काठमाडौं। राष्ट्रिय जनस्वास्थ्य प्रयोगशालामा संक्रामक रोग तथा महामारीका बेला सुरक्षित नमूना परीक्षण गर्ने उद्देश्यले उच्च प्रविधियुक्त ल्याब एकाइ स्थापना गरिएको छ।

ल्याबको उद्घाटन गर्दै स्वास्थ्य तथा जनसंख्या मन्त्री प्रदीप पौडेलले प्रयोगशालालाई पछिल्ला दिनमा सबलीकरण गर्न मन्त्रालयले प्राथमिकतासाथ काम गरेको भन्दै प्रयोगशाला परीक्षणमा नेपाललाई आत्भनिर्भर बनाउनका लागि मन्त्रालय प्रतिबद्ध रहेको बताए।

प्रयोगशालालाई पूर्ण क्षमताको केन्द्रीय प्रयोगशालाका रुपमा विकास गर्नु आवश्यक छ, उनले भने, यसमा हाम्रो सहयोगी भूमिका रहनेछ।

मन्त्री पौडेलले स्वास्थ्य क्षेत्रका सहयोगी दाताहरुलाई प्रयोगशाला व्यवस्थित बनाउनका लागि सहकार्यका लागि समेत आग्रह गरे।
मन्त्री पौडेलले नेपालमा परीक्षण सम्भव नभएका क्यान्सरका जटिल परीक्षणका लागि प्रयोगशालामा गर्ने व्यवस्था मिलाएका थिए। उनले विभिन्न सरकारी अस्पतालमा सम्भव नभएका परीक्षणका लागि समेत प्रयोगशालामार्फत सुपथ मुल्यमा गर्ने गरी व्यवस्था मिलाएका थिए।

नेपालमा पहिलो पटक निर्मित ल्याब करिब चार करोड लागतमा निर्माण सम्पन्न भएको प्रयोगशालाका निर्देशक डा. रञ्जन भट्टले बताए।
ल्याब उद्घाटनकै अवसरमा नेपालमा प्राथमिकताप्राप्त ५२ रोगको परीक्षणका लागि आवश्यक उपकरण विश्व स्वास्थ्य संगठनले मन्त्रालयलाई हस्तान्तरण गरेको छ। अब यी किटहरु प्रदेश तथा जिल्ला तहका अस्पतालसम्म पुर्याइने र यसले परीक्षण सहज हुने विश्वास गरिएको भट्टले बताए।

स्वास्थ्य तथा जनसंख्या मन्त्री पौडेलले आधारभूत तहसम्म अनिवार्य परीक्षण हुनुपर्ने सुचीसहितको पुस्तिकाको अनावरण पनि गरे। अब हरेक आधारभूतदेखि विशिष्ट अस्पतालहरुमा मन्त्रालयले तोकेको परीक्षण गर्ने पर्ने व्यवस्था मिलाउने तयारी मन्त्रालयले गरेको प्रवक्ता डा. प्रकाश बुढाथोकीले बताए।

काठमाडौँ । काठमाडौँमा ‘डेभकन २०२५’ सम्मेलन आयोजना गरिएको छ । इडिट इन्टरप्राइज प्रालिको आयोजनामा बिहीबार भएको कार्यक्रममा अमेरिकास्थित पिट्सबर्ग विश्वविद्यालयका प्राध्यापक डा. जेम्स जोशीले एआई र डेटा गोपनीयताका अवसर र चुनौतीबारे प्रस्तुति दिएका थिए ।

उनले एआईको तीव्र विकाससँगै डेटा यसको आधारशिला भएको बताउँदै मानव बेचबिखन, वित्तीय ठगी, आविष्कारजस्ता क्षेत्रमा डेटा उपयोगबाट अवसर खुल्ने तर साथसाथै गोपनीयता र साइबर सुरक्षामा गम्भीर चुनौती थपिने बताए। पछिल्लो समयमा स्मार्ट उपकरण र आईओटीको प्रयोग बढेसँगै एआईको बजार पनि तीव्र रूपमा बढिरहेको उनले उल्लेख गरे ।

डा. जोशीका अनुसार अहिले साइबर अपराध बढ्दै गएकाले त्यसको नियन्त्रणमा विश्वभर खर्बौँ डलर खर्च भइरहेको छ । साथै, विगतमा मौसमी परिवर्तन र पृथ्वीमा हुने प्राकृतिक परिवर्तन प्रमुख विश्वव्यापी जोखिम मानिँदा अहिले गलत तथा भ्रामक सूचना र साइबर सुरक्षा सबैभन्दा ठुलो चुनौतीको रूपमा देखिएको उनको भनाइ थियो ।

उनले प्रविधिको तीव्र विकासलाई सम्हाल्न नीतिगत तयारी ढिलो भएको भन्दै विश्वका विभिन्न मुलुकमा डेटा सुरक्षासम्बन्धी कानुन निर्माणको क्रम सुरु भए पनि त्यसको कार्यान्वयनमा समस्या रहेको बताए । नेपालले पनि राष्ट्रिय एआई नीति अगाडि सारेको, तर कार्यान्वयनमा ढिलाइ भइरहेको उनले उल्लेख गरे।

कार्यक्रममा डा. जोशीसहित त्रिभुवन विश्वविद्यालय सीएसआईटी विभागका प्रमुख सर्बिन सायमी र फ्लिटपाण्डाकी सङ्गीता शर्मा प्यानल छलफलमा सहभागी भएका थिए ।

पछिल्लो अध्यावधिक: बैशाख २५, २०८२ १७:१४

काठमाडौं – गृहमन्त्री रमेश लेखकले नाउपाका संरक्षक रेशम चौधरी पक्राउ प्रकरणमा सरकारकाे कुनै पूर्वाग्रह नरहेको प्रष्टीकरण दिएका छन्।

प्रतिनिधि सभाको बैठकमा सांसदहरुले उठाएको प्रश्नको जवाफ दिँदै सर्वोच्च अदालतको शाखा अधिकृत महिमानसिंह बिष्टले अनधिकृत पत्र तयार पारेको कारणले चौधरीलाई पक्राउ गरिएको भएपनि अध्ययन लगत्तै छाडिएको बताए।

उनले भने, ‘भविष्यमा यस्ता घटना नदोहोरिनको लागि सबैलाई सचेत र सजग बनाएको छ। यस घटनाले रेशम चौधरीलाई भएको पीडाप्रति दुख व्यक्त गर्न चाहन्छु।’

उनले अनधिकृत पत्र तयार पार्ने व्यक्तिलाई पक्राउ गरिसकेको बताए। प्रहरीले सर्वोच्चको आदेश पालना गर्ने उद्देश्यले मात्रै चौधरीलाई पक्राउ गरेको भएपनि सत्य पत्ता लागेपछि छाडेको बताए।

यस्तो छ रेशम चौधरी पक्राउबारे गृहमन्त्रीको जवाफ–

रेशम चौधरी पक्राउ पर्नुभएको घटनामा दुःख व्यक्त गर्न चाहन्छु। प्रहरी महानिरीक्षकले मलाई जानकारी गराए अनुसार, सो दिन सर्वोच्च अदालतको चलानी संख्या १९२७७ मिति २०८२ ०१ १७ उल्लेख भएको पत्र लिएर सर्वोच्च अदालतका शाखा अधिकृत महिमानसिंह विष्ट प्रहरी प्रधान कार्यालय पुगे। निजले आफ्नो परिचयपत्र नेपाल प्रहरीका महानिरीक्षकलाई देखाए। परिचयपत्रसहित अदालतको आदेश कार्यान्वयन गर्न आएको भने। त्यसपश्चात प्रहरी महानिरीक्षकले सम्मानित अदालतको आदेश कार्यान्वयन गर्नपर्ने दायित्व समेत भएको हुनाले, यो विषय प्रहरी परिसर काठमाडौंमा पठाए। सो को आधारमा प्रहरी परिसर काठमाडौंको टोलीले उहाँलाई नियन्त्रणमा लिइ डिल्लिबजार कारागारमा बुझाए।

घटनाका सन्दर्भमा प्रहरी महानिरीक्षकबाट जानकारी प्राप्त गर्नासाथ सर्वोच्च अदालतका रजिस्ट्रारलाई फोन गरेर पत्राचारबारेमा जानकारी लिएको छु। सुरुमा रजिस्ट्रारले अनविज्ञता प्रकट गर्दै थप विषय बुझेर खबर गर्ने बताउनुभयो। पछि उहाँले उक्त पत्र अदालतको आधिकारिक नभएको र अदालतबाट थप छानबिन भइरहेको जानकारी गराउनुभएको थियो। केही समयपश्चात सम्मानित सर्वोच्च अदालतबाट विज्ञप्तिमार्फत उक्त पत्र आधिकारिक नभएको जानकारी गराइएको, र कारागार कार्यालय डिल्लीबजारलाई समेत लेखि पठाए अनुसार रेशम चौधरीजी तत्काल रिहा हुनुभएको हो। अनधिकृत रुपमा पत्र लेख्ने सर्वोच्च अदालतका शाखा अधिकृत महिमानसिंह विष्टलाई जिल्ला प्रहरी परिसर काठमाडौंले तत्काल पक्राउ गरी झुटा जानकारी दिन नहुने, आदेशको अवज्ञा गर्न नहुने र कीर्ते गर्न नहुने समेत मुद्दा शीर्षकहरूमा सम्मानित अदालतबाट म्याद लिइ अनुसन्धान भइरहेको छ।

यसअघि सम्मानित अदालतबाट हुने गरेको पत्राचारलाई प्रहरी प्रशासनले तत्काल कार्यान्वयन गरेझैं यस घटनामा पनि सही नियतले कानुनको कार्यान्वयन गर्ने मनसायबाहेक कुनै पूर्वाग्रह नरहेको सम्मानित सदनसमक्ष अनुरोध गर्न चाहन्छु। भविष्यमा यस्ता घटना नदोहोरिनेतर्फ सबैलाई सचेत बनाएको ब्यहोरासमेत जानकारी गराउँछु। यस घटनाले रेशम चौधरी, उहाँको परिवारजन र साथीहरूलाई जुन असहजता भयो, दुःख भयो, पीडा भयो त्यसका लागि म दुःख व्यक्त गर्न चाहन्छु।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । भारतको रक्षा मन्त्रालयले बुधबार राति पाकिस्तानले ड्रोन र मिसाइल प्रयोग गरेर धेरै भारतीय सैन्य अड्डाहरूलाई निशाना बनाउने प्रयास गरेको दाबी गरेको छ। अर्कोतर्फ, पाकिस्तानले पनि भारतमाथि यस्तै आरोप लगाएको छ र २५ वटा भारतीय ड्रोन खसालेको बताएको छ।

दुवै देशले गरेको कुनै पनि दाबीको स्वतन्त्र रूपमा पुष्टि गर्न सकिएको छैन।

भारतको रक्षा मन्त्रालयले एक विज्ञप्तिमा भनेको छ – पाकिस्तानले ड्रोन प्रयोग गरेर अवन्तीपुरा, श्रीनगर, जम्मू, पठानकोट, अमृतसर, कपुरथला, जालन्धर, लुधियाना, आदमपुर, बठिंडा, चण्डीगढ, नाल, फलोदी, उत्तरलाई र भुज लगायत उत्तरी र पश्चिमी भारतका धेरै सैन्य प्रतिष्ठानहरूमा आक्रमण गर्ने प्रयास गरेको छ।

भारतको रक्षा मन्त्रालयले पाकिस्तानका यी आक्रमणहरूलाई एकीकृत काउन्टर यूएएस ग्रिड र वायु रक्षा प्रणालीद्वारा निष्क्रिय पारिएको बताएको छ।

भारतको रक्षा मन्त्रालयको विज्ञप्तिमा भनिएको छ – पाकिस्तानी ड्रोनका भग्नावशेषहरू अब धेरै स्थानहरूबाट बरामद भइरहेका छन् जसले आक्रमण पाकिस्तानले गरेको प्रमाणित गर्दछ। रक्षा मन्त्रालयले भारतले पनि पाकिस्तानलाई उस्तै तीव्रताका साथ जवाफ दिएको दाबी गरेको छ।

भारतको विज्ञप्तिमा भनिएको छ – भारतको सशस्त्र सेनाले बिहीबार बिहान पाकिस्तानका धेरै स्थानहरूमा रहेको वायु रक्षा राडार र प्रणालीहरूलाई निशाना बनाएको छ। मन्त्रालयले दाबी गरेको छ – “विश्वसनीय जानकारी अनुसार लाहोरमा एक वायु रक्षा प्रणाली नष्ट गरिएको छ।”

भारतले मे ७ मा ‘अपरेशन सिन्दूर’ बारे पत्रकार सम्मेलनमा भनेको थियो – पाकिस्तानी सैन्य प्रतिष्ठानहरूलाई लक्षित गरिएको थिएन। भारतीय सैन्य प्रतिष्ठानहरूमा हुने कुनै पनि आक्रमणको उचित जवाफ दिइने कुरा पनि दोहोर्‍याइएको थियो।

भारतको रक्षा मन्त्रालयले भनेको छ – पाकिस्तानले जम्मू कश्मीरको कुपवाडा, बारामुल्ला, उरी, पुंछ, मेन्धर र राजौरी सेक्टरहरूमा नियन्त्रण रेखामा मोर्टार र भारी तोपखाना प्रयोग गरेर ‘बिना उक्साहट’ गोलीबारी गरेको छ।

मन्त्रालयले पाकिस्तानी गोलाबारीमा तीन महिला र पाँच बालबालिकासहित १६ निर्दोष व्यक्तिको मृत्यु भएको बताएको छ।

अर्कोतर्फ, पाकिस्तानले २५ वटा भारतीय ड्रोन खसालेको दाबी गरेको छ। पाकिस्तानले भनेको छ – यी ड्रोनहरू पाकिस्तानका विभिन्न शहरहरूमा खसालिएको छ।

पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले बिहीबार एक पत्रकार सम्मेलनमा भने – भारतले मे ७ को रातदेखि “ड्रोनको सहयोगमा घुसपैठ गर्ने प्रयास” गरिरहेको छ।

जनरल चौधरीले सेनाको कारबाही जारी रहेको बताए। उनले लाहोर, गुजरनवाला, चकवाल, अटक, रावलपिंडी, मियाँवाली र कराँचीमा ड्रोन ध्वस्त पारिएको बताए। पाकिस्तानी प्रवक्ताको भनाइमा भारतले कुनै टिप्पणी गरेको छैन। पाकिस्तानले गरेको दाबीलाई बीबीसीले स्वतन्त्र रूपमा पुष्टि गर्न सकेन।

काठमाडौँ । भारतका चर्चित पत्रकार रविश कुमारको नाममा नक्कली युट्युब च्यानल सञ्चालनमा आएको खुलासा भएको छ । स्वयं रविश कुमारले सामाजिक सञ्जाल फेसबुकमार्फत यसबारे जानकारी गराएका हुन् ।

उनले ‘Ravish Ki News’ नामक नक्कली च्यानलले आफ्नो फोटो र आवाज प्रयोग गरिरहेको बताएका छन् ।

अप्रिल १ देखि सञ्चालनमा आएको यो च्यानलमा छोटो समयमै ६७ लाख एक हजार सब्सक्राइबर पुगेका छन् । हालसम्म नौ वटा मात्र भिडिओ पोस्ट गरिए पनि ती भिडिओमा करिब साढे नौ लाख भ्युज पुगेको छ ।

उक्त च्यानलमा एआई प्रविधि प्रयोग गरी रविश कुमारकै जस्तो आवाज निकालेर भिडिओहरू राखिएको पाइएको छ । उनको बोल्ने शैली, भिडिओको थम्बनेल र जानकारी दिने तरिका दुरुस्तै भएका कारण धेरै दर्शक‍ झुक्किएका छन् ।

च्यानलका सबै भिडिओको सुरुमा रविश कुमारको परिचय देखाइन्छ, तर त्यसपछि अन्य फुटेज र तस्बिरहरू प्रयोग गरिएका छन् । पहिलो भिडिओ सात दिनअघि पोस्ट गरिएको थियो, जसमा रविशको आधिकारिक च्यानल बन्द हुने खतरा बढेकोले नयाँ च्यानल सब्सक्राइब गर्न दर्शकहरूलाई अनुरोध गरिएको छ ।

यसैगरी ‘Ravish K News’ को नाममा करिब ६ महिनादेखि यस्तै युट्युब च्यानल खोलेको पाइएको छ । जसमा १११ ओटा भिडिओ अपलोड भएको देखिन्छ ।

यसैगरी, ‘Ravish K Vichar’ नामक अर्को नक्कली युट्युब च्यानल पनि फेला परेको छ । रविश कुमारले यस च्यानलको बारेमा पनि सामाजिक सञ्जालमार्फत जानकारी दिएका छन् । मे ७ मा सुरु भएको यो च्यानलमा हाल दुई सब्सक्राइबर र तीन ओटा भिडिओ पोस्ट भएका छन् । रविशले यी भिडिओ पनि एआई- सिर्जित भएको दाबी गरेका छन् ।

रविश कुमारले आफ्नो नाममा नक्कली च्यानल सञ्चालन भइरहेको जानकारी दिएलगत्तै यो नयाँ च्यानल खोलिएको अनुमान गरिएको छ । ​रविशको आधिकारिक युट्युब च्यानल Ravish Kumar Official हो, जसमा एक करोड ३० लाख बढी सब्सक्राइबर रहेका छन्।

पछिल्लो अध्यावधिक: बैशाख २५, २०८२ १६:३७

काठमाडौँ–कानून, न्याय तथा मानवअधिकार समितिकी सभापति विमला सुवेदीले शान्ति सम्झौता भएको १८ वर्षसम्म पनि पीडितले न्याय पाउन नसक्नु दुःखद भएको बताएकी छन्।

बिहीवार ललितपुरमा आयोजित महिला शान्ति र सुरक्षाका सम्बन्धमा ‘कार्यान्वयनको हालसम्मको अवस्था र आगामी कार्यदिशा’ विषयक कार्यक्रमका उनले यस्तो बताएकी हुन्। 

उनले संक्रमणकालीन न्यायसँग सम्बन्धित विधेयक समितिमा आएपछि निकै मेहनतका साथ काम गरेर अन्तिम टुङ्गोमा पुर्‍याएको बताइन्। उनले द्वन्द्व पीडितको न्यायको विषय संवेदनशील भएको बताइन्। शान्ति सम्झौता भएको १८ वर्षसम्म पनि पीडितले न्याय पाउन नसक्नु दुःखद भएको बताइन्।

सुवेदीले भनिन्‚‘संक्रमणकालीन न्यायको विषय टुङ्गिन नसक्दा र पीडितले राज्यको तर्फबाट दिनसक्ने र दिनुपर्ने जुन राहत परिपूरक न्यायसहितको राहत दिनुपर्ने अधिकार पनि नपाउँदा ठूलो पीडाको स्थितिबाट गुज्रिनुभएको छ। अहिले १८ वर्षपछि संक्रमणकालीन न्यायको कानून निर्माणको कुरा सकिएको छ। यसमा हामीले धेरै मेहनत गरेका छौँ। द्वन्द्वसँग जोडिएको विषय आफैँमा धेरै जटिल धेरै संवेदनशील विषय र यो राष्ट्रिय हिसाबले धेरै महत्त्वपूर्ण विषय पनि हो।’

सभापति सुवेदीले बेपत्ता, घाइते तथा शहीद परिवारको पीडा न्यायसँग जोडिएकाले कानूनले उचित न्याय प्रदान गर्नुपर्नेमा जोड दिइन्।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

सुन्दरबजार (लमजुङ) । जिल्लाको सुन्दरबजार नगरपालिकाबाट अन्यत्र बसाइँ सर्नेको सङ्ख्या पछिल्लो समय बढेको छ। चालु आर्थिक वर्षको साउनदेखि चैत मसान्तसम्म ७२ परिवारका एक सय ९८ जना यहाँबाट अन्यत्र बसाइँ सरेका हुन्।

नगरपालिकाको सामाजिक सुरक्षा तथा पञ्जीकरण शाखाका एमआइएस अपरेटर सन्तोष पोख्रेलले गत आवमा २८ परिवारका ९३ जना बसाइँ सरेकामा चालु आवको चैतसम्म त्यो सङ्ख्या दोब्बरले बढेको जानकारी दिए। उनका अनुसार नगरभित्र पनि अन्यत्रबाट बसाइँसराइ गरी आउनेको सङ्ख्या बढेको छ।

गत आवमा १३ परिवारका २७ जना सुन्दरबजार आएका थिए भने चालु आवको चैत मसान्तसम्म ३९ परिवारका एक सय २० जना नगरमा बसाइँसराइ गरी आएका पोख्रेलले उल्लेख गरे।

एघार वडा रहेको सुन्दरबजार नगरपालिकाका केही वडामा बजार विस्तार तीव्र गतिमा भइरहेका छन् भने केही वडा अझै ग्रामीण र दुर्गम अवस्थामा छन्। ग्रामीण वडाबाट बजार क्षेत्रमा बसाइँ सर्ने प्रवृत्ति बढ्दो रहेको पोख्रेलले बताए। बजार क्षेत्रबाट ठूला सहरतर्फ बसाइँसराइको गति तुलनात्मक रूपमा केही कम रहेको उनको भनाइ छ।

चालु आर्थिक वर्षमा सबैभन्दा बढी सुन्दरबजार–३ बाट १४ परिवारका ४१ जना र सबैभन्दा कम वडा नं ५ र १० बाट दुई-दुई परिवारका छ-छ जना बसाइँ सरेका पोख्रेलले जानकारी दिए।

बसाइँसराइ बढ्नुका मुख्य कारण शिक्षा, स्वास्थ्य, रोजगारी र लगानीको खोजी रहेका नगरका निमित्त प्रमुख प्रशासकीय अधिकृत विवेककुमार पण्डितले बताए। ‘बसाइँसराइ रोक्ने स्थानीयस्तरमा रोजगारीको अवसर सिर्जना गर्नु, प्राविधिक शिक्षालय सञ्चालन तथा लगानीको वातावरण बनाउनेतर्फ पालिकाको प्राथमिकता हुनुपर्छ’, उनले भने।

नगरप्रमुख कृष्णप्रसाद कोइरालाले सुन्दरबजारबाट बाहिरिनेको सङ्ख्या भित्रिनेको भन्दा बढी हुनु नगरका लागि चिन्ताको विषय बनेको बताए। उनले भने, ‘पालिकाले रोजगारी तथा सेवा प्रवाह सहज हुने कार्यक्रम लागू गरिरहेको छ । बसाइँसराइको कारण पहिचान गरी समाधानको उपाय अवलम्बन गर्दै अगाडि बढ्नेछौँ।’

उनका अनुसार आर्थिक सम्पन्नता, शिक्षा, स्वास्थ्य उपचार, रोजगारी, व्यापार व्यवसाय, पारिवारिक सम्पर्कलगायत विविध कारणले नगरवासी ठूला सहरतिर बसाइँ सरिरहेका छन्। रासस

काठमाडौँ । मोबाइल सेवा प्रदायक एनसेलले आफ्नो ग्राहक सेवा विस्तार गर्ने क्रममा नयाँ अवधारणा ‘एनसेल शप-इन-शप’ सुरु गरेको छ । कम्पनीले पहिलोपटक भैरहवामा ‘शप-इन-शप’ सेवा औपचारिक रूपमा सञ्चालनमा ल्याएको हो ।

भैरहवाको मैलावरस्थित एनसेलको आधिकारिक खुद्रा विक्रेता ‘न्यु लुम्बिनी ए टू जेड मोबाइल’ सँगको साझेदारीमा बिहीबार यो सेवा सुरु गरिएको हो ।

शप-इन-शपमार्फत ग्राहकले एनसेल सेन्टरहरूमा पाइने सम्पूर्ण सेवा सुविधा प्राप्त गर्न सक्नेछन् । सिम किन्ने, रिचार्ज गर्ने, केवाईसी अपडेट, सिम स्वामित्व प्रमाणीकरण, ‘सधैं अन’ तथा अन्य प्याकहरूको नवीकरण, ई-सिममा अपग्रेड, इन्टरनेट सेटिङ मिलाउनेजस्ता सेवा सहज रूपमा उपलब्ध हुने कम्पनीले जनाएको छ ।

“अब हाम्रा ग्राहकले नजिकको शप-इन-शपबाटै सबै सेवा लिन सक्नेछन् । आजबाट सुरु भएको यो पहिलो शप-इन-शप हाम्रो विस्तार योजनाको थालनी मात्र हो । देशभर विभिन्न स्थानमा यस्ता शप-इन-शप सञ्चालन गर्ने योजनाअनुसार हामी अघि बढिरहेका छौं,” रोड्रिगेजले भने, “हाम्रो मूल मन्त्र ‘हामी तपाईंका लागि’ अनुरूप ग्राहकलाई अझ सहज, पहुँचयुक्त र सन्तोषजनक सेवा दिन प्रतिबद्ध छौं ।”

कार्यक्रममा सहभागी ग्राहकले शप-इन-शपमा ‘स्पिन एन्ड ह्विल’ गेममार्फत विभिन्न उपहार प्राप्त गरेका थिए ।

शप-इन-शप सेवा आइतबारदेखि शुक्रबारसम्म हप्तामा ६ दिन सञ्चालन हुनेछ । कम्पनीले हाल देशभर ३३ ओटा एनसेल सेन्टरमार्फत पनि ग्राहक सेवा दिइरहेको छ ।

पछिल्लो अध्यावधिक: बैशाख २५, २०८२ १५:२५

काठमाडौं–नेपाल स्टक एक्सचेञ्ज (नेप्से) परिसूचकमा गिरावट आएको छ। साताको अन्तिम कारोबार दिन आज नेप्से १२.६० अंकले गिरावट हुँदै २६६१ विन्दुमा कायम भएको हो।

बजारको परिसूचक घटे पनि कारोबार रकममा उछाल आएको छ। बुधबार ६२.२५ अंक बढ्दै १० अर्ब ५१ करोड कारोबार भएको थियो। तर, आज सेयर बजार गिरावट आए पनि कारोबार रकम साढे ११ अर्बभन्दा बढी रहेको छ।

आज ९६ वटा कम्पनीको सेयर मूल्य बढ्दा १५० कम्पनीको मूल्यमा गिरावट आएको छ। कारोबारमध्ये पाँच कम्पनीको मूल्य १० प्रतिशत बढेको छ। 

जसमा नेपाल माइक्रो इन्स्योरेन्स, क्रेस्ट माइक्रोलाइफ इन्स्योरेन्स, छ्याङ्दी हाइड्रो पावर लिमिटेड, ओम मेगाश्री फार्मास्युटिकल लिमिटेड र आईसीएफसी फाइनान्स लिमिटेड कम्पनीको सेयर मूल्यमा सकारात्मक सर्किट लागेको हो।

आज सबैभन्दा बढी गुमाउने कम्पनीमा नारायण डेभलपमेण्ट बैंकको सेयर मूल्य सबैभन्दा बढी गिरावट भएको छ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।