कर्णाली । कर्णाली प्रदेश सरकारको आगामी आर्थिक वर्ष २०८२/८३ को नीति तथा कार्यक्रम बहुमतले पारित भएको छ।

कर्णाली प्रदेशसभाको दोस्रो कार्यकालको छैटौँ अधिवेशनअन्तर्गत आज बसेको बाह्रौँ बैठकमा सभामुख नन्दा गुरुङले मुख्यमन्त्री यामलाल कँडेललाई ‘आव २०८२/८३ को नीति तथा कार्यक्रम पारित गरियोस्’ भनी सभामा प्रस्ताव गर्न समय दिइन्। मुख्यमन्त्री कँडेलले ‘प्रदेशसभा नियमावली, २०८१ को नियम ३९ को उपनियम ४ बमोजिम नीति तथा कार्यक्रम पारित गरियोस्’ भनी सभासमक्ष प्रस्ताव गरे।

तत्पश्चात् सभामुख गुरुङले ध्वनि मतका आधारमा प्रस्तावबारे निर्णय लिएकी थिइन्। प्रतिपक्षी दल नेपाल कम्युनिष्ट पार्टी (माओवादी केन्द्र)का प्रदेशसभा सदस्यहरूले इन्कार गरे पनि सत्ता साझेदार दलका सदस्यहरूको ध्वनि मत बहुमत भएको भन्दै सभामुख गुरुङले नीति तथा कार्यक्रम बहुमतले पारित भएको घोषणा गरिन्।

प्रदेशसभाको अर्को बैठक यही सोमबार दिउसो ३ बजे बस्ने छ।

काठमाडौँ । डिजिटल प्रणालीले राहदानी वितरण प्रक्रिया सहज भएको परराष्ट्रमन्त्री आरजु राणा देउवाले बताएकी छन् । शनिबार राहदानी विभागले धनगढीमा आयोजना गरेको ‘राहदानी प्रणाली र यसको कार्यदिशा’ विषयक प्रदेशस्तरीय अन्तरक्रिया कार्यक्रममा बोल्दै मन्त्री राणाले सरकारले डिजिटल प्रविधिको प्रयोगमार्फत राहदानी सेवा झन् सहज र सुलभ बनाउने दिशामा कार्य अघि बढाएको पनि जानकारी दिइन् ।

“पहिला राहदानी बनाउन धेरै गाह्रो थियो,” उनले भनिन्, “अहिले भने अनलाइनबाट ई–पासपोर्ट सजिलै बनाउन सकिने अवस्था बनिसकेको छ । प्रविधिको अधिकतम प्रयोग गरेर प्रणालीलाई अझ प्रभावकारी बनाउने सोचमा छौँ ।”

मन्त्री राणाले राहदानी प्राप्त गर्नु प्रत्येक नागरिकको संवैधानिक अधिकार भएको भन्दै यस प्रक्रियामा कुनै प्रकारको अवरोध हुनु नहुने पनि स्पष्ट गरेकी छन् । साथै राहदानी वितरण प्रणालीमा देखिएका समस्याको समाधान गर्न आवश्यक नीति तथा प्राविधिक संरचना निर्माणका लागि सम्बन्धित निकायहरूसँग छलफल भइरहेको जानकारी दिइन् ।

पछिल्लो अध्यावधिक: जेठ २५, २०८२ ८:३०

काठमाडौं । देशका विभिन्न स्थानका चार जनाको शव फेला परेको छ।

कास्कीको पोखरा महानगरपालिका-२५ हेम्जास्थित बुलौसी सामुदायिक वनको भीरमा सोही ठाउँ बस्ने ५८ वर्षीय अग्निधर अधिकारी आइतबार मृत अवस्थामा फेला परेका छन्।

सल्यानको वनगाड कुपिण्डे नगरपालिका-९ सेरास्थित ठुली आमाकी घरमा बस्दै आएकी शारदा नगरपालिका-९ नेपाने घर भएका कृष्ण बहादुर थापाकी छोरी १० वर्षीया रितु थापा उनकै कोठामा आइतबार मृत अवस्थामा फेला परेकी छन्।

डोटीको सायल गाउँपालिका-६ दल्लेख बस्ने ४१ वर्षीय सुवास दमाई सोही ठाउँस्थित जंगलमा आइतबार मृत अवस्थामा फेला परेका छन्।

मोरङको ग्रामथान गाउँपालिका-७ मन्दिर टोल बस्ने ८९ वर्षीया तिलमाया खड्का सोही गाउँपालिका-६ स्थित रामजानकी मन्दिर नजिक रहेको सुनसरी मोरङ सिंचाई परियोजनाको नहरमा आइतबार मृत अवस्थामा फेला परेकी छिन्। सबै घटनाका सम्बन्धमा प्रहरीले आवश्यक अनुसन्धान गरिरहेको जनाएको छ।

काठमाडौँ । यही जुन २० तारिखमा सार्वजनिक हुने तयारीमा रहेको हलिउडको हरर (डरलाग्दो) चलचित्र ‘28 Years Later’ (२८ वर्ष पछि) अहिले निकै चर्चामा छ । चर्चामा हुनुको कारण यसको कथावस्तु वा अन्य कुनै विषय भन्दा पनि चलचित्र निर्माण गर्न प्रयोग भएको प्रविधिको विषय रहेको छ । 

यो चलचित्रको छायाङ्कनमा २० वटा आईफोन प्रयोग गरिएको भन्ने विषय बाहिर आएपछि चलचित्र अहिले चर्चाको विषय बन्न पुगेको हो । निर्देशक डेनी बोइलले निर्देशन गरेको यो चलचित्रका केही विशेष दृश्यहरू खिच्नका लागि रिग प्रयोग गरेका थिए, जसमा एकैपटक ८, १० वा २० वटा आईफोन राख्न सकिन्छ । यसरी फरक-फरक क्यामेरा एंगलबाट छायाङ्कन गरेर दृश्यहरूलाई फरक शैलीमा प्रस्तुत गरिएको छ ।

निर्देशक बोइल चलचित्र निर्माणमा प्रविधिको फरक प्रयोगका लागि चिनिन्छन् । यो पटक पनि उनले ‘होम भिडिओ’ नामक फरक प्रविधि प्रयोग गरेर चलचित्रको छायाङ्कन गरेका छन् जसका लागि आईफोन प्रयोग गरिएको हो । 

चलचित्रमा आईफोन १५ प्रो म्याक्सका साथै ड्रोन र परम्परागत क्यामराको समेत प्रयोग गरिएको छ । निर्देशकका अनुसार, २० आईफोन प्रयोग गरेर खिचिएको दृश्यलाई उनले “गरीबको बुलेट टाइम” भनेका छन्, जसले १८० डिग्री दृश्य प्रदान गर्छ र सम्पादनका क्रममा समय वा एंगल अनुसार दृश्य चयन गर्न सकिन्छ ।

पछिल्लो अध्यावधिक: जेठ २५, २०८२ १०:११

भद्रपुर (झापा) । बिर्तामोड नगरपालिका–२ चैतुवाडीस्थित श्रीराम प्लाई उदोग नजिकैको कच्ची सडक छेउमा एक अज्ञात पुरुषको शव फेला परेका छ।

स्थानीयवासीले शव देखेपछि इलाका प्रहरी कार्यालय घैलाडुब्बालाई खबर गरेका थिए। जानकारी प्राप्त भए लगत्तै इलाका प्रहरी कार्यालय अनारमनी र घैलाडुब्बाबाट खटिएको प्रहरी टोली घटनास्थलमा पुगेर अनुसन्धान प्रारम्भ गरेको जिल्ला प्रहरी कार्यालयका प्रहरी नायब उपरीक्षक खगेन्द्रबहादुर खड्काले जानकारी दिए।

प्रनाउ खड्काका अनुसार मृतकको नाम, थर र स्थायी ठेगाना हालसम्म खुलेको छैन। घटनाबारे थप अनुसन्धान भइरहेको प्रहरीले जनाएको छ।

काठमाडौँ । सहरी विकास मन्त्रालयले नेपाली नेपाल तरुण दलको भवन बनाउन तीन करोड रुपैयाँ विनियोजन गरेको भन्दै सामाजिक सञ्जालमा तीव्र आलोचना भएको छ । तरुण दलका अध्यक्ष विद्वान गुरुङले शनिबार विज्ञप्ति जारी गर्दै उक्त बजेट तरुण दलको भवन निर्माणका लागि भएको उल्लेख गर्दै उपप्रधानमन्त्री एवं सहरी विकासमन्त्री प्रकाशमान सिंह र कांग्रेस सभापति शेरबहादुर देउवालाई धन्यवाद दिएका थिए । मन्त्री सिंह कांग्रेसका संस्थापक स्वर्गीय गणेशमान सिंहका छोरा हुन् ।

यसपछि सामाजिक सञ्जाल प्रयोगकर्ताले सरकारी स्रोतको दुरुपयोग भएको भन्दै विरोध जनाएका छन् । फेसबुक, एक्स लगायतका माध्यममा प्रयोगकर्ताले जनताको करमा लुटधन्धा भएको भन्दै सत्तारुढ पार्टीकै भातृसंस्थालाई लाभ दिनेगरी बजेट विनियोजन गरिनुलाई भ्रष्टाचार भएको चित्रण गरेका छन् ।

विवाद चर्किएपछि अध्यक्ष गुरुङले शनिबार नै अर्को विज्ञप्ति निकाल्दै अघिल्लो भनाइ सच्याए । उनले बजेट तरुण दलको नभई गणेशमान सिंह स्मृति भवन निर्माणका लागि विनियोजन गरिएको र त्यसले युवाहरूको क्षमता विकास, सशक्तीकरण र सीप अभिवृद्धिमा सहयोग गर्ने दाबी गरेका छन् ।

तर, सामाजिक सञ्जाल प्रयोगकर्ताहरूको आक्रोश कम भएको छैन । धेरैले मन्त्रालयले पारदर्शिता नदेखाएको र सरकारी बजेट पार्टी हितमा प्रयोग गरेको आरोप लगाएका छन् ।

एक्समा मानवी ढकाल लेख्छिन्- “वाह! मनपरितन्त्र ! तरुण दलको भवन बनाउन शहरी विकास मन्त्रालयको ३ करोड बजेट !”

वाह! मनपरितन्त्र!

तरुण दलको भवन बनाउन शहरी विकास मन्त्रालयको ३ करोड बजेट!

https://t.co/MRwReApwIt

— Manavi Paudel (@ManaviPaudel) June 7, 2025

त्यस्तै कष्ण घिमिरे लेख्छन्- “बारामा बामाले भवन, यता तरुणदल भवन!!! विचार बेच्न दाउमा राख्ने- नाम गणेशमान र मदन- जीवराज!!!! जनआक्रोश त्यसै बढ्या छैन। जय होस।”

बारामा बामाले भवन,

यता तरुणदल भवन!!! विचार बेच्न दाउमा राख्ने- नाम गणेशमान र मदन- जीवराज!!!!

जनआक्रोश त्यसै बढ्या छैन।

जय होस।

— Krishna Ghimire (@kghimire1) June 8, 2025

‘हर्ष’ नामका अर्का एक्स प्रयोगकर्ता लेख्छन्- “सरकारी बजेट नेपाली कांग्रेसको भातृ संगठन नेपाल तरुण दलको कार्यालय बन्ने भएछ! आफ्नै हातमा डाडु पनिउ भएपछि केछ र! आफू भ्रष्टाचारमा लिप्त कार्वाही माधवकुमार नेपाललाई मात्रै ।”​

सरकारी बजेट नेपाली कांग्रेसको भातृ संगठन नेपाल तरुण दलको कार्यालय बन्ने भएछ!

आफ्नै हातमा डाडु पनिउ भएपछि केछ र!

आफू भ्रष्टाचारमा लिप्त कार्वाही माधवकुमार नेपाललाई मात्रै । pic.twitter.com/a8xQc1tuhk

— हर्ष (@jrhariss29) June 7, 2025

उत्तम खत्रीले जनताको करले, भवन बनाउन रकम छुट्ट्याइएकमा असन्तोष व्यक्त गर्दै लेखेका छन् । “देश बनाउने होइन,पार्टीको शाखा बनाउने हो रे! जनता को कर ले, भवन बनाउन ३ करोड  छुट्टाइयो अरे। सपना थियो — शिक्षा, स्वास्थ्य, रोजगारी आयो — भवन, भाषण, भ्रष्टचारी!   गलत लाई गलत त भनिदिनुन हो कोहि तरुण नेता हरुले यार। जय नेपाल”​​

देश बनाउने होइन,पार्टीको शाखा बनाउने हो रे!

जनता को कर ले, भवन बनाउन ३करोड छुट्टाइयो अरे।

सपना थियो — शिक्षा, स्वास्थ्य, रोजगारी

आयो — भवन, भाषण, भ्रष्टचारी!

गलत लाई गलत त भनिदिनुन हो कोहि तरुण नेता हरुले यार। 🤣जय नेपाल

— Uttam Khatri (@Selbyuttam) June 7, 2025

सामाजिक सञ्जाल एक्समै भिष्म नामका प्रयोगकर्ता लेख्छन्, “देशभर विद्यालय, अस्पताल, सडक पुलको अभाव हुँदाहुँदै पनि सहरी विकास मन्त्रालयले तीन करोड रुपैयाँ नेपाली कांग्रेस निकट नेपाल तरुण दलको भवन बनाउन छुट्याएको छ , विकासको परिभाषा परिवर्तन भएको छ, जनता भोकै सुत्ने, तर पार्टीका पाका र तरुणका भवनहरू बनाउन पर्छ?”

देशभर विद्यालय, अस्पताल, सडक पुलको अभाव हुँदाहुँदै पनि सहरी विकास मन्त्रालयले तीन करोड रुपैयाँ नेपाली कांग्रेस निकट नेपाल तरुण दलको भवन बनाउन छुट्याएको छ , विकासको परिभाषा परिवर्तन भएको छ, जनता भोकै सुत्ने, तर पार्टीका पाका र तरुणका भवनहरू बनाउन पर्छ?@PMSinghNC…

— भीष्म ( Bhismak1962) (@BhismaK62) June 7, 2025

बर्थिङ सेन्टर र एम्बुलेन्स अभावमा ज्यान जाने देशमा लाइभ लुटको धन्दा चलिरहेको भन्दै निर्मल प्रसाईं लेख्छन्, “ओ माई गड! तरुण दलको भवन बनाउन सहरी विकास मन्त्रालयबाट ३ करोड विनियोजन, अनि मदन-आश्रित फाउण्डेशनलाई पनि ३ करोड बजेट। बर्थिङ सेन्टर र एम्बुलेन्स अभावमा ज्यान जाने देशमा लाईभ लुटको धन्दा चलिरहेको छ, भ्रष्टचार उम्लिरहेको छ।”

ओ माई गड! तरुण दलको भवन बनाउन सहरी विकास मन्त्रालयबाट ३ करोड विनियोजन, अनि मदन-आश्रित फाउण्डेशनलाई पनि ३ करोड बजेट।

बर्थिङ सेन्टर र एम्बुलेन्स अभावमा ज्यान जाने देशमा लाईभ लुटको धन्दा चलिरहेको छ, भ्रष्टचार उम्लिरहेको छ।

— Nirmal Prasai🇳🇵 (@NirmalPrasai5) June 7, 2025

तरुण दलले गत वर्ष चैतमा काठमाडौंको रविभवनस्थित १८ आना जग्गामा नयाँ केन्द्रीय कार्यालय निर्माण गर्ने निर्णय गरेको थियो । समाजसेवी मैयादेवी श्रेष्ठले प्रदान गरेको जग्गामा निर्माण हुने भनिएको उक्त भवनका लागि केन्द्रीय सदस्यहरूले आ-आफ्नो तर्फबाट ४७ लाख रुपैयाँ र मासिक एक हजार रुपैयाँ योगदान गर्ने प्रतिवद्धतासमेत व्यक्त गरेका थिए । तर आफू मन्त्री भएको छेको पारी प्रकाशमान सिंहले तीन करोड बजेट भवन निर्माणमा छुट्याएका छन् ।

सरकारी ढुकुटीको दुरुपयोग र दलगत हितमा प्रयोगको घटना यो नै नयाँ भने होइन । यसअघि पनि विभिन्न राजनीतिक दलले नेताका नाममा स्थापित प्रतिष्ठान र कोषमार्फत सरकारी ढुकुटीको रकम लिई पार्टी कार्यालय सञ्चालन हुँदै आएका छन् । यस्तो प्रवृत्तिलाई लिएर सामाजिक सञ्जाल प्रयोगकर्ताले सरकार तथा मन्त्रालय जनताप्रति जवाफदेही नभएको, पारदर्शिता शून्य रहेको र पार्टीगत हितलाई मात्र प्राथमिकतामा राखेको भन्दै आक्रोश पोखेका छन् ।

पछिल्लो अध्यावधिक: जेठ २५, २०८२ ११:५४

वालिङ (स्याङ्जा) । यहाँका एक मिर्गौला पीडित युवाको सहयोगका लागि रु १३ लाख १६ हजार सङ्कलन गरी हस्तान्तरण गरिएको छ। वालिङ नगरपालिका–९ भुसालथोकका मिर्गौला पीडित ३६ वर्षीय जगदीश भुसालको सहयोगार्थ नेपाल स्वयंसेवक सञ्जालले रकम सङ्कलन गरी हस्तान्तरण गरेको हो।

सामाजिक तथा मानवीय कार्यमा सक्रिय रहँदै आएको सञ्जालले ‘जगदीश बचाउ अभियान’ सञ्चालन गरी सो रकमको चेक उहाँको परिवारलाई हस्तान्तरण गरेको हो। भुसालको दुवै मिर्गौलाले काम गर्न छाडेपछि अभियान सञ्चालन गरी उक्त रकम सङ्कलन गरेको सञ्जालका अध्यक्ष गोविन्द गैरेले बताए। सञ्जालले सामाजिक सञ्जालको प्रयोगमार्फत सञ्चालन गरेको अभियानमा देश तथा विदेशमा रहेका विभिन्न सहयोगदाताले संस्थालाई उपलब्ध गराएको रकम उहाँको परिवारलाई उपलब्ध गराएको अध्यक्ष गैह्रेले बताए।

वैदेशिक रोजगारीका सिलसिलामा युएईमा रहेका भुसाल केही समयअघि मात्रै स्वदेश फर्किएका थिए। उनको हाल काठमाडौंस्थित त्रिवि शिक्षण अस्पतालमा उपचार भइरहेको भाइ चिरञ्जीवी भुसालले बताए।

चार वर्षअगाडि वालिङमा स्थापना भएको सञ्जालले केही दिनअगाडि मात्रै वालिङ–५ की पाठेघरको क्यान्सरबाट पीडित युवती बिपना रेग्मीलाई दुई लाख सहयोग गरेको थियो।

काठमाडौँ । गुगलले आफ्नो लोकप्रिय ‘फाइन्ड माइ डिभाइस’ सेवालाई नयाँ नाम र विकसित क्षमताका साथ ‘फाइन्ड हब’ को रूपमा रि-ब्रान्डिङ गरेको छ । यो महत्त्वपूर्ण परिवर्तनले प्रयोगकर्ताहरूलाई आफ्नो हराएको एन्ड्रोइड फोन, ट्याब्लेट, वेयर ओएस वाच, हेडफोन वा ट्र्याकर ट्याग भएका कुनै पनि सामानहरू थप सहजै पत्ता लगाउन, सुरक्षित गर्न र हटाउन मद्‍दत गर्नेछ ।

यो नयाँ ब्रान्डिङ गुगल प्ले सर्भिसको पछिल्लो अपडेट (भर्सन २५.२०.३७) मार्फत रोल आउट भइरहेको छ । यसबिचमा तपाईँको डिभाइसमा दुवै नाम (फाइन्ड माइ डिभाइस र फाइन्ड हब) अस्थायी रूपमा देखिन सक्छन् । एन्ड्रोइड सेटिङभित्रका सबै ‘फाइन्ड माइ डिभाइस’ उल्लेख भएका ठाउँमा ‘फाइन्ड हब’ देखिन थालेको छ । उदाहरणका लागि, सेटिङको Security & privacy/Password and security अन्तर्गतको टोगलको नाम अब ‘फाइन्ड हब’ रहन गएको छ । साथै त्यसभित्र Allow device to be located (डिभाइस पत्ता लगाउन अनुमति दिनुहोस्) भन्ने नयाँ टोगल समावेश गरिएको छ ।

फाइन्ड हबको सबैभन्दा महत्त्वपूर्ण नयाँ सुविधा भनेको अफलाइन वा पावर अफ भएका मोबाइल डिभाइस पनि पत्ता लगाउने क्षमता हो । यो फिचरले तपाईँको डिभाइस अफलाइन हुँदा वा ब्याट्री सकिएर बन्द हुँदा पनि केही घण्टासम्म (यो फिचर सपोर्ट गर्ने डिभाइसहरू, जस्तै पिक्सेल ८ सिरिजका फोन) पत्ता लगाउन मद्‍दत गर्छ ।

यो सुविधाले एन्ड्रोइड डिभाइसको क्राउडसोर्स नेटवर्क प्रयोग गर्दछ । यस नेटवर्कमा तपाईँका एन्ड्रोइड डिभाइसहरूले ब्लुटुथ प्रयोग गरी नजिकका वस्तुहरू स्क्यान गर्छन् र पत्ता लागेका स्थानहरूलाई इन्क्रिप्टेड रूपमा फाइन्ड हबमा पठाउँछन् ।

यसका लागि, तपाईँको डिभाइसमा पिन, प्याटर्न वा पासवर्ड सेट गरिएको हुनुपर्छ । अफलाइन खोज्नका लागि विभिन्न सेटिङ उपलब्ध छन् । जसमा With network in high-traffic areas only रहेको छ । डिफल्ट रूपमा उपलब्ध हुने यो सेटिङले एयरपोर्ट वा व्यस्त फुटपाथ जस्ता हाई-ट्राफिक भएका क्षेत्रहरूमा हराएको डिभाइस फेला पार्न मद्दत गर्छ ।

त्यस्तै With network in all areas सेटिङले हाई-ट्राफिक र लो-ट्राफिक दुवै क्षेत्रमा हराएको डिभाइस पत्ता लगाउन मद्दत गर्छ । यो सुविधा सक्रिय राख्नका लागि फोन बन्द हुँदाको समयमा ब्लुटुथ र लोकेसन अन रहेको हुनुपर्छ । एन्ड्रोइड ८.० वा सोभन्दा तल्ला भर्सनका डिभाइसका लागि भने Store recent location सेटिङ अन गर्नुपर्छ ।

फाइन्ड हबको सहयोगमा अब हेडफोन र ब्लुटुथ ट्र्याकर ट्यागहरू जस्ता सहायक उपकरणहरूलाई पनि ट्र्याक गर्न सघाउनेछ । फास्ट पेयर (Fast Pair) प्रयोग गरेर हेडफोनहरू जोड्न सकिन्छ । जबकि ब्लुटुथ ट्र्याकर ट्यागहरू पेयरिङ पूरा भएपछि स्वतः थपिन्छन् । ट्र्याकर ट्यागहरू चाबी, झोला, साइकल जस्ता सामानहरू ट्र्याक गर्न प्रयोग गर्न सकिन्छ ।

 

फाइन्ड हब सेट अप गर्ने तरिका

तपाईँको मोबाइल डिभाइस हराउनु अघि फाइन्ड हब तयार राख्न निम्न कामहरू गर्नुपर्ने हुन्छ:

• गुगल अकाउन्टमा साइन इन भएको सुनिश्चित गर्नुहोस् । 

• लोकेसन सर्भिस अन राख्नुहोस् ।

• फाइन्ड हब (पहिलेको फाइन्ड माई डिभाइस) अन गर्नुहोस् ।

• तपाईँको डिभाइस गुगल प्लेमा देखिने कुराको सुनिश्चित गर्नुहोस् ।

• रिमोट्ली लक वा इरेज गर्नका लागि टु-स्टेप भेरिफिकेसन ब्याकअप कोड सिर्जना गर्नुपर्ने हुन्छ ।

हराएको डिभाइस पत्ता लगाउन र सुरक्षित गर्न:

फाइन्ड हब (फाइन्ड माई डिभाइस) को सहयोगमा आफ्नो हराएको फोन तथा अन्य एन्ड्रोइड डिभाइस फेला पार्न निम्न चरणहरू अपनाउनु पर्ने हुन्छ ।

• android.com/find मा गएर वा फाइन्ड हब मोबाइल एप प्रयोग गरेर आफ्नो गुगल अकाउन्टमा साइन इन गर्नुहोस् । 

• फाइन्ड हबले डिभाइसको हालको अनुमानित स्थान देखाउँछ ।

• नजिकैको उपकरण पत्ता लगाउन Play Sound (आवाज बजाउने) विकल्प प्रयोग गर्न सकिन्छ, जसले ५ मिनेटसम्म हराएको डिभाइसमा ठुलो आवाजमा घण्टी बजाउँछ ।

• यदि उपकरण टाढा छ वा चोरी भएको शङ्का छ भने, Secure Device (डिभाइस सुरक्षित गर्ने) विकल्प प्रयोग गरेर त्यसलाई तुरुन्तै लक गर्न सकिन्छ र लक स्क्रिनमा आफूले चाहेको मेसेज पनि थप्न सकिन्छ ।

• अन्तिम उपायको रूपमा यदि उपकरण भेटिने सम्भावना छैन भने Erase Device ( डिभाइस मेटाउने) विकल्प प्रयोग गरेर रिमोट्ली सबै डेटा डिलिट गर्न सकिन्छ। तर, यसो गर्दा उक्त डिभाइसमा रहेका, तर ब्याकअप नगरिएका कुनै पनि डेटा सधैँका लागि गुमाउनु पर्ने हुन सक्छ । 

फाइन्ड हब बन्द गर्ने तरिका

यदि कुनै कारणले तपाईँ फाइन्ड हब सुविधा प्रयोग गर्न चाहनु हुन्न र एक्टिभ भएको अवस्थामा त्यसलाई बन्द गर्न चाहनु हुन्छ भने निम्न चरण अपनाउन सक्नु हुन्छ । 

• सेटिङमा गएर Security मा ट्याप गर्नुहोस् ।

• ‘फाइन्ड हब’ (वा ‘फाइन्ड माइ डिभाइस’) मा गएर टगल बन्द गर्नुहोस् ।

• डिभाइसले आफ्नो स्थान शेयर गर्ने काम रोक्नका लागि लोकेसन ट्र्याकिङ पनि बन्द गर्नुपर्ने हुन्छ । यसका लागि सेटिङ हुँदै लोकेसनमा गएर त्यसलाई अफ गर्नुहोस् ।

गुगलको यो नयाँ फाइन्ड हबको रि-ब्रान्डिङ र यसमा आएका नयाँ सुविधाले एन्ड्रोइड प्रयोगकर्ताहरूलाई आफ्ना बहुमूल्य डिभाइसहरू हराउँदाको तनाव कम गर्न र व्यक्तिगत डेटाको सुरक्षा सुनिश्चित गर्न मद्‍दत पुर्‍याउने अपेक्षा गरिएको छ । 

पछिल्लो अध्यावधिक: जेठ २५, २०८२ ११:३४

काठमाडौं । भारत सरकारको सहयोगमा मुस्ताङको लोमान्थाङ गाउँपालिकास्थित दिव्य दीप माध्यमिक विद्यालयको छात्रावास भवन तथा चमेना गृह निर्माण हुने भएको छ।

सो छात्रावास भवन तथा चमेना गृहको शिलान्यास आज भारतीय राजदूतावासका नियोग उपप्रमुख प्रसन्न श्रीवास्तव र लोमान्थाङ गाउँपालिकाका अध्यक्ष टसी न्हर्वु गुरुङले संयुक्त रूपमा गरे।

उपप्रमुख श्रीवास्तवले वर्षौँदेखिको भारत–नेपाल विकास साझेदारीको वृद्धि, विस्तार र विविधीकरणमा खुसी व्यक्त गरे। उनले नेपाल सरकार र नेपाली जनताको प्राथमिकतामा आधारित रही साझेदारीलाई थप प्रगाढ र सुदृढ पार्ने भारत सरकार प्रतिबद्ध रहेको स्पष्ट पारे।

लोमान्थाङ गाउँपालिकाका अध्यक्ष, राजनीतिक प्रतिनिधिहरू, विद्यालय व्यवस्थापन समितिका अध्यक्ष तथा अन्य सरोकारवालाले भारत सरकारको सहयोगको प्रशंसा गरे।

उक्त कार्यक्रममा राजनीतिक प्रतिनिधिहरू, सरकारी अधिकारीहरू, सामाजिक कार्यकर्ता र शिक्षक, विद्यार्थी तथा अभिभावकहरूको उपस्थिति रहेको दूतावासले जनाएको छ। ‘नेपाल–भारत विकास सहयोगअन्तर्गत भारत सरकारको आर्थिक सहयोगमा रु तीन करोड ७६ लाख परियोजना लागतमा छात्रावास भवन तथा चमेना गृह निर्माण हुने भएको छ।

यस परियोजनालाई उच्च प्रभाव सामुदायिक विकास परियोजना (एचआइसीडीपी)को रूपमा लिइएको छ। उक्त विद्यालय माथिल्लो मुस्ताङमा रहेको एक मात्र उच्च माध्यमिक विद्यालय हो। यस विद्यालयमा लो–घेकर दामोदरकुण्ड गाउँपालिका र लोमान्थाङ गाउँपालिकाका बालबालिका अध्ययनरत छन्।

मुस्ताङमा जारी भ्रमणका क्रममा नियोग उपप्रमुखले लोमान्थाङस्थित लोवो निफुग नामड्रोल नोर्वुलिङ्ग मोनास्टिक स्कूलको समेत भ्रमण गर्नुभएको दूतावासले जनाएको छ। यस स्कूलको छात्रावास भवन पनि भारत सरकारको रु चार करोड १४ लाख परियोजना लागतमा उच्च प्रभाव सामुदायिक विकास परियोजनाका रुपमा निर्माण भइरहेको छ।

सन् २००३ यता भारत सरकारले नेपालमा शिक्षा, स्वास्थ्य, सडक र पुल, नदी तालिम, खानेपानी, विद्युतीकरण, कृषि, संस्कृति र समाज कल्याणलगायत विभिन्न क्षेत्रहरूमा ५७३ एचआइसीडीपी अन्तर्गत सहयोग गर्दै आएको छ। यी परियोजनाहरू सातै प्रदेशमा फैलिएका छन्। ५७३ परियोजनाहरू मध्ये ५९ वटा परियोजनाहरू गण्डकी प्रदेशमा छन् जसमध्ये मुस्ताङमा १७ वटा परियोजनाहरू छन्।

काठमाडौँ । पूर्व शिक्षामन्त्री तथा राष्ट्रिय स्वतन्त्र पार्टी (रास्वपा) की सांसद सुमना श्रेष्ठले करिअर काउन्सिलिङको दोस्रो सत्रमा सहभागी हुन अनुरोध गरेकी छिन् । आइतबार फेसबुक लाइभमार्फत उनले कक्षा १२ को परीक्षा दिएर बसेका, स्नातक तह पढेर करिअर अन्तै मोड्ने विचार गरेका विद्यार्थी तथा अभिभावकलाई फेसबुक लाइभमा जोडिन अनुरोध गरेकी हुन् । 

उनका अनुसार आज (आइतबार) आज साँझ ७:३० बाट जुम मिटिङ र “सुमना श्रेष्ठ सचिवलय”को फेसबुक लाइभमार्फत सूचना प्रविधि (आईटी) क्षेत्रमा करिअरको सम्भावनाका विषयमा काउन्सिलिङ दिन लागिएको हो । 

यस विषयमा आईटी क्षेत्रमा लामो समयदेखि काम गरेका तथा स्टार्टअप कम्पनीका लागि कर्मचारी नियुक्त गर्दै आएका व्यक्तिले विद्यार्थीलाई करिअरसँग सम्बन्धित जानकारी प्रदान गर्नेछन् ।  सत्रमा स्वयम् सुमना श्रेष्ठसँगै भूमिथान नेपालका सहसंस्थापक तथा ह्युमन रिसोर्स प्रोफेसनल गुञ्जा श्रेष्ठ, प्रविधि शिक्षक, उद्यमी तथा करियर रणनीतिकार कमलेश श्रेष्ठ वक्ताको रूपमा रहने छन् । 

उनले भनिन्, “दुई हप्ता अघि नै हामीले छलफलमा सहभागी हुन फाराम खुला गरेका थियौँ । फारम भर्नेहरूलाई जुम मिटिङको लिङ्क पठाउँछौँ । तपाईँहरू फेसबुक लाइभबाट पनि जोडिन सक्नु हुनेछ ।” यस क्रममा आईटी क्षेत्रमा भविष्य कस्तो छ, आईटी कम्पनीहरूमा कस्ता कर्मचारी नियुक्त गरिन्छ, करियरका विकल्पहरू केके छन्, आवश्यक सीपहरू र कसरी सुरुवात गर्ने लगायतका विषयमा छलफल गरिनेछ । उक्त छलफलले विद्यार्थीलाई कस्तो करिअर रोज्ने भनेर मार्गदर्शन गर्ने उनको विश्वास छ । 

श्रेष्ठका अनुसार यसअघि गत हप्ता करिअर काउन्सिलिङको पहिलो सत्र सञ्चालन गरिएको थियो । उक्त सत्रमा “करिअर भनेको के हो?” लगायतका विषयमा आधारभूत जानकारी दिइएको थियो । यस्तै, आगामी दिनमा पनि विभिन्न करिअरका विषयमा छलफलका कार्यक्रम सञ्चालन गरिने उनले बताएकी छिन् ।

अपडेटः हेर्नुहोस् लाइभ भिडिओ

पछिल्लो अध्यावधिक: जेठ २५, २०८२ २०:४३