काठमाडौं। संघीय संसद् प्रतिनिधिसभाको बैठक आज बिहान ११ बजे बस्दैछ। राष्ट्रिय स्वतन्त्र पार्टीको बेल घेराउ तथा राष्ट्रिय प्रजातन्त्र पार्टीको आशनमा उभिएर गरिएको बिरोधका बाबजुद पनि शुक्रबारवाट संसद सुचारू गरिएको छ।

संघीय संसद् भवन नयाँ बानेश्वरमा बस्ने बैठकमा उपप्रधानमन्त्री एवम् अर्थमन्त्री विष्णु पौडेलले बजेटसँग आश्रित दुई विधेयक प्रस्तुत गर्ने सम्भावित कार्यसूची छ।

संघीय संसद् सचिवालयका अनुसार, अर्थमन्त्रीले ‘विनियोजन विधेयक, २०८२’ र ‘राष्ट्र ऋण उठाउने विधेयक, २०८२’ प्रस्तुत गर्ने कार्यसूची छ। यस्तै, अर्थमन्त्री पौडेलले आव २०८२-८३ को राजस्व र व्ययको वार्षिक अनुमानमाथि सांसदहरुले राखेको जिज्ञासाको जवाफ दिनेछन्।

यसैगरी, आजको बैठकमा ‘संवैधानिक परिषद् (काम कर्तव्य, अधिकार र कार्यविधि)सम्बन्धी (पहिलो संशाधन) विधेयक, २०७९’ का सम्बन्धमा राष्ट्रियसभाबाट प्राप्त सन्देशसहितको विधेयक टेबुल गरिनेछ।

काठमाडौं । सरकारले पेट्रोलियम पदार्थको मूल्य बढाएको छ। सोमबार बिहानदेखि लागु हुने गरी मूल्य बढाइएको हो।

निगमका अनुसार, पेट्रोल प्रतिलिटर एक रुपैयाँ, डिजेल/मट्टीतेल प्रतिलिटर दुई रुपैयाँ बढाइएको छ।

काठमाडौं । सुदूरपश्चिम प्रदेश सरकारले आउँदो आर्थिक वर्ष २०८२/८३ को लागी ३३ अर्ब ४७ करोड ६० लाखको बजेट ल्याएको छ। आइतबार साँझ आर्थिक मामिला मन्त्री बहादुर सिंह थापाले प्रदेशसभामा बजेट प्रस्तुत गरेका हुन्।

कुल बजेटमा चालु खर्चतर्फ १० अर्ब २० करोड ८१ लाख, पुँजीगत खर्चतर्फ १९ अर्ब ८३ करोड २ लाख, अन्तर सहकारी वित्तीय हस्तान्तरणतर्फ ३ अर्ब ४२ करोड ७७ लाख र वित्तीय व्यवस्थापनका लागि १ करोड रुपैयाँ विनियोजन गरिएको छ।

बजेटको स्रोत व्यहोरामा सबैभन्दा ठूलो हिस्सा नेपाल सरकारको राजस्व बाँडफाँटबाट ९ अर्ब ८७ करोड २५ लाख प्राप्त हुने अनुमान छ।

यस्तै, नेपाल सरकारको वित्तीय समानीकरण अनुदानबाट ८ अर्ब ९२ करोड ५६ लाख, चालु आर्थिक वर्षको बचत रकम ७ अर्ब ६६ करोड ६३ लाख, सशर्त अनुदानबाट ४ अर्ब ३ लाख, आन्तरिक राजस्व परिचालनबाट १ अर्ब ६५ लाख, संघीय समपूरक अनुदानबाट ६० करोड २६ लाख र विशेष अनुदानबाट ५१ करोड ६० लाख प्राप्त हुने प्रक्षेपण गरिएको छ।

धरान । जनता समाजवादी पार्टी नेपालका अध्यक्ष उपेन्द्र यादवले पहिचानमा आधारित सङ्घीयता सशक्त समावेशी र न्यायपूर्ण नेपाल निर्माणका लागि अनिवार्य रहेको बताए।

धरानमा आज जनता समाजवादी पार्टी लिम्बुवान् राष्ट्रिय समिति एकताको प्रथम अधिवेशनको उद्घाटन कार्यक्रममा अध्यक्ष यादवले विविधतामा एकता बोकेको नेपालको सफल भविष्य सुनिश्चित गर्न सबै जातजाति, भाषाभाषी र समुदायको समान सहभागिता आवश्यक रहेको धारणा राखे।

शासन प्रणाली, शिक्षा, प्रशासन र न्यायालयजस्ता राज्यका अङ्गहरुमा विविध समुदायको समानुपातिक प्रतिनिधित्व सुनिश्चित हुनुपर्ने उल्लेख गर्दै समान अवसर र समावेशितामा आधारित शासन व्यवस्था नै सुदृढ लोकतन्त्रको जग रहेको बताए।

अझै पनि खस भाषाको एकाधिकार सरकारी कार्यालय र शिक्षण संस्थानमा कायम रहँदा सीमावर्ती अल्पसङ्ख्यक र ऐतिहासिक रुपमा पछाडि पारिएका समुदायको समुन्नति सुस्त भइरहेको जिकिर गर्दै उनले यसलाई समावेशी र पहिचानमूलक संरचनाबाट मात्र सुधार गर्न सकिने स्पष्ट पारे। अध्यक्ष यादवले किरात लिम्बुवान् क्षेत्रको ऐतिहासिक पृष्ठभूमि नेपालको वर्तमान सीमाङ्कनभन्दा पुरानो रहेको उल्लेख गरे।

उनले भने, ‘राज्यको नीति तथा निर्णय प्रक्रियामा विविध समुदायका प्रतिनिधि उपस्थित हुनुपर्छ। जबसम्म सबै समुदायको आवाज प्रतिनिधत्व हुँदैन तबसम्म लोकतन्त्र अधुरो हुन्छ।’

अछाम । अछामको मंगलसेन नगरपालिकाले आफ्न्नो नगरको फोहोरको व्यवस्थापन गर्न नसक्दा समस्या उत्पन्न भएको छ। मंगलसेन बजारभित्रको सबै फोहोर मध्यपहाडी राजमार्गअन्तर्गत ठूलासैन–मङ्गलसेन सडक खण्डमा पर्ने पालेवन सामुदायिक वनमा फाल्दा समस्या भएको हो।

मंगलसेन नगरपालिका–६ को मानव बस्तीको बीचमा नगरपालिकाले डम्पिङ साइट निर्माण गरेको थियो। नागरिकलाई असर हुने भएपछि उक्त डम्पिङ साइट अलपत्र अवस्थामा छ।

पालेवन सामुदायिक वन क्षेत्रमा अहिले फोहोरको थुर्पो देख्न सकिन्छ। बजार क्षेत्रबाट निस्किने फोहोर अहिले जंगलको सडक छेउछाउमा थुपारिएको छ। घरबाट निस्कने फोहोर मात्रै होइन पसल, होटेलबाट निस्किने फोहोर प्लास्टिक, ब्वायलर कखुराको भुत्ला, मदिराका बोतलहरु लगायतका फोहोरले वन क्षेत्र दुर्गन्धित एवम् फोहोर भएको छ।

यसरी जताभावी फोहोर फालिँदा जङ्गल नै कुरुप मात्र होइन, स्वास्थ्यको जोखिम बढेको स्थानीयले बताएका छन्। कुहिने र नकुहिने फोहोर एकै ठाउँमा हुँदा झन् सडक आसपासमा दुर्गन्ध फैलिने गरेको छ ।

फोहोर हटाउन र त्यहाँ नफाल्न पालेवन सामुदायिक वन उपभोक्ता समितिको बैठकबाट निर्णय गरी पटकपटक नगरपालिकालाई पत्राचार गर्दा पनि नगरपालिकाले कुनै सुनुवाइ नगरेको पालेवन सामुदायिक वन उपभोक्ता समितिका अध्यक्ष यज्ञप्रसाद ढुंगानाले बताए। करिब एक वर्षदेखि फोहोर त्यहाँ फाल्ने गरेको उनले बताए।

कास्की । पोखरा रङ्गशालाको क्रिकेट मैदानमा सञ्चालन भइरहेको गण्डकी प्रदेशस्तरीय पुरूष टि–२० क्रिकेट प्रतियोगिताको आजको खेलमा तनहुँ र स्याङ्जा विजयी भएका छन्।

प्रतियोगिताको समूह ‘ए’ मा रहेका यी टोलीले दोस्रो दिनसमेत जितको लयलाई कायम राखेका हुन्। प्रतियोगिताको लिग चरणअन्तर्गत तनहुँ र म्याग्दी बीचको खेलमा तनहुँले एकपक्षीय प्रदर्शन गर्दै म्याग्दीलाई एक सय ७७ रनको फराकिलो अन्तरले पराजित गरेको छ।

म्याग्दीले टस जितेर पहिला फिल्डिङ रोजेपछि तनहुँले निर्धारित २० ओभरमा पाँच विकेटको क्षतिमा दुई सय २३ रनको विशाल योगफल खडा ग¥यो। तनहुँको जितमा कृष ऐरले ४८ बलमा एक सय दुई रनको शतकिय पारी खेले। त्यस्तै दिपेश अधिकारीले आक्रमक रुपमा खेल्दै २५ बलमा ५१ रन बनाउँदै साथ दिए। तनहुँका लागि समीर कँडेलले व्यक्तिगत १८ रन बनाए भने सुप्रिम सुनार २३ रनको योगदान दिए।

म्याग्दीका लागि रोशन कार्की, सागर कटुवाल र हरि सुवेदीले एक÷एक विकेट लिए। खेलमा जितका लागि दुई सय २४ रनको लक्ष्यसहित मैदानमा उत्रिएको म्याग्दीले १४ ओभरको चौथो बलमा ४६ रनमा बाहिरियो। रोशन कार्कीले १८ रन बनाउनु बाहेक अन्य कुनै पनि ब्याटरले दोहोरो अङ्क पार गर्न सकेनन्।

यसैगरी दोस्रो खेलमा स्याङ्जाले उत्कृष्ट प्रदर्शन गर्दै बाग्लुङलाई ७८ रनले हरायो। टस जितेर पहिले ब्याटिङ गरेको स्याङ्जाले निर्धारित २० ओभरमा नौ विकेट गुमाउँदै एक सय ७८ रन बनायो। स्याङ्जाका कप्तान सन्दीप खत्री क्षेत्रीले आक्रामक ब्याटिङ गर्दै ३३ बलमा छ चौका र चार छक्कासहित ६१ रनको महत्वपूर्ण इनिङ्स खेले।

खेलमा जितका लागि एक सय ७९ रनको लक्ष्य पछ्याउन उत्रेको बाग्लुङको ब्याटिङ सुरुदेखि नै दबाबमा रह्यो। बाग्लुङले पूरै २० ओभरमा एक सय रनमै सीमित रहँदा स्याङ्जाका बलर हाबी बने। बाग्लुङका लागि दीपेश कुँवरले सर्वाधिक २७ रन बनाए। कप्तान विश्व कार्कीले १५ रन जोडे।

प्रतियोगिताको समूह ‘ए’ को खेलमा स्याङ्जा र तनहुँ दुवै टोलीले दुई/दुई खेल जित्दै चार/चार अङ्क बटुलेका छन् भने म्याग्दी र बाग्लुङ अङ्कविहीन छन्।

यसैगरी सोमबारको पहिलो खेल बाग्लुङ र म्याग्दी तथा दोस्रो खेल तनहुँ र स्याङजाबीच हुने आयोजक प्रादेशिक क्रिकेट सङ्घका अध्यक्ष सञ्जयकान्त सिग्देलले जानकारी दिनुभयो। प्रतियोगिता कूल आठ टोलीको सहभागिता रहेको छ। सहभागी टोलीलाई दुई समूहमा विभाजन गरिएको छ।

समूह ‘ए’ मा स्याङ्जा, बाग्लुङ, तनहुँ र म्याग्दी तथा समूह ‘बी’ मा कास्की, नवलपुर, पर्वत र गोरखा रहेका छन्। प्रतियोगिताको विजेता टोलीले रु एक लाख, उपविजेताले रु ५० हजार, ट्रफी, मेडल र प्रमाणपत्र प्राप्त गर्नेछ।

काठमाडौँ । अनुत्तीर्ण परीक्षार्थीबाट पैसा लिएर सवारीचालक अनुमतिपत्र (स्मार्ट ड्राइभिङ लाइसेन्स) को परीक्षामा पास गराउने कार्यमा संलग्न रहेको उजुरीका आधारमा अख्तियार दुरुपयोग अनुसन्धान आयोगले भरतपुरस्थित यातायात व्यवस्था कार्यालय र विभिन्न ड्राइभिङ सेन्टरहरूमा छापा मारेको छ ।

आयोगका अनुसार सवारीचालक अनुमतिपत्रको लिखित तथा प्रयोगात्मक परीक्षा सञ्चालन गर्ने क्रममा अनुत्तीर्ण भएका परीक्षार्थीलाई मिलेमतोमा पास गराउने र त्यसबापत रकम असुल्ने गरिएको उजुरी परेपछि टङ्गालस्थित अख्तियारको टोलीले छापा मारी अनुसन्धान सुरु गरेको, गोरखापत्रमा प्रकाशित समाचारमा उल्लेख गरिएको छ । 

यातायात व्यवस्था कार्यालय, भरतपुर, चितवनका कार्यालय प्रमुख एवं कर्मचारी र महालक्ष्मी ड्राइभिङ सेन्टर, गुरुङ ड्राइभिङ सेन्टर र कुमार ड्राइभिङ सेन्टरलगायतको मिलेमतो रहेको अख्तियारले जानकारी दिएको छ । मिलेमतोमा यातायात व्यवस्था कार्यालय भरतपुर, चितवनबाट सञ्चालन भएको सवारीचालक अनुमतिपत्रको परीक्षा सञ्चालन गर्दा अनुत्तीर्ण भएका परीक्षार्थीबाट विभिन्न वर्गका सवारीचालक अनुमतिपत्र दिनका लागि वर्ग अनुसारको १५ हजारदेखि २५ हजार रुपैयाँसम्म रकम लिने गरेको उजुरी परेको थियो ।

छापाका क्रममा यातायात व्यवस्था कार्यालय भरतपुर, चितवनका सहायक पाँचौँ तहका कर्मचारी इन्द्रजित गुरुङको कार्यकक्षबाट १ लाख ८५ हजार रुपैयाँ नगद बरामद गरिएको छ । सोही स्थानबाट कर्मचारी गुरुङ र बिचौलिया सुरज पाठकलाई नियन्त्रणमा लिइएको बताइएको छ । 

त्यसैगरी, कार्यालय प्रमुख विष्णु भट्टराईसहित अन्य कर्मचारी र महालक्ष्मी, गुरुङ, कुमार ड्राइभिङ सेन्टरका सञ्चालकहरूको मोबाइल ३१ थान, ल्यापटप २ थान र अन्य कागजातहरू पनि नियन्त्रणमा लिइएको आयोगले जनाएको छ ।

पछिल्लो अध्यावधिक: असार १, २०८२ ८:३६

काठमाडौं । बागमती प्रदेश सरकारले आगामी आर्थिक वर्ष २०८२/८३ का लागि ६७ अर्ब ४७ करोड ७३ लाख २७ हजार रुपैयाँको बजेट विनियोजन गरेको छ।

आर्थिक मामिला तथा योजनामन्त्री कुञ्जन राज काफ्लेले चालुतर्फ २६ अर्ब ४ करोड ४६ लाख ९१ हजार (३८.६प्रतिशत) र पुँजीगततर्फ ४१ अर्ब ४३ करोड २६ लाख ३६ हजार (६१.४प्रतिशत) बजेट विनियोजन गरेका हुन्।

मन्त्रालयगत बजेट विनियोजनमा भौतिक पूर्वाधार विकास मन्त्रालयका लागि २४ अर्ब ८० करोड १९ लाख, खानेपानी, ऊर्जा तथा सिँचाइ मन्त्रालयका लागि ७ अर्ब २८ करोड ७१ लाख, वन तथा वातावरण मन्त्रालयका लागि ३ अर्ब ९९ करोड ६७ लाख, स्वास्थ्य मन्त्रालयका लागि ३ अर्ब ९६ करोड ८८ लाख विनियोजन गरिएको छ।

संस्कृति तथा पर्यटन मन्त्रालयका लागि ३ अर्ब ६७ करोड ७० लाख, कृषि तथा पशुपन्छी विकास मन्त्रालयका लागि २ अर्ब ६३ करोड ४२ लाख, युवा तथा खेलकुद मन्त्रालयका लागि १ अर्ब १६ करोड, उद्योग, वाणिज्य, भूमि तथा प्रशासन मन्त्रालयका लागि ७७ करोड ९६ लाख, आर्थिक मामिला तथा कानुन मन्त्रालयका लागि ६२ करोड ११ लाख र सहकारी तथा गरिबी निवारण मन्त्रालयका लागि २५ करोड ७८ लाख विनियोजन गरिएको छ।

काठमाडौँ । भिभो नेपालले आफ्नो नयाँ स्मार्टफोन भिभो भी ५० लाइटको बिक्रीबाट उठेको रकम राष्ट्रिय आविष्कार केन्द्रको ‘न्यानो नानी’ परियोजनालाई दिने घोषणा गरेको छ । ‘न्यानो नानी’ एक स्थानीय रूपमा डिजाइन तथा निर्मित प्रविधि हो, जसले नेपालका दुर्गम तथा शीत क्षेत्रहरूमा रहेका समय अगावै जन्मिएका वा कम तौलका नवजात शिशुहरूलाई जीवनदायिनी ताप प्रदान गर्दछ । 

आइतबार एक विज्ञप्ति जारी गर्दै कम्पनीले भिभो भी ५० लाइट स्मार्टफोनको पहिलो ५० दिनभित्र बिक्री हुने प्रत्येक युनिटबाट ५० रुपैयाँ  ‘न्यानो नानी’ परियोजनालाई सहयोग स्वरूप प्रदान गर्ने बताएको छ । यही जेठ १२ गते सार्वजनिक भएको यो फोनको मूल्य नेपाली बजारमा ३७ हजार ९९९ रुपैयाँ तोकिएको छ । 

६,५०० एमएएचको ब्लु वल्ट ब्याट्री रहेको फोनमा ९० वाटको फ्ल्याश चार्जिङ प्रविधि दिइएको छ । ६.७७ इन्चको १२० हर्ज अल्ट्रा भिजन पी–ओलेड डिस्प्लेसहित फोनमा प्रिमियम डिजाइन, ग्लो रिङ क्यामेरा मोड्युल र हाई-ग्लास मेटालिक फ्रेम जस्ता विशेषता छन् ।

भी ५० लाइटमा ५० मेगापिक्सेलको सोनी आई मुख्य क्यामेरा र ३२ मेगापिक्सेलको सेल्फी क्यामेरा दिइएको छ । साथै, एआई इरेज, एआई फोटो इनह्यान्स जस्ता स्मार्ट फोटोग्राफी टुलले प्रयोगकर्ताको अनुभवलाई अझ सहज बनाउने कम्पनीको दाबी छ ।

प्रोसेसरका हिसाबले फोन मिडियाटेक डाइमेन्सिटी ६३०० (फाइभजी) र स्न्यापड्रागन ६८५ (फोरजी) गरी दुई भेरियन्टमा उपलब्ध छ ।

पछिल्लो अध्यावधिक: असार १, २०८२ १५:२६

एजेन्सी– युक्रेनले यसै महिनाको सुरुमा इस्तानबुलमा भएको वार्तामा भएको आदानप्रदान सम्झौताअन्तर्गत रुसबाट थप एक हजार २०० शव हस्तान्तरण भएको जनाएको छ।

युद्धबन्दीको सहयोगका लागि गठित युक्रेनी सङ्गठनको मुख्यालयले सामाजिक सञ्जालमा लेखेको छ, “रुसी पक्षले युक्रेनी नागरिक र सैनिकसहितको गरी थप एक हजार २०० शव युक्रेनमा फिर्ता गरिएको छ।”

युक्रेनका रक्षामन्त्री रुस्तम उमरोभले फेसबुकमा लेखेका छन्, “यो साता चार हजार ८१२ शव फिर्ता गरिएको छ।”

उनले भने, “म यस मानवीय मिसनमा संलग्न सबैप्रति आभारी छु।”

युक्रेनले कुनै पनि शव रुसी पक्षलाई हस्तान्तरण गरेको छ वा छैन भन्ने बारे केही बताएको छैन।

गत जुन २ मा इस्तानबुलमा भएको पछिल्लो चरणको प्रत्यक्ष वार्तामा दुवै पक्षले कैदी र मारिएका सैनिकको शवको व्यापक आदानप्रदान गर्ने सहमति जनाएका थिए।

रुस र युक्रेन दुवैले सामान्यतया आफ्नो सैन्य क्षतिको खुलासा गर्दैनन्।

युक्रेनका राष्ट्रपति भोलोदिमिर जेलेन्स्कीले यसै वर्षको सुरुमा अमेरिकी समाचार संस्था एनबीसीलाई ४६ हजारभन्दा बढी युक्रेनी सैनिक मारिएको र तीन लाख ८० हजार भन्दा बढी घाइते भएको बताएका थिए। 

रुसले सन् २०२२ को सेप्टेम्बरसम्म छ भन्दा कम सैनिक मारिएको बताएको थियो। त्यसपछि उसले आफ्ना सैनिक मारिएको घोषणा गरेको छैन।

स्थानीय अधिकारीहरू र परिवारका सदस्यहरूद्वारा मृत्यु घोषणाहरूको प्रकाशन जस्ता खुला स्रोतहरू प्रयोग गरेर धेरै स्वतन्त्र अनुसन्धानहरूले मस्कोतर्फ पनि ठूलो सङ्ख्यामा मृत्यु भएको रिपोर्ट गरेका छन्। 

रुसी वेबसाइट मिडियाजोना र बिबिसीको रुसी सेवाले मारिएका करिब एक लाख ११ हजार रुसी सैनिकको नाम पहिचान गरिएको जनाएको छ।

 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।