देशका अधिकांश जनतालाई भ्याक्सिन लगाएर प्रतिबन्धहरु हटाउँदै विश्वकै पहिलो मास्क फ्रि देश बनेको इजरायलमा अब भने फाइजर भ्याक्सिनको प्रभावकारिता घट्न थालेको छ ।
संक्रमण र लक्षणसहित बिरामी हुनबाट रोक्ने काममा भ्याक्सिनको असर कम भइरहेको इजरायलले सोमबार बताएको छ ।
संक्रमितहरु गम्भीर बिरामी हुनबाट रोक्नमा भने भ्याक्सिन अझैसम्म प्रभावकारी छ ।
इजरायलले प्रतिबन्धहरु हटाएको र डेल्टा भेरिएन्टको संक्रमण बढेका बेला इजरायलले भ्याक्सिनको प्रभावकारिता घटेको बताएको हो । समाचार एजेन्सी रोयटर्सका अनुसार इजरायलको स्वास्थ्य मन्त्रालयले ६ जुनसम्म संक्रमण र लक्षणसहित बिरामी हुनबाट रोक्ने काममा भ्याक्सिनको प्रभावकारिता ६४ प्रतिशतमा झरेको बताएको छ ।
गम्भीर बिरामी हुने र अस्पताल भर्ना हुने अवस्था आउनबाट रोक्ने काममा भने भ्याक्सिनको प्रभावकारिता ९३ प्रतिशत छ ।
स्वास्थ्य मन्त्रालयले भ्याक्सिनको यसअघिको सुरक्षा स्तर कति थियो भन्नेबारे बताएको छैन ।
अधिकारीहरुले गएको मे महिनामा एक रिपोर्टमा भ्याक्सिन संक्रमण, लक्षणसहित बिरामी र गम्भीर बिरामी हुनबाट रोक्न ९५ प्रतिशत प्रभावकारी रहेको बताएका थिए ।
फाइजरका प्रवक्ताले इजरायलले जारी गरेको डाटाबारे टिप्पणी गर्न अस्वीकार गरेका छन् ।
तर, अर्को एक शोधको हवाला दिँदै भ्याक्सिन एन्टिबडी बढाउने र कोरोनाका सबै भेरिएन्टविरुद्ध प्रभावकारी रहेको बताएका छन् ।
इजरायलको ९.३ मिलियन जनसंख्यामा ६० प्रतिशतले एक अभियानअन्तर्गत फाइजरको कम्तीमा एक डोज खोप लगाएका छन् ।
खोप अभियान सुरु गरिँदा जनवरीमा दैनिक १० हजारभन्दा धेरै संक्रमित हुने गरेकोमा अघिल्लो महिना सिंगल डिजिट अर्थात १० भन्दा कममा झरेको थियो ।
संक्रमितको संख्यामा गिरावट आएपछि त्यहाँ दूरी कायम गर्ने र मास्क लगाउने नियम हटाइएको थियो ।
तलको फोटो मा क्लिक गरि समाचार पढ्नुहोस्
