काठमाडौँ । नेपालका दुई ठुला डिजिटल भुक्तानी सेवा प्रदायकहरू खल्ती र आइएमई पे आजदेखि औपचारिक रूपमा एकीकृत हुने भएका छन् । नेपाल राष्ट्र बैंक र कम्पनी रजिष्ट्रारको कार्यालयबाट अन्तिम स्वीकृति पाएसँगै दुवै कम्पनीले आजदेखि एकीकृत कारोबार सुरु गर्न लागेका हुन् ।

आज एक विशेष समारोह आयोजना गरी मर्जरको औपचारिक घोषणा गरिँदैछ । यसै अवसरमा खल्तीले आफ्ना सामाजिक सञ्जालका पेजमा नयाँ लोगो अपलोड गरेको छ । सार्वजनिक गरिएको नयाँ लोगोमा खल्तीको पहिचान बनेको बैजनी रङलाई विस्थापित गरी रातो रङलाई मुख्य बनाइएको छ ।

लोगोको दायाँपट्टि माथिल्लो भागमा आइएमईको ब्रान्डलाई झल्काउने चङ्गा राखिएको छ भने त्यसको तल कालो अक्षरमा ‘by’ र रातोमा ‘IME’ लेखिएको छ ।

यो मर्जर प्रक्रियाले गत असार ४ गते नेपाल राष्ट्र बैंक र असार १२ गते कम्पनी रजिष्ट्रारको कार्यालयबाट अन्तिम स्वीकृति प्राप्त गरेपछि पूर्णता पाएको हो । सम्झौताअनुसार, खल्ती प्राइभेट लिमिटेडको सम्पूर्ण सम्पत्ति तथा दायित्व आइएमई डिजिटल सोलुसन लिमिटेडले सकार्ने गरी मर्जर प्रक्रिया टुङ्ग्याइएको छ ।

नियामक नेपाल राष्ट्र बैंकले भुक्तानी तथा फर्छ्योट विनियमावली, २०७७ मा संशोधन गर्दै वालेट मर्ज हुनसक्ने व्यवस्था गरेको थियो । संशोधित विनियमावलीमा भुक्तानीसम्बन्धी कार्य गर्न अनुमतिपत्रप्राप्त संस्थाहरू एक-आपसमा गाभ्न/गाभिन वा प्राप्ति गर्नसक्ने व्यवस्था उल्लेख छ ।

पछिल्लो अध्यावधिक: साउन १, २०८२ ७:१२

काठमाडौँ । त्रिभुवन विश्वविद्यालय इन्जिनियरिङ अध्ययन संस्थान (आईओई) ले स्नातक तह (बी.ई./बी.आर्क.) को नयाँ भर्नाका लागि प्रवेश परीक्षाको तालिका सार्वजनिक गरेको छ । बिहीबार एक सूचना जारी गर्दै संस्थानले  शैक्षिक सत्र २०८२/०८३ का लागि प्रवेश परीक्षा आगामी ३ भदौदेखि सञ्चालन हुने जानकारी दिएको हो ।

सूचना अनुसार अनलाइन आवेदन १३ साउनदेखि खुला गरिने छ । आईओई अन्तर्गतका पाँच आङ्गिक क्याम्पस र १० सम्बन्धन प्राप्त कलेजहरूमा भर्ना हुन चाहने विद्यार्थीहरूले यो प्रवेश परीक्षा अनिवार्य रूपमा उत्तीर्ण गर्नुपर्नेछ ।

इच्छुक विद्यार्थीले आईओईको आधिकारिक वेबसाइट मार्फत अनलाइन आवेदन फाराम भर्न सक्नेछन् । आवेदन शुल्क दुई हजार रुपैयाँ तोकिएको छ । 

आवेदन दिनका लागि विद्यार्थीले भौतिकशास्त्र, रसायनशास्त्र र गणित विषय लिई प्रवीणता प्रमाणपत्र तह वा १०+२ (विज्ञान) उत्तीर्ण गरेको हुनुपर्नेछ । लेटर ग्रेडिङ प्रणालीमा अध्ययन गरेका विद्यार्थीको हकमा न्यूनतम ‘सी’ ग्रेड प्राप्त गरेको हुनुपर्नेछ भने प्रतिशत प्रणालीमा कुल पूर्णाङ्कको कम्तीमा ४५ प्रतिशत अङ्क ल्याएको हुनुपर्नेछ । इन्जिनियरिङ डिप्लोमा उत्तीर्ण गरेका विद्यार्थीले पनि आवेदन दिन सक्नेछन् ।

कम्प्युटरमा आधारित हुने प्रवेश परीक्षामा अंग्रेजी, गणित, भौतिकशास्त्र र रसायनशास्त्र विषयबाट जम्मा १०० वटा वस्तुगत प्रश्नहरू सोधिनेछन् । प्रत्येक गलत उत्तरका लागि १० प्रतिशत अङ्क कट्टा गरिने (नेगेटिभ मार्किङ) व्यवस्था गरिएको संस्थानले जनाएको छ ।

परीक्षार्थीहरूले अनलाइन फाराम भर्दा हालसालै खिचेको पासपोर्ट साइजको फोटो, नागरिकता वा पासपोर्टको स्क्यान कपि र आफ्नो शैक्षिक योग्यताको प्रमाणपत्र/प्रवेश पत्रको स्क्यान कपि अनिवार्य रूपमा अपलोड गर्नुपर्नेछ । परीक्षासम्बन्धी विस्तृत पाठ्यक्रम र अन्य जानकारी आईओईको वेबसाइटबाट प्राप्त गर्न सकिने सूचनामा उल्लेख छ ।

पछिल्लो अध्यावधिक: साउन १, २०८२ १०:३७