काठमाडौँ । दुर्गेश थापाको नयाँ गीत ‘जाने भए जाम माया’ युट्युबको ‘ग्लोबल डेली टप म्युजिक भिडिओ’को दशौँ स्थानमा पर्न सफल भएको छ । बुधबार सार्वजनिक भएको यो गीत छोटो समयमै विश्वका शीर्ष म्युजिक भिडिओको सूचीमा अटाएको हो ।

यो गीत नेपालको युट्युब ट्रेन्डिङमा पहिलो नम्बरमा छ । यसका साथै नेपाली भाषीहरूको उपस्थिति रहेका अन्य देशमा पनि गीत ट्रेन्डिङमा छ । दुर्गेशले कन्टेन्ट क्रिएटर तथा भ्लगर सिसन बानियाँ र टिकटकमा चर्चित गुराँस नानीसँगको सहकार्यमा ल्याएको यो गीतले सार्वजनिक हुनुअघि नै व्यापक चर्चा पाएको थियो ।

विशेषगरी गीत सार्वजनिक हुनुपूर्व दुर्गेश र सिसनले गुराँस नानीलाई प्रस्तुत गर्दै विभिन्न मनोरञ्जनात्मक भिडिओ बनाइरहेका थिए । शुटिङका क्रममा खिचिएका तस्बिरहरू बाहिरिएपछि गीतको चर्चा झनै चुलिएको थियो ।

गीतले सार्वजनिक भएको २४ घण्टाभित्रै करिब २० लाख भ्युज पाएको थियो । यो समाचार तयार पार्दासम्म भिडिओले ४१ लाख ६० हजारभन्दा बढी भ्युज र तीन लाख सात हजारभन्दा बढी लाइक प्राप्त गरिसकेको छ । र, यो क्रम तीव्र गतिमा बढिरहेको छ । सामाजिक सञ्जाल फेसबुक, इन्स्टाग्राम र टिकटकमा पनि गीतले राम्रो चर्चा पाइरहेको छ ।

गीतमा लिप सिङ्क र डान्स गर्दै सामाजिक सञ्जाल प्रयोगकर्ताले भिडिओ बनाएपछि यसको चर्चा थप फैलिएको हो । यो म्युजिक भिडिओ ‘ग्लोबल विक्ली (साप्ताहिक) ट्रेन्डिङ’मा समेत पर्न सक्ने सम्भावना उच्च देखिएको छ । साप्ताहिक रूपमा सबैभन्दा बढी हेरिएका भिडिओ यो सूचीमा पर्ने गर्छन् । यो हरेक आइतबार अद्यावधिक हुन्छ ।

पछिल्लो अध्यावधिक: असार २८, २०८२ २१:७

काठमाडौँ । नेपाल राष्ट्र बैंकले आर्थिक वर्ष २०८२/८३ का लागि सार्वजनिक गरेको मौद्रिक नीतिप्रति नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा) असन्तुष्ट देखिएको छ । शुक्रबार एक विज्ञप्ति जारी गर्दै नाइमाले अटोमोबाइल क्षेत्रको सुधारका लागि दिइएका सुझावहरुलाई मौद्रिक नीतिले समावेश नगरेको भन्दै निराशा व्यक्त गरेको हो । 

नाइमाले विशेषगरी सवारी कर्जामा ८० प्रतिशतदेखि २० प्रतिशतसम्मको कर्जा अनुपात कायम गर्न, चीनमा उत्पादित सवारी आयातमा युआनमा प्रतितपत्र (एलसी) खोल्न र सवारी कर्जाको जोखिम भारित सम्पत्ति (Risk-Weighted Asset) को दर १०० प्रतिशतबाट घटाएर ७५ प्रतिशतमा झार्न सुझाव दिएको थियो । 

यी व्यवस्थाहरूले कर्जा प्रवाह सहज भई बजार विस्तारमा टेवा पुग्ने नाइमाको विश्वास थियो । तर, मौद्रिक नीतिमा यी सुझावहरूलाई बेवास्ता गरिएको एसोसिएसनको भनाइ छ । 

“अटोमोबाइल क्षेत्रको दीर्घकालीन सुधार र सन्तुलित विकासका लागि हामीले दिएका सुझावहरू समावेश नगरिनु अत्यन्त निराशाजनक विषय हो,” नाइमाकी अध्यक्ष ऋतु सिंह वैद्यले हस्ताक्षर गरेकको विज्ञप्तिमा उल्लेख छ । 

मौद्रिक नीतिले समग्रमा कर्जा आपूर्ति बढाउने लक्ष्य राखे पनि अटो कर्जाको पहुँच विस्तारका लागि कुनै स्पष्ट र लक्षित उपाय नल्याएको नाइमाको आरोप छ । रियल स्टेट र शेयर बजार जस्ता अन्य क्षेत्रका लागि स्पष्ट नीति ल्याइए पनि अटोमोबाइल क्षेत्रलाई उपेक्षा गरिएको विज्ञप्तिमा उल्लेख छ । 

यद्यपि, समग्र मौद्रिक नीतिले कर्जा आपूर्ति वृद्धि गर्ने उद्देश्य लिएकाले अटो कर्जाको उपलब्धता र पहुँचमा सकारात्मक प्रभाव पर्न सक्ने सम्भावनालाई भने नाइमाले सकारात्मक रूपमा लिएको छ । देशको आर्थिक विकासमा अटोमोबाइल क्षेत्रको भूमिकालाई मनन गर्दै उल्लिखित विषयहरूमा पुनर्विचार गर्न र आवश्यक नीति समायोजन गर्न नाइमाले नियामक निकाय राष्ट्र बैंकलाई अनुरोध गरेको छ ।

पछिल्लो अध्यावधिक: असार २८, २०८२ १३:४१

काठमाडौँ । त्रिभुवन विश्वविद्यालयले आफ्ना विद्यार्थीहरूमा रहेको नवीन सोच र उद्यमशीलतालाई प्रवर्द्धन गर्न एक विशेष कार्यक्रम सुरु गरेको छ । त्रिविअन्तर्गतको बिजनेस इन्क्युबेसन सेन्टर (TUBIC)ले विद्यार्थीका स्टार्टअप आइडियालाई सफल व्यवसायमा रूपान्तरण गर्न सहयोग गर्ने उद्देश्यले आवेदन खुलाएको हो ।

हालै एक सूचना जारी गर्दै त्रिविले विभिन्न संकाय, विभाग तथा अध्ययन संस्थानमा अध्ययनरत विद्यार्थीलाई आफ्ना स्टार्टअप आइडिया र व्यावसायिक योजनासहित आवेदन दिन आह्वान गरेको छ ।

‘ट्युबिक उद्यमशीलता विकास कार्यक्रम’ नाम दिइएको यस पहलको मुख्य उद्देश्य विद्यार्थीहरूमा अन्तर्निहित नवप्रवर्तनशील सोचलाई प्रस्फुट गरी उनीहरूलाई व्यावसायिक क्षेत्रमा प्रवेश गर्न आवश्यक आत्मविश्वास, अवसर र स्रोत प्रदान गर्नु रहेको विश्वविद्यालयले जनाएको छ ।

प्राप्त आवेदनहरूमध्येबाट सम्भावना बोकेका स्टार्टअप आइडिया छनोट गरिने सूचनामा उल्लेख छ ।

छनोटमा परेका आइडियालाई बजारसम्म पुर्‍याउन आवश्यक पर्ने तालिम, प्राविधिक सहयोग र आर्थिक लगानीसमेत उपलब्ध गराइने केन्द्रले जनाएको छ । स्टार्टअपको प्रकृति र आवश्यकताअनुसार कस्तो प्रकारको सहयोग उपलब्ध गराउने भन्ने निर्णय गरिने बताइएको छ ।

आफ्नो स्टार्टअप आइडियालाई व्यवसायमा रूपान्तरण गर्न इच्छुक विद्यार्थीहरूले आगामी २५ साउनभित्र आवेदन दिइसक्नुपर्नेछ । आवेदनका साथमा विस्तृत व्यावसायिक योजना, अध्ययनरत क्याम्पसको सिफारिस पत्र, नागरिकताको प्रतिलिपि र विद्यार्थी परिचयपत्रको प्रतिलिपि अनिवार्य रूपमा समावेश गर्नुपर्नेछ ।

आवेदन पत्र र विस्तृत जानकारी ट्युबिकको आधिकारिक वेबसाइटमा उपलब्ध छ भने आवश्यक कागजातसहित [email protected] मा ईमेलमार्फत आवेदन पठाउनु पर्नेछ ।

हेर्नुहोस् सूचना

पछिल्लो अध्यावधिक: असार २८, २०८२ १८:५२

काठमाडौँ । प्रविधिको विकाससँगै ज्योतिष परामर्शजस्ता परम्परागत सेवाहरू पनि डिजिटल माध्यममा लोकप्रिय बन्दै गएका छन् । यसैको एक सफल उदाहरण बनेका छन्, ज्योतिषी मुकुन्द शर्मा । शर्माले चर्चित एप ‘हाम्रो पात्रो’ मार्फत दुई लाख मिनेटभन्दा बढी अनलाइन ज्योतिषीय परामर्श सेवा प्रदान गरिसकेका छन् ।

हाम्रो पात्रोको ज्योतिष सेवामा आबद्ध रहेर शर्माले हालसम्म दुई लाख सात हजार मिनेटभन्दा बढी समय भिडिओ तथा अडियो कलमार्फत प्रयोगकर्तासँग प्रत्यक्ष कुराकानी गरिसकेको कम्पनीले जनाएको छ । एक वर्षअघि मात्रै एक लाख मिनेटको कोशेढुंगा पार गरेका उनले छोटो समयमै यो सफलता हासिल गरेका हुन् । 

हाम्रो पात्रोले शर्मालाई सामाजिक सञ्जालमार्फत बधाई दिँदै उनको मार्गदर्शन धेरैले मन पराएको जनाएको छ । 

विगत केही वर्षदेखि हाम्रो पात्रोमा आबद्ध रही ज्यो. शर्माले पारिवारिक, आर्थिक, वैदेशिक यात्रा, शिक्षा, रोजगारी, वैवाहिक जीवन लगायतका विषयमा सेवाग्राहीलाई अनलाइन परामर्श दिँदै आएका छन् ।

उनले हाम्रो पात्रोको वेबसाइटमा लेखेका छन्, “मैले पारिवारिक, आर्थिक, वैदेशिक, शिक्षा, रोजगारी, वैवाहिक सम्बन्ध आदि विषयमा दिएका साना, सरल र उचित परामर्शका कारण प्रयोगकर्ताहरुलाई राम्रो भएको खबर सुन्न पाउँदा अझै हौसला मिलेको छ । यति कम समयमा नै धेरै जनाको साथ, सहयोग र माया पाएकोमा हर्षित छु र आफ्नो जिज्ञासाहरू लिएर हामीसँग जोडिने सबैलाई हार्दिक धन्यवाद र सफलताको शुभकामना व्यक्त गर्दछु । आगामी दिनहरूमा पनि निरन्तर साथ र सहयोग प्रदान गरिदिनुहुन्छ भन्ने कुरामा विश्वस्त छु ।” 

हाम्रो पात्रोको ज्योतिष सेवाले कसरी गर्छ काम ?

हाम्रो पात्रोले आफ्नो एपमार्फत प्रयोगकर्तालाई करिब २० ज्योतिषीहरूसँग प्रत्यक्ष अडियो वा भिडिओ कलमा जोड्ने सुविधा दिएको छ । यो सेवा प्रयोग गर्न:

१. हाम्रो पात्रो एपको होमपेजमा रहेको ‘ज्योतिष’ बटनमा ट्याप गर्नुपर्छ ।

२. परामर्शका लागि टिकट किन्नुपर्छ, जसको भुक्तानी हाम्रो पे, इसेवा, खल्ती वा कार्डमार्फत गर्न सकिन्छ ।

३. टिकट खरिद गरेपछि आफ्नो वा परिवारको जन्मकुण्डली छनोट गरी उपलब्ध ज्योतिषीमध्ये एकलाई कल गर्न सकिन्छ ।

४. परामर्शको समयसीमा तोकिएको हुँदैन । यसले गर्दा प्रयोगकर्ताले आफ्नो जिज्ञासा खुलेर राख्न सक्छन् ।

यो सेवामार्फत प्रयोगकर्ताले कुण्डली विश्लेषण, विवाह मिलान, वास्तु परामर्श र अन्य व्यक्तिगत समस्याबारे घरमै बसेर विज्ञहरूसँग सल्लाह लिन सक्ने कम्पनीले जनाएको छ ।

पछिल्लो अध्यावधिक: असार २८, २०८२ १७:५२

काठमाडौँ । जिल्ला प्रहरी परिसर, काठमाडौंले राजधानीका विभिन्न स्थानमा फेला परेका सयौं महत्त्वपूर्ण कागजात सम्बन्धित धनीलाई बुझ्नका लागि अनुरोध गरेको छ । सडक, सार्वजनिक यातायात तथा अन्य स्थानहरूमा सर्वसाधारणले छाडेका वा हराएका कागजातहरू सङ्कलन गरी परिसरको खोजतलास शाखामा सुरक्षित राखिएको प्रहरीले जनाएको हो ।

यी कागजातको विवरण गुगल शिटमा राखिएको छ । प्रहरीले उपलब्ध गराएको लिङ्कमार्फत यी कागजात फेला पार्न सकिन्छ । प्रहरीले सार्वजनिक गरेको विवरण अनुसार हालसम्म ८२६ थान नागरिकताको प्रमाणपत्र, १३९ थान राहदानी, ४५ थान एटीएम कार्ड र २६ थान सवारी चालक अनुमति पत्र फेला परेका छन् । यसैगरी २९ थान मतदाता परिचय पत्र, १३ थान बचत पास बुक, १० थान स्थायी लेखा परिचयपत्र, ९ थान जेष्ठ नागरिक प्रमाणपत्र, ९ थान शैक्षिक प्रमाणपत्र र ४७ थान अन्य विभिन्न कागजात पनि भेटिएका छन् ।

आफ्नो वा आफन्त, साथीभाइको कुनै कागजात हराएको भए जिल्ला प्रहरी परिसर, काठमाडौंको आधिकारिक माध्यममार्फत विवरण हेरेर यकिन गर्न सकिनेछ । भेटिएका कागजातमा तपाईंको छ कि छन छैन भन्ने थाहा पाउन सबैभन्दा पहिले यहाँ क्लिक गर्नुहोस् । कम्प्युटरमा लिङ्क खोल्दै हुनुहुन्छ भने ‘Ctrl+f’ थिचेर सर्चमा गई आफ्नो नाम खोज्नुहोस् ।

यदि यसरी सर्च बार फेला पार्नु भएन भने जिल्ला लेखिएको बक्सबाट आफ्नो जिल्ला, ‘कागजातको किसिम’को बक्सबाट कागजातको विवरण, त्यसपछि नाम र थर खोज्नुहोस् । यी सबै पुष्टि भइसकेपछि स्थानीय तह र आफ्नो वडा पुष्टि गर्नुहोस् । यसबाट भेटिएको कागजात तपाईंको हो भन्ने भएपछि जिल्ला प्रहरी परिसर, भद्रकालीमा रहेको खोजतलास शाखामा सम्पर्क गरी लिन सकिनेछ । थप जानकारीका लागि खोजतलास शाखाको फोन नम्बर ०१-४२५०८३७ मा वा प्रहरी कन्ट्रोलको हटलाइन १०० मा सम्पर्क गर्न सकिने परिसरले जनाएको छ ।

 

पछिल्लो अध्यावधिक: असार २८, २०८२ ९:९

काठमाडौँ । टिकटकसँग प्रतिस्पर्धा गर्न युट्युबले ल्याएको छोटो भिडिओ फिचर ‘शर्ट्स’ अहिले विश्वभर निकै लोकप्रिय बनेको छ । कम्पनीका प्रमुख कार्यकारी अधिकृत (सीईओ) नील मोहनका अनुसार, हाल शर्ट्समा दैनिक २०० अर्बभन्दा बढी भ्युज आउने गरेको छ । नेपालको युट्युब ट्रेन्डिङमा समेत करिब ९० प्रतिशत भिडिओ शर्ट्स नै देखिनुले यसको बढ्दो प्रभावलाई प्रस्ट पार्छ ।

तर, लामो भिडिओ हेर्न रुचाउने कतिपय प्रयोगकर्ताका लागि छोटा भिडिओ ध्यान भङ्ग गर्ने र अनावश्यक लाग्न सक्छन् । त्यसैले जसरी यसलाई मन पराउनेहरू छन्, त्यसरी नै यसबाट दिक्क हुनेको सङ्ख्या पनि ठुलो छ । 

खासगरी त्यसमा देखिने असान्दर्भिक र बेतुकका शर्ट्स धेरैका लागि टाउको दुखाइका विषय हुन सक्छन् । त्यस्तै छोटा भिडिओका लागि फेसबुक र इन्स्टाग्रामका रिल्स अनि टिकटक हेर्ने प्रयोगकर्तालाई युट्युबको यो फिचर मन नपरेको हुन सक्छ ।

यही समस्यालाई लिएर डेभिड स्कार्पियो नामका एक ‘एक्स’ प्रयोगकर्ताले युट्युबलाई शर्ट्स बन्द गर्ने सुविधा थप्न आग्रह गरेका थिए । जवाफमा कम्पनीले हाल यस्तो योजना नभए पनि उक्त सुझावलाई सम्बन्धित टिमसमक्ष पुर्‍याइएको जानकारी दिएको थियो ।

यदि तपाईं पनि युट्युब शर्ट्सबाट छुटकारा चाहनुहुन्छ भने यसको समाधान एउटा क्रोम एक्सटेन्सनको रूपमा उपलब्ध छ । धेरै प्रयोगकर्ताहरूले यस्ता एक्सटेन्सनबारे जानकारी दिएका छन् । जसलाई इन्स्टल गरेपछि तपाईंको युट्युब फिड र सर्च रिजल्टमा शर्ट्स देखिने छैनन् । यद्यपि ट्रेन्डिङ सेक्सनमा भने शर्ट्सहरू यथावत् देखिन सक्छन् । यहाँ र यहाँ क्लिक गरेर ब्राउजरमा शर्ट्स डिसेबल गर्न सक्नुहुन्छ । यो टिप्स मोबाइल एपका लागि भने काम लाग्दैन ।

पछिल्लो अध्यावधिक: असार २८, २०८२ १६:११

काठमाडौँ । राइड हेलिङ कम्पनी पठाओ नेपालले काठमाडौँ इन्स्टिच्युट अफ चाइल्ड हेल्थ (किओच) लाई १५ लाख रुपैयाँ आर्थिक सहयोग प्रदान गरेको छ । बालबालिकाले सहज र प्रभावकारी स्वास्थ्य सेवा पाउन सकून् भन्ने उद्देश्यका साथ कम्पनीले आर्थिक सहयोग गरेको हो । 

पठाओ नेपालकी निर्देशक सुरक्षा हमालका अनुसार यो सहयोग संस्थागत सामाजिक उत्तरदायित्व (सीएसआर) अन्तर्गत गरिएको हो । यसका लागि कम्पनीले ‘Ride for a Cause’ अभियान सञ्चालन गरेको थियो । यात्राबाट संकलित रकम काठमाडौँमा हालै आयोजित एक कार्यक्रमबिच किओचलाई हस्तान्तरण गरिएको हो ।

डा. भगवान कोइरालाको नेतृत्वमा निर्माण भइरहेको किओच अस्पताललाई सहयोग गर्न पठाओ नेपालले २७ जेठदेखि २ असारसम्म उक्त अभियान सञ्चालन गरेको थियो । यस सहयोगले आर्थिक रूपमा कमजोर पृष्ठभूमिका बालबालिकाको उपचारमा सहयोग पुग्ने पठाओ‌को विश्वास छ ।

पठाओले प्रविधि र आफ्ना सञ्जाल प्रयोग गरी किओचको सामाजिक उद्देश्यमा साथ दिएको जनाएको छ । यस पहलबाट बाल स्वास्थ्य, जनचेतना वृद्धि र भविष्यमा दीर्घकालीन सहकार्यको सम्भावना पनि देखिएको पठाओको भनाइ छ ।

डा. कोइरालाको अगुवाइमा सातै प्रदेशमा बाल अस्पताल निर्माणको अभियान अघि बढाइएको छ । हालसम्म कोशी प्रदेशको झापामा एउटा बाल अस्पताल निर्माण भइसकेको छ भने अब काठमाडौँसहित अन्य बाँकी प्रदेशहरूमा पनि बाल अस्पताल निर्माणको योजना राखिएको छ ।

पछिल्लो अध्यावधिक: असार २८, २०८२ ९:२७