रिय सभागृहमा सहायता कक्ष स्थापना गरिने समितिका सदस्य विवेक बास्तोलाले जानकारी दिए । हालसम्म ३,५७६ जनाले आवेदन दिइसकेको जनाइएको छ । आवेदकमध्ये सबैभन्दा धेरै माग डिजिटल मार्केटिङ, बारिस्ता, एआई, बेकरी र ब्युटिसियन पेशामा देखिएको छ । महानगरले सरकारी, गैरसरकारी तथा निजी क्षेत्रसँग सहकार्य गर्दै २०८२ जनालाई निःशुल्क तालिम दिने लक्ष्य राखेको हो ।

तालिममा काठमाडौँ महानगरभित्र स्थायी वा अस्थायी रूपमा बसोबास गर्ने, ल्याण्डफिल प्रभावित क्षेत्रका बासिन्दा, फरक क्षमता भएका व्यक्ति, तथा सडक पेटीमा व्यवसाय गर्नेहरूलाई प्राथमिकता दिइनेछ । तालिममा १८ देखि ५८ वर्ष उमेर समूहका नेपाली नागरिक सहभागी हुन पाउनेछन् । ३० दिनसम्म दैनिक ६ कक्षा गरी १०० घण्टा तालिम दिइनेछ ।

पछिल्लो अध्यावधिक: जेठ ५, २०८२ ९:४६

काठमाडौँ – नेपाली युवा बक्सर अविरल घिमिरेले किक बक्सिङ खेलको इतिहासमा नयाँ कीर्तिमान कायम गर्न सफल भएका छन् ।  ‘हिमालयन चितुवा’को नामले विश्व परिचित बक्सर घिमिरेले पहिलो पटक तीनवटा अन्तरराष्ट्रिय ‘किक बक्सिङ टाइटल’ हात पार्दै अदम्य साहस तथा असाधारण उपलब्धि हासिल गरेका हुन् । 

बक्सर घिमिरेले जापानको ओसाका सहरमा आइतबार सम्पन्न  विश्व प्रसिद्ध ‘के वन क्रस १७५’को उपाधि चुम्दै नयाँ कीर्तिमान बनाउन सफल भएका हुन् । अत्यन्त प्रतिस्पर्धात्मक प्रतियोगितामा उनले जापानी किक बक्सिङ ‘च्याम्पियन’ ओडा जिन्कलाई दोस्रो राउण्डमा परास्त गर्दै विश्व ‘च्याम्पियन’ बनेका हुन् । 

 ‘च्याम्पियन’ जिन्कलाई रिङ्मा ढाल्ने बक्सर घिमिरे पहिलो नेपाली खेलाडी बनेको बक्सर अविरलका पिता एवं पूर्वअन्तरराष्ट्रिय किक बक्सर तथा फुलकन्ट्र्याक कराँते खेलाडी देव घिमिरेले जानकारी दिए । उनका अनुसार ‘के वन क्रस १७५’ लाई किक बक्सिङ खेलका क्षेत्रमा अन्त्यन्त प्रतिष्ठित प्रतियोगिता मानिन्छ । सो अन्तरराष्ट्रिय खेल हेर्ने जापानमा रहेका नेपाली  तथा जापानीको उल्लेखनीय सहभागीता रहेको कराँते खेलाडी देवले बताए । 

प्रतियोगिताका लागि बक्सर अविरलले थाइल्याण्डको फुकेट सहरस्थित टाइगर मोथाई क्लबमा करिब डेढमहिना आफ्नै खर्चमा बन्द प्रशिक्षणसमेत लिएका थिए ।  ‘के वन क्रस १७५’को उपाधि हात पारेपछि बक्सर अविरलले भन्नुभयो, “ ‘के वन क्रस १७५’को उपाधि हात पार्नु नेपाल र मेरो लागि ऐतिहासिक क्षण हो । यसका लागि मेरा पिता एवं प्रशिक्षक कराँते खेलाडी देवलाई विशेष धन्यवाद दिन चाहन्छु । मेरो खेल हेर्न हलमा सहभागी भएका नेपाली र जापानी खेलप्रेमीलाई पनि धन्यवाद दिन चाहन्छु । मेरो खेलयात्रा जारी रहने छ । ”

किक बक्सिङ खेल क्षेत्रमा एकपछि अर्को ऐतिहासिक कीर्तिमान बनाउन सफल भएका बक्सर अविरलले हालै ‘के वान वल्र्ड म्याक्स २०२५’ प्रतियोगिताको उपाधि जितेका थिए । ‘के वान प्रोफेसनल किक बक्सिङ’द्वाराजापानको टोकियो सहरस्थित नेशनल योयोगी स्टेडियम गत माघको अन्तिम साता आयोजित सो प्रतियोगितामा उनले जापानका बक्सर यसुहितो सिरासुलाई ढाल्दै विजयी हुन सफल भएका थिए ।

यसैगरी गत कात्तिक ११ मा इन्टरनेशनल स्पोर्टस् किक बक्सिङ एसोसिएसनद्वारा जापानको नागोया सहरस्थित नागोया कंग्रेस सेन्टरमा आयोजित ‘इन्टरनेशनल किक बक्सिङ’ (इस्का) प्रतियोगितामा ‘हिमचितुवा’ले विश्वप्रसिद्ध फ्रान्सका बक्सर एन्टोनिन मार्कोनीलाई ढाल्दै ‘वल्र्ड च्याम्पियन’ हुन सफल भएका थिए ।

हालसम्म फ्रान्स, जापान, दक्षिण कोरिया, ब्राजिल, बोलिभिया, नेदरल्याण्ड, थाइल्याण्डलगायत देशका बक्सरलाई पराजित गरिसकेका युवा पुस्ताका चर्चित खेलाडी अविरलले अन्तरराष्ट्रिय प्रतियोगितामा नेपाली झण्डा फहराउँदै विश्वमा नेपालको पहिचान बनाउन सफल भएका छन् । 

बक्सर अविरल आफ्ना पिता बक्सर देवको साथमा जापानको नागोया सहरमा बस्दै आएका छन् । कराँते खेलाडी देव सन् २००४ मा कोरियाको सोलमा सम्पन्न ‘के वान प्राफेसलन किक बक्सिङ प्रतियोगिता’मा सहभागी हुने पहिलो दक्षिण एसियाली खेलाडी हुन् । चन्द्रागिरि नगरपालिका–१२ गुर्जुधारा बलम्बूका बासिन्दा उनको परिवार हाल जापानको नागोया सहरमा बसोबास गर्दै आइरहेको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

भरतपुर। चितवन नजिकको टिकौली जंगल प्राकृतिक सौन्दर्य र जैविक विविधताका लागि प्रसिद्ध छ।

चितवन राष्ट्रिय निकुञ्जको जैविक मार्ग क्षेत्रको रूपमा रहेको यस जंगलमा दुर्लभ वन्यजन्तु, चरा र वनस्पतिहरू पाइन्छन्।

टिकौली जंगलमा भ्रमण गर्दा पर्यटकहरूले एकसिङ्गे गैंडा, पाटे बाघ, विभिन्न प्रजातिका मृग र चराहरू देख्न सक्छन्। यस क्षेत्रको रामसार सूचीमा सूचीकृत विसहजारी ताल जैविक मार्गको महत्त्वपूर्ण हिस्सा हो।

तस्बीर : नेपाल न्युज बैंक

काठमाडौँ । गुगलले आफ्नो एआई टुल जेमिनाईमा भिडिओ संवाद गर्न सकिने नयाँ सुविधा सबैका लागि उपलब्ध गराएको छ । कम्पनीले केही दिनअघि घोषणा गरेको यो फिचर अब सबै प्रयोगकर्ताका लागि निःशुल्क उपलब्ध भएको हो ।

यसअघि यस्तै प्रकारको सुविधा ओपनएआईको च्याटजीपीटीमा उपलब्ध थियो । तर, त्यसका लागि प्रयोगकर्ताले मासिक २० डलर शुल्क तिरेर च्याटजीपीटी प्लसको सब्सक्रिप्सन लिनुपर्ने बाध्यता थियो । यता गुगलले भने जेमिनाईमा यो फिचर निःशुल्क उपलब्ध गराएको छ । यसले गर्दा प्रयोगकर्ताले कुनै अतिरिक्त शुल्क बिना नै भिडिओ संवाद गर्न सक्नेछन् ।

जेमिनाईसँग भिडिओ संवाद गर्दा क्यामेरा खुल्छ । क्यामेराले खिचेको दृश्य स्क्रिनमा देखिन्छ । त्यसपछि तपाईंले त्यही दृश्यसँग सम्बन्धित जिज्ञासा जेमिनाईसँग सोध्न सक्नुहुन्छ । तपाईंले केही सोध्नु भएन भने पनि जेमिनाई आफैँले उक्त वस्तु पहिचान गरेर तपाईंलाई जानकारी दिन्छ । 

यो फिचर प्रयोग गर्न सबैभन्दा पहिले जेमिनाई एप खोल्नुहोस् । एप अपडेट गर्नुपर्नेछ भने अपडेट गर्नुहोस् । एप खोलिसकेपछि तल दायाँपट्टि रहेको तीन ओटा लाइनको अप्सनमा ट्याप गर्नुहोस् । यति गरेपछि जेमिनाई लाइभको पेज खुल्छ । 

त्यसमा तलपट्टि बायाँतिर भिडिओको अप्सन देख्न सकिन्छ । भिडिओ संवाद गर्न उक्त अप्सन छान्नुहोस् । डिफल्ट रूपमा पछाडिको क्यामेरा खुलेको हुन्छ । तपाईंले क्यामेरा जता तेर्साउनु भयो त्यहीको दृश्य स्क्रिनमा देखिन्छ । र, जेमिनाईले त्यसैका विषयमा चर्चा गर्न सघाउँछ । तपाईंले अर्को कुनै व्यक्तिलाई भिडिओ कल गरेर क्यामेरा देखाएर सोधे जस्तै जेमिनाईलाई विभिन्न विषयमा सोध्न सक्नुहुन्छ । 

त्यस्तै यसमा स्क्रिन शेयरको फिचर पनि उपलब्ध छ । तपाईंको मोबाइलमा कुनै समस्या आयो वा तपाईंलाई कुनै टिप्स चाहियो भने स्क्रिन शेयर गरेर आफ्नो समस्या राख्नुहोस् । एपले तपाईंलाई गाइड गर्न सक्छ । यसरी विभिन्न तरिकाले जेमिनाईको स्क्रिन शेयर गरेर आफूलाई परेका समस्या समाधान गर्न सक्नुहुन्छ ।

पछिल्लो अध्यावधिक: जेठ ५, २०८२ ९:५५