एजेन्सी–संयुक्त राष्ट्रसङ्घका अनुसार यमनमा पाँच वर्षमुनिका प्रत्येक दुईमध्ये एक बालबालिका गम्भीर कुपोषणको शिकार छन्। तीमध्ये पाँच लाखभन्दा बढी घातक कुपोषणबाट प्रभावित छन्।

संयुक्त राष्ट्रसङ्घीय बाल एजेन्सी युनिसेफले यमनमा एक दशकदेखि चलिरहेको द्वन्द्वले बाल्यकाल खोसेको र एउटा सम्पूर्ण पुस्तालाई बाँच्नको लागि सङ्घर्ष गर्न बाध्य पारेको चेतावनी दिएको छ, यद्यपि मानवीय सङ्कट बढ्दै गइरहेको छ।

“पाँच वर्ष मुनिका दुई मध्ये एक बालबालिका तीव्र कुपोषित छन्,” युनिसेफका यमन प्रतिनिधि पिटर हकिन्सले जेनेभामा आयोजित पत्रकार सम्मेलनमा भने।

“ती मध्ये पाँच लाख ३७ हजार भन्दा बढी बालबालिकाहरू गम्भीर तीव्र कुपोषणबाट ग्रस्त छन्। यो अवस्था पीडादायी रहेको छ,” उनले बताए। “कुपोषणले प्रतिरक्षा प्रणालीलाई कमजोर बनाउँछ, विकास रोक्छ,” हकिन्सले उल्लेख गरेका छन्। 

“यमनमा, यो केवल स्वास्थ्य सङ्कट मात्र होइन। यो हजारौंको लागि मृत्युदण्ड हो।”

यमनका हुथी विद्रोहीले देशको ठूलो भूभाग कब्जा गरेका छन्। उनीहरू सन् २०१५ देखि अन्तर्राष्ट्रिय रूपमा मान्यता प्राप्त सरकारलाई समर्थन गर्ने साउदी नेतृत्वको गठबन्धनसँग युद्धमा छन्, जसले ठूलो मानवीय सङ्कट निम्त्याएको छ।

हकिन्सले पश्चिमी तटका केही क्षेत्रहरूमा गम्भीर कुपोषणको स्तर ३३ प्रतिशत पुगेको बताउनुभयो। यो एक प्रकोप हो, जसमा हजारौं मानिस मर्नेछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। उपप्रधानमन्त्री एवं सहरी विकासमन्त्री प्रकाशमान सिंहले कम स्रोतबाट धेरै नागरिक लाभान्वित हुने गरी विकास निर्माणका काम गर्नुपर्ने बताएका छन्।

नगर विकास कोषले आज यहाँ आयोजना गरेको ‘सहरी पूर्वाधारः प्राथमिकता तथा वित्त व्यवस्थापन’ कार्यशालामा उनले त्यसका लागि संघीयतालाई बलियो बनाउन संघ र स्थानीय सरकारबीचको सम्बन्ध सुमधुर हुनुपर्नेमा जोड दिए।

उपप्रधानमन्त्री सिंहले परिवर्तित सन्दर्भमा नगर विकास कोषले नगरपालिकाको भौतिक पूर्वाधार विकासमा उपयुक्त कार्यक्रमका विषयमा छलफल गर्न कार्यशाला उपयोगी हुने विश्वास व्यक्त गरे। सहरीकरणका लागि हाल देखिएको समस्या समाधानका लागि सरकार प्रतिबद्ध रहेको भन्दै उनले नागरिकको जीवन र जीविका सहज बनाउने कुरा नै सरकारको प्राथमिकतामा रहेको बताए।

कार्यक्रममा देशभरका महानगरपालिका, उपमहानगरपालिका र नगरपालिकाका प्रमुख तथा प्रतिनिधिहरूको सहभागिता रहेको थियो। त्यस क्रममा जनप्रतिनिधिहरूले हाल भोगिरहेका समस्या र वित्त व्यवस्थापनका चुनौतीबारे धारणा राखेका थिए।

काठमाडौं । चीनले एउटा यस्तो अनौठो फ्याक्ट्री बनाएको छ, जहाँ न कामदार छन्, न बत्ती नै बल्छ । तर पनि यो फ्याक्ट्री २४ सै घण्टा स्वचालित रूपमा चलिरहेको छ । सामाजिक सञ्जालमा ‘डार्क फ्याक्ट्री’ को नामले चर्चित यो फ्याक्ट्रीले विश्वभरका प्रविधिमा अगाडि बढ्ने होडमा लागेका देशहरूलाई चकित पारेको छ । 

चीनको चाङपिङ सहरमा रहेको यो फ्याक्ट्री पूर्ण रूपमा रोबटद्वारा सञ्चालित छ । यहाँ बत्तीको प्रयोग हुँदैन, केवल सामान वेल्डिङ गर्दा निस्कने झिल्काको उज्यालो मात्र देखिन्छ । बत्तीको पैसा बचाउनु भन्दा पनि रोबटहरूलाई प्रकाशको आवश्यकता नपर्ने भएकाले यहाँ बत्तीको व्यवस्था गरिएको छैन । अब अनुमान गर्नुहोस्, यो अनौठो फ्याक्ट्री कसको होला ? 

यो फ्याक्ट्री अरू कसैको नभई हामीले सधैँ सुन्ने नाम साओमी कम्पनीको हो । साओमीले गत वर्षदेखि यो पूर्ण स्वचालित फ्याक्ट्री सञ्चालनमा ल्याएको हो । यहाँ २४सै घण्टा, हप्ताको सातै दिन र वर्षको ३६५ दिन नै काम हुन्छ, तर कुनै मान्छेको उपस्थिति बिना ।

रोबटहरूले यहाँ स्मार्टफोन उत्पादन गर्छन् । कच्चा पदार्थलाई एसेम्बल गरेर अन्तिम उत्पादन तयार पार्ने सबै काम रोबटले नै गर्छन् । यसले कम्पनीको मोबाइल उत्पादन क्षमता दोब्बर बनाएको चर्चा छ । 

यो फ्याक्ट्री स्मार्टफोन उत्पादनमा मात्र सीमित छैन । यहाँका रोबटहरूले कामको क्रममा आउने सामान्य समस्याहरूका साथै अन्य रोबटहरूमा देखा पर्ने प्राविधिक समस्याहरू समेत आफैं समाधान गर्छन् ।

साओमीले फ्याक्ट्रीभित्र निस्कने फोहोर सफा गर्न स्वचालित मेसिनहरू पनि जडान गरेको छ । विभिन्न सञ्चार माध्यमहरूका अनुसार यो अत्याधुनिक फ्याक्ट्री निर्माण गर्न साओमीले करिब २.५ अर्ब युआन (लगभग ४५.५ अर्ब नेपाली रुपैयाँ) खर्च गरेको छ । यो फ्याक्ट्रीले वार्षिक एक करोड उपकरण उत्पादन गर्न सक्ने क्षमता राख्छ ।

–न्युज डटकम डट एयूको सहयोगमा

पछिल्लो अध्यावधिक: चैत १२, २०८१ १८:७

काठमाडौं– एएफसी एसियन कप २०२७ को छनोट चरण अन्तर्गत समूहको पहिलो खेलमा नेपाल  मलेसियासँग २-० ले पराजित भएको छ।

समूह ए अन्तर्गत मलेसियाको जोहोरस्थित इब्राहिम सुल्तान स्टेडियममा भएको खेलमा नेपालले दुवै हाफमा गोल व्यहोरेको थियो।

खेलको २९ औं मिनेटमा घरेलु टोलीले अग्रता लिएको थियो । हेक्टर हेभलले गोल गर्दै मलेसियालाई खेलमा अघि बढाएका थिए । पेनाल्टी क्षेत्र बाहिरबाट उनले गरेको प्रहार डिफेन्डरलाई लाग्दै गोलमा परिणत भएको थियो ।

मलेसियालाई घरेलु मैदानमा जितसहित छनोट यात्रामा सुखद सुरुवात दिलाउन हेक्टोर हेभेल र ला’भेरे कोर्बिन ओङले एक-एक गोल गरे।

पोर्चुगलको पोर्टिमोनेन्समा व्यावसयिक फुटबल खेल्ने हेक्टोर यसै खेलका लागि मलेसियन टिममा समावेश भएका थिए। उनले मलेसियाका लागि पहिलो खेलमै डेब्यु गोल गर्दै यादगार बनाए।

यस्तै दोस्रो हाफमा मलेसियाले गोल थप्यो। कोर्बिन ओसले ७०औं मिनेटमा गोल गरेका थिए।

एसियन कप छनोटको समूह बी मा मलेसियाले जितसहित ३ अंक जोडेको छ। नेपालले भने हारबाट छनोट यात्रा सुरु गरेको छ। नेपालले आगामी जुनमा लाओससँग अवे म्याच खेल्ने तालिका छ।

नेपालले मलेसियासँग पहिलो खेल होम म्याच खेल्ने तय भएपनि नेपालको दशरथ रंगशालमा अन्तर्राष्ट्रिय मान्यता नपाउँदा नेपालले घरेलु खेल मलेसियामा गएर खेल्नुपरेको हो। यद्यपी अखिल नेपाल फुटबल संघ (एन्फा) ले नेपाल र मलेसियाले होम म्याच स्वाप (साटेको) गरेको र आगामी नोभेम्बरमा मलेसियाको घरेलु मैदानमा खेल्ने भनिएको म्याच नेपालमा खेलिने जनाएको छ।

यस समूहको अर्को खेलमा भियतनामाले लाओसलाई ५-० ले हराएर सानदार सुरुवात गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

अछाम। मोटरसाइकल दुर्घटनामा परी आज यहाँ एकको मृत्यु भएको छ भने एक जना घाएते भएका छन्। मङ्गलसेन नगरपालिका –५ स्थित मध्यपहाडी लोकमार्गमा मोटरसाइकल अनियन्त्रित भई दुर्घटना हुँदा सोही नगरपालिका–१ कुन्ती निवासी २० वर्षीय जीवन थापाको मृत्यु भएको छ। मोटरसाइकलको पछाडि बसेका सोही ठाउँका १७ वर्षीय चेतन थापा घाइते भएका छन्।

ठूलासेनबाट मङ्गलसेन तर्फ जाँदै गरेको से ७ प १४६९ नंको मोटरसाइकल मृतक जीवन थापाले चलाएका थिए। गम्भीर घाइते थापालाई उपचारको लागि जिल्ला अस्पताल मङ्गलसेन ल्याइएकामा अस्पतालले मृत घोषणा गरेको जिल्ला प्रहरी कार्यालयका प्रहरी निरीक्षक जय पार्कीले जानकारी दिए।

घाइते चेतन थापालाई थप उपचारका लागि न्याय हेल्थ अस्पताल बयालपाटा रेफर गरिएको छ।

काठामाडौं । सन् २०१२ तिरको कुरा हो, नेपाल प्रविधिमा फड्को मार्दै थियो । फेसबुक भर्खरै नेपालीहरूको मनमा बस्न थालेको थियो । सन् २००८ मा पोखरा विश्वविद्यालयबाट सफ्टवेयर इन्जिनियरिङमा स्नातक गरेका पोखराका नारायण कोइराला एउटा सपना बुन्दै थिए – साइबर सुरक्षा कम्पनी खोल्ने !

त्यो समय नेपालमा बैंक, वित्तीय संस्था, सरकारी र गैरसरकारी संस्थाहरू डिजिटल युगमा प्रवेश गर्दै थिए । सँगसँगै साइबर आक्रमणको जोखिम पनि बढ्दै थियो । ‘ब्ल्याक ह्याट ह्याकर’ ती कम्पनीको टाउको दुखाइका विषय बनेका थिए । नयाँ प्रविधि अँगाल्न खोज्ने कम्पनी ह्याकरबाट कम्पनी कसरी जोगाउने भन्ने अन्योलमा थिए । नारायणले त्यसलाई अवसर देखे ।

त्यसैले सन् २०१३ मा आजकै दिन उनले एमिनेन्स वेज नामक कम्पनी खडा गरे । प्रविधिको युगमा बामे सर्दै गरेका नेपाली कम्पनीमा ठ्याक्कै साइबर सुरक्षामा लगानी गरिहाल्नु पर्छ भन्ने चेत आइसकेको थिएन । त्यसैले नारायणले सुरुवातमा एमिनेन्स मार्फत साइबर सुरक्षाको बारेमा जनचेतना फैलाउने कामको इतिश्री गरे । बिस्तारै उनीहरूले अन्य साइबर सुरक्षा सेवाहरू पनि थप्दै गए ।

आज एमिनेन्स वेजले वार्षिक ५ करोड रुपैयाँ बराबरको कारोबार गर्छ । स्थापना भएको १३ वर्षमा ५०० भन्दा बढी सङ्घसंस्था र कम्पनीहरूलाई सेवा दिइसकेका छन् । यस कम्पनीले अहिले ८० जनाभन्दा बढीलाई रोजगारी दिएको छ । साइबर सुरक्षामा आफूलाई अगाडि ल्याउन चाहनेका लागि एमिनेन्स पहिलो पाइला जस्तै बनेको छ ।

कसरी सुरु भयो एमिनेन्स ?

सन् २००८ मा पोखरा विश्वविद्यालयबाट सफ्टवेयर इन्जिनियरिङ पुरा गरेपछि नारायण कोइरालाले ‘भ्यु नेपाल वेब सोलुसन’मा वेब डेभलपरको रूपमा आफ्नो करियरको पहिलो पाइला चाले । त्यहाँ उनले वेबसाइट, ईकमर्स साइट र सीएमएस साइटहरू बनाउने काममा आफूलाई समर्पित गरे । लगभग डेढ वर्षको अनुभवपछि, उनले ब्रेनडिजिट आईटी सोलुसनमा नयाँ चुनौती स्वीकारे । यस पटक उनको भूमिका थियो – क्वालिटी एसुरेन्स (क्यूए) म्यानेजर ।

क्वालिटी एसुरेन्स भनेको कुनै पनि सफ्टवेयर वा उत्पादनले तोकिएको मापदण्ड पुरा गर्छ कि गर्दैन भनेर सुनिश्चित गर्ने प्रक्रिया हो । यसमा परीक्षण, निरीक्षण र मूल्याङ्कन जस्ता काम हुन्छन् । एक किसिमले एमिनेन्सको बिजारोपण त्यहीँबाट सुरु भएको थियो भन्दा फरक पर्दैन । “क्यूए म्यानेजरको भूमिकामा रहेपछि एप, वेब वा सफ्टवेयरले सुरक्षा मापदण्ड पुरा गरेको छ कि छैन, राम्ररी काम गर्छ कि गर्दैन, कमजोरी छन् कि छैनन् भन्ने सुनिश्चित गर्नुपर्ने थियो,” कोइराला सम्झिन्छन्, “यसरी क्यूए म्यानेजरको रूपमा काम गर्दै गर्दा साइबर सुरक्षामा मेरो रुचि बढ्दै गइरहेको थियो ।”

क्यूए इन्जिनियरको मुख्य जिम्मेवारी सफ्टवेयरको गुणस्तर सुनिश्चित गर्नु हो । यस्ता इन्जिनियरहरूले सफ्टवेयरमा भएका कमजोरीहरू पत्ता लगाउने, कार्यक्षमतामा सुधार ल्याउने र त्रुटिरहित बनाउने काम गर्छन् । क्यूए इन्जिनियरले प्रोजेक्टको आवश्यकताअनुसार परीक्षण योजना बनाउँछन्, म्यानुअल तथा अटोमेटेड परीक्षण गर्छन्, बग (त्रुटि) पहिचान गरी रिपोर्ट गर्छन्, रिग्रेसन तथा पर्फर्मेन्स टेस्टिङ गर्छन् । विश्लेषण क्षमता, प्रोग्रामिङको ज्ञान, समस्या समाधान गर्ने सीप र ध्यानपूर्वक काम गर्ने बानी उनीहरूको मुख्य विशेषता हो । उनीहरू डेभलपरसँग सहकार्य गर्दै सफ्टवेयरलाई भरपर्दो, सुरक्षित र प्रयोगकर्तामैत्री बनाउन मद्दत गर्छन् ।

यसरी नारायण कोइरालाले क्वालिटी एसुरेन्स म्यानेजरको रूपमा तीन वर्ष बिताइसकेका थिए । यो सन् २०११-१२ तिरको कुरा हो । नेपालमा प्रविधि अपनाउने कम्पनीहरूको सङ्ख्या दिनानुदिन बढिरहेको थियो । तर, दुःखको कुरा, त्यही बेला नेपालमा ब्ल्याक ह्याट ह्याकरहरूको बिगबिगी पनि बढ्यो ।

नबढोस् पनि किन ! नयाँ सीप सिक्न खोज्ने केही जमात ह्याकर बन्ने सपना देख्थे । उनीहरूका लागि नेपाली कम्पनीहरूले भर्खरै आत्मसात् गरेका प्रविधि (सफ्टवेयर, वेबसाइट) नै कमजोरी खोज्ने र त्यसलाई डाउन गर्ने, नियन्त्रणमा लिने अभ्यासका लागि गज्जबको ठाउँ थियो । सही तरिकाले रिपोर्ट गर्नुपर्छ भन्ने मान्यता नै थिएन । बरु, कमजोरी बारे जानकारी दिएमा नराम्रो तरिकाले हेर्ने प्रवृत्ति थियो । त्यसैले ह्याकरहरू र प्रविधि अपनाउने कम्पनीहरू एक अर्काका लागि शत्रु जस्ता थिए ।

नारायण सम्झिन्छन्, “ह्याकरहरूले सिस्टममा आक्रमण गर्ने दर बढिरहेको थियो । खासगरी भारत र बङ्गलादेशबाट साइबर आक्रमण हुन्थ्यो । नेपालमा साइबर सुरक्षाको अवधारणा त्यति थिएन । तर, अन्तर्राष्ट्रिय बजारमा यसको माग बढ्दै गइरहेको थियो ।” कोइरालाले सुरुवाती समयमै साइबर सुरक्षामा अवसर देखे । तर, भर्खरै प्रविधिमा पाइला चाल्दै गरेको पुस्तालाई सोझै जुत्ताको महत्त्व बुझाएर फाइदा थिएन । बुझाउनु पनि चुनौतीपूर्ण थियो ।

“त्यतिबेला साइबर सुरक्षा भनेको चप्पल नलगाउने ठाउँमा जुत्ता लगाउनुपर्छ भनेर सिकाउनुपर्ने अवस्था जस्तै थियो,” उनी भन्छन्, “हामीले त्यहीँबाट साइबर सुरक्षाको सेवा दिने कम्पनी सञ्चालन गर्ने सङ्कल्प गर्‍यौँ ।”

उनी अगाडि भन्छन्, “यहाँ ठुल्ठुला बैंक छन्, बैंकमा ठुला सफ्टवेयर छन् । कर्पोरेटमा ठुलै सफ्टवेयर हुन्छन् । त्यतिबेला पनि सबैभन्दा बढी साइबर आक्रमणमा पर्ने सरकारी कार्यालय र बैंक नै थिए ।”

खासगरी विश्वव्यापी रूपमा मौलाइरहेका ब्ल्याक ह्याट ह्याकरहरूको निशानामा नेपालका सरकारी साइट र वित्तीय संस्थाहरू थिए । सिक्नकै लागि वा ‘मैले साइट ह्याक गरें’ भनेर देखाउनकै लागि ती ह्याकरहरू नेपालका वेबसाइट कब्जामा लिएर दुरुपयोग गर्ने वा सेवा अवरुद्ध पारिदिने काम गर्थे । यी ह्याकरहरूबाट नेपालका साइट जोगाउन र साइट सुरक्षित बनाउनु पर्ने आवश्यकता थियो ।

त्यही सेवा दिन २५ मार्च २०१३ मा कोइरालाले एमिनेन्स स्थापना गरे । यो दिन कोइरालाका लागि विशेष थियो, किनभने त्यो उनको जन्म दिन पनि हो । अर्थात् उनले आफ्नै जन्मदिनको दिन एमिनेन्स वेज प्रालिको स्थापना गरे । र, आफैलाई एउटा महत्त्वपूर्ण र चुनौतीपूर्ण उपहार दिए । “हामीले क्वालिटीका हिसाबले सोच्यौँ । एमिनेन्सको अर्थ उत्कृष्ट हो । टपमस्ट क्वालिटी नै एमिनेन्स हो ,” कम्पनीको नामको विषयमा कोइराला भन्छन्, “वेज भनेको त्यो एमिनेन्सको स्तरलाई स्थिर राख्ने तरिका वा ठाउँ भन्ने हो । यसरी हामीले कम्पनीको नाम राख्यौँ ।”

साइबर सुरक्षा सम्बन्धी सचेतना दिँदै अगाडि बढेको एमिनेन्सको यात्रा

साइबर सुरक्षालाई व्यावसायिक तवरबाट अगाडि बढाउनु एउटा ठुलो चुनौती थियो । कम्पनीहरूलाई साइबर सुरक्षाको महत्त्व बुझाउनु एउटा पाटो थियो भने, त्यसलाई सुरक्षित बनाउन सक्ने जनशक्ति पाउनु अर्को चुनौती थियो । कम्पनी सुरु त भयो, तर कसरी सेवा सुरु गर्ने भन्ने प्रश्नले उनलाई सताइरहेको थियो ।

त्यसका लागि कोइरालाले साइबर सुरक्षाको सचेतना फैलाउन सुरु गरे । आवश्यक जनशक्ति विदेशबाट मगाउने माहोल बनाए । र, नेपालका वित्तीय तथा सरकारी कार्यालयहरूमा सचेतना फैलाउन थाले ।

“हामीले बाहिरबाट सर्टिफाइड ट्रेनर बोलाएर अन्तर्राष्ट्रिय बजारमा के भइरहेको छ, अनि नेपालमा के गर्नुपर्ने आवश्यकता छ भन्ने विश्लेषण गर्न लगायौँ । साइबर सुरक्षा के हो, कसरी सिस्टम सुरक्षित राख्ने, कम्पनीले के कुरामा ध्यान दिने, डेभलपरले के गर्ने भन्ने विषयमा दुई दिनसम्मको सेमिनार गर्‍यौँ,” कोइराला सुरुवाती दिनहरू सम्झिए ।

पहिलो पटकमै एमिनेन्सले ४० ओटा नेपाली सङ्घसंस्थालाई साइबर सुरक्षाको विषयमा दुई दिनसम्म सचेत बनाउने अवसर पायो । बिस्तारै एमिनेन्सले अन्य संस्थाहरूमा पनि यो कार्यक्रमलाई निरन्तरता दियो । सूचना प्रविधि अध्यापन गराउने क्याम्पसमा गएर साइबर सुरक्षाको बारेमा जानकारी दिन थाले । नयाँ पुस्तालाई साइबर सुरक्षामा आकर्षित गर्ने माहोल बनाउन लागिपरे । त्यसका लागि आवश्यक सीप सिक्न कोइराला र त्यहाँ काम गर्ने कर्मचारी विभिन्न देशमा आयोजना हुने कार्यक्रममा गए । यसरी दक्ष जनशक्ति उत्पादनमा कम्पनी सक्रिय हुँदै गयो ।

“ब्ल्याक ह्याट प्राक्टिस गरिरहेका भाइहरूलाई डर पनि थियो । पेनिट्रेसन टेस्टिङका लागि उपयुक्त ठाउँ थिएन । हामी तपाईँहरूलाई त्यो ठाउँ दिन्छौं भनेर विश्वस्त बनायौँ,” कोइराला थप्छन् । त्यसबाहेक ब्ल्याक ह्याट ह्याकरका रूपमा मनोरञ्जनका लागि साइबर आक्रमण गर्ने नेपाली ह्याकरलाई कर्मचारीका रूपमा राखेर कमजोरी पत्ता लगाउने, सुरक्षित राख्ने उपायहरू खोज्ने र सिस्टम सुरक्षित बनाउने काम दिए । यसरी कम्पनीको यात्रा सुरु त भयो । तर, वित्तीय रूपमा कम्पनी अगाडि बढ्न भने सकिरहेको थिएन । कर्मचारीलाई तलब खुवाउन, कार्यालयको भाडा तिर्न आवश्यक खर्च कोइरालाले नै बेहोरे । कम्पनी सुरु भएको झण्डै डेढ वर्षपछि एमिनेन्सले पहिलो ग्राहक पायो । त्यो ग्राहक थियो, इकोइन्टरप्राइज बायो सोलुसन्स प्रालि ।

उक्त गैरसरकारी संस्थाका लागि पनि एमिनेन्सले क्वालिटी एसुरेन्सकै काम गर्‍यो । जब सरकारी कार्यालयहरू दिनानुदिन साइबर आक्रमणको शिकार हुन थाले, तब ‘यसलाई कसले समाधान गर्छ ?’ भन्ने प्रश्नले सबैलाई सताउन थाल्यो । साइबर सुरक्षाको क्षेत्रमा आफूलाई अग्रस्थानमा उभ्याएको एमिनेन्स नै सबैको रोजाइमा पर्न थाल्यो । यसरी सरकारी कार्यालयहरू पनि एमिनेन्ससँग जोडिन थाले । “नेपालमा एन्टि ह्याकिङ कम्पनी कसले सञ्चालन गरेको छ भन्ने प्रश्न आउन थालेपछि धेरैले हाम्रो नाम लिन थाल्नुभयो । यसरी हामीले व्यवसायिक तवरबाट विभिन्न सङ्घसंस्थामा जोडिने मौका पायौँ,” उनी भन्छन् । 

बैंकिङ क्षेत्रमा पनि साइबर सुरक्षाको अवधारणा पूर्ण रूपमा फैलिसकेको थिएन । यद्यपि यो आवश्यक छ भन्ने भान चाहिँ वित्तीय संस्थाहरूलाई थियो । जब बैंकहरू साइबर आक्रमणमा पर्न थाले, तब राष्ट्र बैंकले नै साइबर सुरक्षालाई प्राथमिकता दिने निर्देशन जारी गर्‍यो । यसरी बैंकहरू पनि एमिनेन्ससँग जोडिन थाले ।

साइबर सुरक्षा क्षेत्रको बारेमा सिक्दै अगाडि बढिरहेको एमिनेन्सलाई सन् २०१५ को भूकम्प र २०१९ को कोभिड महामारीले परिपक्व बनाउन सहयोग गर्‍यो । “भूकम्प गएको समयमा हाम्रोमा काम गर्ने अधिकांश कर्मचारी कोठामा जान सक्ने अवस्था थिएन,” उनी भन्छन्, “हामीले सबै कर्मचारीलाई अफिसमै बस्ने व्यवस्था मिलायौँ । त्यतिबेला नयाँ सीप सिकाउन, खोज तथा अनुसन्धान गर्न, बजारको अवस्था बुझ्न थप मद्दत पुग्यो ।” कोभिड महामारीमा साइबर आक्रमणको विकराल रूप देखियो । त्यो समयमा पनि एमिनेन्सले अनलाइन र भौतिक उपस्थितिमा नेपालका विभिन्न सङ्घसंस्थालाई सुरक्षित बनाउन सघायो । 

एमिनेन्सले दिने सेवा

एमिनेन्सले कुनै पनि व्यवसायलाई साइबर आक्रमणबाट जोगाउन सुरक्षा सम्बन्धी समाधानको सेवा दिन्छ । कम्पनीले सानादेखि ठुला सबै आकारका व्यवसायलाई सघाउँदै आएको छ ।

कम्पनीले पेनिट्रेसन टेस्टिङ (Penetration testing) मार्फत सिस्टममा रहेका कमजोरी पत्ता लगाउँछ । र, त्यसलाई सुरक्षित बनाउने सेवा दिन्छ । यसले गर्दा सुरक्षा जोखिम कम हुन्छ र सिस्टम अर्काको नियन्त्रणमा हुने वा ह्याक हुने सम्भावना न्यून हुन्छ । त्यस्तै एमिनेन्सले सूचना प्रणाली लेखा परीक्षण (Information Systems Audit) गरेर ग्राहकको सूचना सुरक्षा नियन्त्रणको प्रभावकारिता मूल्याङ्कन गर्न सहयोग गर्छ ।

एमिनेन्सले दिने अर्को सेवा हो सुरक्षा परामर्श (Security consulting) । यस अन्तर्गत एमिनेन्स वेजले आफ्ना ग्राहकलाई साइबर सुरक्षा रणनीति विकास र कार्यान्वयन गर्न मद्दत गर्छ ।

कुनै व्यवसाय साइबर आक्रमणको शिकार भएमा, एमिनेन्स वेजले तत्काल र प्रभावकारी रूपमा प्रतिक्रिया (इन्सिडेन्ट रेस्पोन्स) दिन सघाउँछ । कोइरालाका अनुसार कम्पनीसँग सातै दिन २४ सै घण्टा सेवा दिने गरी अनुभवी इन्सिडेन्ट रेस्पोन्डर छन् । यसका साथै एमिनेन्स वेजले साइबर सुरक्षामा तालिम र प्रमाणीकरण कार्यक्रमहरू पनि दिने गर्छ । जसले ग्राहक र उनीहरूको सङ्गठनलाई साइबर सुरक्षाको बारेमा ज्ञान हासिल गर्न मद्दत गर्दछ ।

कम्पनीले ग्राहकको आवश्यकता अनुसार विभिन्न सुरक्षा सम्बन्धी सेवा दिँदै आएको छ । यसका साथै एमिनेन्स वेजले ग्राहकलाई आफ्नो वर्तमान सुरक्षा स्थितिको मूल्याङ्कन गर्न र सुधार गर्न सकिने क्षेत्रहरू पहिचान गर्न निःशुल्क परामर्श पनि दिन्छ ।

कर्पोरेट उद्योग, आईटी कम्पनी, वित्तीय संस्था, बीमा कम्पनी र सरकारी निकाय एमिनेन्सका मुख्य ग्राहक हुन् । कम्पनीले सुरुवाती दिनदेखि हालसम्म ५०० बढी कम्पनीलाई सेवा दिएको दाबी गरेको छ । अहिले पनि एमिनेन्समा सक्रिय ग्राहकको सङ्ख्या ५०० बढी छ । कोइरालाका अनुसार एमिनेन्सले नेपाल बाहेक अमेरिका, अस्ट्रेलिया, यूएई, भुटान, डेनमार्क, भारत, सिङ्गापुर र बेलायतमा पनि आफ्नो सेवा विस्तार गरेको छ । यस कम्पनीमा हाल ८० बढी कर्मचारी कार्यरत छन् । त्यसमध्ये २० एसओसी एनालिस्ट, ४ क्लाउड सेक्युरिटी एक्सपर्ट, ८ नेटवर्क इन्फ्रास्टक्चर सेक्युरिटी एक्सपर्ट, २५ वेब, एपीआई, मोबाइल एप्लिकेसन सेक्युरटी एक्सपर्ट, ८ साइबर सेक्युरिटी म्यानेजर, ११ आईएस अडिटर र ७ गभर्नेन्स एक्सपर्ट छन् । 

एमिनेन्सले वार्षिक पाँच करोड रुपैयाँभन्दा माथिको कारोबार गर्दै आएको दाबी गरेको छ । साइबर सुरक्षा क्षेत्रका धेरैजसो पेसेवरले पेनिट्रेसन टेस्टिङका लागि नेपालको सबैभन्दा प्रभावकारी ठाउँको रूपमा एमिनेन्सलाई लिने गर्छन् । नेपालका १५० भन्दा बढी बैंक तथा वित्तीय संस्था एमिनेन्सकै ग्राहक हुन् । त्यस्तै ४० बढी हस्पिटालिटी, ५ एभियसन, १०० बढी प्रविधि कम्पनी, ३५ टेलिकम तथा आईएसपी, ५० बढी शैक्षिक संस्था, ४० बढी सरकारी निकाय, १५ कर्पोरेट र १५ स्वास्थ्य क्षेत्रका सङ्घसंस्था तथा कम्पनीमा पनि एमिनेन्सले आफ्नो सेवा दिइरहेको छ ।

विभिन्न १० देशमा आफ्नो सेवा विस्तार गरिसकेको एमिनेन्सले अब विश्वव्यापी रूपमा आफूलाई अग्रस्थानमा राख्ने लक्ष्य लिएको छ ।

शब्द-चित्रमा एमिनेन्स वेज

पछिल्लो अध्यावधिक: चैत १२, २०८१ २०:३७

काठमाडौँ– वन तथा वातावरणमन्त्री ऐनबहादुर शाही ठकुरीले विश्वका सबै मुलुक मिलेर कार्बन उत्सर्जन तत्काल घटाउनुपर्ने बताएका छन्।

जर्मनीको बर्लिनमा आयोजित ‘पिटर्सबर्ग जलवायु संवाद’लाई सम्बोधन गर्दै पृथ्वीको तापक्रम वृद्धिलाई सन्तुलनमा राख्नुपर्ने, जलवायु वित्त परिचालनलाई तीव्रता दिनुपर्ने जस्ता विषयमा प्राथमिकता दिन अनुरोध गर्नुभएको उहाँको सचिवालयले जनाएको छ।

मन्त्री शाहीले नेपालले नगन्य कार्बन उत्सर्जन गरेपनि जलवायु परिवर्तनका अवसरबाट सबैभन्दा बढी प्रभावित हुनुपरेको बारेमा विश्व समुदायको ध्यानाकर्षण गराएका थिए। सो अवसरमा उनले नेपालले आगामी जेठ २ देखि ४ गतेसम्म काठमाडौँमा आयोजना गर्न लागेको ‘सगरमाथा संवाद’ बारे जानकारी गराएका  थिए।

विगत १४ वर्षदेखि जर्मन सरकारले जलवायु परिवर्तनमा बहुपक्षीय भूमिका र अन्तरराष्ट्रिय सहकार्यको महत्त्वलाई प्रवर्द्धन गर्न ‘पिटर्सबर्ग जलवायु संवाद’ आयोजना गर्दै आएको छ। उक्त संवादमा विशेष गरी जलवायु परिवर्तनको अन्तर्राष्ट्रिय परिप्रेक्ष्य, जलवायु कूटनीति, सबैको सहकार्यबाट पृथ्वीको बढ्दो तापक्रमलाई कसरी नियन्त्रण गर्ने, र जलवायु जोखिममा परेका देशहरूलाई कसरी सहयोग गर्ने भन्ने विषयमा छलफल भइरहेको छ।

जलवायु वार्तामा विशेष भूमिका रहेका देशलाई आमन्त्रित गरिने यस संवादको १५औँ संस्करणमा पहिलो पटक नेपाल सरकारका तर्फबाट वन तथा वातावरणमन्त्री शाही सहभागी भएका हुन्। कार्यक्रममा मन्त्री शाहीसँगै जर्मनीका लागि नेपाली राजदूत शैल रुपाखेती, जलवायु विज्ञ मञ्जित ढकाललगायत सहभागी छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। वन तथा वातावरणमन्त्री ऐनबहादुर शाही ठकुरीले विश्वका सबै मुलुक मिलेर कार्बन उत्सर्जन तत्काल घटाउनुपर्ने बताएका छन्।

जर्मनीको बर्लिनमा आयोजित ‘पिटर्सबर्ग जलवायु संवाद’लाई सम्बोधन गर्दै पृथ्वीको तापक्रम वृद्धिलाई सन्तुलनमा राख्नुपर्ने, जलवायु वित्त परिचालनलाई तीव्रता दिनुपर्ने जस्ता विषयमा प्राथमिकता दिन अनुरोध गर्नुभएको उनको सचिवालयले जनाएको छ।

मन्त्री शाहीले नेपालले नगन्य कार्बन उत्सर्जन गरेपनि जलवायु परिवर्तनका अवसरबाट सबैभन्दा बढी प्रभावित हुनुपरेको बारेमा विश्व समुदायको ध्यानाकर्षण गराएका थिए। सो अवसरमा उनले नेपालले आगामी जेठ २ देखि ४ गतेसम्म काठमाडौंमा आयोजना गर्न लागेको ‘सगरमाथा संवाद’ बारे जानकारी गराएका थिए।

विगत १४ वर्षदेखि जर्मन सरकारले जलवायु परिवर्तनमा बहुपक्षीय भूमिका र अन्तरराष्ट्रिय सहकार्यको महत्त्वलाई प्रवर्द्धन गर्न ‘पिटर्सबर्ग जलवायु संवाद’ आयोजना गर्दै आएको छ। उक्त संवादमा विशेष गरी जलवायु परिवर्तनको अन्तर्राष्ट्रिय परिप्रेक्ष्य, जलवायु कूटनीति, सबैको सहकार्यबाट पृथ्वीको बढ्दो तापक्रमलाई कसरी नियन्त्रण गर्ने, र जलवायु जोखिममा परेका देशहरूलाई कसरी सहयोग गर्ने भन्ने विषयमा छलफल भइरहेको छ।

जलवायु वार्तामा विशेष भूमिका रहेका देशलाई आमन्त्रित गरिने यस संवादको १५औँ संस्करणमा पहिलो पटक नेपाल सरकारका तर्फबाट वन तथा वातावरणमन्त्री शाही सहभागी भएका हुन्। कार्यक्रममा मन्त्री शाहीसँगै जर्मनीका लागि नेपाली राजदूत शैल रुपाखेती, जलवायु विज्ञ मञ्जित ढकाललगायत सहभागी छन्।

काठमाडौं । मोबाइल ब्रान्ड नथिङले नेपाली बजारमा १४ चैतदेखि १८ चैतसम्म ‘फ्ल्यास सेल अफर’ सञ्चालन गर्ने भएको छ ।

यस अन्तर्गत कम्पनीले नथिङ टुए (Nothing 2a) मोडेलमा ६ हजार छुट दिनेछ । यो अफर सबै प्रमुख अफलाइन च्यानलहरू, सीजी डिजिटल, हुकुट, दराज, ओलिज स्टोर, नियो स्टोर र अन्य अनलाइन च्यानलहरूमा उपलब्ध हुने कम्पनीले जनाएको छ । 

नथिङ (टुए) को ८ जीबी तथा १२८ जीबी स्टोरेज भेरियन्टको मूल्य ४५ हजार ९९९ रुपैयाँ रहेकोमा फ्ल्यास सेल अफर अवधिभर ३९ हजार ९९९ रुपैयाँमा खरिद गर्न सकिनेछ । 

त्यस्तै ८ जीबी तथा २५६ जीबी स्टोरेज भेरियन्टको मूल्य ५२ हजार ९९९ रुपैयाँ रहेकोमा फ्ल्यास सेल अफर अवधिभर ४६ हजार ९९९ रुपैयाँमा खरिद गर्न सकिनेछ । 

पछिल्लो अध्यावधिक: चैत १२, २०८१ १९:३१

नेपालगन्ज – बाँकेको नरैनापुर गाउँपालिकामा आज दिउँसो भएको आगलागीमा १७ घरगोठ जलेर नष्ट भएका छन्। 

गाउँपालिका–४ जयरामपूर्वामा भएको आगलागीबाट १७ घरगोठ जलेर नष्ट भएका जिल्ला प्रहरी कार्यालयका निमित्त सूचना अधिकारी तथा प्रहरी निरीक्षक यामबहादुर मल्लले जानकारी दिएका हुन्। 

स्थानीय जुमाई खाँको घरबाट लागेको आगो नेपालगञ्ज उपमहानगरपालिका र कोहलपुर नगरपालिकाका दुई दमकल, नेपाल प्रहरी, सशस्त्र प्रहरी र स्थानीय बासिन्दाको सहयोगमा नियन्त्रणमा लिइएको प्रहरीले जनाएको छ। 

खरले छाएका र एक आपसमा जोडिएका घरगोठमा लागेको आगो करिब डेढ घण्टापछि नियन्त्रणमा आएको प्रहरी निरीक्षक मल्लले बताए।  क्षतिको  विवरण सङ्कलन भइरहेको उनले बताए।  

नरैनापुर गाउँपालिकाका अध्यक्ष इश्तियाक अहमद शाह, प्रमुख प्रशासकीय अधिकृत नवराज वलीलगायतको टोली घटनास्थलमा पुगेर आगलागी पीडितलाई राहत दिने प्रतिबद्धता व्यक्त गरेका छन्। 

विभिन्न निकायसँगको समन्वयमा आगलागी पीडितका लागि त्रिपाल र खानाको व्यवस्था गर्ने काम भइरहेको र जिल्ला विपद् व्यवस्थापन समितिलाई थप राहतको व्यवस्था गर्न माग गरिएको अध्यक्ष शाहले बताए। उनले हावाहुरीको मौसममा आगलागीको सम्भावना अत्यधिक रहेकाले सचेत रहन आग्रह गरेका छन्।  

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।