काठमाडौँ । विद्युतीय कार निर्माता टेस्लाले स्वचालित (सेल्फ-ड्राइभिङ) प्रविधिमा एक ऐतिहासिक सफलता हासिल गरेको छ । कम्पनीले पहिलो पटक अमेरिकाको टेक्सासस्थित आफ्नो फ्याक्ट्रीबाट चालक बिना नै कार सिधै ग्राहकको घरसम्म डेलिभरी गरेको हो ।
केही हप्ताअघि मात्र टेस्लाले टेक्सासको अस्टिनमा आम मानिसलाई चालकविहीन ट्याक्सी (रोबोट्याक्सी) को अनुभव लिन आमन्त्रण गरेको थियो । अहिले कम्पनीले फ्याक्ट्रीबाट कार डेलिभरी गरेर सबैलाई चकित पारेको छ ।
World’s first autonomous delivery of a car!
This Tesla drove itself from Gigafactory Texas to its new owner’s home ~30min away — crossing parking lots, highways & the city to reach its new owner pic.twitter.com/WFSIaEU6Oq
— Tesla (@Tesla) June 28, 2025
टेस्लाले आफ्नो सामाजिक सञ्जाल ‘एक्स’मा एक पोस्ट गर्दै लेखेको छ, “विश्वको पहिलो स्वचालित कार डेलिभरी !” कम्पनीले सार्वजनिक गरेको भिडिओ अनुसार ‘क्विकसिल्भर मोडल वाई’ कार फ्याक्ट्रीबाट निस्किएर राजमार्गमा गुड्दै करिब ३० मिनेटको यात्रापछि आफ्नो नयाँ मालिकको घरमा पुगेको थियो । यात्राका क्रममा कारले राजमार्ग, सहरी सडक, ट्राफिक, पैदलयात्री, ट्राफिक लाइट र चोक सफलतापूर्वक पार गरेको भिडिओमा देखिन्छ । कार घरको अगाडि रोकिएपछि ग्राहकले आफ्नो नयाँ गाडीको डेलिभरी लिएका थिए ।
यो सफलतापछि टेस्लाले ग्राहकको घरबाहिर डेलिभरी गरिएका केही तस्बिर पनि सार्वजनिक गरेको छ । कम्पनीका सीईओ एलन मस्कले पनि यो खबर शेयर गर्दै टेस्लाको एआई टिमलाई बधाई दिएका छन् । उनले लेखेका छन्, “टेस्ला एआई टिमका सफ्टवेयर र एआई चिप डिजाइन दुवै टिमलाई बधाई !”
The first fully autonomous delivery of a Tesla Model Y from factory to a customer home across town, including highways, was just completed a day ahead of schedule!!
Congratulations to the @Tesla_AI teams, both software & AI chip design!
— Elon Musk (@elonmusk) June 27, 2025
टेस्लाका एआई उपाध्यक्ष अशोक इल्लुस्वामीले यात्राको विवरण शेयर गर्दै कारले राजमार्गमा ७२ माइल प्रतिघण्टा (लगभग ११६ किलोमिटर प्रतिघण्टा) को अधिकतम गतिमा गुडेको जानकारी दिए । यो ऐतिहासिक क्षणभन्दा केही महिनाअघि मात्र टेस्लाका गाडी फ्याक्ट्रीभित्रै स्वचालित रूपमा पार्किङ स्थलसम्म पुग्न थालेका थिए । सोही परीक्षणको सफलतापछि कम्पनीले सार्वजनिक सडकमा चालक वा यात्रु बिना नै कारको क्षमता देखाउन यो डेलिभरी गरेको हो ।
यो घटना टेस्लाको ‘फुल सेल्फ-ड्राइभिङ’ सफ्टवेयर प्रयोग गरेर पूर्ण स्वचालित गाडी बजारमा ल्याउने योजनाको लागि एक महत्त्वपूर्ण कोशेढुङ्गा मानिएको छ । यसले कम्पनीको एआई र सेल्फ-ड्राइभिङ कारमाथिको लगानीले सार्थकता पाउन थालेको देखाएको छ ।
पछिल्लो अध्यावधिक: असार १७, २०८२ ७:४
सामाग्री श्रोत :
टेक पाना
काठमाडौँ – नेपाल राष्ट्र बैंकले आजका लागि विदेशी मुद्राको विनिमय दर निर्धारण गरेको छ । राष्ट्र बैंकका अनुसार अमेरिकी डलर एकको खरिददर १३६ रुपैयाँ ९२ पैसा र बिक्रीदर १३७ रुपैयाँ ५२ पैसा निर्धारण गरिएको छ ।
युरोपियन युरो एकको खरिददर १६० रुपैयाँ ५९ पैसा र बिक्रीदर १६१ रुपैयाँ २९ पैसा, युके पाउण्ड स्ट्रलिङ एकको खरिददर १८७ रुपैयाँ ७२ पैसा र बिक्रीदर १८८ रुपैयाँ ५५ पैसा, स्वीस फ्रयाङ्क एकको खरिददर १७१ रुपैयाँ ८४ पैसा र बिक्रीदर १७२ रुपैयाँ ५९ पैसा कायम गरिएको छ ।
अष्ट्रेलियन डलर एकको खरिददर ८९ रुपैयाँ ४६ पैसा र बिक्रीदर ८९ रुपैयाँ ८६ पैसा, क्यानेडियन डलर एकको खरिददर १०० रुपैयाँ १५ पैसा र बिक्रीदर १०० रुपैयाँ ५९ पैसा, सिङ्गापुर डलर एकको खरिददर १०७ रुपैयाँ ४६ पैसा र बिक्रीदर १०७ रुपैयाँ ९३ पैसा तोकिएको छ ।
जापानी येन १० को खरिददर नौ रुपैयाँ ४९ पैसा र बिक्रीदर नौ रुपैयाँ ५३ पैसा, चिनियाँ युआन एकको खरिददर १९ रुपैयाँ ११ पैसा र बिक्रीदर १९ रुपैयाँ १९ पैसा, साउदी अरेबियन रियाल एकको खरिददर ३६ रुपैयाँ ५१ पैसा र बिक्रीदर ३६ रुपैयाँ ६७ पैसा, कतारी रियाल एकको खरिददर ३७ रुपैयाँ ५७ पैसा र बिक्रीदर ३७ रुपैयाँ ७३ पैसा कायम भएको छ ।
केन्द्रीय बैंकका अनुसार थाइ भाट एकको खरिददर चार रुपैयाँ २१ पैसा र बिक्रीदर चार रुपैयाँ २३ पैसा, युएई दिराम एकको खरिददर ३७ रुपैयाँ २८ पैसा र बिक्रीदर ३७ रुपैयाँ ४४ पैसा, मलेसियन रिङ्गेट एकको खरिददर ३२ रुपैयाँ ५१ पैसा र बिक्रीदर ३२ रुपैयाँ ६५ पैसा, साउथ कोरियन वन १०० को खरिददर १० रुपैयाँ १० पैसा र बिक्रीदर १० रुपैयाँ १४ पैसा, स्वीडिस क्रोनर एकको खरिददर १४ रुपैयाँ ४२ पैसा र बिक्रीदर १४ रुपैयाँ ४९ पैसा र डेनिस क्रोनर एकको खरिददर २१ रुपैयाँ ५२ पैसा र बिक्रीदर २१ रुपैयाँ ६२ पैसा तोकिएको छ ।
राष्ट्र बैंकले हङ्कङ डलर एकको खरिददर १७ रुपैयाँ ४४ पैसा र बिक्रीदर १७ रुपैयाँ ५२ पैसा, कुवेती दिनार एकको खरिददर ४४७ रुपैयाँ ८५ पैसा र बिक्रीदर ४४९ रुपैयाँ ८१ पैसा, बहराइन दिनार एकको खरिददर ३६२ रुपैयाँ ९२ पैसा र बिक्रीदर ३६४ रुपैयाँ ५१ पैसा, ओमनी रियाल एकको खरिददर ३५५ रुपैयाँ ६२ पैसा र विक्रीदर ३५७ रुपैयाँ १८ पैसा रहेको छ ।
भारतीय रुपैयाँ एक सयको खरिददर १६० रुपैयाँ र बिक्रीदर १६० रुपैयाँ १५ पैसा तोकेको छ । राष्ट्र बैंकले यो विनिमय दरलाई आवश्यकतानुसार जुनसुकै समयमा पनि संशोधन गर्न सकिने जनाएको छ । वाणिज्य बैंकले तोक्ने विनिमय दर भने फरक हुनसक्ने र अद्यावधिक विनिमय दर केन्द्रीय बैंकको वेबसाइटमा उपलब्ध हुने जनाइएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौँ । डिशहोमको रमाइलो टिभी च्यानलले चर्चित धार्मिक टेलिभिजन सिरिज ‘रामायण’ नेपाली भाषामा प्रसारण गर्ने भएको छ । यो ऐतिहासिक श्रृंखला १९ असारदेखि हरेक बिहीबार र शुक्रबार बेलुका ८ बजे प्रसारण हुनेछ ।
‘रामायण’ भारतीय संस्कृत महाकाव्य रामायणमा आधारित टेलिभिजन श्रृंखला हो । यसलाई चर्चित निर्माता, निर्देशक तथा लेखक रामानन्द सागरले निर्माण गरेका हुन् । यो सिरिज पहिलोपटक सन् १९८७ देखि १९८८ सम्म भारतको डीडी नेसनल च्यानलमा प्रसारित भएको थियो । आशोक कुमार र रामानन्द सागरद्वारा प्रस्तुत गरिएको यो श्रृंखलामा संगीत संयोजन रविन्द्र जैनले गरेका थिए ।
‘रामायण’ ले प्रसारणको समयमा भारतमा ८२ प्रतिशत दर्शक संख्या पाउँदै इतिहास रचेको बताइन्छ । बीबीसीका अनुसार यो श्रृंखलालाई ६५ करोडभन्दा बढी दर्शकले हेरेका थिए । यसको पुनः प्रसारण विश्वका १७ देशका २० भन्दा बढी च्यानलमार्फत पनि गरिएको थियो ।
कोरोना महामारीका बेला सन् २०२० मा यसको पुनः प्रसारण हुँदा एकै दिन सात करोड ७० लाख दर्शक संख्यासहित विश्वको सबैभन्दा धेरै हेरिएको टेलिभिजन कार्यक्रमको कीर्तिमान बनाएको थियो ।
डिशहोमले आफ्ना ग्राहकका लागि राष्ट्रिय तथा अन्तर्राष्ट्रिय खेलकुद, लोकप्रिय कार्यक्रम र मनोरञ्जनात्मक सामग्रीहरु लगातार प्रसारण गर्दै आएको छ । यसैक्रममा, अब डिशहोमका ग्राहकले यो ऐतिहासिक र धार्मिक कथा नेपाली भाषामा रमाइलो टिभीमार्फत हेर्न सक्नेछन् ।
हाल रमाइलो टिभी डिशहोमका ग्राहकका लागि मात्र उपलब्ध छ ।
पछिल्लो अध्यावधिक: असार १६, २०८२ १५:५२
सामाग्री श्रोत :
टेक पाना
काठमाडौँ । सामसङले आफ्ना ग्यालेक्सी फोन प्रयोगकर्ताहरूलाई फोन चोरीबाट बचाउनका लागि केही महत्त्वपूर्ण सुरक्षा फिचर सक्रिय गर्न आग्रह गरेको छ । विश्वभर फोन चोरीका घटना बढिरहेकाले कम्पनीले सबै ग्यालेक्सी प्रयोगकर्ताहरूलाई आफ्नो एन्टी-थेफ्ट फिचर इनेबल गर्न जोड दिएको हो ।
जस मध्ये धेरैजसो सुविधाहरू एन्ड्रोइड १५ मा आधारित वन यूआई ७ अपडेटमार्फत सामसङ डिभाइसहरूमा उपलब्ध गराइएका छन् । सामसङले भविष्यमा थप ग्यालेक्सी डिभाइसहरूले पनि यी सुविधाहरू प्राप्त गर्ने बताएको छ ।
थेफ्ट डिटेक्शन लक (Theft Detection Lock) नामक फिचर एन्ड्रोइड १० वा सोभन्दा माथिका डिभाइसमा उपलब्ध एन्ड्रोइड फिचर हो । यसले आर्टिफिसियल इन्टेलिजेन्स (एआई) प्रयोग गरी कसैले तपाईँको फोन हातबाट खोसेर भाग्ने, साइकल चलाउने वा गाडीमा लिएर भाग्ने प्रयास गरेमा पत्ता लगाउँछ । यदि यो सुविधाले सो कुराको सङ्केत पायो (ट्रिगर भयो) भने, तपाईँको फोनको स्क्रिन तुरुन्तै लक हुन्छ, जसले अनधिकृत पहुँचबाट फोनलाई जोगाउँछ ।
त्यस्तै ग्यालेक्सी फोनहरूमा आएको अर्को सुविधा हो अफलाइन डिभाइस लक (Offline Device Lock) । यो पनि सामसङको विशेष सुविधा नभई एन्ड्रोइडकै फिचर हो । यसले धेरै पटक गलत अथेन्टिकेसनका प्रयास पत्ता लगाएर तपाईँको डिभाइसलाई अफलाइन हुँदा वा गलत हातमा पर्दा पनि तपाईँको डेटा सुरक्षित राख्न स्क्रिन स्वचालित रूपमा लक गर्छ ।
त्यसैगरी एन्ड्रोइड सेक्युरिटी फिचरको रूपमा रहेको रिमोट लक (Remote Lock) नामक सुविधाले तपाईँलाई कुनै पनि डिभाइस प्रयोग गरेर आफ्नो फोन नम्बर र फोनको स्क्रिन टाढैबाट लक गर्ने अनुमति दिन्छ ।
यी फिचर एक्टिभ गर्नका लागि तपाईँले आफ्नो ग्यालेक्सी फोनको सेटिङमा जानु पर्ने हुन्छ । त्यहाँबाट Security and privacy > Lost device protection > Theft protection मा गएर यसलाई एक्टिभ गर्नुहोस् ।
यसका अतिरिक्त, सामसङले प्रयोगकर्ताहरूलाई आइडेन्टिटी चेक (Identity Check) एक्टिभ गर्न पनि प्रोत्साहित गरिरहेको छ । यो फिचरले तपाईँको डिभाइस विश्वसनीय स्थानमा नभएको बेला महत्त्वपूर्ण सेक्युरिटी सेटिङ परिवर्तन गर्नका लागि बायोमेट्रिक अथेन्टिकेसन पूरा गर्नुपर्ने बनाउँछ । यसलाई सक्रिय गर्नका लागि Settings हुँदै Security and privacy > Lost device protection > Theft protection मा रहेको Identity Check मा जानुहोस् । त्यहाँ तपाईँले Safe places (सुरक्षित स्थानहरू) पनि थप्न सक्नुहुन्छ, जुन यस्ता स्थानहरू हुन्, जहाँ संवेदनशील जानकारी परिवर्तन गर्नका लागि बायोमेट्रिक्स आवश्यक पर्दैन ।
सामसङले आफ्नो ब्लग पोस्टमा सेक्युरिटी डिले (Security Delay) लाई पनि हाइलाइट गरेको छ । यो आइडेन्टिटी चेककै एक भाग हो । यदि कसैले तपाईँको डिभाइसको बायोमेट्रिक डेटा रिसेट गर्ने, आइडेन्टिटी चेक बन्द गर्ने, लक स्क्रिन सेटिङ परिवर्तन गर्ने, फाइन्ड माई (Find My) बन्द गर्ने, वा सुरक्षित स्थानहरू एडिट गर्ने प्रयास गर्छ भने, यसले एक घण्टाको प्रतीक्षा अवधि सुरु गर्दछ । यसले तपाईँलाई चोरीको अवस्थामा आफ्नो फोन टाढैबाट लक गर्न पर्याप्त समय दिन्छ ।
सामसङका अनुसार, यी सुविधाहरू हाल केही सीमित ग्यालेक्सी फोनहरूमा उपलब्ध छन् । भविष्यमा थप ग्यालेक्सी फोनहरूमा यसलाई विस्तार गरिने बताइएको छ ।
नयाँ सेक्युरिटी फिचर प्राप्त गर्ने फोनहरूः
१. ग्यालेक्सी एस २५ सिरिज (Galaxy S25 series)
२. ग्यालेक्सी एस २४ सिरिज (Galaxy S24 series)
३. ग्यालेक्सी जेड फोल्ड ६ (Galaxy Z Fold 6)
४. ग्यालेक्सी जेड फ्लिप ६ (Galaxy Z Flip 6)
५. ग्यालेक्सी जेड फोल्ड ५ (Galaxy Z Fold 5)
६. ग्यालेक्सी जेड फ्लिप ५ (Galaxy Z Flip 5)
७. ग्यालेक्सी एस २३ सिरिज (Galaxy S23 series)
८. ग्यालेक्सी एस २२ सिरिज (Galaxy S22 series)
पछिल्लो अध्यावधिक: असार १६, २०८२ १६:३२
सामाग्री श्रोत :
टेक पाना
काठमाडौं– काठमाडौंको दरबारमार्गमा निर्माणाधीन घरको चौथो तलाबाट खस्दा दुई कामदारको मृत्यु भएको छ ।
मृत्यु हुनेमा कैलालीका करिब ३० वर्षीय प्रदेशी चौधरी र बर्दियाका करिब २० वर्षीय विशाल चौधरी रहेको प्रहरीले जनाएको छ ।
दरबारमार्गस्थित हिटीपोखरी नजिक पोतला डेभलप्मेन्ट प्रालिले बनाउँदै गरेको ९ तले पक्की घरमा सोमबार बेलुका करिब ५ बजे उक्त घटना भएको हो ।
चौथो तलामा लिफ्टमा चढेर ग्रिज लगाउने क्रममा फलामको सिक्री चुँडिएर खस्दा गम्भीर घाइते भएका उनीहरुलाई तत्काल उपचारका लागि वीर अस्पताल लगिएको थियो । अस्पतालले ५:१० बजेको समयमा दुवैलाई मृत घोषणा गरेको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौं- नेपाल चिकित्सक संघले उपभोक्ता अदालतले हालै चिकित्सकीय अभ्याससम्बन्धी मुद्दामा सुनाएको फैसलाहरू नेपाल मेडिकल काउन्सिलको अधिकारक्षेत्रसँग बाझिएकोमा आपत्ति जनाउँदै चरणबद्ध आन्दोलन घोषणा गरेको छ।
आन्दोलन अन्तर्गत असार १७ गतेदेखि देशभरका चिकित्सक र स्वास्थ्यकर्मीले कालो पट्टी बाँधी सेवा दिने निर्णय गरिएको छ।
विभिन्न अस्पताल प्रमुख, निजी मेडिकल तथा डेन्टल कलेज संघ, एपीएचआईएन, एपीपीओएन, नेपाल नर्सिङ एसोसिएसन, चिकित्सक समाजलगायतका सरोकारवालाहरूसँग गरिएको बृहद् छलफलपछि संघले यस्तो निर्णय गरेको हो। छलफलमा चिकित्सकद्वारा उपचारका क्रममा हुने त्रुटीसम्बन्धी उजुरी नेपाल मेडिकल काउन्सिलमार्फत हेर्नुपर्ने निष्कर्ष निकालिएको संघले जनाएको छ।
त्यसैगरी महासचिव डा. सन्जिव तिवारीको संयोजकत्वमा विभिन्न स्वास्थ्य संघसंस्थाका प्रतिनिधिहरू समावेश गरिएको टास्क फोर्स बनाउने निर्णय गरिएको छ।नेपाल सरकारअन्तर्गत सरोकारवाला निकायहरूसँग संवाद गरी समस्या समाधानका लागि दबाब सिर्जना गर्ने र असार १९ गते पुनः सबै सरोकारवालासँग बैठक गरी भावी रणनीति तय गरिने बताइएको छ।
संघले आवश्यकताअनुसार थप कडा आन्दोलनका कार्यक्रमहरू घोषणा गर्न सक्ने चेतावनीसमेत दिएको छ। संघले यथाशीघ्र सरकारको ध्यानाकर्षण गराउँदै, ऐन संशोधन गरी काउन्सिललाई मात्र चिकित्सकीय मुद्दा हेर्ने अधिकार सुनिश्चित गर्न माग गरेको छ।
सामाग्री श्रोत :
swasthyakhabar
काठमाडौँ । निजामती कर्मचारीले सामाजिक सञ्जालमा सार्वजनिक पदाधिकारी, राजनीतिक दल र नेताहरूको पक्ष वा विपक्षमा कमेन्ट गर्न नपाउने भएका छन् । आइतबार (१५ जेठ) मा प्रतिनिधि सभाबाट पारित विधेयकको दफा ८९ मा निजामती कर्मचारीहरूले विद्युतीय माध्यम वा सामाजिक सञ्जालमा टिप्पणी गर्न नहुने व्यवस्था गर्दै उक्त व्यवस्था गरिएको हो ।
उक्त दफामा भनिएको छ, “निजामती कर्मचारीले विद्युतीय माध्यम वा सामाजिक सञ्जालमा सामाजिक द्वेष वा कलह बढ्ने, हिंसा भड्किने गरी वा सार्वजनिक पदाधिकारी वा कुनै राजनीतिक दल वा राजनीतिक दलको पदाधिकारीको पक्ष वा विपक्षमा कुनै टिप्पणी गर्न वा यस परिच्छेद विपरीत हुने गरी कुनै कुरा व्यक्त गर्न हुँदैन।”
पारित उक्त विधेयकलाई तत्कालीन सङ्घीय मामला तथा सामान्य प्रशासन मन्त्री अनिता देवीले प्रतिनिधि सभामा २१ फागुन २०८० मा दर्ता गराएकी थिइन् । उक्त प्रस्ताविक विधेयक प्रतिनिधि सभाबाट पास हुनुभन्दा पहिले विधेयकमा १२४ जना सांसदहरूको संशोधन प्रस्ताव स्वीकृत भएको थियो । जहाँ १५८३ वटा संशोधन प्रस्तावमा छलफल भएको थियो ।
तर, दफा ८९ मा कुनै पनि सांसदले संशोधन प्रस्तावना गरेका थिएनन् । जस कारण दर्ता भएको विधेयकको उक्त दफा कुनै पनि संशोधन बिना नै पारित भएको छ ।
अब विधेयक राष्ट्रिय सभामा पठाइनेछ । राष्ट्रिय सभाबाट पारित भएर पुन प्रतिनिधिसभामा फिर्ता पठाइनेछ । त्यसपछि सभामुखले प्रमाणित गरेर राष्ट्रपति समक्ष पेस गर्नेछन् । राष्ट्रपतिबाट प्रमाणीकरण भएसँगै उक्त विधेयक कार्यान्वयनमा आउनेछ ।
पछिल्लो अध्यावधिक: असार १६, २०८२ १८:४०
सामाग्री श्रोत :
टेक पाना
तेहरान– इजरायलसँग भएको १२ दिन लामो युद्धका क्रममा इरानमा कम्तीमा ९३५ जनाले ज्यान गुमाएको इरानी सरकारी सञ्चारमाध्यमले सोमबार जनाएको छ । युद्धविराम लागू भएको करिब एक सातापछि यो विवरण सार्वजनिक गरिएको हो ।
‘सियोनवादी शासनद्वारा हाम्रो देशमाथि थालिएको १२ दिने युद्धको क्रममा हालसम्म ९३५ जना सहिदको पहिचान गरिएको छ,’ न्याय परिषद्का प्रवक्ता असगर जहाङ्गीरलाई उद्धृत गर्दै सरकारी समाचार संस्था इरनाले जनाएको छ ।
मृतकमध्ये १३२ जना महिला र ३८ जना बालबालिका रहेका छन् ।
इरानका अनुसार जुन १३ गते इजरायलले इरानका सैनिक शिविर, आणविक अनुसन्धान स्थल र आवासीय क्षेत्रहरूलाई लक्षित गरी बम आक्रमण शुरु गरेको थियो । ती आक्रमणमा उच्चपदस्थ सैनिक अधिकृतहरू र वैज्ञानिकहरूको मृत्यु भएको उल्लेख गरिएको छ ।
इरानले पनि जवाफी कारबाहीस्वरूप मिसाइल र मानवरहित विमान प्रयोग गरी इजरायलका प्रमुख सहरहरूमा आक्रमण गरेको थियो । इजरायली अधिकारीहरूका अनुसार ती कारबाहीमा २८ जनाको मृत्यु भएको थियो । दुवै देशबीच जुन २४ गते युद्धविराम लागू भएको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौँ । सामसङले आफ्नो नयाँ इयरबड्स ‘ग्यालेक्सी बड्स कोर’ नेपाली बजारमा सार्वजनिक गर्ने घोषणा गरेको छ । जुलाई १ देखि ग्राहकका लागि उपलब्ध हुने यी बड्सहरू दैनिक उपयोगका लागि डिजाइन गरिएको कम्पनीको दाबी छ ।
कालो र सेतो रंगमा उपलब्ध ग्यालेक्सी बड्सकर नेपालभर सामसङका आधिकारिक बिक्रेताहरू बाट बिक्री हुनेछ । एनसी (ANC) र कल न्वाइज रिडक्सन (Call Noise Reduction) को साथमा, प्रयोगकर्ताहरूले धेरै हल्ला भएको ठाउँमा पनि स्पष्ट सँग कुरा गर्न सक्ने बताइएको छ । यसमा तीनवटा माइक प्रणाली जडान गरिएको छ, जसले गर्दा फोन कल गर्दा होस् वा गीत सुन्दा अथवा कुनै व्यावसायिक मिटिङमा बस्नुपर्दा यो इयरबड्स उपयुक्त हुने कम्पनीको दाबी छ ।
यो इयरबड्सको एक प्रमुख फिचर हो ‘ग्यालेक्सी एआई इन्टरप्रिटर’, जसले आमने सामने कुराकानीको क्रममा दुईतर्फी रियल-टाइम अनुवाद प्रदान गर्छ । तपाईं आफ्नै भाषामा बोल्नुहोस्, र इयरबड्सले तुरुन्तै अनुवादित उत्तर प्रदान गर्नेछ ।
सात हजार ३९९ रुपैयाँ मूल्य रहेको यो इयबड्स सस्तो भए पनि फिचर भने प्रिमियम रहेको कम्पनीको भनाइ छ ।
पछिल्लो अध्यावधिक: असार १६, २०८२ २०:२७
सामाग्री श्रोत :
टेक पाना
काठमाडौं– सम्पत्ति शुद्धीकरण र भ्रष्टाचार मुद्दामा नागार्जुन नगरपालिकाका निलम्बित मेयर मोहनबहादुर बस्नेतलाई करिब ११ वर्ष कैद सजाय भएको छ । यस्तै ३१ करोड १८ लाख ६२ हजार १ सय ७८ रुपैयाँ जरिवानाको सजाय सुनाइएको छ ।
अख्तियार दुरुपयोग अनुसन्धान आयोगले दायर गरेको सम्पत्ति शुद्धीकरण र भ्रष्टाचारसम्बन्धी मुद्दामा विशेष अदालतका अध्यक्ष न्यायाधीश टेकनारायण कुँवर र अर्का न्यायाधीश रामबहादुर थापाको इजालासले गत असार ६ मा बस्नेतलाई दोषी ठहर गरेकामा सोमबार सजाय निर्धारण गरेको हो । दोषी ठहर बस्नेत २०७४ र २०७९ को स्थानीय निर्वाचनमा कांग्रेसबाट मेयर निर्वाचित भएका थिए ।
सजाय निर्धारण गर्दै विशेषले व्यापारीबाट घुस लिएको कसुरमा उनलाई २ करोड ३० लाख ६१ हजार ५ सय ८ रुपैयाँ जरिवाना र ८ वर्ष कैद सजाय सुनाएको हो । मेयरको पद दुरुपयोग गरेकामा थप ३ महिना कैद सजाय गरिएको छ । यस्तै सम्पत्ति शुद्धीकरणतर्फ उनलाई १३ करोड १२ लाख ७३ हजार ३२ रुपैयाँ बिगो कायम भएकामा बिगोको दोब्बर २६ करोड २५ लाख ४६ हजार ६४ रुपैयाँ जरिवाना सुनाइएको हो ।
सम्पत्ति शुद्धीकरणतर्फ अदालतले थप ३ वर्ष कैद सजाय तोकेको हो । यस्तै अदालतले २ करोड ६२ लाख ५४ हजार ६सय ६ रुपैयाँ ४६ पैसा पनि थप जरिवानाबापत सजाय निर्धारण गरेको हो ।
यस्तै बस्नेतबाट अपराधपीडित राहत कोषमा १ करोड ५ लाख १ हजार ४२ रुपैयाँ जम्मा गर्न पनि अदालतले आदेश दिएको छ । बस्तेलाई घुस दिएको कसुरमा पद्मा कोलोनी प्रालि र पद्मा मर्चेन्टका अध्यक्ष राजुप्रसाद कँडेल तथा उनको संस्थाबाट जनही ९ लाख २२ हजार ४ सय ६० रुपैयाँ अपराधपीडित राहत कोषमा जम्मा गर्न आदेश गरिएको छ ।
पद्मा कोलोनीका सञ्चालक कँडेलबाट ९ करोड २२ लाख ४६ हजार ३३ रुपैयाँ घुस लिएको र उक्त घुस प्रतिवादी बस्नेतले शुद्धीकरण गरेको भन्दै विशेषले गत असार ६ मा दोषी ठहर गरेको थियो ।
अख्तियार दुरुपयोग अनुसन्धान आयोगले मेयर बस्नेत र व्यापारी कँडेलसहितलाई प्रतिवादी बनाएर १४ पुस २०८१ मा विशेष अदालतमा सम्पत्ति शुद्धीकरण मुद्दा दायर गरेको थियो । सोही मुद्दाको किनारा लगाउँदै विशेषले दुबैजनालाई दोषी ठहर गरेको हो । विशेषले सजाय निर्धारणका लागि भने असार १६ गतेलाई पेसी तोकेको छ । घरजग्गा कारोबारी राजुप्रसाद कँडेलबाट घूसबापत रकम लिएर त्यसलाई शुद्धीकरण गरेको अभियोगमा अख्तियारले बस्नेत, पत्नी उर्मिलासहितलाई प्रतिवादी बनाएर मुद्दा दायर गरेको थियो । विशेषले उर्मिला बस्नेतलाई भने सफाई दिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
