माघ २७, काठमाडौँ | महानगरीय अपराध महाशाखा काठमाडौँले सामाजिक संजालको दुरुपयोग गरी ठगीमा संलग्न झापा अर्जुनधारा १ का पंकज पौडेलीलाई पक्राउ गरेको छ ।
पौडेलीले सामाजिक संजाल फेसबुक, ह्वाट्सएप, इमो र फेक इमेल खोलेर सिंगापुर, लण्डन, कोरियाको नागरीक हुँ भन्दै बिभिन्न ब्यक्तिहरुलाई साथी बनाएर ठगि गरेको पाइएको छ । ठगीमा संलग्न ३० बर्षीय पौडेलीले सामाजिक संजालबाट कुराकानी गरी बिश्वास दिलाई पीडितहरुलाई नेक्लेस, घडी, जुत्ता, मोबाइल, डलरको पार्सल एवं गिफ्ट समेत पठाएको प्रहरीले जनाएको छ । त्यसैमा मानिसहरुलाई विश्वास दिलाएर रोजगारीको लागि भिषा लगाईदिने भनी नक्कली भिषा पठाई बिश्वासमा दिलाई ठगि गरेको प्रहरीले जनाएको छ । पौडेलीले केहि मानिसलाई पार्सल एवं गिफ्टको सामानहरु प्राप्त गर्नको लागि भन्सार शुल्क तिर्नु पर्छ भनी भारतबाट फोन समेत गरी नेपालमा रहेका बिभिन्न ब्यक्तिहरुको नाममा रकम पठाउनु भनी नाम समेत दिएर हालसम्म बिभिन्न पीडित ब्यक्तिहरुबाट २६ लाख ८० हजार २७१ आइएमई गरी बिभिन्न ब्यक्तिहरुको नाममा रकम पठाउन लगाएको प्रहरीलाई उजुरी परेको थियो ।
प्रहरीका अनुसार पीडितहरुलाई सामाजिक संजाल मार्फत साथी बनाई प्रलोभनमा पार्ने पौडेलीले बिभिन्न ब्यक्तिहरुको परिचयपत्रको समेत दुरुपयोग गर्ने गरेको पाइएको छ । ठगि धन्दामा संलग्न पौडेलीले पिडितकै परिचयपत्र देखाएर अरुकै नामबाट आइएमई मार्फत पैसा निकाल्ने गरेको समेत खुलेको छ । रकम निकाल्दा रकम पठाएका ब्यक्तिहरुको सवारी चालक अनुमति पत्रमा एउटै फोटो प्रयोग गरी नक्कली सवारी चालक अनुमती पत्र पेश गरी रकम लिने गरेको देखिएको प्रहरी अनुसंधानबाट खुलेको छ ।
प्रहरी महाशाखाले अनुसन्धानको क्रममा ठगि धन्दामा संलग्न ब्यक्तिहरुको बारेमा अनुसन्धान गर्दै जाँदा पंकज पौडेलीको संलग्नता रहेको देखिएको जनाएको छ । पौडेली झापाका हुन् । निजलाई जिल्ला प्रहरी कार्यालय झापासंग समन्वय गरी गत माघ २५ गते बिर्तामोडबाट पक्राउ गरीएको प्रहरी महाशाखाले जनाएको छ । प्रहरीले ठगीमा संलग्न पौडेलीको साथबाट प्रारम्भिक अनुसन्धानको क्रममा एक करोड ९५ लाख १२ हजार ३५२ रुपैया बिभिन्न व्यक्तिहरुबाट प्राप्त गरेको रेकर्ड समेत फेला परेको जनाएको छ । प्रहरीले उनलाई पक्राउ गर्ने क्रममा साथबाट १३ लाख ९५ हजार २१५ रुपयाँ बरामद गरेको जनाएको छ । त्यस्तै मोबाइल २ थान, बिनोद काफ्ले नामको सवारी चालक अनुमति पत्रको फोटोकपि, अनिल बस्नेतको नामको सवारी चालक अनुमति पत्रको प्रतिलिपि, निजकै नागरिकता, स्टार गोल्ड लेखिएको १ थान झोला, सिटि एक्सप्रेस मनि ट्रान्सफरको २ थान बिल र इस्टिमेट लेखिएको २ थान बिल फेला पारेको छ ।
ठगीमा संलग्न पौडेलीमाथि थप अनुसन्धान भईरहेको प्रहरीले जनाएको छ । उनलाई थप अनुसन्धान तथा कारबाहिको लागी महानगरीय प्रहरी परिसर काठमाण्डौ ल्याइएको छ ।
समाचार र भिडियो हेर्न तल का लिंकहरु मा क्लिक गर्नुहोस्
श्रोत : साझासबल मिडिया
