काठमाडौं। संसद्का दुई ठूला दल नेपाली कांग्रेस र नेकपा एमालेबीचको वर्तमान सत्ता गठबन्धन परिवर्तनको प्रयास जारी छ।

मुख्यगरी प्रमुख प्रतिपक्ष दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेकपा एमालेका अध्यक्ष केपी शर्मा ओली नेतृत्वको कांग्रेससहितको गठबन्धन सरकार परिवर्तनको निरन्तर प्रयासमा रहेका छन्।

वर्तमान गठबन्धन परिर्वतनको प्रयासमा प्रचण्डलाई अन्य विपक्षी दलहरूले पनि अप्रत्यक्ष ढंगले साथ दिइरहेका छन्। त्यसो त सत्तागठबन्धनको प्रमुख घटक नेपाली कांग्रेसभित्र ठूलो पंक्ति सरकारका काम कारबाहीप्रति रुष्ट छ। प्रधानमन्त्री केपी शर्मा ओलीको कार्यशैलीका कारण कांग्रेसका प्रभावशाली नेताहरू समेत वर्तमान सरकार लामो अवधि जान नहुने निष्कर्षमा पुग्न थालेका छन्।

सत्तारूढ दलको प्रमुख घटक कांग्रेसभित्रको असन्तुष्टि र प्रमुख प्रतिपक्ष दल नेकपा माओवादी केन्द्रका अध्यक्षको एकपछि अर्को प्रयासका बाबजुद सत्ता समीकरणको प्रयासले सार्थकता भने पाउन सकेको छ।

पछिल्लो समय गठबन्धनका दुई दल कांग्रेस र एमालेबीच चुलिएको खटपटकाबीच माओवादी केन्द्रका अध्यक्ष प्रचण्डले नेपाली कांग्रेसका सभापति शेरबहादुर देउवाबीच टेलिफोन सम्वाद भएको छ।

पार्टीको मध्यपहाडी लोकमार्ग केन्द्रित अभियानका लागि देउवाको गृहजिल्ला डडेल्धुरा पुगेका प्रचण्डले देउवालाई फोन गरेका हुन् ।

प्रेस सेन्टर डडेल्धुराले आयोजना गरेको पत्रकार सम्मेलनमा देउवासँग कुराकानी भएको जानकारी दिँदै अध्यक्ष प्रचण्डले भने, ‘मैले डडेल्धुरामा न्यानो स्वागत पाएको सुनाए। म यहाँ बस्दै गर्दा यो अब शेरबहादुर देउवाजीको जिल्ला भनेर पनि चिनिन्छ, देउवाजीसँग पनि सम्पर्क भयो र उहाँले पनि मेरो जिल्लामा स्वागत भन्नुभयो। डडेल्धुरामा स्वागत भन्नुभएको छ।’

उनले फोन वार्तामा थप के कुराकानी भयो ? भनेर केही खुलाएनन्। प्रचण्डले कांग्रेसका पुराना नेताहरूसहित अन्य राजनीतिक दलका नेताहरूसँग पनि कुराकानी भएको जानकारी दिए। २०७९ को निर्वाचनपछि प्रतिनिधि सभाको ठूलो दल नेपाली कांग्रेस पटक-पटक सत्ता साझेदार दलको भूमिकामा छ।

यसबीचमा कांग्रेसले नेकपा माओवादी केन्द्रका अध्यक्ष प्रचण्ड र एमाले अध्यक्ष ओलीलाई पालैपालो प्रधानमन्त्रीका रूपमा समर्थन गरेको छ। गतवर्ष असार १७ गते नेकपा एमालेका अध्यक्ष ओली र कांग्रेस सभापति शेरबहादुर देउवाबीच भएको सहमति अनुसार अब १४ महिनापछि कांग्रेसले सरकारको नेतृत्व गर्न पाउनेछ । यद्यपि, प्रमुख तीन दलबीच गठबन्धन केन्द्रित विभिन्न गतिविधि भइरहेका छन् ।

माओवादी केन्द्रकै नेताहरू अहिलेको गठबन्धन आफ्नै भारले ढल्ने दाबी गरिरहेका छन् । यिनै आशंकाबीच शुक्रबार माओवादी केन्द्रका अध्यक्ष प्रचण्डले कांग्रेस सभापति देउवालाई डडेल्धुरा पुगेर फोन गरेका हुन्।

यसअघि १५ मंसिर २०८० मा नेकपा एमालेका अध्यक्ष ओलीले मेची–महाकाली अभियानको सिलसिलामा देउवाकै गृहजिल्ला डडेल्धुरा पुगेर फोनमा कुराकानी गरेका थिए। ओलीकै सोही फोन कूटनीतिअनुसार नै प्रचण्डले शुक्रबार देउवासँग टेलिफोन वार्ता गरेका हुन्।

संयोग त के छ भने ओलीले डडेल्धुराबाट देउवालाई फोन गरेको दिन शुक्रबार थियो। प्रचण्डले पनि शुक्रबार नै फोन गरेका छन्। अर्को दुवै नेताले आफ्नो पार्टीको राजनीतिक अभियान लिएर डडेल्धुरा पुगेको समयमा देउवालाई फोन गरेका हुन्।

अर्को संयोग भनेको दुवै नेताले आफू प्रमुख प्रतिपक्षी दलको नेता रहँदा सत्ताको प्रमुख साझेदार दलको नेताका हैसियतमा रहनुभएका देउवासँग वार्ता गरेका हुन्। २०८० मंसिर १५ गते ओलीले डडेल्धुराबाट देउवालाई फोन गर्दा ओली प्रमुख प्रतिपक्षी दलको नेता थिए। प्रचण्ड पनि अहिले प्रमुख प्रतिपक्षी दलको नेताकै रूपमा छन्।

ओलीले डडेल्धुरा पुगेर देउवालाई फोन गरेको सात महिनापछि ओली-देउवाबीच निर्णायक छलफल भई दुई ठूला दलबीचको गठबन्धन निर्माण भएको थियो । कतै प्रचण्डले पनि यस्तै, राजनीतिक उपलब्धिका लागि फोन कूटनीति अघि सारेका त होइनन् भन्ने आशंका राजनीतिक वृत्तमा उब्जिएको छ।

हिमालय टाइम्स दैनिकबाट

जनकपुर। तेस्रो जनकपुरधाम मेयरकप २०८२ को उपाधी भारतको लखनउले हासिल गरेको छ। जनकपुरधामको निर्माणधिन रामजानकी बहुउद्देश्यीय क्रिकेट स्टेडियममा शुक्रबार सम्पन्न फाइनल खेलमा बारालाई ८ विकेटले पराजित गर्दै लखनउ टिमले उपाधी हात पार्न सफल भएको हो।

आजको अन्तिम खेलमा बारा टिमले पहिलो ब्याटिंग गर्दै निर्धारित २० ओभरमा ६ विकेट गुमाएर १६८ रन बनाएको थियो।

बाराका लागि रवि साहले ५४, आदिल अंसारीले ५०, विवेक यादवले २२, पवन सर्राफलले १६, त्रित दासले ९ र निरंजन यादवले ७ रन जोडे भने अरनिको यादव शुन्य रनमै आउट भए। यता, लखनउका लागि सुभम यादव र मनिष सिंलेह २/२ तथा शैलेन्द सिंह र अस्मित मिश्राले १/१ विकेट लिए।

१६९ रनको विजयी लक्ष्य सहित ब्याटिंग गर्न मैदानमा ओर्लेकाे लखनउ टिमले १७ ओभर ४ बलमा २ विकेट गुमाएर १७३ रन बनायो। लखनउका लागि हर्षित यादवले ९८, सुमित पाठकले ५३, अंकित सिंहले १९ र सोमन महन्तीले २ रन जोडे।

बाराका पवन सर्राफ र साहब आलम १/१ विकेट लिए। कप विजेता लखनउ टिमलाई दुई लाख नगद र ट्रफी तथा उपविजेता बारा टिमलाई एक लाख २५ हजार नगद तथा ट्रफि प्रदान गरिएको छ।

जलेश्वर (महोत्तरी)। नेपाली कांग्रेसका नेता एनपी साउदले वर्तमान सरकारले जनअपेक्षाअनुरुप काम गर्न नसकेको आरोप लगाएका छन्।

नेपाली कांग्रेस महोत्तरीले आज सदरमुकाम जलेश्वरमा आयोजना गरेको कार्यकर्ता भेटघाट तथा अन्तरक्रिया कार्यक्रमलाई सम्बोधन गर्दै नेता साउदले वर्तमान सरकार दुईतिहाइको मजबुत भए पनि जनताले सोचेअनुसार काम गर्न नसकेको बताए।

नेता साउदले देशमा जनताको प्रत्यक्ष प्रतिनिधित्व रहेको संसद्मार्फत विधेयक ल्याएर कानुन निर्माण गर्नु नै संविधानको मर्मअनुरुप हुने उल्लेख गरे ।

उनले पार्टीभित्रको संगठन सुदृढीकरण, युवा सहभागिता र सामाजिक न्यायमा आधारित समाजवादतर्फ कांग्रेसले नेतृत्व लिनुपर्ने बेला आएको बताए।

काठमाडौं। शुक्रबार पोखरा महानगरपालिका–१० पृथ्वीचोकस्थित चाईनापुलबाट सेति नदिमा हाम्फालेका एक युबकको सशस्त्र प्रहरी बलले उद्दार गरेको छ।

नाम वतन नखुलेको अन्दाजी २०र२१ वर्षको युवक आत्महत्याको लागि हाम फालेको भन्ने खबर प्राप्त हुनासाथ सशस्त्र प्रहरि बल नेपाल नं. २४ कालिका गण कास्कीबाट खटिएको विपद् व्यवस्थापन टोलीले राती ९ः३५ बजे करिब ४५ मिनेटको प्रयासमा रोप रेस्क्यू प्रयोग गरि उद्दार गर्न सफल भएको सह प्रवक्ता डिएसपी शैलेन्द्र थापाले जानकारी दिए।

अन्दाजी १०० मिटर तल सेति नदीको खोंचबाट अर्धचेत अवस्थामा निकालिएका उनलाई उपचारको लागि गण्डकी मेडिकल कलेज पठाईएको छ।

लेखनाथ (कास्की)। अन्नपूर्ण म्याराथन–२०८२ को पाँचौँ संस्करण यही जेठ २० गते हुने भएको छ। फ्रान्सेली पर्वतारोही मौरिस हर्जोगको टोलीले सन् १९५० जुन ३ मा अन्नपूर्ण प्रथम हिमाल (८०९१ मिटर) सफलतापूर्वक आरोहण गरेको ७५औँ वर्षगाँठका अवसरमा उक्त म्याराथनलाई हीरक महोत्सवका रूपमा मनाइने भएको हो।

अन्नपूर्ण सेन्चुरी पर्यटन समितिद्वारा आयोजना गर्दै आइएको उक्त म्याराथन अन्नपूर्ण आधार शिविर (४१३० मिटर) बाट सुरु भई माछापुच्छ्रे आधार शिविर, देउराली, दोभान, बम्बो, छोम्रोङ, किम्रोङखोला, उरी हुँदै घान्द्रुकस्थित मेश्राम वराह माविको खेलमैदानमा सम्पन्न हुने आज पोखरामा समितिद्वारा आयोजित पत्रकार सम्मेलनमार्फत जानकारी दिइएको छ।

म्याराथनको दूरी ४२.१९५ किलोमिटर रहेको र यस म्याराथनलाई अन्तर्राष्ट्रियस्तरमा पुर्याउने लक्ष्यसहित अल्टिमेट एडभेन्चर नेपालले प्राविधिक व्यवस्थापन गर्ने समितिको अध्यक्ष एवं म्याराथनका संयोजक ललित गुरुङले जानकारी दिए।

म्याराथनमा पुरुष र महिलातर्फ छुट्टाछुट्टै प्रतिस्पर्धा हुने छ। हालसम्म १० विदेशी धावकसहित ६० जनाले नाम दर्ता गराइसकेको जनाइएको छ। दर्ता शुल्क महिला तथा पुरुष दुवैका लागि रु सात हजार तोकिएको छ। प्रतियोगितामा प्रथम, द्वितीय र तृतीय हुने धावकले क्रमशः रु एक लाख ५० हजार, रु एक लाख र रु ७५ हजार पुरस्कार प्राप्त गर्नेछन्।

यसपटक म्याराथनमा थप विशेष पुरस्कार पनि घोषणा गरिएको छ। अन्नपूर्ण गाउँपालिकाभित्रको स्थायी ठेगाना भएका सहभागीमध्ये प्रथम हुने धावकलाई विशेष पुरस्कार प्रदान गरिने छभने गण्डकी प्रदेशका धावकमध्ये प्रथम हुनेले पनि विशेष पुरस्कार पाउने छन्। महिलातर्फ लगातार तीनपटक म्याराथनमा सहभागिता जनाउने धावकलाई प्रोत्साहनस्वरूप विशेष पुरस्कार दिइने आयोजकले जानकारी दिएको छ।

अन्तरराष्ट्रिय धावकका लागि छुट्टै प्रोत्साहन पुरस्कार प्रदान गरिने जनाइएको छ। महिला र पुरुष दुवै समूहमा विदेशी सहभागीमध्ये प्रथम हुनेलाई विशेष पुरस्कार प्रदान गरिने छ। यसैगरी ७५औँ अन्नपूर्ण आरोहण दिवसका अवसरमा म्याराथनमा ७५औँ स्थान हासिल गर्ने धावकलाई ‘डायमण्ड जुभिली अवार्ड’ दिइने जानकारी पत्रकार सम्मेलनमा गराइयो।

म्याराथनकै अवसरमा ‘अन्नपूर्ण पत्रकारिता पुरस्कार–२०८२’ प्रदान गरिने छ। कार्यक्रम सम्पन्न गर्न करिब रु ३८ लाख लाग्ने अनुमान गरिएको छ। अन्नपूर्ण गाउँपालिका, नेपाल पर्यटन बोर्ड, पोखरा महानगरपालिका, एक्याप, गण्डकी प्रदेश खेलकुद परिषद्, विभिन्न पर्यटन समिति तथा निजी क्षेत्रका संघसंस्थाबाट सहयोग जुटाइने बताइएको छ।

कार्यक्रम व्यवस्थापनका लागि ५०१ सदस्यीय मूल समिति र १३ वटा उपसमिति गठन गरिएको छ। हालसम्म ९० प्रतिशत तयारी पूरा भइसकेको संयोजक गुरुङले जानकारी दिए।

अमरगढी (डडेल्धुरा)। नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जनताको आवाज सरकारसमक्ष पुर्‍याउने बताएका छन्।

बैतडीको पाटनबाट ‘जनतासँग माओवादीः मध्यपहाडी लोकमार्ग जनजागरण अभियान’ सुरु गरी यहाँ आइपुगेका उनले सबै समुदायसँग संवाद गर्दै जनताको आवाज सरकारसमक्ष पुर्‍याउने लक्ष्य लिएको बताए।

‘बजेट अगाडि यो अभियान सकेर हामी यहाँका जनताको माग र आवश्यकता सरकारसमक्ष राख्न चाहन्छौँ’, पूर्वप्रधानमन्त्रीसमेत रहनुभएका अध्यक्ष दाहालले भने, ‘विशेषतः तराईका मजदुर र किसानका माग सम्बोधन गर्न सरकारलाई पहिले नै आग्रह गरिसकेको छु।’

उनले मधेस आन्दोलन समाधानदेखि संविधान कार्यान्वयनसम्म माओवादीको भूमिका ऐतिहासिक रहेको उल्लेख गर्दै वर्तमान सत्तालाई जनमुखी बनाउन पहल आवश्यक रहेको बताए। अध्यक्ष दाहालले परशुराम, अजमेरु कोट क्षेत्रको पर्यटन विकास, डडेल्धुरा–भारत सिमानामा भन्सार स्थापनाजस्ता विषयलाई राष्ट्रिय मुद्दा बनाउने प्रतिबद्धता व्यक्त गरे।

कार्यक्रममा पार्टीका महासचिव देव गुरुङले सहिदहरूको योगदानलाई स्मरण गर्दै जनआन्दोलन र संघर्षले ल्याएको परिवर्तनलाई संस्थागत गर्न सबै क्षेत्र गम्भीर हुनुपर्नेमा जोड दिए।

काठमाडौं। काठमाडौं उपत्यकासहित विभिन्न क्षेत्रमा आज हावाहुरीसहितको वर्षा भएको छ। हावाहुरीका कारण जनजीवन केही प्रभावित समेत भएको छ।

राष्ट्रिय विपद जोखिम न्यूनीकरण तथा व्यवस्थापन प्राधिकरणका प्रवक्ता रामबहादुर केसीले नवलपरासी कञ्चनपुर, कैलाली, चितवन, उदयपुर, सङ्खुवासभा, बारा, कपिलवस्तुलगायत जिल्ला प्रभावित भएको बताए।

उनका अनुसार हावाहुरी र वर्षाका कारण केही जिल्लामा मानवीय क्षति र भौतिक सम्पत्तीमा समेत क्षति भएको छ। अहिले साँझसम्म प्राप्त विवरणमा दुई जनाको मृत्यु भएको र सात जना घाइते भएको जानकारी प्राप्त भएको पनि उनले बताए।

उनले नवलपरासी पश्चिममा हावाहुरीका कारण रुख ढल्दा दुई जनाको मृत्यु भएको जानकारी दिए। उनले बारामा एक, कैलालीमा दुई, कञ्चनपुरमा एक र नवलपरासीमा तीन जना घाइते भएका पनि जानकारी दिए। चितवनमा हावाहुरीले क्षति गराएको छ।

शनिबार पनि वर्षा तथा हावाहुरी ल्याउने प्रणाली कायम रहेको र उक्त प्रणाली पूर्वतर्फ सरिरहेको जल तथा मौसम विज्ञान विभाग, मौसम पूर्वानुमान महाशाखाका मौसमविद् विनु महर्जनले जानकारी दिए। अहिले भने कोशी, मधेस प्रदेश, बागमती र गण्डकी प्रदेशमा बदली भएको र ती प्रदेशका केही ठाउँमा वर्षा भइरहेको छ।

प्राप्त विवरणअनुसार पछिल्लो १२ घण्टामा पर्वतमा ४३.८, धादिङ ३७, म्याग्दी ३०.२ गोरखामा ३१।६, काभ्रे २९, स्याङ्जामा ३० र काठमाडौंको बूढानीलकण्ठ क्षेत्रमा १५.६ मिलिमिटर वर्षा भएको छ। काठमाडौंमा शनिबार अपरान्हतिर आजको जस्तै बदली हुने सम्भावना रहेको पनि मौसमविद् महर्जनले जानकारी दिए।