काठमाडौँ । राहदानी विभागले इलेक्ट्रोनिक मसिन रिडेबल ट्राभल डकुमेन्ट (ईएमआरटीडीएस) को ठेक्का दुई जर्मन कम्पनीलाई दिएको छ । बिहीबार छुट्टाछुट्टै सूचनामार्फत विभागले दुवै कम्पनीको सँग ठेक्का सम्झौता गर्न चाहेको जानकारी गराएको हो ।
दुई प्याकेजमा विभाजित ईएमआरटीडीएसको प्याकेज-१ मुइलबर आईडी सर्भिसेज जीएमबीएच (Muehlbauer ID Services GmbH) लाई एक अर्ब ५५ करोड ८ लाख १४ हजार ३२५ तथा ७ लाख ३८ हजार ५३६ गरी एक अर्ब ५५ करोड १५ लाख ५२ हजार ८६१ रुपैयाँमा दिइएको छ । जसमा प्रि-इनरोलमेन्ट, इनरोलमेन्ट, डेटा म्यानेजमेन्ट र डेलिभरी सिस्टम लगायत ईएमआरटीडीएस सिस्टमको काम समावेश छ ।
त्यसैगरी परियोजनाको प्याकेज-२ को ठेक्का ६ अर्ब ११ करोड ३८ लाख २७ हजार ३७० का अतिरिक्त १६ करोड १६ लाख ८ हजार ३८४ गरी ६ अर्ब २७ करोड ५४ लाख ३५ हजार ७५४ रुपैयाँको ठेक्का जर्मनीकै भेरिडोस जीएमबीएच (Veridos GmbH) लाई हस्तान्तरण गरिएको छ ।
जसमा ईएमआरटीडीएसको बुकलेटसहित पर्सनलाइजेसन, क्वालिटी कन्ट्रोल र प्याकेजिङ सिस्टम समावेश छ । दुवै प्याकेजको ठेक्का सम्झौताका लागि तय गरिएको मूल्य ७ अर्ब ८२ करोड ६९ लाख ८८ हजार ६१५ रुपैयाँ हुन आउँछ । उल्लिखित दुवै कम्पनी न्यूनतम बोलकबोल रकमको आधारमा छनौट गरिएको विभागले जनाएको छ ।
पछिल्लो अध्यावधिक: जेठ २३, २०८२ २१:०
सामाग्री श्रोत :
टेक पाना
बुटवल– नवलपरासीमा एक युवकले कोदालाे प्रहार गरी आफ्नै बुबा र छिमेकीको हत्या गरेका छन् । जिल्लाको सुनवल नगरपालिका वडा नम्बर २ अवरैयामा २७ वर्षीय हेमराज थारुले बुबा ५० वर्षीय जयराम थारु र छिमेकी ७० वर्षीय नाथु धरिकारको हत्या गरेका हुन् ।
शुक्रबार उनले कोदालोले प्रहार गरेर बुबा र छिमेकीको हत्या गरेको जिल्ला प्रहरी कार्यालय नवलपरासीका सूचना अधिकारी बिरदत्त पन्तले जानकारी दिए ।
हेमराजले आफ्नै बुबाको कोठाभित्रै कोदालो प्रहार गरेर हत्या गरेका हुन् । उनले लगत्तै छिमेकी धरिकारलाई घर अगाडिको बाटोमै हत्या गरेको प्रहरी जनाएको छ ।
प्रहरी नायव उपरीक्षक पन्तका अनुसार हत्याको कारणबारे अझै खुल्न सकेको छैन । हेमराजलाई भने प्रहरीले नियन्त्रणमा लिएको छ ।
हेमराज रुपन्देहीमा मणिग्रामस्थित सुधार गृहमा बसेर केही समय अगाडि मात्रै निस्किएको प्रारम्भिक अनुसन्धानबाट खुलेको छ । उनी तीन महिना सुधार गृहमा बसेका थिए । हत्याबारे थप अनुसन्धान अगाडि बढाइएको प्रहरीले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
नेपालमा छात्रवृत्तिमा पढेका आँखा रोग विशेषज्ञ चिकित्सकहरूको दुई वर्षे सेवा अवधिलाई प्रभावकारी बनाउन पारदर्शी र सहभागितामूलक परिचालन प्रणाली आवश्यक छ। सरकारी अस्पतालमा पर्याप्त पूर्वाधार, उपकरण, जनशक्ति र बिरामीमैत्री वातावरण सुनिश्चित गर्नुपर्छ। अस्पतालको पूर्वमूल्यांकन, अनुभवी विशेषज्ञसँग सहकार्य र प्राविधिक सहयोगले सेवा गुणस्तरीय बनाउन सकिन्छ।
समयमै तलब, प्रोत्साहन, मानसिक स्वास्थ्य सहयोग र सुरक्षित आवासले चिकित्सकको मनोबल र कार्यक्षमता बढ्छ। नेत्र सेवालाई मुख्य विभागको रूपमा स्थापित गर्दै मोतिबिन्दु शल्यक्रिया र अन्य विशेष सेवाहरू विस्तार गर्नुपर्छ।
निजी क्षेत्रसँग सहकार्य गर्दा सरकारी जिम्मेवारीबाट पन्छिनुहुँदैन। थप अध्ययन, तालिम, र सम्मानजनक वातावरणले चिकित्सकहरूलाई देशको सेवा गर्न प्रेरित गर्छ, जसले सबै नेपालीका लागि गुणस्तरीय नेत्र सेवा सुनिश्चित गर्नेछ।
छात्रवृत्तिमा पढेका आँखा रोग विशेषज्ञ चिकित्सकहरूको प्रभावकारी परिचालन र सरकारको दायित्वलाई यसरी बुझ्न सकिन्छ:
१. दुई वर्षे सेवा अवधिमा आँखा रोग विशेषज्ञ (Ophthalmologist) चिकित्सकहरू जाने अस्पतालको विस्तृत जानकारी दिनु आवश्यक छ। त्यहाँ उपलब्ध नेत्र सेवा, उपकरणहरू, जनशक्ति स्थिति, बिरामीको आगमन संख्या आदिबारेयसरी गरेमा खटाइने ठाउँप्रति पूर्वतयारी भएर जान मिल्छ।
– ‘टप-डाउन’ आदेशभन्दा ‘कोल्याबोरेटिभ डेभलप्मेन्ट’ को अभ्यास सुरु हुन्छ।
आँखा रोग विशेषज्ञ चिकित्सक सेवा स्थलमा ‘खटाइएको’ होइन, ‘सहमतिमा सहभागी भएको’ महसुस गर्न सक्ने पारदर्शी र सुरक्षित प्रणाली हुनु आवश्यक छ।देशका दुर्गम ठाउँमा सेवा गर्दा सम्मान, सुरक्षा र सहयोगको प्रत्याभूति पाउनैपर्छ।
२. छात्रवृत्तिमा पढेका चिकित्सकहरूको उचित परिचालन
•दुई वर्षे बोन्डमा रहेका आँखा रोग विशेषज्ञ (अप्थाल्मोलोजिष्ट) चिकित्सकहरूलाई सरकारी अस्पतालहरूमा नै खटाउनु पर्छ।पहिले नै कार्यरत रहेका आँखा रोग विशेषज्ञ भएका अस्पतालहरूमा खटाइयो भने नयाँ आँखा रोग विशेषज्ञलाई प्रशिक्षण, मार्गदर्शन र सहकार्य गर्न सहज हुन्छ।
३.खटाउनु अघि अस्पतालको मूल्याङ्कन गर्नुपर्छ
अस्पतालको पूर्वाधार, उपकरण, आवश्यक जनशक्ति (अप्टोमेट्रिस्ट, अप्थाल्मिक एसिस्टेन्ट आदि) छन् कि छैनन् भनेर अध्ययन गर्नुपर्छ।
• पूर्वका आँखा रोग विशेषज्ञहरूले पहिल्यै के–कस्तो समस्या भोगे? अनुसन्धान (फिल्ड फिडब्याक) लिएर सुधार गर्नु पर्छ।
४. आँखा विभाग सफा, बिरामीमैत्री हुनुका साथै, चिकित्सक तथा प्यारामेडिक्सहरुले सहज ढंगले बिरामीको जाँच गर्न सक्ने वातावरण हुनुपर्छ र कार्यस्थल आउन मन लाग्ने खालको आकर्षक, आरामदायी र विश्वासिलो वातावरण सिर्जना गर्नुपर्छ।
५. प्रविधिको पहुँच हुनुपर्छ । हिजोका दिनमा टर्च लाइटले आँखा जाँच गरेका ठाउँमा आज स्लिट ल्याम्प छ।यो सकारत्मक सुधार हो तर अहिले पनि कतिपय अस्पतालमा आधारभूत नेत्र उपकरण छैनन्।अनिवार्य उपकरणहरू उपलब्ध गराउनु पर्छ। नत्र भने यो त लडाइँमा हतियार बिना परिचालन गरेको सिपाही जस्तै हुन्छ।
६. जनशक्ति व्यवस्थापन
• नेत्र विभागमा बिरामीको आगमन संख्या, र शल्यक्रियाको मात्रा आदिको आधारमा जनशक्तिको आवश्यकता मूल्याङ्कन गर्नुपर्छ।
• जहाँ आवश्यक छ, त्यहाँ अप्टोमेट्रिस्ट, अप्थाल्मिक एसिस्टेन्ट र अन्य सहयोगी स्वास्थ्यकर्मी थप्नु पर्छ।
७.नेत्र विभागको कार्यक्षेत्र विस्तार गर्ने सोच ल्याउनु पर्छ
• अस्पताल व्यवस्थापनले नेत्र विभागलाई ‘मुख्य सेवा विभाग’ भनेर बुझ्न आवश्यक छ, न कि ‘अप्सनल’ सेवा जस्तो व्यवहार गर्नु।
नेत्र सेवा भनेको मात्र डाइबेटिक रेटिनोप्याथी वा हाइपर रेटिनोप्याथीको स्क्रिनिङको लागि मात्र राखिएको हो भनेर सोच्नु हुँदैन। आँखाको उपचार जाँचमा मात्र सीमित नराखी, मोतिबिन्दु शल्यक्रिया समेत सुरु गर्ने उद्देश्य र प्रगति गर्ने सोच हुनुपर्छ।
८. तलबको विषय विशेष प्राथमिकता: समयमै तलब, कामको आधारमा थप प्रोत्साहन, स्थायीत्व र सम्मानको अनुभूति दिलाउने व्यवस्था गर्नु आवश्यक छ।
९. कार्य-जीवन सन्तुलन : सरकारी सेवामा काम गर्दा कार्यको चाप र व्यक्तिगत जीवनबीच सन्तुलन कायम राख्न सकुन् भन्ने सुनिश्चित गर्नुपर्छ।प्रशासकीय दबाब घटाउने, समयमै बिदा दिने र मानव संशाधन उचित रूपमा बाँडफाँट गर्ने व्यवस्था हुनुपर्छ।
१०. मानसिक स्वास्थ्यमा ध्यान: आँखा रोग विशेषज्ञ चिकित्सकहरूको लागि मानसिक स्वास्थ्य सत्र, काउन्सेलिङ सेवा, जस्ता कार्यक्रमहरु सञ्चालन गर्नुपर्छ।बर्नआउट कम गर्न सकिने नीति तथा व्यवस्थापन प्रणाली विकास आवश्यक छ। कुनै अस्पतालमा आँखा रोग विशेषज्ञ चिकित्सकले काम गर्ने वातावरण अपमानजनक, अपारदर्शी वा यातनाजन्य अनुभव गरे: यस्तो अवस्था उपयुक्त अनुसन्धानसहित तत्काल सम्बोधन गरिनुपर्छ।आवश्यक परे स्थानान्तरणको वैकल्पिक व्यवस्था मिलाइनुपर्छ।
११. दुई वर्षे बोन्डको भावना बदल्नु पर्छ : आँखा रोग विशेषज्ञ चिकित्सकहरूले ‘दुई वर्षको समय बेकार गयो’ भन्ने होइन, ‘देशको सेवा गर्दा अनुभव, आत्मसन्तुष्टि र सम्मान पाएँ’ भन्ने अनुभूति पाउन वातावरण सिर्जना गर्नुपर्छ। भविष्यमा पनि अरु आँखा रोग विशेषज्ञ चिकित्सकहरू खुशीका साथ जान चाहून्, भन्ने वातावरण निर्माण गर्नु जरुरी छ। यसमा अस्पतालका मेडिकल डाइरेक्टरहरूको प्रमुख भूमिका हुन्छ।
१२. निजी तथा गैरसरकारी क्षेत्रसँग प्रविधिक सहकार्य: निजी तथा गैरसरकारी संस्थाहरूबाट प्राविधिक सहयोग लिनु सकारात्मक हो, तर सहयोग पायो भन्दैमा सरकारले यस्ता संस्थालाई आफ्नो घरको चाबी नै दिनु हुँदैन, आफ्ना जिम्मेवारीबाट पन्छिनु पनि हुँदैन।
सरकारी अस्पतालभित्रै उपकरण, जनशक्ति र सेवा सञ्चालन गर्नु पर्छ न कि बाहिर। यसरी गर्दा डुप्लिकेसनको जोखिम हट्छ, नयाँ भवन निर्माण वा छुट्टै पूर्वाधारको आवश्यकता पर्दैन, जसले गर्दा खर्चमा कटौती हुन्छ।सरकारले आफ्नो पूर्वाधार र जनशक्ति मार्फत आमजनतालाई गुणस्तरीय सेवा दिँदै साझा उद्देश्य: सबै नेपालीलाई गुणस्तरीय आँखा सेवा र नेपालका सबै भूभागमा नेत्र सेवा विस्तार लक्ष्य पूरा हुन मद्दत गर्छ।
१३.सुरक्षा निकाय (नेपाल प्रहरी, सशस्त्र प्रहरी र नेपाली सेना) अस्पतालहरूमा पर्याप्त संख्यामा आँखा रोग विशेषज्ञहरू छ-छैनन् अध्ययन गरी दुई वर्षे बोन्डमा रहेका आँखा रोग विशेषज्ञहरू खटाउने व्यवस्था गर्नुपर्छ र लोकसेवा आयोग मार्फत दरबन्दी खुलाउँदा विशेष प्राथमिकता दिनु आवश्यक छ।
१४. थप अध्ययन र सीप विकासका अवसरहरू- फेलोसिप, सबस्पेसियालिटी ट्रेनिङ, वर्कशप, सेमिनार, सिएमईमा आँखा रोग विशेषज्ञ चिकित्सकहरूको सहभागी गर्न मौका तथा हौसला दिनु पर्छ।
१५. आँखा रोग विशेषज्ञ चिकित्सकहरूका लागि सुरक्षित र सम्मानजनक आवासको व्यवस्था र न्यूनतम यस्ता आवासीय सुविधा उपलब्ध हुनु पर्छ:
• कम्तिमा १ कोठा (रूम), किचन, शौचालय
• आँखा रोग विशेषज्ञ चिकित्सकले त्यो क्वार्टरमा आफ्नो परिवारसहित बस्न मिल्ने वातावरण पाउनुपर्छ, र सरकारले दिएको ‘सुविधा’ लाई गर्भको रूपमा लिने वातावरण हुनु पर्छ।
बसोबासको स्थान आँखा रोग विशेषज्ञ चिकित्सक र उनीहरुको परिवारको लागि सुरक्षात्मक हुनुपर्छ।त्यहाँ आवासीय इलाकामा बिजुली, पानी, सञ्चार सुविधा, सरसफाइ आदि न्यूनतम आवश्यक पूर्वाधार व्यवस्थापन अनिवार्य हुनु पर्छ।
-(आँखा रोग विशेषज्ञ डाक्टर मल्ल नेपाल ओफ्थाल्मिक सोसाइटीका महासचिव हुन्। उनी नेपाल चिकित्सक संघका केन्द्रिय सदस्य पनि हुन्।)
सामाग्री श्रोत :
swasthyakhabar
धरान (सुनसरी)। नेपाली कांग्रेसका महामन्त्री गगन थापाले पार्टीले उत्तेजक नारा र भीड उक्साउने शैलीको राजनीतिमा विश्वास नराख्ने बताएका छन्।
धरानमा नेपाल लोकतन्त्रवादी याक्थुङ लिम्बू संघको प्रथम महाधिवेशनमा आज उनले संविधान निर्माणदेखि त्यसको कार्यान्वयनसम्मको यात्रामा कांग्रेसको अग्रणी भूमिका रहेको बताए। उहाँले संविधान निर्माणको संवैधानिक प्रक्रियामा मात्र नभएर त्यसलाई व्यवहारमा उतार्ने जिम्मेवारीमा कांग्रेस अग्रमोर्चामा उभिएको धारणा राखे।
राजनीति उक्सावट लोकतन्त्रमाथि नै गम्भीर प्रश्न उठ्न सक्ने भएकाले पार्टी शान्ति स्थिरता र संस्थागत सुधारका लागि जिम्मेवार भूमिका खेल्दै आएको बताए। उनले भने, ‘लोकतान्त्रिक मूल्य, बहस सहमतिदेखि नीति नै कांग्रेसको राजनीति आधार हो । राजनीतिमा भावना हुन्छ तर भावनालाई हामीले बेचेर राष्ट्र बन्दैन । परिवर्तनको प्रक्रिया शान्त र स्थायी र सवलीकरणको मार्गबाट अघि बढ्नुपर्छ।’
कांग्रेसले विवेकपूर्ण बहस र नीति निर्माणका कामलाई बलियो बनाउँदै अघि बढ्ने बताउँदै महामन्त्री थापाले राजनीतिमा लोकमत र भावनाभन्दा विचार नीति र पहुँचमुखी संवादलाई महत्त्व दिनु आजको आवश्यकता रहेको बताए।
राष्ट्रवादको बहानामा कुनै पनि बहुकालीन व्यवस्थामा फर्किन नहुने धारणा राख्दै उनले नेपालको आर्थिक सामाजिक परिवर्तनमा प्रजातन्त्रले अतुलनीय योगदान दिएको बताए। उनले भने, ‘अहिले दुई दलको सरकार र राजनीतिलाई नै शक्तिशाली बनाउनु हाम्रो पहिलो आवश्यकता हो।’
सामाग्री श्रोत :
काठमाडौँ । एनसेल फाउन्डेसनले ‘सीप मेला २०८२’ को लागि काठमाडौँ महानगरपालिकासँग साझेदारी गरेको छ । सीप विकास अन्तर्गत काठमाडौँ महानगरपालिकाले आयोजना गरेको यो सबैभन्दा ठुलो सीप विकास कार्यक्रम हो । यस कार्यक्रम अन्तर्गत, व्यवहारिक र रोजगारमुखी सीपको तालिम दिने लक्ष्य लिइएको छ ।
जसले सहभागीहरूको रोजगारी सम्भावना वृद्धि गर्दै दिगो जीविकोपार्जनमा सहयोग पुऱ्याउने अपेक्षा राखिएको छ । काठमाडौँ महानगरपालिकाले बुधबार काठमाडौँको टुंडिखेलमा दुवै पक्षबिच सम्झौता पत्रमा हस्ताक्षर भएको हो ।
काठमाडौँ महानगरपालिकाको तर्फबाट सीप मेला २०८२ कार्यान्वयन समितिका संयोजक शैलेन्द्र झा र गतिशील अभियान नेपालका तर्फबाट अध्यक्ष रामजीप्रसाद पौडेलले सम्झौता पत्रमा हस्ताक्षर गरेका छन् । एनसेलको तर्फबाट एनसेल फाउन्डेसन एन्ड स्पेसल प्रोजेक्ट डाइरेक्टर, विशाखा लक्ष्मी खड्का र कर्पोरेट एन्ड रेगुलेटरी अफेयर्स डाइरेक्टर डिल्लिराम श्रेष्ठले सम्झौतामा हस्ताक्षर गरेका छन् ।
“एनसेल फाउन्डेसनमा हामी सीप अभिवृद्धि नै रोजगारीको सम्भावना बढाउने र दिगो जीविकोपार्जनको आधार निर्माण गर्ने प्रमुख उपाय हो भन्नेमा विश्वास गर्छौँ । यस सहकार्यबाट युवाहरूलाई व्यवहारिक सीपहरू प्रदान गरी आजको परिवर्तनशील रोजगारी बजारमा सफल हुन सघाउने विश्वास लिएका छौँ,” विशाखा लक्ष्मी खड्काले भनिन् ।
गत ७ जेठदेखि सुरु भएको सीप मेलामा हाल १० क्षेत्रमा आधारित ३७ पेसामा २,४२४ जनालाई सीप तालिम प्रदान भइरहेको छ । यसमा आईसीटी क्षेत्रमा साइबर सेक्युरिटी, मल्टिमिडिया, डट नेट, जाभा, पीएचपी र ग्राफिक्स, डिजिटल मार्केटिङ, ड्रोन, रोबोटिक्स, फाइबर अब्टिक्स टेक्निसियन, एआई र यसको प्रयोग गरी १२ पेसा समावेश छन् ।
इलेक्ट्रिक्समा ल्यापटप रिपेयर टेक्निसियन, एसी एण्ड रेफ्रिजेरेटर, सीसीटिभी रिपेयरिङ, मोबाइल रिपेयरिङ गरी ४ ओटा पेसाको तालिम सञ्चालनमा छ । कन्स्ट्रक्सनमा इलेक्ट्रिसियन लगायतका ५ पेसाको तालिम छ । अटोमोबाइल्समा इलेक्ट्रिक भेहिकल (ईभी) मेन्टिनेन्स, हलुका सवारी साधन उपकरण मर्मत, विद्युतीय र इन्धनबाट चल्ने मोटरसाइकल र स्कुटर मर्मत गरी ३ पेसाको तालिम सञ्चालित छ ।
पछिल्लो अध्यावधिक: जेठ २३, २०८२ २१:१९
सामाग्री श्रोत :
टेक पाना
काठमाडौं– माओवादी केन्द्रसम्वद्ध वाईसीएलको अध्यक्षमा पुष्प ओली सर्वसम्मत चयन भएका छन्।
राजधानीमा भएको तेस्रो सम्मेलनबाट ओली नेतृत्वमा सर्वसम्मत बनेका हुन्। त्यसैगरी महासचिवमा गणेश शाही चुनिएका छन्।
आइतबारदेखि सुरु भएको तेस्रो सम्मेलनमा सहमति जुट्न नसक्दा चार पटकसम्म निर्वाचन कार्यतालिका संशोधन भएको थियो।
बिहिबारसम्म कमलादीस्थित प्रज्ञा भवनमा चलेको सम्मेलन आजदेखि चाबहिल मित्रपार्कमा रहेको गोल्डेन पार्टी प्यालेसमा सारिएको थियो।
वाईसीएल नेताहरुका अनुसार अध्यक्षका आकांक्षी १३ जना आकांक्षी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौं – सिंहदरबार बैद्यखानाको विकासका लागि प्रथम पञ्चवर्षीय रणनीतिक योजना २०८२ सार्वजनिक भएको छ।
सिंहदरबार वैद्यखाना विकास समितिद्वारा २०८१ कार्तिक ९ गते गठित पञ्चवर्षीय रणनीतिक योजना तर्जुमा उपसमितिले आज स्वास्थ्य तथा जनसंख्यामन्त्री प्रदीप पौडेलको उपस्थितीमा उक्त रणनीति सार्वजनिक गरेको हो। डा लक्ष्मी प्रसाद घिमिरे संयोजनक रहेको उक्त उपसमितिमा डा पुष्पराज पौडेल, डा कोपिला अधिकारी, डा विभाकर ठाकुर, डा विनोद शाह सदस्य रहेका छन्।
उक्त रणनीतिक योजना मार्फत् दीर्घकालीन रुपमा गुणस्तरीय आयुर्वेद औषधि उत्पादनमा आत्मनिर्भरता हासिल गर्दै अन्तर्राष्ट्रिय निर्यात प्रवर्धन गर्न सफल हुने स्थितीमा पुग्नुपर्ने आयुर्वेद क्षेत्रका विज्ञहरु बताउँछन्।
५ परिच्छेदमा सार्वजनिक भएको उक्त रणनीतिमा परिच्छेद १ मा सिंहदरबार वैद्यखाना विकास समिति र रणनीतिक योजनाको आवश्यकताका सम्बन्धमा प्रकाश पारिएको छ। त्यस्तै परिच्छेद २ मा सिंहदरबार वैद्यखाना विकास समितीको वर्तमान अवस्था र समस्याहरु, परिच्छेद ३ मा सिंहदरबार वैद्यखाना विकास समितीका पहिलो रणनीतिक योजना, परिच्छेद ४ मा परिवर्तनको सिद्दान्त तथा नतिजा खाका तथा परिच्छेद ५ मा रणनीतिको कार्यान्वयन, अर्थ व्यवस्थापन, अनुगमन तथा मुल्यांकनबारे प्रकाश पारिएको छ।
वैद्यखाना विकास समितिको गौरवमय इतिहास, जनविश्वास र राष्ट्रिय मागसँगै राष्ट्रहितमा आधारित रही उक्त रणनीतिक योजना तयार पारिएको सिंहदरबार वैद्यखानाका निर्देशक डा प्रदीप केसी बताउँछन्। वैद्यखानाको विकासका लागि अभिलेख बनाएर अगाडि बढ्नुपर्छ भन्ने मान्यतामा आधारतामा बजेटको सीमितताको बीच पनि उक्त रणनीतिक तयार गरिएको डा केसीको दाबी छ।
‘रणनीतिक योजनामा कतिपय विषयवस्तुहरु वैद्यखानाको कार्य क्षेत्र बाहिरको पनि उल्लेख भएका छन्, ती विषयहरुलाई मन्त्रालय तहबाट नै कार्यान्वयन गर्न पहल गराइनेछ’, उनले भने ‘कानुनी पक्षहरु हामीले भन्दा पनि मन्त्रालय तहबाट नै सम्बोधन हुनुपर्छ।यसले धेरै पाटोलाई समावेश गरेको छ, उक्त कुरालाई कार्यान्वयन गर्नका लागि आर्थिक व्यवस्थापनमा आवश्यक छ।’
करिब २ अर्ब बराबरको लगानी गर्न सके ८ गुणा फाइदा वैद्यखानालाई हुने डा केसीको दाबी छ। हाल वैद्यखानासँग कच्चा पदार्थ लगायत अन्य अत्यावश्यक सामग्रीहरु खरिदको क्षमता एकदमै कम रहेकोमा विभिन्न चरणहरु पार गर्दै वैद्यखाना आत्मनिर्भर हुनसक्नेमा उनी आशावादी छन्। यो सँगै सिंहदरबार वैद्यखानाको उत्पादनले गति लिने उनको विश्वास पनि छ।
यसका अतिरिक्त विश्लेषणबाट पहिचान गरिएका वर्तमान सबल पक्ष एवं उपलब्ध अवसरहरूको सदुपयोग गरी दुर्बल पक्ष तथा सामना गर्नु परेका चुनौती तथा समिति सामु रहेका प्रमुख रणनीतिक सवालहरूलाई यस योजना तर्जुमाका चरणहरूमा प्रमुख अन्य आधारका रुपमा उनले बताए।
सामाग्री श्रोत :
swasthyakhabar
गोदावरी (कैलाली)। जिल्लको गोदावरी नगरपालिका–१ अत्तरियामा सञ्चालित तरकारी हाटबजारमा बिक्रीका ल्याइएका बन्दागोभीमा अत्यधिक मात्रामा विषादी फेला परेको छ।
आज अत्तरियामा रहेको विषादी अवशेष द्रुत विश्लेषण एकाईमा गरिएको परीक्षणमा पाण्डेय फलफूल तथा सब्जी पसलमा बिक्रीका लागि राखिएका ६५ किलो बन्दामा विषादी भेटिएपछि नष्ट गरिएको छ।
एकाइ कार्यालयका प्राविधिक राजेन्द्रप्रसाद भट्टले बन्दामा ९९ दशमलव ११ अर्गानोफस्फेट र एक दशमलव ६१ कार्बामेट विषादीको अंश फेला परेको जानकारी दिए। उनका अनुसार वैज्ञानिक मापदण्डअनुसार अर्गानोफस्फेटको तीन सय ५५ भन्दा कम मात्रा खान उपयुक्त मानिन्छ भने चार सय ५५ भन्दा बढी भएमा नष्ट गर्नुपर्ने हुन्छ।
कृषि प्राविधिकका अनुसार अर्गानोफस्फेटको ३५ प्रतिशतभन्दा कम मात्रा भए उपभोग योग्य, ३५ देखि ४५ प्रतिशत भए केही दिन पर्खेर खान मिल्ने र ४५ प्रतिशतभन्दा माथि रोकावट प्रतिशत मानिने भएकाले नष्ट गर्नुपर्ने हुन्छ।
उक्त बन्दागोभी उपभोगका लागि अयोग्य ठहरिएपछि गोदावरी नगरपालिकाका प्रवक्ता गोपालदत्त भट्टको रोहवरमा नष्ट गरिएको हो। प्रवक्ता भट्टले उपभोक्तालाई विषादीरहित तरकारी तथा फलफूल मात्र उपभोग गर्न र प्रमाणित सामान रोज्न आग्रह गरे।
पछिल्लो समय बजारमा असामान्य रूपमा पाकेको देखिने आँप आइपुगेको भन्दै उपभोगमा सर्तकता अपनाउन सुझाव दिइएको छ। तरकारी तथा फलफूल हाटबजार समिति अध्यक्ष दिल्लीराज जोशीले बाहिरी क्षेत्रबाट आउने तरकारी र फलफूलमा निगरानी बढाइएको बताए। उनले कृषकलाई विषादी प्रयोगबारे सचेत रहन पनि आग्रह गरे।
यसअघि सो तरकारी हाटबजारमा विषादी अवशेष द्रुत विश्लेषण एकाईले गोलभेँडामा पनि अत्यधिक मात्रामा विषादी फेला पारेको थियो।
सामाग्री श्रोत :
काठमाडौँ । सूचना प्रविधिमा उच्च शिक्षा अध्ययनका लागि तयारी गरिरहेका विद्यार्थीहरूलाई लक्षित गर्दै ‘साझा इन्ट्रान्स’ ले सीएसआईटी (CSIT), बीआईटी (BIT), बीसीए (BCA), बीएससी आईटी (Bsc.IT), बीबीए (BBA) लगायत कोर्सका लागि प्रवेश परीक्षा तयारी कक्षा सुरु गरेको छ ।
संस्थाले भौतिक कक्षा जेठ २४ गतेदेखि बागबजारस्थित आफ्नो कार्यालयमा र अनलाइन कक्षा जेठ २५ गतेदेखि जुम प्लेटफर्ममार्फत सञ्चालन हुने जानकारी दिएको छ ।
विद्यार्थीहरूलाई अनुभवी शिक्षक टोलीबाट अध्यापन, नियमित अभ्यास परीक्षा, निःशुल्क तयारी सामग्री, छात्रवृत्तिको अवसर तथा करियर काउन्सिलिङ र आईटी तालिमसमेत प्रदान गरिने साझा इन्ट्रान्सले जनाएको छ ।
प्रारम्भिक रूपमा भर्ना हुने पहिलो ५०० विद्यार्थीका लागि विशेष छुट योजना पनि ल्याइएको छ । थप जानकारीका लागि भाइबर वा ह्वाट्सएप (९८६०६८८२१२ ) मार्फत जानकारी लिन तथा यहाँ क्लिक गरी आवश्यक कोर्स अध्ययनका गर्न फारम भर्न सकिनेछ ।
पछिल्लो अध्यावधिक: जेठ २३, २०८२ १७:५८
सामाग्री श्रोत :
टेक पाना
काठमाडौं– अमेरिकाले नेपाली नागरिकका लागि दिँदै आएको टेम्पोररी प्रोटेक्टेड स्टाटस (टीपीएस) सुविधा अब खारेज गर्ने भएको छ । त्यहाँको आन्तरिक सुरक्षा मन्त्रालय (डीएचएस) ले सोमबार संघीय रजिस्टरमा सूचना प्रकाशित गर्दै सन् २०२५ अगस्ट ५ बाट नेपालीका लागि टीपीएस कार्यक्रम औपचारिक रूपमा अन्त्य हुने घोषणा गरेको छ ।
मन्त्रालयकी सचिव क्रिस्टी नोएमले नेपालको वर्तमान अवस्था तथा अन्तरनिकाय परामर्शपछि नेपालले टीपीएसको मापदण्ड पूरा नगर्ने निष्कर्ष निकाल्दै उक्त निर्णय गरिएको जनाइएकी छन् । मन्त्रालयले हाल टीपीएसका आधारमा अमेरिका बसोबास गरिरहेका नेपालीहरूलाई अन्य वैध आवासीय आधार नभएमा स्वदेश फर्कने तयारी गर्न अनुरोध गरेको छ ।
अमेरिकाबाट घर फर्किन चाहनेहरूले ‘सीबीपी होम मोबाइल एप्लिकेसन’ प्रयोग गर्न सक्ने व्यवस्था गरिएको अमेरिकाको सिटिजनसिप एन्ड इमिग्रेसन सर्भिसेजको वेबसाइटमा उल्लेख छ ।
सन् २०१५ को भूकम्पपछि नेपालीहरू प्रभावित भएको भन्दै अमेरिकी सरकारले टीपीएस कार्यक्रममार्फत हजारौँ नेपालीलाई अमेरिका बस्न र काम गर्न अनुमति दिएको थियो । यो कार्यक्रमले मानवीयताका आधारमा आफ्नो देश फर्कन सक्ने अवस्था नभएका योग्य देशका नागरिकलाई आवधिक र अस्थायी कानुनी मान्यता प्रदान गर्छ ।
राष्ट्रपति डोनाल्ड ट्रम्पको अघिल्लै कार्यकालमा पटक-पटक यो कार्यक्रम खारेज गर्ने प्रयास भए पनि विभिन्न मुद्दा र बाइडेन सरकारको निर्णयका कारण खारेजी लागू हुने समय थपिँदै आएको थियो।
नेपालीलाई अब टीपीएस कार्यक्रम उपलब्ध नगराउने भन्ने घोषणा अमेरिकाको आप्रवासन र भिसा नीतिमा भइरहेको व्यापक परिवर्तन र कडाइकै सेरोफेरोमा आएको छ ।
अमेरिकी विदेश मन्त्रालयले नयाँ विद्यार्थी भिसाको अन्तर्वार्ता मिति तोक्ने प्रक्रियासमेत स्थगित गरेको छ भने विभिन्न १२ देशका नागरिकलाई अमेरिका प्रवेशमै प्रतिबन्ध लगाइसकेको छ । आप्रवासनसम्बन्धी मुद्दामा लचिलो रहने डेमोक्र्याट नीतिको विपरीत आप्रवासनमा कडाइ र गैरकानुनी आप्रवासनलाई नियमन गर्ने भनेरै पुनः निर्वाचित भएका ट्रम्प प्रशासनले सत्ता सम्हाल्नेबित्तिकै यस्ता कार्यक्रम निरन्तर थप्दै लगेको छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
