काठमाडौं। प्रतिपक्ष दलले संसद अवरुद्ध पार्ने थाहा पाएपछि प्रधानमन्त्री केपी शर्मा ओलीले प्रमुख प्रतिपक्ष दल माओवादी केन्द्रका अध्यक्ष पुष्पकमल दाहाल प्रचण्डलाई फोन गरेर गृहमन्त्रीलाई संसदमा बोल्न दिने वातावरण बनाउन आग्रह गरेका छन्।
प्रतिपक्ष दलको बैठक बसिरहेका बेला प्रधानमन्त्री ओलीले प्रचण्डलाई फोन गरेर संसदमा गृहमन्त्रीलाई बोल्ने वातावरण बनाउन सहयोगको याचना गरेका हुन्। तर जवाफमा प्रचण्डले गृहमन्त्रीलाई राजीनामा गराउनुस् र गृहमन्त्रीमाथि उठेको विषयमा तपाईंले जवाफ दिनुस् भन्ने जवाफ फर्काएका छन्।
बिहीबार प्रधानमन्त्री निवास बालुवाटारमा भएको कांग्रेस एमाले शीर्ष नेताहरुबीचको छलफलले गृहमन्त्रीले राजीनामा नदिने निर्णय गरेको थियो। त्यस लगत्तै बसेको प्रतिपक्ष दलको बैठकले संसद अवरोध गर्ने गरी छलफल गरेको थियो। विपक्षी दलको बेठक चलिरहेका बेला प्रधानमन्त्री ओलीले प्रचण्डलाई फोन गरेको बैठकमा सहभागी माओवादी सांसद माधव सापकोटाले जानकारी दिए।
‘प्रधानमन्त्रीजीले अध्यक्ष (प्रचण्ड) लाई फोन गर्नु भएको थियो। प्रधानमन्त्रीले संसदमा गृहमन्त्रीलाई बोल्ने वातावरण बनाउनु सहयोग आग्रह गर्नु भयो। जवाफमा अध्यक्षले गृहमन्त्रीको राजीनामा गराउनुस्, त्यसपछि गृहमन्त्रीमाथि उठेका प्रश्नको जवाफ तपाईंले दिनुस् भन्नु भयो,’ प्रधानमन्त्री र प्रचण्डबीच भएको फोन संवाद उद्धृत गर्दै सापकोटाले डिसी नेपालसँग भने।
भिजिट भिसा प्रकरणमा गृहमन्त्रीको राजीनामा माग गर्दै प्रतिपक्ष दलहरुले संसद अवरोध गर्दै आएका छन्।
सामाग्री श्रोत :
सहयोग मागेका प्रधानमन्त्रीलाई प्रचण्डको जवाफ-पहिला गृहमन्त्री हटाउनुस्
काठमाडौं । प्रोग्रामिङ शिक्षा प्रदान गर्दै आएको ‘मेरो कोडिङ क्लास’ले कक्षा १२ को परीक्षा दिएर बसेका विद्यार्थीका लागि एआई र पाइथन प्रोग्रामिङ सम्बन्धी नयाँ प्रशिक्षण कार्यक्रम ल्याएको छ । कम्पनीले १८ जेठदेखि नयाँ कक्षा सञ्चालन गर्न लागेको हो ।
यस कोर्सलाई ‘मेरो कोडिङ्स प्रो लेभल’ नाम दिइएको छ । प्रशिक्षणमा सहभागी विद्यार्थीले एआई र पाइथनका साथै मसिन लर्निङ, डिप लर्निङजस्ता विषयमा गहन ज्ञान हासिल गर्न सक्ने कम्पनीले जनाएको छ ।
कम्पनीका अनुसार कोर्समा सहभागीलाई आईटी कम्पनीका विज्ञबाट मेन्टरशिपको अवसर प्रदान गरिनुका साथै इन्टर्नशिपका लागि समेत तयारी गराइनेछ । यस बाहेक कोर्स पूरा गरेपछि विद्यार्थीलाई विभिन्न प्रोग्रामिङ प्रतियोगितामा सहभागी गराइने र ३० भन्दा बढी एआई प्रोजेक्टमा काम गर्ने अवसर दिइने छ ।
दुई महिनासम्म सञ्चालन हुने यस कोर्सको कुल शुल्क २५ हजार रुपैयाँ निर्धारण गरिएको छ । यद्यपि सुरुवाती ३० विद्यार्थीले २० प्रतिशत अर्थात् पाँच हजार रुपैयाँ छुट पाउनेछन् । यसबारे थप बुझ्न तथा आवेदन दिन यहाँ क्लिक गर्नुहोस् ।
पछिल्लो अध्यावधिक: जेठ १४, २०८२ १२:१२
सामाग्री श्रोत :
टेक पाना
एजेन्सी–भारतको मणिपुरमा आज भूकम्पका दुई झट्का महसुस गरिएको छ।
भूकम्पको तीव्रता रेक्टर स्केलमा २ दशमलव ५ र ५ दशमलव २ मापन गरिएको थियो। भूकम्पको झट्का महसुस गरेपछि मानिसहरू आत्तिँदै घरबाट बाहिर निस्किएका थिए।
राष्ट्रिय भूकम्प विज्ञान केन्द्र (एनसीएस) का अनुसार मे २८ मा भारतीय समयअनुसार बिहान १ः५४ बजे मणिपुरको चुराचन्दपुर जिल्लामा ५ दशमलव २ म्याग्निच्युडको भूकम्प गएको थियो। यस भूकम्पको केन्द्रबिन्दु २४ दशमलव ४६ उत्तर अक्षांश र ९३ दशमलव ७० पूर्वी देशान्तरमा ४० किलोमिटर गहिराइमा थियो। यसको केही समयपछि, मणिपुरमा दोस्रो पटक भूकम्पका झट्का महसुस गरियो।
एनसीएसका अनुसार, मणिपुरको नोनी जिल्लामा बिहान २ः२६ बजे २ दशमलव ५ म्याग्निच्युडको अर्को हल्का भूकम्प गएको थियो। यस भूकम्पको केन्द्र नोनी जिल्लामा २४ दशमलव ५३ उत्तर अक्षांश र ९३ दशमलव ५० पूर्वी देशान्तरमा थियो, जसको गहिराइ २५ किलोमिटर थियो।
यद्यपि, यस भूकम्पबाट जनधनको क्षतिको कुनै समाचार आएको छैन। तर, लगातार दुई भूकम्पका कारण मणिपुरका मानिसहरू आत्तिएर घरबाट बाहिर निस्किएका चाहिँ थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौं- स्वास्थ्य तथा जनसंख्या मन्त्री प्रदीप पौडेलले नेपालमा पढेका चिकित्सक लिने देशसँग रोयल्टी लिने व्यवस्था गरिने बताएका छन्। एमबीबीएस अध्ययन गराउन सरकारको ठूलो खर्च लाग्ने बताउँदै त्यस्तो व्यवस्था गरिने बताएका हुन्।
बुधबार राष्ट्रिय ट्रमा सेन्टरमा आयोजित ‘ट्रमा एन्ड इन्जुरी लाइफ सपोर्ट’ कार्यक्रममा बोल्दै उनले यस्तो बताएका हुन्। आफू विश्व स्वास्थ्य सम्मेलनमा स्विट्जरल्यान्ड पुगेपछि यस्तो महशुस भएको उल्लेख गरे।
उनले भने, ‘एमबीबीएस पढाउन राज्यको ठूलो लगानी लागेको हुने रहेछ। ती विदेशिँदा राज्यलाई ठूलो हानी हुँदो रहेछ। हामीले लगानी गर्ने, विदेशीले सेवा लिने भइरहेको छ।’
यस्तो अवस्थामा राज्यबाट राज्यलाई नै रोयल्टी तिर्ने व्यवस्था गर्ने उनको भनाइ छ। नेपालमा अवसर नपाएर चिकित्सकहरु विदेशिरहेको समेत उल्लेख गरे। त्यसकारण ट्रमा सेन्टर जस्ता अस्पतालमा प्रशासनका करारहरु आवश्यकता भन्दा बढी भए नवीकरण नगर्न सुझाए।
उनले थपे, ‘डाक्टरले करारमा समेत जागिर नपाए विदेशिन्छ। हामीलाई खडदार भन्दा पनि नर्स चाहिएको छ। डाक्टर चाहिएको छ।’
उनले यसअघि मन्त्रीहरुले आफ्नो मान्छेलाई व्यवस्थापन गर्न गैरप्राविधिक जनशक्ति अस्पतालहरुमा भरेको संकेत गरे। आफूले सिफारिस गर्दा पनि चिकित्सक र नर्सबाहेकलाई नगरेको प्रष्ट्याए।
‘ट्रमा एन्ड इन्जुरी लाइफ सपोर्ट’ तालिम सुरु
सेन्टरले पाइलट प्रोजेक्टमा रुपमा ‘ट्रमा एन्ड इन्जुरी लाइफ सपोर्ट’ तालिम सुरु गरेको छ। अस्पतालका प्रमुख मेडिकल सुपरिटेन्डेन्ट डा बद्री रिजालले उपत्यकाभित्रका विभिन्न अस्पतालका मेडिकल अधिकृतलाई उक्त तालिम दिइने बताए।
तालिममा २४ जना सहभागी छन्। राष्ट्रिय तालिम केन्द्रको सहयोगमा सेन्टरले ‘पाइलट प्रोजेक्ट’का रुपमा सुरु गरेको हो। विस्तारै क्यालेन्डर प्रोगामका रुपमा राखिने उनको भनाइ छ।
चिकित्सा विज्ञान राष्ट्रिय प्रतिष्ठानका उपकुलपति डा भुपेन्द्र बस्नेतले तालिमले चिकित्सकको सीप विकासमा भूमिका खेल्ने बताए। उनले थपे, ‘सैद्धान्तिक ज्ञानका साथै व्यवहारिक प्रयोग हुने भएकाले काममा रुपान्तरण गर्दा यसले भूमिका खेल्नेछ।’
तालिम केन्द्रका निमित्त निर्देशक डा माधव लम्सालले नेपालको स्वास्थ्य प्रणालीमा यस्ता तालिमले नयाँपन दिने बताए। उनले भने, ‘प्रिहस्पिटल, हस्पिटल र पोष्ट हस्पिटल केयरमा इन्जुरी र ट्रमाका विषयमा तालिम दिइनेछ। कतिपय अवस्थामा ज्ञान पुरानो हुनसक्छ वा नयाँ अभ्यास र अध्ययनले फरक पारेको हुनसक्छ। यसले अपडेट गराउनेछ।’
सामाग्री श्रोत :
swasthyakhabar
काठमाडौं । चीनको पूर्वी शानडोङ प्रान्तमा रहेको एक रासायनिक प्लान्टमा भएको ठूलो विस्फोटमा कम्तीमा पाँच जनाको मृत्यु भएको छ। यस दुर्घटनामा १९ जना घाइते भएका छन्।
मंगलबार राति भएको यस दुर्घटनापछि छ जना बेपत्ता भएको बताइएको छ। सामाजिक सञ्जालमा भाइरल भएको फुटेजमा घटनास्थलबाट कालो धुवाँ निस्किरहेको देखिन्छ।
स्थानीय प्रशासनका अनुसार शानडोङ युदाओ केमिकल कारखानामा राहत र उद्धार कार्यका लागि २०० भन्दा बढी आपतकालीन उद्धारकर्मीहरू खटाइएको थियो। कम्पनीको वेबसाइटका अनुसार यहाँ कीटनाशक र औषधि उत्पादन गरिन्थ्यो।
सामाग्री श्रोत :
चीनको एक रासायनिक प्लान्टमा ठूलो विस्फोट, कम्तिमा पाँच जनाको मृत्यु
काठमाडौँ । मेटाले आईप्याड प्रयोगकर्ताका लागि छुट्टै ह्वाट्सएप एप ल्याएको छ । सन् २००९ मा ह्वाट्सएप र २०१० मा पहिलो आईप्याड सार्वजनिक भएपछिको १५ वर्षपछि मेटाले पहिलो पटक यस्तो कदम चालेको हो ।
एप स्टोरमा उपलब्ध भइसकेको यस एपमा आईफोनको ह्वाट्सएप एपमा जस्तै सुविधा उपलब्ध छन् । यसमार्फत ३२ जनासम्मको अडियो र भिडिओ कल गर्न सकिनेछ । त्यस्तै अगाडि र पछाडिको दुबै क्यामेरा प्रयोग गर्न मिल्नेछ । साथै स्क्रिन सेयर गर्ने सुविधा पनि उपलब्ध हुनेछ ।
यो एप आईप्याडओएसका स्टेज म्यानेजर, स्प्लिट भ्यू र स्लाइड ओभर जस्ता सुविधासँग मेल खाने गरी डेभलप गरिएको छ । यसले गर्दा प्रयोगकर्ताले वेब ब्राउजिङ वा भिडिओ हेर्दै गर्दा पनि स्प्लिट स्क्रिनमा मेसेजहरू सजिलै हेर्नसक्ने कम्पनीले जनाएको छ ।
यसअघि ठुलो स्क्रिनमा ह्वाट्सएप प्रयोग गर्न चाहनेहरूले आईप्याडको ब्राउजरमार्फत वेब संस्करण खोल्नु पर्ने वा म्याक/पिसीको डेस्कटप एप प्रयोग गर्नु पर्ने बाध्यता थियो ।
पछिल्लो अध्यावधिक: जेठ १४, २०८२ ११:२५
सामाग्री श्रोत :
टेक पाना
दार्चुला –नौगाड गाउँपालिका–६ धुलिगडाबाट बझाङतर्फ पैदलयात्रा गरिरहेका ७० वर्षीय कालु जोशीको ढुङ्गाले लागेर मृत्यु भएको छ । उनको आज बिहान मृत्यु भएको हो ।
जिल्ला प्रहरी कार्यालय दार्चुलाका प्रहरी निरीक्षक छत्र रावतका अनुसार जोशीको घटनास्थलमै मृत्यु भएको हो । बाटोमा हिँडिरहेका उनिमाथि रतपडे भन्ने ठाउँमा माथिबाट खसेको ढुङ्गा लागेको हो । ढुङ्गाले लागेर नौगाड गाउँपालिका–६ धुलिगडाका ४५ वर्षीय प्रताप धामी घाइते भएका छन् । उनलाई उद्धार गरेर गोकुलेश्वर अस्पताल पठाइएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
देश संघीयतामा गएसँगै स्वास्थ्य सेवाको संघीयता बमोजिम पुन:संरचना भएको छ । आधारभूत स्वास्थ्य तथा सरसफाइको पूर्ण जिम्मेवारी प्राप्त गरेसँग स्थानीय सरकारले जनतालाई सर्वसुलभ स्वास्थ्य सेवाको पहुँचमा ल्याउनका लागि विविध नविनतम क्रियाकलापहरु सञ्चालन गरेको सुन्नमा पाइन्छ। स्वास्थ्यमा डिजिटलाइजेश, नसर्ने रोगको स्क्रिनिङ, ज्येष्ठ नागरीक स्वास्थ्य परीक्षण, विपन्न स्वास्थ्य बिमा कार्यक्रम, मातृ पोषण कार्यक्रम, रक्तअल्पताको स्क्रिनिङ, प्रयोगशाला सञ्चालन तथा आधारभूत अस्पतालको स्थापना तथा सेवा सुदृढिकरण लगायतका कार्यक्रमहरु स्थानीय तहमा प्राथमिकतामा परेका कार्यक्रमहरु हुन्। सेवाग्राही संग प्रत्यक्ष संलग्न रहेर सेवा प्रदान गर्नुपर्ने भएकोले स्थानीय तहको योजना तथा कार्यक्रमले स्वास्थ्य सेवाको गुणस्तर र पहुँचमा प्रत्यक्ष प्रभाव पार्छ।
स्वास्थ्य निति २०७६ ले परिकल्पना गरे बमोजिम जनतालाई सर्वशुलभ र गुणस्तरीय आकस्मिक तथा आधारभूत स्वास्थ्य सेवा उपलब्ध गराउन स्थानीय सरकारले स्वास्थ्य सेवालाई पहिलो प्राथमिकतामा राखेर निति तथा योजना निर्माण गर्नुपर्नेमा दुईमत छैन। अहिले धेरै जसो स्थानीय सरकारले स्वास्थ्यलाई पहिलो प्राथमिकतामा राखेर नै निति तथा योजना निर्माण गरिरहेका छन्। पालिकाले लिएका नीति तथा योजना लागु गर्न स्वास्थ्य शाखाको अहम भूमिका रहन्छ, तर हाल गाँउपालिका अन्तर्गत स्वास्थ्य शाखामा हेल्थ असिष्टेण्ट/सि.अ.हे.व (५६७) को मात्रै दरबन्दी देखिन्छ भने नगरपालिकामा जनस्वास्थ्य अधिकृत (७८) को दरवन्दी भएतामा पनि अधिकांश नगरपालिकामा पदपूर्ती भएका छैन।
गाँउपालिकामा शिक्षा, प्रशासन, प्राविधिक, लेखा समुहको सातौ तहको दरबन्दी लोकसेवाबाट पद पूर्ती हुदै आएकोमा स्वास्थ्यको हकमा स्वास्थ्य शाखा प्रमुखको रुपमा पाचौँ तहको जनशक्ति पदपूर्ती गर्ने गरी हालको विद्यमान व्यवस्था रहेको छ, जुन व्यवस्थाले जुनियर कर्मचारी शाखा प्रमुख हुने र सिनियर कर्मचारी स्वास्थ्य संस्थामा कार्यरत रहदा जुनियर शाखा प्रमुखको मातहतमा काम गर्नु पर्ने अवस्था आउन सक्छ।
स्थानीय तहको स्वास्थ्य सम्बन्धी निति योजना निर्माण गर्न, स्वास्थ्य सम्बन्धी विभिन्न निर्देशिका तथा कार्यविधि निर्माण गर्न एवं कार्यक्रमको प्रभावकारी अनुगमन तथा सुपरीवेक्षणका लागि गाउँपालिका तथा नगरपालिकामा एकजना जनस्वास्थ्य क्षेत्रको जनशक्तिको आवश्यकता महशुश हुँदै गइरहेको छ। यही अवस्थालाई मध्येनजर गर्दै स्वास्थ्य तथा जनसंख्या मन्त्रालयले आगामी निति तथा कार्यक्रममा एक स्थानीय तह – एक जनस्वास्थ्य अधिकृत कार्यक्रम लागु गर्न लागेको सुन्नमा आएको छ। स्थानीय तहमा जनस्वास्थ्यका कार्यक्रमहरु प्रभावकारी रुपमा सञ्चालन गर्नका लागि एक स्थानीय तह एक जनस्वास्थ्य अधिकृत कार्यक्रम पक्कै पनि निकै फलदायी रहनेछ, यद्यपी कार्यक्रमको मोड्युललाई थोरै परिमार्जन गरी लागु गर्न सकेमा अति उत्तम हुने थियो । मेरो व्यक्तिगत विचारमा मैले केही बुँदाहरु सुझावका रुपमा प्रस्तुत गर्न चाहान्छु।
१. सबै स्थानीय तहमा एकजना स्थायी जनस्वास्थ्य अधिकृत (७८) को दरवन्दी सिर्जना गरी पदपूर्तीको व्यवस्था मिलाउने।
२. तत्कालका लागि हरेक स्थानीय तहमा जनस्वास्थ्य अधिकृत (७८) को अस्थायी दरबन्दी सिर्जना गर्ने र बजेटको व्यवस्थापन गर्ने । सम्भव भएसम्म छात्रवृत्ति करारका जनस्वास्थ्य अधिकृतहरुलाई उक्त दरबन्दीमा खटाइ सोही तलब भत्ताबाट खर्च व्यहोर्ने, जसबाट राज्यलाई दोहोरो आर्थिक भार पनि नपर्ने र हाल छात्रवृत्ति करारमा खटाएको जनस्वास्थ्यको जनशक्तिलाई सेवा सुविधा प्रदान गर्न समेत राज्यलाई असहज भएको छ।
(पौडेल गल्कोट नगरपालिकामा जनस्वास्थ्य अधिकृतका रुपमा कार्यरत छन्)
सामाग्री श्रोत :
swasthyakhabar
काठमाडौं । गाजामा अत्याचार गरिरहेको भन्दै जर्मनीका विदेश मन्त्रीले इजरायलविरुद्ध विशेष कदम चाल्ने चेतावनी दिएका छन् । विदेश मन्त्री जोहान वाडेफुलले प्रसारक डब्ल्यूडीआरलाई दिएको अन्तर्वार्तामा गाजामा इजरायलको ठूला हवाई आक्रमणहरूका कारण खाद्यान्न तथा औषधिको अभावले गाजाको अवस्थालाई असह्य बनाएको भन्दै जर्मनीले इजरायललाई दिने ऐतिहासिक समर्थनलाई उपकरणको रूपमा प्रयोग नगर्न चेतावनी दिएका हुन्।
उनले गाजामा मानवीय कानुन उल्लंघन गर्न प्रयोग हुने हतियार निर्यात नगर्ने पनि बताएका हुन् । हामासले सन २०२३ को अक्टोबर ७ मा इजरायलमा गरेको आक्रमणपछि दीर्घकालसम्म जर्मनीले संयुक्त राज्य अमेरिकासँगै इजरायलको कारबाहीलाई समर्थन गरेको थियो ।
तर, अहिले इजरायल अन्तर्राष्ट्रियस्तरमा एक्लिँदै गइरहेको छ । जर्मनीको धारणामा आएको परिवर्तन युरोपियन युनियनले आफ्नो इजरायल नीति पुनरावलोकन गरिरहेको बेलामा बेलायत, फ्रान्स र क्यानडाले पनि गाजाको लागि ठोस कार्यहरू गर्ने चेतावनी दिए पछि आएको हो ।
गाजाको सन्दर्भमा यो भनाइ विदेश मन्त्रीको र चान्सलर फ्रेडरिक मर्जको अहिलेसम्मको सबैभन्दा कडा भत्र्सना भएको बताइएको छ ।
सामाग्री श्रोत :
काठमाडौँ । एप्पलले २०० मेगापिक्सेल क्षमताको क्यामेरा परीक्षण गरिरहेको खबर बाहिरिएको छ । पछिल्लो केही समयदेखि यो क्षमताका क्यामेरा स्मार्टफोन बजारमा प्रचलनमा आइरहँदा एप्पल पनि यो लाममा मिसिन आएको हो ।
चिनियाँ सोसल मिडिया प्लेटफर्म वेइबोमा सक्रिय लिकर डिजिटल च्याट स्टेसन मार्फत सार्वजनिक भएको सूचना अनुसार एप्पलले २०० मेगापिक्सेलको सेन्सर परीक्षण गरिरहेको छ । तर कुन सेन्सर र कुन क्यामेराका लागि प्रयोग गरिन्छ भन्नेबारे स्पष्ट जानकारी दिइएको छैन ।
यो परीक्षण मेन क्यामेराका लागि हुन सक्ने बताइएको छ । प्रतिस्पर्धी ब्रान्डहरूमध्ये सामसङले आफ्नो ग्यालेक्सी अल्ट्रा सिरिज र हालैको एस२५ एजमा २०० मेगापिक्सेल मुख्य क्यामेरा प्रयोग गरिसकेको छ । त्यस्तै, चिनियाँ ब्रान्डहरूले समेत केही महिनायता २०० मेगापिक्सेल टेलिफोटो पेरिस्कोप क्यामेरा प्रयोग गरिरहेका छन् ।
एप्पलको नयाँ क्यामेरा परीक्षणसँगै कम्पनीले आगामी तीन वर्षभित्र आफ्नो डिजाइनमा ठुलो परिवर्तन गर्ने अनुमान गरिएको छ । यसै वर्ष आउने आईफोन १७ मा पछाडिको भागमा ठुलो क्यामेरा बम्प हुने चर्चा छ । त्यस्तै, सन् २०२६ मा प्रो मोडलमा फेस आईडी स्क्रिनमुनि राख्ने योजना छ । जसले गर्दा फ्रन्टमा सेल्फी क्यामेराका लागि सानो होल-पन्च मात्र रहनेछ ।
त्यस्तै सन् २०२७ मा आउने आईफोन १९ प्रो मा अगाडिको भागमा पूर्ण स्क्रिन हुने सम्भावना छ । त्यसका लागि कम्पनीले अन्डर-डिस्प्ले क्यामेरा प्रविधि प्रयोग गर्ने योजना बनाइरहेको चर्चा छ ।
यद्यपि, यी सबै जानकारी अहिलेसम्म पुष्टि नभएका अड्कलबाजी मात्र हुन् । एप्पलले यी प्रविधि कहिले र कुन मोडलमा ल्याउने भन्ने अझै स्पष्ट छैन ।
पछिल्लो अध्यावधिक: जेठ १४, २०८२ १०:१
सामाग्री श्रोत :
टेक पाना
