काठमाडौं–प्रदेश सरकारहरूले चालु आर्थिक वर्ष ९ महिनामा ८५ अर्ब ४७ करोड रुपैयाँ खर्च गरेका छन्।

नेपाल राष्ट्र बैंकले आइतबार सार्वजनिक गरेको चालु आव २०८१/८२ को समग्र आर्थिक तथा वित्तीय अवस्था अनुसार चैतसम्म ७ प्रदेश सरकारले ८५ अर्ब ४७ करोड रुपैयाँ बराबर खर्च गरेका हुन्।

उक्त खर्च गर्दा प्रदेश सरकारहरूको स्रोत परिचालन १ खर्ब ३९ अर्ब ७३ करोड रुपैयाँ देखिएको छ।

राष्ट्र बैंकका अनुसार प्रदेश सरकारहरूको कुल स्रोत परिचालनमा नेपाल सरकारले हस्तान्तरण गरेको अनुदान र विभाज्य कोषबाट बाँडफाँट हुने राजस्व समेत गरी १ खर्ब ४ अर्ब ६७ करोड र प्रदेश सरकारहरूले परिचालन गरेको तथा अन्य स्रोतबाट प्राप्त राजस्व ३५ अर्ब ७ करोड रुपैयाँ छ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

धनगढी । कैलालीमा एक युवतीमाथि बलात्कार गरेको आरोपमा प्रहरीले सहोदर दाजुभाइलाई पक्राउ गरेको छ।

२५ वर्षीया युवतीलाई बलात्कार गरेको आरोपमा ५८ र ५३ वर्षीय दाजुभाइ पक्राउ परेका हुन्।

आरोपित दाजुभाइले स्पष्ट बोल्न नसक्ने ती युवतीमाथि जबरजस्तीकरणी गरेको उजुरीका आधारमा पक्राउ गरिएको इलाका प्रहरी कार्यालय मालाखेतीले जनाएको छ।

पीडित युवतीले गर्भ जाँच गरेको र सो क्रममा आफू गभर्वती रहेको बताएकी छन्।

काठमाडौँ । उद्योगी तथा व्यवसायीहरूले नागरिक एपमार्फत व्यवसाय दर्तादेखि सम्पूर्ण प्रक्रिया पूरा गर्न सकिने प्रविधिमैत्री प्रणालीको माग गरेका छन् । आइतबार नेपाल उद्योग वाणिज्य महासंघले आयोजना गरेको आर्थिक वर्ष २०८२/८३ को प्रि-बजेट छलफल कार्यक्रममा यस्तो माग गरिएको हो ।

सुशासनका लागि प्रविधिको उच्चतम प्रयोग आवश्यक रहेको भन्दै महासंघले यसका लागि नागरिक एपबाटै सम्पूर्ण व्यवसायजन्य सेवा उपलब्ध गराउनु आवश्यक रहेको कुरामा जोड दिएका हुन् ।

महासंघले व्यावसायिक वातावरण सुधारसम्बन्धी सुझाव दिँदै यस्तो व्यवस्था हुँदा लघु, घरेलु तथा साना उद्यमले सेवा लिन सजिलो हुने उल्लेख गरेको छ । व्यवसाय दर्ता, राजस्व तिर्ने र कर चुक्ता प्रमाणपत्र तुरुन्तै प्राप्त गर्ने प्रक्रिया सरल र एकद्वार प्रणालीमा जानुपर्ने माग गरिएको छ।

यस्तै महासंघले थप पाँच वर्षसम्म स्टार्टअप उद्योगलाई दिइएको छुट सुविधा निरन्तरता दिनुपर्ने र “सय स्टार्टअप, सय लगानीकर्ता” कार्यक्रममार्फत एक आर्थिक वर्षभित्र कम्तिमा एक सय स्टार्टअपमा निजी क्षेत्रको लगानी भित्र्याउने योजना ल्याउन आग्रह गरेको छ ।

सार्वजनिक तथा निजी संस्थाहरूले स्वदेशमै उत्पादित सफ्टवेयरको प्रयोगमा प्राथमिकता दिनुपर्ने र सूचना प्रविधिमा निजी क्षेत्रलाई आईसिटी मल (ICT Mall) स्थापना गर्न प्रोत्साहित गरिनुपर्ने पनि व्यवसायीहरूको सुझाव छ । यस्तो मलबाट सहरी क्षेत्रमा प्रविधि उद्यमलाई आवश्यक पूर्वाधार र सुविधा उपलब्ध हुने महासंघको विश्वास छ ।

त्यस्तै, पहाडी क्षेत्रमा स्थापना हुने सूचना प्रविधि उद्योग तथा डेटा सेन्टरहरूलाई जग्गा, बिजुली र सडकको पहुँच सुनिश्चित गर्नुपर्नेमा पनि जोड दिइएको छ । महासंघले प्रदेशहरूमा आफ्नै संरचना भएकाले स्थानीय निकाय र निजी क्षेत्रबिच सहकार्य गर्न सहज हुने उल्लेख गर्दै सबै प्रदेशमा स्टार्टअप तथा प्रविधि प्रवर्द्धन केन्द्र स्थापना गर्न सरकारसँग आग्रह गरेको छ । 

पछिल्लो अध्यावधिक: बैशाख २८, २०८२ १७:५८

काठमाडौँ–काठमाडौँको न्युरोडबाट प्रहरीले हुन्डीको रकम सहित दुई जनालाई पक्राउ गरेको छ। 

पक्राउ पर्नेमा खोटाङको वराहपोखरी गाउँपालिका–२ घर भएर कोटेश्वर बस्ने विजय कुमार राई र रामेछापको मन्थली नगरपालिका–६ घर भएर कोटेश्वर बस्ने खेटराज श्रेष्ठ छन्।

उनीहरूको साथबाट स्रोत नखुलेको ४२ लाख १० हजार बरामद गरिएको उपत्यका अपराध अनुसन्धान कार्यालयका एसपी काजी कुमार आचार्यले बताएका हुन्। विशाल बजारबाट हुन्डीको रकम रिसिभ गरेर हिँडेको अवस्थामा उनीहरू शुक्रवार पक्राउ परेका हुन्।

आरोपीहरूलाई हुन्डी सम्बन्धी कसुरमा अनुसन्धान गर्न जिल्ला प्रहरी परिसर काठमाडौँमा पठाइएको एसपी आचार्यले जानकारी दिए।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । उपप्रधान एवं अर्थमन्त्री विष्णुप्रसाद पौडेलले आगामी आर्थिक वर्षका लागि विनियोजन विधेयकका सिद्धान्त र प्राथमिकता प्रतिनिधिसभामा प्रस्तुत गरेका छन्।

आइतबार बसेको प्रतिनिधिसभा बैठकमा पौडेलले आर्थिक बर्ष २०८२/८३ का लागि विनियोजन विधेयकका सिद्धान्त र प्राथमिकता (कर प्रस्ताव बाहेक) छलफलका लागि प्रस्तुत गरेका छन्। सो क्रममा पौडेलले नेपालको संविधानले व्यवस्था गरेको मौलिक हक र निर्देशक सिद्धान्तको कार्यान्वयनमा उच्च महत्व दिइने बताए।

लोककल्याणकारी राज्यको अवधारणा अनुरूप समावेशी विकास र सामाजिक न्याय कायम गरिनेछ। विकासको लाभमा आम नागरिकको पहुँच सुनिश्चित गरिने उनले बताए ।

उनले दिगो र तीब्र गतिको विकासका लागि आवश्यक कार्यक्रम तर्जुमा गरिने र सवल अर्थतन्त्र निर्माण गर्न उत्पादनमुखी विकासको ढाँचा अवलम्वन गरिने जानकारी दिए। पौडेलले सन्तुलित र समावेशी विकासका लागि सङ्‍घ, प्रदेश र स्थानीय तह तथा सार्वजनिक, निजी, सहकारी र सामुदायिक क्षेत्रबीचको समन्वय र सहकार्यलाई सुदृढ बनाइने बताए।

उनले राष्ट्रिय प्राथमिकताका उच्च प्रतिफल हासिल हुने आयोजनामा सार्वजनिक ऋणको उपयोग र दिगोपना सुनिश्चित गरिने जानकारी दिए। मुलुकको अर्थतन्त्रलाई गतिशील तुल्याउन कानूनी, संस्थागत र प्रक्रियागत सुधार गरिने, आर्थिक क्षेत्रका नियामकीय निकायको भूमिकालाई सुदृढ बनाइने र सन् २०३० सम्ममा दिगो विकास लक्ष्य हासिल गर्न आवश्यक तयारी गरिनेछ। उच्चस्तरीय आर्थिक सुधार सुझाव आयोगका सुझावहरू क्रमशः कार्यान्वयन गरिने उनले बताए।

उनले स्रोत व्यवस्थापन तथा बजेट कार्यान्वयनमा दक्षता ल्याई सीमित साधनबाट अधिकतम प्रतिफल हासिल गर्न जोड दिइनेसमेत बताए। साना, छरिएका, दोहोरो परेका, स्रोत सुनिश्चित नभएका र सम्पन्न हुन लामो समय लाग्ने विद्यमान आयोजना संख्यामा कटौति गरिने र क्रमागत आयोजनाहरूलाई पुनःप्राथमिकीकरण, पुनर्संरचना वा स्थगन गरिने उनको भनाइ छ।

विनियोजन विधेयकका सिद्धान्त र प्राथमिकता(कर प्रस्ताव बाहेक)को छलफलका लागि बैंशाख ३०, ३१ र जेष्ठ १ र २ गते निर्धारण गरिएको सभामुख देवराज घिमिरेले जानकारी दिए।

काठमाडौं । प्रधानमन्त्री केपी शर्मा ओलीले आर्थिक वर्ष २०८२/८३ को नीति तथा कार्यक्रम युवा लक्षित भएको बताएका छन् । उनले नयाँ नीति तथा कार्यक्रमले सामाजिक सञ्जालका फेक अकाउन्टमा अल्मलिएका युवाहरूलाई आफ्नो भविष्य निर्माणतर्फ मोड्ने विश्वास व्यक्त गरेका छन् ।

आइतबार प्रतिनिधि सभा बैठकमा बोल्दै प्रधानमन्त्री ओलीले विशेषगरी जेन जेड पुस्तालाई लक्षित गरेर यो नीति ल्याइएको बताए ।  ​“यसपटकको नीति तथा कार्यक्रममा सबै क्षेत्रलाई समेटिएको त छँदैछ,” प्रधानमन्त्री ओलीले भने, “त्यसमा पनि युवाहरूलाई स्टार्टअपमार्फत उद्यमशील बनाउने, रोजगारीका अवसर सिर्जना गर्ने, विद्यार्थीलाई पढाइसँगसँगै सरकारी सेवाको इन्टर्नशिपमा प्रवेशको ढोका खोल्ने नीति पनि लिएको पक्ष पुनः दोहोर्‍याउन चाहन्छु ।”

त्यस्तै उनले ‘जेन जी’ पुस्ताका लागि विशेष स्थान र भूमिका दिएर ल्याइएको नीति तथा कार्यक्रम भएकाले यसको आकार र भाषामा परम्परा तोडिएको पाइने उनले बताए । “यसले सामाजिक सञ्जालका फेक अकाउन्टहरूमा अल्मलिएका युवाहरूलाई पनि आफ्नो भविष्य निर्माणमा नयाँ जागर र उर्जा पैदा गर्न बाटो खोल्नेछ भन्ने मैले विश्वास लिएको छु,” ओलीले भने । 

पछिल्लो अध्यावधिक: बैशाख २८, २०८२ १६:४३

काठमाडौं–विश्व प्रतिष्ठित कान्स फिल्म फेस्टिभलको ७८ औं संस्करण यही मंगलबारदेखि फ्रान्सको दक्षिणी सहर कान्समा आयोजना हुँदैछ। 

मे १३ देखि २४ तारिखसम्म हुन लागेको फेस्टिभलमा सहभागी हुन विश्वभरबाट कलाकार, निर्देशक, निर्माता तथा वितरकहरु कान्समा भेला भइरहेका छन्। 

यस वर्ष कान्स फेस्टिभलको प्रतिस्पर्धामा कुनै नेपाली फिल्म छनोट नभए पनि नेपालको प्रतिनिधित्व गर्दै प्रदीप शाही निर्देशित फिल्म ‘एक्लो’को फेस्टिभलमा स्टल राखिने भएको छ। जहाँ फिल्मको टिमले अन्तर्राष्ट्रिय वितरकहरुलाई टिजर र छायांकनका दृश्य देखाउँदै विश्वव्यापी वितरणबारे छलफल गर्नेछ। यो फेस्टिभलमा पहिलो पटक नेपाली फिल्मको स्टल राखिन लागिएको हो।

‘मार्चे दु फिल्म’ भनिने कान्स मार्केटमा ‘एक्लो’ ले स्टल नै खडा गरेर चलचित्रलाई अन्तर्राष्ट्रिय वितरक, सेल्स एजेन्ट र निर्माताबीच ‘पिचिङ’ गर्न लागेको हो।स्टलमा नेपालको झण्डा राख्ने तयारी छ भने निर्देशक प्रदीप शाही स्वयं प्रोड्युर्स नेटवर्कमा सहभागी हुँदैछन्। 

फेस्टिभलको प्रोड्युसर्स नेटवर्कमा छानिएका निर्देशक शाही आइतबार फ्रान्सको राजधानी पेरिस पुगिसकेका छन् भने निर्माताहरू रितेश राना, संगीता श्रेष्ठ, भाइराजा थापा, राजु गुरुङ, उत्सव विष्ट र बजारीकरण प्रमुखको रुपमा फिल्मकी को-अपरेटिभ डिरेक्टर रिश्ता कार्की कान्स मार्केटमा सहभागी हुनेछन्। फेस्टिभलमा फिल्मको स्टल राख्न निर्माताले ५० लाखभन्दा बढी खर्च गरेका छन्।

यस वर्षको फेस्टिभलमार्फत नेपाल र ‘एक्लो’लाई कनेक्ट गर्न खोजेको निर्देशक शाहीले बताए।कान्समा ‘एक्लो’ले अन्तर्राष्ट्रिय वितरक, सेल्स एजेन्ट, मेकर र ओटीटीमाझ फिल्म प्रवर्धन गर्नेछ। नेपालको छायांकन गन्तव्यबारे प्रचारप्रसार गर्ने र सम्भावित को–प्रोडक्सनबारे मार्केटमा ‘एक्लो’का निर्माताले पहल गर्नेछन् ।

यस वर्ष प्रदर्शनको लक्ष्य राखिएको फिल्ममा प्रदीप खड्का, विजय लामा, सुनिल थापा, दीया पुन, बेनिशा हमाल, दिनेश डीसी, कविता नेपालीसहित बेलायती कलाकार जेमी बेकन लगायतको अभिनय छ। फिल्मले खतरनाक भाइरसले सन् २०३० सम्म मानिसले पृथ्वी छाड्ने भविष्यको एक काल्पनिक कथा भन्छ। भीएफएक्ससहित ‘एक्लो’को बजेट ६ करोड पुगेको जनाइएको छ।

कान्स मार्केटमा १४० देशका १४,००० भन्दा बढी सहभागी हुने जनाइएको छ जहाँ, १,५०० फिल्मको प्रदर्शन र ४,००० प्रोजेक्ट पिच हुनेछन्।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।