काठमाडौं। नेपाल राष्ट्र बैंकले आजका लागि विदेशी मुद्राको विनिमय दर निर्धारण गरेको छ। राष्ट्र बैंकका अनुसार अमेरिकी डलर एकको खरिददर १३६ रुपैयाँ ७१ पैसा र बिक्रीदर १३७ रुपैयाँ ३१ पैसा कायम भएको छ।

युरोपियन युरो एकको खरिददर १५६ रुपैयाँ १३ पैसा र बिक्रीदर १५६ रुपैयाँ ८१ पैसा, युके पाउण्ड स्ट्रलिङ एकको खरिददर १८५ रुपैयाँ १४ पैसा र बिक्रीदर १८५ रुपैयाँ ९५ पैसा, स्वीस फ्रयाङ्क एकको खरिददर १६६ रुपैयाँ ४२ पैसा र बिक्रीदर १६७ रुपैयाँ १५ पैसा कायम गरिएको छ।

अष्ट्रेलियन डलर एकको खरिददर ८८ रुपैयाँ ७८ पैसा र बिक्रीदर ८९ रुपैयाँ १७ पैसा, क्यानेडियन डलर एकको खरिददर ९९ रुपैयाँ ९० पैसा र बिक्रीदर १०० रुपैयाँ ३४ पैसा, सिङ्गापुर डलर एकको खरिददर १०६ रुपैयाँ ३१ पैसा र बिक्रीदर १०६ रुपैयाँ ७७ पैसा निर्धारण गरिएको छ।

जापानी येन १० को खरिददर नौ रुपैयाँ ४८ पैसा र बिक्रीदर नौ रुपैयाँ ५२ पैसा, चिनियाँ युआन एकको खरिददर १९ रुपैयाँ ०३ पैसा र बिक्रीदर १९ रुपैयाँ १२ पैसा, साउदी अरेबियन रियाल एकको खरिददर ३६ रुपैयाँ ४५ पैसा र बिक्रीदर ३६ रुपैयाँ ६१ पैसा, कतारी रियाल एकको खरिददर ३७ रुपैयाँ ५१ पैसा र बिक्रीदर ३७ रुपैयाँ ६७ पैसा कायम भएको छ।

केन्द्रीय बैंकका अनुसार थाइ भाट एकको खरिददर चार रुपैयाँ १९ पैसा र बिक्रीदर चार रुपैयाँ २१ पैसा, युएई दिराम एकको खरिददर ३७ रुपैयाँ २२ पैसा र बिक्रीदर ३७ रुपैयाँ ३८ पैसा, मलेसियन रिङ्गेट एकको खरिददर ३२ रुपैयाँ ३२ पैसा र बिक्रीदर ३२ रुपैयाँ ४६ पैसा, साउथ कोरियन वन १०० को खरिददर १० रुपैयाँ ०७ पैसा र बिक्रीदर १० रुपैयाँ ११ पैसा, स्वीडिस क्रोनर एकको खरिददर १४ रुपैयाँ २५ पैसा र बिक्रीदर १४ रुपैयाँ ३१ पैसा र डेनिस क्रोनर एकको खरिददर २० रुपैयाँ ९३ पैसा र बिक्रीदर २१ रुपैयाँ ०२ पैसा तोकिएको छ।

राष्ट्र बैंकले हङकङ डलर एकको खरिददर १७ रुपैयाँ ४२ पैसा र बिक्रीदर १७ रुपैयाँ ५० पैसा, कुवेती दिनार एकको खरिददर ४४६ रुपैयाँ ०७ पैसा र बिक्रीदर ४४८ रुपैयाँ ०३ पैसा, बहराइन दिनार एकको खरिददर ३६२ रुपैयाँ ६४ पैसा र बिक्रीदर ३६४ रुपैयाँ २३ पैसा, ओमनी रियाल एकको खरिददर ३५५ रुपैयाँ ०९ पैसा र विक्रीदर ३५६ रुपैयाँ ६४ पैसा रहेको छ।

भारतीय रुपैयाँ एक सयको खरिददर १६० रुपैयाँ र बिक्रीदर १६० रुपैयाँ १५ पैसा तोकेको छ। राष्ट्र बैंकले यो विनिमय दरलाई आवश्यकतानुसार जुनसुकै समयमा पनि संशोधन गर्न सकिने जनाएको छ। वाणिज्य बैंकले तोक्ने विनिमय दर भने फरक हुनसक्ने र अद्यावधिक विनिमय दर केन्द्रीय बैंकको वेबसाइटमा उपलब्ध हुने जनाइएको छ।

काठमाडौं । वैदेशिक रोजगारीमा आकर्षक तलबको प्रलोभनमा पारी युके र पोल्याण्ड पठाइदिन्छु भन्दै रकम ठगी गरेको अभियोगमा २ जनालाई प्रहरीले पक्राउ गरेको छ।

पक्राउ पर्नेहरूमा काठमाडौं दक्षिणकाली नगरपालिका–१ बस्ने रामेछाप मन्थली नगरपालिका–३ घर भएकी ४० वर्षीया प्रमिला बरूवाल र काठमाडौं महानगरपालिका–२६ गोंगबु बस्ने पाल्पा माथागढी गाउँपालिका–४ घर भएका ३४ वर्षीय मोहन पोखरेल रहेका छन्।

पक्राउ मध्ये प्रमिलाले युके पठाइदिन्छु भन्दै ७ जना पीडितहरूबाट ३२ लाख ३५ हजार रूपैयाँ र मोहनले पोल्याण्ड पठाइदिन्छु भन्दै १ जना पीडितबाट १० लाख रूपैयाँ लिई सम्पर्कबिहीन भएको भन्ने पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले प्रमिलालाई काठमाडौं नागार्जुन नगरपालिका–३ हलचोकबाट र दिनेशलाई काठमाडौं महानगरपालिका–२६ गोंगबुबाट पक्राउ गरेको हो।

उनीहरूलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको छ।

गण्डकी। गण्डकी प्रदेश सरकारद्वारा गठित प्रदेश प्रशासनिक संरचना पूनरावलोकन अध्ययन तथा सुझाव समितिले शुक्रबार मुख्यमन्त्री सुरेन्द्रराज पाण्डेसमक्ष अध्ययन प्रतिवेदन पेस गरेको छ। समितिका संयोजक शरदचन्द्र पौडेलले तीन सय २४ पृष्ठको उक्त प्रतिवेदन मन्त्री र सचिवहरूको उपस्थितिमा मुख्यमन्त्री पाण्डेलाई हस्तान्तरण गरेका हुन्।

उक्त अवसरमा समितिका संयोजक पौडेलले कुनै पनि दबाब, आग्रह–पूर्वाग्रहबिना प्रदेश सरकारका एक सय ७४ वटा संगठन संरचनाको अध्ययन गरेर प्रतिवेदन तयार पारिएको बताए। ‘यो प्रतिवेदनले प्रदेश सरकारले चाहेजस्तो आफ्ना संरचनालाई चुस्त राख्न र कामकारबाहीलाई प्रभावकारी बनाउन मद्दत पुग्नेछ’, उनले भने। समितिले आफ्नो कार्यजिम्मेवारीभित्र रहेर सुझावसहित प्रतिवेदन बुझाएको हो।

प्रतिवेदन बुझेपछि मुख्यमन्त्री पाण्डेले सरकारले त्यसलाई अध्ययन गरेर लागु गर्ने बताए। ‘यो देखाउन वा थन्क्याउन बनाइएको होइन, प्रतिवेदन अध्ययन गरेर तत्काल कार्यान्वयन गर्न औँल्याइएका विषय लागू हुन्छ, अन्य विषय क्रमशः सरकारले लागु गर्दै जानेछ’, मुख्यमन्त्री पाण्डेले भने। संघीयता लागू गर्दा उत्साहका साथ धेरै संरचना खडा गरिएको तर अहिले ती संरचनाका कारण प्रदेशमाथि पनि प्रश्न उठ्न थालेकाले प्रशासनिक पुनरावलोकन जरूरी परेको उनको भनाइ थियो।

प्रशासनिक खर्च धेरै हुँदा प्रदेशको विकास खर्च बर्सेनि घटेको, आम्दानीको स्रोत बढाउन कानुनी अड्चन झेल्नुपरेकाले खर्च कटौतीका लागि पुर्नसंरचना आवश्यक भएको मुख्यमन्त्री पाण्डेले बताए। प्रदेश सरकारले गत चैतमा पूर्वसचिव पौडेलको संयोजकत्वमा पूर्वसहसचिव महेश्वर नरसिंह केसी र सहसचिव अच्युत लामिछाने सदस्य रहेको अध्ययन तथा सुझाव समिति बनाएको थियो।

काठमाडौं। माओवादी केन्द्रनिकट युवा संगठन योङ कम्युनिस्ट लिग (वाईसीएल)को अध्यक्षमा पुष्प ओली सर्वसम्मत चयन भएका छन्।

शुक्रबार तेस्रो सम्मेलनबाट अध्यक्षमा ओली सर्वसम्मत बनेका हुन्। ओली निवर्तमान समितिका उपमहासचिव थिए। त्यसैगरी महासचिवमा गणेश शाही चुनिएका छन्।

आइतबारदेखि सुरु भएको सम्मेलनमा सर्वसम्मत सहमति जुट्न नसक्दा चार पटकसम्म निर्वाचन कार्यतालिका संशोधन भएको थियो।

लेखनाथ (कास्की)। शिक्षा, विज्ञान तथा प्रविधिमन्त्री रघुजी पन्तले शिक्षा विधेयकसम्बन्धी भएका छलफलले अन्तिम रूप लिन लागेकाले यथाशीघ्र ऐन आउने बताएका छन्। प्रिन्सिपल एसोसिएसन अफ नेपाल (पान)को दोस्रो शिखर सम्मेलनलाई आज पोखरामा सम्बोधन गर्दै उनले आगामी साउनभित्र शिक्षा ऐन ल्याउने गरी तयारी भइरहेको उल्लेख गरे।

शिक्षा विधेयक पारित गर्न शिक्षक महासंघको सहयोग आवश्यक रहेको बताउँदै मन्त्री पन्तले शिक्षा मन्त्रालय महासंघसँग छलफल र वार्ता गरी अगाडि बढ्न तयार रहेको बताए। ‘उत्कृष्ट शिक्षा ऐन ल्याउन सक्यौँ भने शिक्षा क्षेत्रको विकास दु्रतगतिमा अगाडि बढ्ने विश्वाससहित महासंघसँग सहकार्य र समन्वय आवश्यक परेको हो’, उनले भने।

आगामी आर्थिक वर्षको बजेटमा शिक्षा क्षेत्रको विकासका लागि यथास्थितिमा बजेट छुट्याइएकाले उल्लेख्य उपलब्धि प्राप्त गर्न केही असहज हुनसक्ने मन्त्री पन्तले धारणा राखे । ‘विदेशको तुलनामा नेपालमा शिक्षा क्षेत्रमा बजेट कम छुट्याउने गरिन्छ, त्यसले समग्र विकासमा केही बाधा पर्ने देखिन्छ। चालु आवमा जति बजेट थियो, त्यति नै आगामी आवका लागि छुट्याउँदा शिक्षा क्षेत्रको विकास गर्न केही असहज परिस्थिति आउनसक्ने अनुमान गरेका छौँ’, उनले भने।

शिक्षामा नयाँनयाँ प्रविधि र अभ्यासको प्रयोग विकास हुँदै गएकाले शिक्षक पनि प्रविधिमैत्री हुन जरुरी रहेको बताउँदै मन्त्री पन्तले गुणस्तरीय शिक्षण सिकाइ र व्यावहारिक शिक्षामा जोड दिन उनले सम्पूर्ण शिक्षकलाई आग्रह गरे। ‘प्राथमिक तहमा दरबन्दीभन्दा बढी शिक्षक भएकाले ती शिक्षकलाई निम्नमाध्यमिक र माध्यमिक तहमा समायोजन गर्ने तयारीमा छौँ’, उनले भने।

शिक्षक महासंघसँग भएका नौ बुँदे सहमतिप्रति शिक्षा मन्त्रालय गम्भीर रहेको बताउँदै मन्त्री पन्तले शिक्षा विधेयक पारित गर्न शिक्षकहरूको सहयोगको आवश्यकता औँल्याए।

शिक्षा, स्वास्थ्य तथा सूचना प्रविधि समितिका सभापति अम्बरबहादुर थापाले विद्यालय तहको शिक्षामा सुधार गर्ने प्रमुख जिम्मेवारी प्रधानाध्यापकसहित सम्पूर्ण शिक्षकको भएकाले विद्यालयमा शैक्षिक वातावरण बनाउन आग्रह गरे। ‘शिक्षकहरूले आफ्नो अधिकारमात्र खोज्ने होइन, आफ्नो कर्तव्य पनि पूरा गर्नुपर्छ’, उनले भने।

शिक्षाविद् प्रा डा विद्यानाथ कोइरालाले शिक्षण सिकाइलाई प्रभावकारी बनाउँदै शिक्षामा नयाँ प्रविधि र अभ्यास प्रयोग गर्न शिक्षकहरूलाई आग्रह गरे। सम्मेलनमा सातवटै प्रदेशका उत्कृष्ट प्रधानाध्यापक, विद्यालय, पालिका तथा दीर्घसेवा प्रदान गरेका प्रधानाध्यापकलाई सम्मान गरिएको थियो।

दुई दिनसम्म सञ्चालन हुने सम्मेलनले शिक्षा क्षेत्रका समग्र पक्षलाई समेटेर पोखरा घोषणापत्र जारी गरिने पानले जनाएको छ। उक्त कार्यक्रम पानका अध्यक्ष सुदामप्रसाद गौतमको अध्यक्षतामा सम्पन्न भएको थियो।

काठमाडौँ । गुगलले आफ्नो नयाँ एआई मोडेल जेमिनाई २.५ प्रो अपडेट गरी सार्वजनिक गरेको छ । यो संस्करण पहिलेभन्दा थप सशक्त र बौद्धिक रहेको भन्दै कम्पनीले कोडिङका जटिल कार्यमा अन्य प्रतिस्पर्धी मोडेलभन्दा उत्कृष्ट भएको दाबी गरेको छ ।

यो अपडेटेड संस्करण हाल गुगलको एआई डेभलपर प्लेटफर्म एआई स्टुडिओ, भर्टेक्स एआई र जेमिनाई एपमा उपलब्ध छ भने केही सातामा सबैका लागि सार्वजनिक रूपमा उपलब्ध हुने जानकारी दिइएको छ ।

गुगलका अनुसार नयाँ जेमिनाई २.५ प्रोले प्रयोगकर्ताका अघिल्ल‍ा प्रतिक्रियालाई ध्यानमा राख्दै जवाफको शैली र संरचनामा सुधार ल्याएको छ । कोड एडिटिङमा यसले ८२.२ प्रतिशतको प्रदर्शन देखाएको छ भने गणित (AIME 2025) मा ८८ प्रतिशत र विज्ञान (GPQA) मा ८६.४ प्रतिशतको नतिजा ल्याएको छ ।

जटिल ज्ञान र तर्कशक्ति परीक्षण (Humanity’s Last Exam) मा पनि यसले २१.६ प्रतिशत स्कोर गर्दै अन्य मोडेलभन्दा अग्रस्थान कायम राखेको गुगलको दाबी छ ।

जेमिनाई २.५ प्रोको इनपुट मूल्य प्रति मिलियन टोकन १‍.२५ डलर तोकिएको छ भने आउटपुट मूल्य १० डलर रहेको छ । यसमा भिजुअल र भिडिओ बुझाइ, लामो सन्दर्भ सम्हाल्ने क्षमता र बहुभाषिक प्रदर्शनमा समेत सुधार देखिएको कम्पनीको भनाइ छ ।

गुगलले यो मोडेल अब इन्टरप्राइज स्तरको प्रयोगका लागि समेत उपयुक्त बनाइएको र यसमा थिङ्किङ बजेट (thinking budgets) जस्ता सुविधा समावेश गरिएको जनाएको छ । यसले डेभलपरलाई लागत र समय बचाउन सजिलो बनाउने विश्लेषण गरिएको छ ।

पछिल्लो अध्यावधिक: जेठ २३, २०८२ १३:११

झापा। कनकाई नगरपालिका–२ मा करेन्ट लाग्दा आज आठ जना घाइते भएको जिल्ला प्रहरी कार्यालय झापाले जनाएको छ। हात्ती छेक्न लगाइएको तारबाट करेन्ट लाग्दा उनीहरू घाइते भएका हुन्।

स्थानीय फरकबहादुर बस्नेतको केरसाबारीमा बोडी टिप्न जाँदा उनीहरूलाई करेन्ट लागेको थियो। घाइते हुनेहरूरुमा कनकाई ४४ वर्षीय तुलाराम कार्की, २२ वर्षीया लक्ष्मी चौहान, ३५ वर्षीय गोपाल बस्नेत, ५८ वर्षीया डम्बरकुमारी बस्नेत, ६४ वर्षीय फरकबहादुर बस्नेत, २६ वर्षीया अनु खड्का, २२ वर्षीया सन्ध्या कार्की र १८ वर्षीय सलिन कार्की रहेका छन्।

घाइतेहरूको बीएण्डसी अस्पताल विर्तामोडमा उपचार भइरहेको र सबै जनाको अवस्था सामान्य रहेको प्रहरीले जनाएको छ।

आजै कमल गाउँपालिका–२ तोपगाछीमा बाथरुमा चिप्लिएर एक जनाको मृत्यु भएको प्रहरीले जनाएको छ । मृत्यु हुनेमा स्थानीय ९३ नरप्रसाद पौडेल छन्।

आफ्नै घरको बाथरूमबाट निस्कने क्रममा चिप्लिएर लड्दा उनी घाइते भएका थिए। उनलाई उपचारका लागि बिराटनगरस्थित टिचिङ अस्पतालमा लगिएको थियो। उपचारकै क्रममा सोही अस्पतालमा उनको मृत्यु भएको जिल्ला प्रहरी कार्यालय झापाका प्रवक्ता खगेन्द्रबहादुर खड्काले बताए।

काठमाडौँ । मधेस प्रदेशमा ‘स्कुल अफ एआई तथा रोबोटिक्स’ स्थापना हुने भएको छ । शुक्रबार बसेको मधेस प्रदेश सभाको बैठकमा आर्थिक वर्ष २०८२/८३ का लागि प्रदेश सरकारको नीति तथा कार्यक्रम प्रस्तुत गर्दै प्रदेश प्रमुख सुमित्रा सुवेदी भण्डारीले उक्त योजना पेस गरेकी हुन् । 

“स्कुल अफ एआई तथा रोबोटिक्स पूर्वाधार तथा भवन संरचना निर्माणको कार्यलाई अघि बढाइनेछ,” उनले भनिन् । यसका साथै प्रदेशभर नै ‘एआई फर इफिसेन्सी’ शीर्षक अन्तर्गत एआई साक्षरता तथा प्रशिक्षण कार्यक्रम पनि सञ्चलनमा ल्याइने उनले बताइन् । 

यस्तै प्रदेशले आगामी आर्थिक वर्षमा सामुदायिक माध्यमिक विद्यालयहरूमा प्रविधिमैत्री गुणस्तरीय शिक्षा प्रदान गर्न स्मार्ट/डिजिटल बोर्डको व्यवस्था मिलाइने र सूचना तथा डिजिटल प्रविधिको विकास गरी गुणस्तरीय शिक्षामा जोड दिइने प्रदेश प्रमुख भण्डारीले बताइन् । 

स्पेस एन्ड कम्युनिकेसन सेन्टर तथा स्टार्टअप र इन्कुवेसन सेन्टर स्थापना हुने

विज्ञान र प्रविधिको विकासलाई समृद्धिको आधारका रूपमा अघि बढाउने लक्ष्यसहित मधेस प्रदेश सरकारले ‘साइन्स एन्ड टेक्नोलोजी इनोभेसन क्लस्टर्स’ अन्तर्गत विभिन्न केन्द्रहरू पनि स्थापना गर्ने भएको छ । प्रदेश प्रमुख भण्डारीका अनुसार, प्रदेश गौरवको आयोजनाको रूपमा रहेका यी केन्द्रहरूका लागि प्रविधिमैत्री वातावरण निर्माण, नवप्रवर्तनमा आधारित उद्यमशीलता प्रवर्धन र वैज्ञानिक अनुसन्धानलाई प्रोत्साहन गर्ने लक्ष्य लिइएको छ । 

पछिल्लो अध्यावधिक: जेठ २३, २०८२ २०:३१

काठमाडौं। नेपाल कम्युनिष्ट पार्टी (एमाले) का महासचिव शंकर पोखरेलले मुलुकको अर्थतन्त्र विस्तारै लयमा फर्कन थालेको बताएका छन्।

एमाले उपत्यका विशेष प्रदेश कमिटीले आज यहाँ आयोजना गरेको ‘आर्थिक वर्ष २०८२/८३ को बजेट विमर्श–२०८२’ कार्यक्रममा उनले निजी क्षेत्र चलायमान देखिएकोले अर्थतन्त्र लयमा फर्कन थालेको बताए। उनले बजेटका माध्यमबाट निजी क्षेत्रका माग सम्बोधन गर्ने प्रयास गरिएको बताए।

महासचिव पोखरेलले तरलता नियन्त्रण गर्ने नाममा साधारण खर्च बढिरहेकाले राज्यको पैसा अनुत्पादक काममा खर्च भइरहेको बताए। ‘मौद्रिक सन्तुलनका लागि हामीले पैसा खर्च गरिरहेका छौँ। एकातिर हामीसँग पैसा छैन। अर्कातिर बैंकमा थुप्रिएका पैसालाई व्यवस्थापन गर्ने नाममा पैसा खर्च गरिरहेका छौँ’, उनले भने, ‘राज्यको पैसा तरलता नियन्त्रण गर्ने नाममा खर्च भइरहेको छ।’

राष्ट्र बैंकले तरलता खिच्नुपर्ने बाध्यताको अन्त्य गर्न सके बैंकमा व्यवसायीहरु लगानीका प्रस्ताव लिएर आउने बताए। ‘अर्थतन्त्र लयमा फर्कनका लागि निजी क्षेत्र चलायमान हुनुपर्‍यो। अहिले बाहिरबाट सामान ल्याएर व्यापार गर्ने सक्रिय छन्। राजस्व बढेको छ। आयात वृद्धि भएको छ। आर्थिक क्रियाकलाप बढेर आयात बढेको हो’, उनले भने।

एमाले पोलिटब्युरो सदस्य सुजिता शाक्यले बजेटले अर्थतन्त्र चलायमान गराउने कार्यक्रम समेटिएको बताए। कमिटीका अध्यक्ष प्रेमप्रसाद पराजुलीले मुलुकको आर्थिक संकट समाधान गर्न वर्तमान सरकार सफल भइरहेको बताए।

काठमाडौँ । मधेस प्रदेश सरकारले सौर्य ऊर्जा प्रवर्धन गर्दै ऊर्जामा आत्मनिर्भर बन्ने लक्ष्यसहित विस्तृत गुरुयोजना तयार पार्ने भएको छ ।

शुक्रबार मधेस प्रदेश सभाको बैठकमा आर्थिक वर्ष २०८२/८३ का लागि नीति तथा कार्यक्रम प्रस्तुत गर्दै प्रदेश प्रमुख सुमित्रा सुवेदी भण्डारीले प्रदेशभित्र रहेका नदीका बगरहरूलाई सदुपयोग गरी सौर्य ऊर्जा उत्पादन गर्ने कार्यक्रम घोषणा गरेकी हुन् । 

उनका अनुसार यसरी उत्पादित ऊर्जालाई राष्ट्रिय प्रसारण लाइनमा जोडिनेछ । साथै सार्वजनिक तथा निजी साझेदारीको मोडेलमा सामुदायिक विद्यालयहरू र प्रादेशिक अस्पतालहरूमा सौर्य ऊर्जा जडान गरिने पनि उनले बताइन् ।

पछिल्लो अध्यावधिक: जेठ २३, २०८२ २०:४४