काठमाडौं । नेपाली बजारमा चिनियाँ स्मार्टफोन ब्राण्ड ओप्पोको नयाँ मोडेल ‘ओप्पो ए फाइभ प्रो’ भित्रिएको छ ।  शुक्रबार राजधानीमा एक कार्यक्रममार्फत कम्पनीले ‘ए’ सिरिजको नयाँ लाइनअप सार्वजनिक गरेको हो ।

विशेषगरी टिकाउ र उच्च प्रदर्शन चाहने प्रयोगकर्ताका लागि लक्षित गरी यो फोन ल्याइएको कम्पनीले जनाएको छ । पानी तथा धूलोमा सुरक्षित राख्न यो फोनले आईपी६९ रेटिङ पाएको छ भने कठिन वातावरणबाट बच्न ग्रेड शक प्रमाणपत्र प्राप्त गरेको छ ।

कमजोर सिग्नलको क्षेत्रमा पनि कनेक्टिभिटीलाई सुनिश्चित गर्न फोनमा ‘Al LinkBoost’ र ‘BeaconLink’ जस्ता प्रविधि राखिएको कम्पनीले जनाएको छ ।

क्वालकम स्न्यापड्रागन सिक्स एस जेन थ्री मोबाइल प्लेटफर्मबाट सञ्चालित फोन ८ जीबी र्‍याम तथा २५६ जीबी स्टरेजमा उपलब्ध छ ।

यसमा ५,८०० एमएएचको ठुलो ब्याट्री छ, जसका लागि कम्पनीले ४५ वाटको सुपरभोक प्ल्याश चार्जर दिनेछ । १,००० निट्स अल्ट्रा ब्राइट डिस्प्ले भएका कारण सूर्यको प्रकाशमा पनि सजिलै फोन चलाउन सकिने कम्पनीको भनाइ छ ।

यसमा गुणस्तरीय अडिओ अनुभवका लागि ड्युल स्टेरियो स्पिकर र अल्ट्रा भोल्युम मोड दिइएको छ । मोचा ब्राउन र ओलिभ ग्रीन गरी दुई रंगमा उपलब्ध फोनको मूल्य ३२ हजार ९९९ रुपैयाँ तोकिएको छ । 

कम्पनीले भोलि शनिबारदेखि २४ मार्चसम्म यो फोनको प्रि-बुकिङ खुलाउने भएको छ भने बजारमा २५ मार्चदेखि उपलब्ध गराउने छ । प्रि-बुक गर्ने हरेक ग्राहकले एक हजार रुपैयाँ क्याशब्याक पाउनेछन् ।

पछिल्लो अध्यावधिक: चैत ८, २०८१ १७:१९

काठमाडौं । भारतको मद्रास उच्च अदालतले एउटा महत्त्वपूर्ण फैसला सुनाउँदै पोर्न (अश्लील सामग्री) हेर्नु र हस्तमैथुन गर्नु ‘वैवाहिक क्रुरता’ नहुने ठहर गरेको छ । महिलाको यौन स्वायत्तता र गोपनीयताको अधिकारलाई जोड दिँदै अदालतले हालै यस्तो फैसला सुनाएको हो ।

एक पुरुषले आफ्नी श्रीमतीले पोर्न हेर्ने र हस्तमैथुन गर्ने गरेको भन्दै सम्बन्धविच्छेदको लागि अदालतमा निवेदन दिएका थिए । तर, अदालतले पुरुषको निवेदन खारेज गर्दै यस्ता गतिविधिहरूलाई वैवाहिक क्रुरता मान्न नसकिने बताएको छ ।

न्यायाधीश जीआर स्वामीनाथन र आर पूर्णिमाको मदुराई बेन्चले फैसला सुनाउँदै भनेको छ, “यदि कुनै जोडीले निजी ठाउँमा पोर्न हेर्छन् र यसले वैवाहिक कर्तव्य निर्वाह गर्नमा कुनै नकारात्मक असर गर्दैन भने यस्ता गतिविधिहरूलाई क्रुरता मान्न सकिँदैन र सम्बन्धविच्छेदको आधार बन्न सक्दैन ।”

फैसलामा भनिएको छ, “पुरुषहरूले हस्तमैथुन गर्नु सामान्य मानिन्छ भने महिलाहरूले पनि यस्तो गर्नुलाई गलत मान्न मिल्दैन । विवाहपछि महिलाले विवाहबाहिर यौन सम्बन्ध राखेमा त्यो सम्बन्धविच्छेदको आधार बन्न सक्छ, तर आफ्नो शरीरबाट यौन आनन्द लिनुलाई क्रुरता भन्न सकिँदैन ।”

यो मुद्दा तमिलनाडुको करुर जिल्लाका एक पुरुषले दायर गरेका थिए, जसलाई फ्यामिली कोर्टले सम्बन्धविच्छेद दिन अस्वीकार गरेको थियो । पुरुषले अदालतमा श्रीमतीले धेरै खर्च गर्ने, पोर्न हेर्ने, घरको काम नगर्ने र हस्तमैथुन गर्ने गरेको आरोप लगाएका थिए । तर, अदालतले पुरुषले लगाएको आरोपलाई प्रमाणित गर्ने कुनै प्रमाण नभएको ठहर गरेको छ ।

अदालतले महिलाको गोपनीयताको अधिकारलाई जोड दिँदै भनेको छ, “गोपनीयता मौलिक अधिकार हो र यसमा वैवाहिक गोपनीयता पनि पर्छ । महिलाको यौन स्वायत्तता पनि यसभित्र पर्छ । कानुनले निषेध नगरेसम्म, आफ्नो इच्छा व्यक्त गर्ने अधिकार कसैलाई पनि रोक्न मिल्दैन ।”

अदालतले विवाहपछि पनि महिलाको व्यक्तिगत पहिचान कायम रहने र वैवाहिक स्थितिले उनको मौलिक पहिचानलाई समाप्त नपार्ने स्पष्ट पारेको छ ।

–हिन्दुस्तान टाइम्सको सहयोगमा

पछिल्लो अध्यावधिक: चैत ८, २०८१ १८:११

त्रिवेणी (रुकुमपश्चिम) रुकुमपश्चिमको चौरजहारी नगरपालिका–१ मा मिनीट्रकभित्र च्यापिएर एकजना मजदुरको मृत्यु भएको छभने एकजना घाइते भएका छन्।

आज दिउँसो मार्बल र सिमेन्ट बोकेको मिनीट्रकले च्यापिएर ट्रकमा बसेका डोल्पाको त्रिपुरासुन्दरी नगरपालिका–१ का २४ वर्षीय देवचन्द्र सार्कीको मृत्यु भएको जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकले जानकारी दिए। उनका अनुसार त्रिपुरासुन्दरी–६ का २१ वर्षीय मन्दिर सार्की घाइते भएका छन्।

‘लुम्बनी प्रदेश०३–००१क ००२७ नम्बरको मिनीट्रकको पछाडि भागमा मार्बलसँगै देवचन्द्र र मन्दिर बसेका थिए। उकालो मोडमा मार्बल बाँधेको डोरी चुडिएपछि बीचमा बसेका दुई मजदुर च्यापिएका हुन्’, प्रहरी निरीक्षक पाठकले भने। उनका अनुसार देवचन्द्रको उद्धार गरी उपचारका लागि अस्पताल पुर्‍याएकामा चिकित्सकले मृत घोषणा गरेका छन् भने मन्दिरको चौरजहारी अस्पतालमा उपचार भइरहेको छ।

घटनापश्चात प्रहरी टोलीले ट्रक नियन्त्रणमा लिएको छभने चालक सुर्खेतको गुर्भाकोट नगरपालिका–११ का विकास सुनार फरार रहेका प्रहरी निरीक्षक पाठकले जानकारी दिए। चालकको खोजी भइरहेको प्रहरीले जनाएको छ।