काठमाडौँ । कुनै पनि स्थानको सही ठेगाना हुनुको अर्थ त्यहाँसम्म पुग्न सहज हुनु मात्र होइन । सही ठेगानाले सहरी विकासका कार्यहरूलाई सरल बनाउन सहयोग गर्छ, पिछडिएका क्षेत्रहरू पहिचान गर्न र तिनका स्रोत तथा साधनहरूलाई व्यवस्थापन गर्न मद्दत पुर्‍याउँछ । यसका अतिरिक्त ठेगानाको महत्त्व कर सङ्कलन, मतदाता दर्ता, ट्रयाकिङ, अनलाइन डेलिभरीजस्ता सेवामा झन् बढ्दै गएको छ ।

यस्ता कार्यलाई सहज बनाउन विकसित गरिएको प्रणाली हो: डिजिटल मेट्रिक ठेगाना प्रणाली । यूके इन्टरनेसनल डेभलपमेन्टको सहयोगमा द एसिया फाउन्डेसन अन्तर्गत डेटा फर डेभलपमेन्ट परियोजनामार्फत यो सेवा उपलब्ध गराइएको हो । यसका लागि नक्साले प्रणाली व्यवस्थापनको काम गरिरहेको छ ।

यो प्रणालीमार्फत डिजिटल घर नम्बर तयार गर्न सकिन्छ । जसले प्रत्येक घरमा बस्ने मानिसहरूको संख्या, सो घरका व्यक्तिहरूले पाउनुपर्ने सार्वजनिक सुविधा लगायत बाटोघाटोको अवस्था लगायतको सटीक जानकारी दिन्छ ।

नक्साका प्रोजेक्ट कोअर्डिनेटर कुन्दनजंग थापाका अनुसार यस प्रणालीमार्फत प्रत्येक घरमा डिजिटल ठेगाना तयार गरिन्छ । जसअन्तर्गत एउटा घरको एउटा युनिक कोड हुन्छ । “उक्त कोड प्रयोग गरेर आफ्नो क्षेत्रमा बसोबास गर्ने नागरिकको जानकारी पालिकाले सहजै पाउन सक्छ । यस्ता तथ्याङ्क प्रयोग गरेर पालिकाले आफ्नो आगामी योजनाहरू पनि तयार गर्नसक्छन्,” उनले भने ।  

हाल यो प्रणाली काठमाडौँको टोखा नगरपालिका, भक्तपुरको चागुँनारायण नगरपालिका, पर्साको वीरगन्ज महानगरपालिका र धनुषाको जनकपुरधाम उपमहानगरपालिकामा लागु भइरहेको छ । प्रणालीबाट प्राप्त तथ्याङ्कले पछिल्लो समयमा बढ्दै गइरहेको सहरीकरण व्यवस्थापन र विकासको गतिलाई समात्न सघाउने जनकपुरधाम उपमहानगरपालिकाका भूमि व्यवस्था शाखाका सर्वेक्षक रत्नकुमार साह बताउँछन् । 

यो प्रणालीले सबैभन्दा धेरै सहज त पालिकाका प्राविधिकहरूलाई बनाएको छ । पालिकाका प्राविधिकहरूलाई विभिन्न नक्साङ्कन लगायतका कामहरूका लागि फिल्डमा गइरहनुपर्ने हुन्छ । उनीहरूले फिल्डमा गएर नक्सा अनुरूप काम भइरहेको छ वा छैन लगायतका कुराहरूको पनि निगरानी राख्नुपर्ने हुन्छ । यस्तोमा पटक-पटक फिल्डमा जानुपर्ने तथा सेवाग्राहीलाई भेटिरहनुपर्ने झन्झट यो प्रणालीले हटाएको छ । 

उपमहानगरकी इन्जिनियर सोनाली कुमारी साह भन्छिन्, “फिल्डमा गइरहनुपर्ने झन्झट हटेको छ । यस प्रणालीमार्फत कहाँ नक्सा के कस्तो भनेर थाहा हुन्छ । अर्कोतिर कतै जानुपर्ने भयो भने सोधी सोधी जानुपर्दैन । घर नम्बरको आधारमा कुन घर कहाँ छ भनेर ठ्याक्कै पत्ता लगाई ठाउँमै पुग्न सकिन्छ ।”

यति मात्र नभइ उक्त क्षेत्रमा रहेका बैंकहरूले घर नक्सा भर्नुपर्ने फारममा घर नम्बर मात्र लेखे पुग्ने व्यवस्था गरेको उनले बताइन् । साथै यो प्रणालीले घरजग्गालाई लिएर नागरिकबिच हुने विवादलाइ समेत समाधान गरेको उनी सुनाउँछिन् । कतिपय अवस्थामा पालिकाहरूलाई आफ्नो क्षेत्र कहाँसम्म हो, वडाहरूको सीमाना कहाँसम्म पर्छ भन्ने यकिन पनि हुँदैन । यस्तो अवस्थामा पनि फिल्डमा नगई प्रणालीमै हेरेर काम अगाडि बढाउन सकिएको साहले बताइन् ।  

अर्कोतिर, आफ्नो क्षेत्रमा कुनै समस्या पर्‍यो अथवा कुनै पूर्वाधार विकास तथा मर्मतका काम गर्नुपर्‍यो भने यसै प्रणालीमार्फत जानकारी लिई तुरुन्त समाधानका एक्सन लिन सकिने वडा नं ७ का वडा सदस्य फुलकुमारी साह बताउँछिन् । यो प्रणालीले स्थानीय तहहरूको निर्णय गर्ने क्षमतालाई थप प्रभावकारी बनाएको उनको भनाइ छ।  

“अब वडाबासीले फोन गर्छन्, ‘फूलकुमारी दिदी, यहाँ आगलागी भयो रे’ । म तुरुन्त सोध्छु, ‘घर नम्बर कति हो ?’ ‘सडक नम्बर ७, घर नम्बर २२५ ।’ अनि तुरुन्त नगरपालिकालाई जानकारी दिन्छु र सेवा त्यहीँ पुग्छ,” उनले भनिन्, “वडा सदस्यको नाताले नागरिकलाई छरितो सेवा दिन सहज भएको छ ।” 

उपमहानगरपालिकाकी उपप्रमुख किशोरी साह यो प्रणालीका कारण आफ्नो क्षेत्रमा कति घरधुरी छन्, कतिले नक्सा पास गरेका छन् लगायत कर संकलनमा सहजीकरण हुनेमा विश्वस्त छन् । “कति घरधुरी छ, कति नक्सा पास गरेको छ, कतिले अनुमति लिएको छ कि छैन, यस्ता कुराहरू थाहा पाउन सकिएको छैन,” उनी भन्छन्, “हामीसँग अहिलेसम्म धेरै घरहरूले नक्सा पास गराएका छैनन्, कर प्रणालीमा छैनन् । अब यो प्रणालीले सबैको विवरण दर्ता गरेर कर संकलन र कारबाही सहज बनाउनेछ ।” 

कुनै पनि सहरको विकास हुँदै गर्दा त्यहाँको भौतिक, आर्थिक सामाजिक लगायतका विकासका लागि तथ्याङ्क महत्त्वपूर्ण हुने र यसका लागि यो प्रणालीले भूमिका खेल्ने डेटा फर डेभलपमेन्टका प्रोजेक्ट डाइरेक्टर प्रणय स्थापित बताउँछन् । 

उनी भन्छन्, “सहर समयसँगै कसरी परिवर्तन हुँदैछ ? जनसंख्या कसरी बढ्दैछ ? सामाजिक अन्तरक्रिया कहाँ भइरहेको छ ? यी सबै बुझ्न डेटा अपरिहार्य हुन्छ । यस प्रणालीले सहरको समग्र विकास योजना बनाउन सहयोग पुर्‍याउँछ।” 

यो प्रणालीले स्थानीय तहहरूलाई योजनाबद्ध रूपमा पूर्वाधार विकास गर्न मद्दत गर्ने र नागरिक सेवाहरूलाई पनि प्रभावकारी बनाउन टेवा पुग्ने डेटा फर डेभलपमेन्ट परियोजनाको अपेक्षा छ ।

पछिल्लो अध्यावधिक: असार ३, २०८२ १६:५०

काठमाडौं– स्कटल्याण्डमा जारी त्रिदेशीय टी–२०आई सिरिजमा नेपालले घरेलु टोलीमाथि २ विकेटको जित निकालेको छ । 

स्कटल्याण्डले दिएको ९८ रनको सामान्य लक्ष्य नेपालले १९ ओभर ५ बलमा ८ विकेट गुमाएर पूरा गर्‍यो । नेपालका लागि ओपनर कुशल भुर्तेलले सर्वाधिक ३० रन बनाए । ३५ बलमा उनले ४ चौका प्रहार गरे।

लोकेश बम ९, अनिलकुमार शाह ३, कप्तान रोहित पौडेल ७, बसिर अहमद १३, रुपेश सिंह ३, किरण ठगुन्ना १० र दीपेन्द्रसिंह ऐरी १४ रनमा आउट भए । सन्दीप लामिछाने एक र करण केसी ३ रनमा अविजित रहे ।

बलिङमा स्कटल्याण्डका माइकल लिस्क र सफायान सरिफले समान २ विकेट लिए । टस हारेर पहिला ब्याटिङ गरेको स्कटल्याण्ड १९ ओभर ४ बलमा ९७ रन बनाएको थियो ।

नेपाली बलरसामु चलेन स्कटल्याण्डका माइकल लिस्कबाहेक अन्य ब्याटर खुलेर खेल्न सकेनन् । माइकल लिस्कले सर्वाधिक ४७ रन बनाए ।

बलिङमा नेपालका स्पीनर सन्दीप लामिछानेले उत्कृष्ट प्रदर्शन गरे । ४ ओभर बलिङ गरेका सन्दीपले ११ रन खर्चेर ४ विकेट लिए । करण केसी र दीपेन्द्रसिंह ऐरीले २-२ र ललित राजवंशीले एक विकेट लिए ।

अब नेपालले सिरिजान्तर्गत आफ्नो तेस्रो खेल नेदरल्यान्डससँग बिहीवार खेल्नेछ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । साइबर ब्युरोले सञ्चारकर्मी दिलभूषण पाठकलाई कार्यालयमा उपस्थित भई अनुसन्धानमा सहयोग गर्न आग्रह गरेको छ । मंगलबार एक सूचना जारी गर्दै ब्युरोले यथाशीघ्र प्रहरी कार्यालयमा उपस्थित हुन आग्रह गरेको हो ।

“…प्रस्तुत विषयमा परिवर्तित नाम साइबर ब्युरो ५९ (२०८१/८२) को जाहेरीले वादी नेपाल सरकार प्रतिवादी तपाईँ भएको विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा तपाई विरुद्ध सम्मानित काठमाडौं जिल्ला अदालतबाट मिति २०८२ जेठ २७ गते मुलुकी फौजदारी कार्यविधि संहिता २०७४ को दफा ९ को उपदफा ३ बमोजिम पक्राउ अनुमति प्राप्त भएको हुँदा यथाशीघ्र यस ब्युरो वा नजिकको प्रहरी कार्यालयमा उपस्थित भई अनुसन्धान कार्यमा सहयोग पुऱ्याई दिनु हुन अनुरोध गरिएको छ,” सूचनामा भनिएको छ ।

यो प्रकरण पाठकद्वारा सञ्चालित ‘टफ टक’ कार्यक्रमअन्तर्गत ‘टफ एक्स्प्लेनर’ शृङ्खलाको एक रिपोर्टसँग जोडिएको छ । उक्त रिपोर्टमा नेपाली कांग्रेसका सभापति शेरबहादुर देउवाका छोरा जयवीर सिंह देउवाले व्यापारी शाहिल अग्रवाल र दीपक भट्टसँग मिलेर नक्सालस्थित हिल्टन होटल खरिद गरेको दाबी गरिएको थियो । यसलाई ‘कपोलकल्पित, भ्रामक र चरित्रहत्या गर्ने उद्देश्यले तयार पारिएको’ भन्दै उनी विरुद्ध साइबर ब्युरोमा उजुरी परेको छ ।

यसअघि जिल्ला अदालत काठमाडौँबाट पक्राउ अनुमति जारी भएपछि फरार रहेका पाठकले उच्च अदालत पाटनमा निषेधाज्ञाका लागि निवेदन दर्ता गराएका थिए । अदालतले दुवै पक्षलाई ५ असारमा छलफलका लागि बोलाएको छ भने सो समयसम्म उनलाई पक्राउ नगर्न आदेशसमेत दिएको छ ।

यस विषयमा पत्रकार महासंघ, विभिन्न सञ्चारमाध्यमका सम्पादक तथा सरोकारवालाले सरकार र प्रहरी प्रशासनले प्रेस स्वतन्त्रता दबाउने प्रयास गरेको भन्दै विरोध जनाएका छन् ।

पछिल्लो अध्यावधिक: असार ३, २०८२ २१:५७

पोखरा– आँधीखोलाको दोहन रोक्न खोज्दा स्याङ्जा वालिङ नगरपालिका- १० का वडाध्यक्ष सुनिल खनालले आफूमाथि रड प्रहार गरेको दुई जनाले आरोप लगाएका छन् ।

विरोध कार्यक्रममा गएर फर्किंदै गर्दा वालिङ नगरपालिका- ९ सुर्कौदी दरबार चोकमा मोटरसाइकल रोकेर वडाध्यक्ष खनाल र अर्का एक जनाले फलामको रड प्रहार गरेको दिनकर नेपालले सामाजिक सञ्जालमार्फत बताएका छन् ।

उनले आफू र मेघ आलेलाई रड प्रहार गरेको उल्लेख गरेका छन् । यस विषयमा जानकारी आएको र खोजी कार्य भइरहेको स्याङ्जा प्रहरीले जनाएको छ । 

घाइतेलाई उपचारका लागि प्राथमिक स्वास्थ्य उपचार केन्द्र लगिएको स्याङ्जा प्रहरीका सूचना अधिकारी प्रशन्नराज चौधरीले जानकारी दिए ।

पीडितबाट निवेदन आएपछि थप प्रक्रिया अघि बढ्ने चौधरीले बताए । आरोपका विषयमा बुझ्न खोज्दा वडाध्यक्ष खनालको मोबाइल स्विच अफ गरिएको पाइएको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । आफ्ना जिज्ञासाहरूको जवाफ गुगलमा त खोजिन्छ तर गुगलमा आउने लामा लामा विश्लेषण, लेखहरूले कहिलेकाही दिक्क नै लाग्छ । एउटा सानो जवाफको लागि पूरा लेख नै पढ्नुपर्ने बाध्यता हुन्छ । तर पछिल्लो समयमा विकास भएका विभिन्न एआई टुलहरूले भने यो कामालाई सहज बनाइदिएको छ । 

तपाईँले जान्न चाहेको कुरा कुनै पनि लामो लेखबाट सारांशमा थाहा पाउन सक्नुहुन्छ । यही कुरालाई मध्यनजर गर्दै गुगलले यो कामलाई अब सहज बनाएको छ । 

अब गुगलमा सर्च रिजल्ट अडियोमा नै सुन्न सकिने भएको छ । शुक्रबार ‘सर्च ल्याब्स’ अन्तर्गत सार्वजनिक गरिएको यो फिचरलाई अडियो ओभरभिउज (Audio Overviews) भनेर नाम दिइएको छ । 

यस फिचरले जेमिनाइको प्रयोग गरेर प्रयोगकर्ताले सर्च गर्दा आउने रिजल्टको ३० देखि ४५ सेकेन्डको छोटो सारांश अडियो तयार गर्छ । उक्त अडियोसँग सम्बन्धित अन्य लिंकहरू पनि देख्न सकिन्छ, ताकी प्रयोगकर्ताले अडियोमा दिएका कुराहरू पुन: भेरिफाइ गर्न सकियोस् । 

यो फिचर धेरै नोटबुक एलएममा प्रयोग भएको पाइन्छ । नोटबुक एलएममा लामा-लामा लेख तथा दस्तावेजहरूको सारांश बनाएर पोडकास्टको रुपमा सुन्न सकिन्छ । गुगलले पनि यस्तै सेवा सुरु गर्न लागेको हो ।   

गुगलले यो फिचरले सर्च अनुभवलाई टेक्स्टबाट अडियोतर्फ लैजाने संकेत दिएको छ । यसले विशेष गरी दृष्टिविहीन वा कम दृष्टि भएका प्रयोगकर्ताका लागि सहजता ल्याउने अपेक्षा गरिएको छ । तर यसले प्रकाशकहरूका लागि भने चुनौती थप्न सक्छ, जसको आम्दानी प्रयोगकर्ताले लिंक क्लिक गर्दा हुनेगर्छ  । हालसम्म यो सुविधा केवल अमेरिका भित्रका प्रयोगकर्ताका लागि उपलब्ध छ । 

अन्य प्रयोगकर्ताले भने गुगल ल्याब्समा गएर ‘सर्च ल्याब’ मा साइन इन गरी अडियो ओभरभिउज एक्टिभ गर्नुपर्नेछ । 

एकपटक इन्स्टल भएपछि ‘Generate Audio Overview’ भन्ने अप्सन आउँछ । यस ट्याप गरिसकेपछि अडियो क्लिप प्ले गर्न, भोल्युम बढाउन, म्यूट गर्न वा प्रतिक्रिया दिन सकिनेछ ।

गुगलले यो फिचर अझ परीक्षणकै चरणमा रहेको बताएको छ ।   

पछिल्लो अध्यावधिक: असार ३, २०८२ २०:४७

काठमाडौं– नेपाली राष्ट्रिय क्रिकेट टोलीले स्कटल्यान्डमा जारी त्रिदेशीय टी–२० आई सिरिजको दोस्रो खेलमा आयोजक स्कटल्यान्डलाई ९७ रनमा रोकेको छ । 

टस हारेर ब्याटिङको निम्तो पाएको स्कटल्यान्ड निर्धारित १९ दशमलव ४ ओभरमा अलआउट हुँदै ९७ रनमा समेटियो । नेपालले विजयीका लागि ९८ रनको लक्ष्य पाएको छ । 

सुरुवातबाटै दबाबमा राखेको नेपालले स्कटल्यान्डलाई १ सय रनको आँकडा पूरा गर्न दिएन ।  नेपालका लागि सन्दीप लामिछानेले कसिलो बलिङ गरे । उनले चार ओभरमा मात्र ११ रन खर्चिँदै चार महत्वपूर्ण विकेट निकाले । 

यस्तै करण केसीले ४ ओभरमा २० रन खर्चिँदै २ विकेट निकाल्दा दीपेन्द्र सिंह ऐरीले पनि दुई र ललित राजवंशीले एक विकेट निकाले । 

सुरुको ओभरमै दीपेन्द्र सिंह ऐरीले पहिलो विकेट निकालेका थिए । त्यसपछि दोस्रो ओभरमा करण केसीले एक विकेट र सोही ओभरमा अर्को विकेट रनआउट मार्फत् गुमाएपछि स्कटल्यान्ड दबाबमा परेको थियो । 

स्कटल्यान्डका माइकल लिस्कले सर्वाधिक ४६ रन बनाए । उनले ४६ बल खेल्दै एक छक्का र ४ चौका प्रहार गरे । यस्तै माथ्यु क्रसले १५ र ब्रान्डन म्याकमुलेनले १० रन बनाउनुबाहेक अन्य कुनै पनि ब्याटर दोहोरो अंकमा रन बनाउन सकेनन् । 

टी–२० आईमा नेपालको यो सबैभन्दा दबाबमुलक प्रदर्शन हो । यस्तै नेपालका पेस बलर करण केसीले टी-२०आई क्रिकेटमा १०० विकेट पूरा गरेका छन् । स्कटल्याण्डमा भइरहेको त्रिदेशीय टी-२०आई शृंखलाअन्तर्गत आज भइरहेको स्कटल्याण्डसँगको खेलमा विकेट लिँदै उनले कोशेढुंगा पार गरेका हुन् ।

उनले स्कटल्याण्डका विस्फोटक ओपनर जर्ज मुन्सेको विकेट लिए । लगत्तै उनले एक अर्को विकेट लिएर १०१ विकेट पूरा गरेका छन् । टी-२०आईमा १०० भन्दा बढी विकेट हालसम्म सन्दीप लामिछानेको नाममा मात्र थियो । उनको १११ विकेट छ ।

अब करण पनि १०० विकेटको क्लबमा जोडिएका छन् । करणको उत्कृष्ट बलिङ प्रदर्शन ५-२१ छ जुन् पीएनजीविरुद्ध सन् २०२२ मा कीर्तिपुरमा गरेको प्रदर्शन हो ।

करणभन्दा पछाडि सोमपाल कामीको ७५ तथा अविनाश बोहराको ७४ विकेट छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । एडोबीले आफ्नो जेनेरेटिभ एआई प्लेटफर्म फायरफ्लाइ ‘Firefly’ को मोबाइल एप पनि तयार गरेको छ । 

फायरफ्लाइ मोबाइल एपमा एडोबी फोटोशपमा पाइने ‘Generative Fill’ र ‘Generative Expand’ जस्ता प्रमुख टुलहरू समावेश छन् । यस एपमार्फत टेक्स्ट–टु–इमेज, टेक्स्ट–टु–भिडिओ र इमेज–टु–भिडिओ जस्ता सुविधा पनि प्रयोग गर्न सकिने एडोबीले जनाएको छ ।

फायरफ्लाइमा एडोबीका आफ्नै मोडलहरूबाहेक थर्ड पार्टी जेनेरेटिभ एआई मोडल प्रयोग गर्ने सुविधा पनि उपलब्ध छ । यसमा गुगलको Imagen 3 र  4, Veo 2 र 3 भिडिओ मोडल तथा ओपनएआईको इमेज जेनेरेटर समावेश छन् ।

मोबाइल एपबाट तयार गरिएका सामग्रीहरू प्रयोगकर्ताको क्रियटिभ क्लाउड अकाउन्टसँग स्वत: सिंक हुने भएकाले वेब वा डेस्कटप एपमा पनि सजिलै निरन्तर काम गर्न सकिने कम्पनीले जनाएको छ । यो एप नि:शुल्क भएपनि केही फिचरहरू प्रयोग गर्नका लागि भने क्रियटिभ क्लाउडको पेड भर्सन प्रयोग गर्नुपर्ने बताइएको छ ।  

यो एप आईओएस र एन्ड्रोइड दुवैमा उपलब्ध छ । 

पछिल्लो अध्यावधिक: असार ३, २०८२ १९:३७

काठमाडौं– नेपाल प्रहरीको साइबर ब्यूरोले कार्यालयमा उपस्थित हुन भन्दै पत्रकार दिलभूषण पाठकको नाममा सूचना जारी गरेको छ ।

पीडित ‘साइबर ब्यूरो ५९’को जाहेरीले सरकार प्रतिवादी भएको विद्युतीय कारोबार ऐन, २०६३ अन्तरगतको कसुरमा पक्राउ अनुमति प्राप्त भएको भन्दै उपस्थित हुन सूचनामा भनिएको छ ।

जिल्ला अदालत काठमाडौंले दिएको पक्राउ पूर्जीविरुद्ध पाठकका तर्फबाट उच्च अदालत, पाटनमा निवेदन परेको थियो । 

त्यसक्रममा अदालतले दुवै पक्षलाई ५ असारमा छलफलका लागि बोलाउँदै अल्पकालीन अन्तरिम आदेश दिएको थियो । त्यसअघि उनलाई पक्राउ नगर्न अदालतले भनेको थियो ।

मंगलबार ब्यूरोको वेवसाइटमा सूचना जारी गर्दै उनलाई ब्यूरो वा नजिकको प्रहरी कार्यालयमा उपस्थित भएर अनुसन्धानमा सहयोग गरिदिन भनिएको छ ।

प्रहरीले यसअघि पक्राउ अनुमति जारी भएका कोही पनि व्यक्तिलाई उपस्थित भइदिन भन्दै सार्वजनिक सूचना जारी गर्ने गरेको थिएन ।

हिल्टन होटलसँग सम्बन्धित भिडियोमा नेपाली कांग्रेसका सभापति शेरबहादुर देउवाका छोरा जयवीरलाई जाडेको भन्दै उनीविरुद्ध प्रहरीको साइबर ब्यूरोमा उजुरी परेको थियो । त्यसपछि प्रहरीले विद्युतीय अपराध ऐनको दफा ४७ अन्तरगतको कसुरमा पाठकलाई पक्राउ गर्न जिल्ला अदालत, काठमाडौंबाट अनुमति लिएको थियो ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । प्रयोगकर्तालाई नयाँ फिचर उपलब्ध गराउने दौडमा अझै पनि एप्पल एन्ड्रोइडभन्दा पछाडि नै छ । उदाहरणको लागि एप लक फिचर । एन्ड्रोइड प्रयोगकर्ताको लागि यो कुनै नौलो कुरा होइन । तर आईफोन प्रयोगकर्ताको लागि भने ‘बल्ल आयो यो फिचर’ भने जस्तै हो । एप्पलले आईओएस १८ मा नयाँ अपडेटसँगै यो फिचर उपलब्ध गराएको हो । अब आईफोन प्रयोगकर्ताले आफूले गोप्य राख्न चाहेका एपहरू लक गरेर राख्न सक्छन् वा होमपेजमा नै देख्न नसकिने गरी हाइड गरेर राख्न सक्छन् । 

यसरी लक गर्नुहोस् आईफोनमा एप 

• आफ्नो होमपेजमा गएर आफूले लग गर्न चाहेको एप छनोट गर्नुहोस् । उक्त एपमा लामो समयसम्म प्रेस गर्नुहोस् । 

• अब स्क्रिनमा देखिने विभिन्न अप्सनमध्ये अन्त्यतिर भएको ‘Require Face ID’ अप्सनमा ट्याप गर्नुहोस् । 

• यसलगत्तै ‘Face ID Required to open WhatsApp’ भन्ने पेज देखिन्छ र तपाईँको एप लगत्तै लक हुनेछ । यसपछि भने आफूले लक गरेको एप ओपन गर्नका लागि फेसआईडीको आवश्यकता पर्नेछ । 

अब यदि तपाईँ यसरी लक गरेको एपलाई अनलक गर्न चाहनुहुन्छ भने एपमा लामो समयसम्म प्रेस गरेर त्यहाँ देखिने ‘Don’t Require Face ID’ भन्ने अप्सनमा ट्याप गर्नुहोस् । यसपछि तपाईँको एप अनलक हुनेछ । 

एप लक गरेर हाइड गर्ने तरिका 

• यसपछि ‘Hide and Require Face ID’ मा ट्याप गर्नुहोस् । यहाँ याद गर्नुपर्ने यदि तपाईँको ह्वाट्सएपमा लोकेसन अन छ भने त्यसलाई अफ गर्नुहोस् । लोकेसन अन हुँदा एप हाइड गर्न मिल्दैन । 

• अब अब एप हाइड गर्दा के के हुन्छ भनेर पूर्ण विवरण सहितको पेज खुल्छ । सो पेजको सबैभन्दा अन्त्यमा भएको ‘Hide App’ मा ट्याप गर्नुहोस् ।  

• यसरी लक गरेर हाइड गरिएका एपहरू तपाईँको एप लाइब्रेरीमा हुन्छ । होमपेजमा बायाँतिर स्वाइप गरेर सबैभन्दा अन्तिममा हुने एप लाइब्रेरीमा जानुहोस् । त्यहाँ थोरै तल स्क्रोल गरेर सबैभन्दा अन्तिममा भएको ‘Hidden’ भन्ने एल्बममा तपाईँले आफूले लुकाएका एपहरू देख्न सक्नुहुनेछ । 

यहाँ तपाईँले हाइड गरेका एपहरू त हुन्छन्, तर अरू कसैले कुन एप हाइड गर्नु भएको भन्ने थाहा पाउँदैन । यहाँ कुनै पनि एफको आइकन देखिदैँन । तपाईँले उक्त एपमा ट्याप गरेर तपाईँको फेसआईडी मिलेपछि मात्र हाइड गरिएको देखापर्छ । यसरी हाइड गरेको एप पुन: बाहिर ल्याउनको लागि भने हिडनभित्र भएको एपमा लामो समय प्रेस गर्नुहोस् र ‘Require Face ID’ मा ट्याप गर्नुहोस् ।   

पछिल्लो अध्यावधिक: असार ३, २०८२ १८:३६