चितवन- भरतपुर अस्पताल, चितवनले क्याथ ल्याब सेवा सञ्चालनमा ल्याएको छ। अस्पतालले एक प्रेस विज्ञप्ति जारी गर्दै अबदेखि एन्जियोग्राफी, एन्जियोप्लास्टी, पेसमेकर जडान तथा न्युरो इन्टरभेन्सन प्रविधि प्रयोग गरेर पक्षघात (स्ट्रोक), क्यारोटिड स्टेनोसिस, मस्तिष्कघात (ब्रेन) लगायतका समस्या सुलभ ढंगले निदान र उपचार गर्न सकिने जानकारी दिएको छ।
नयाँ सेवा सुरु भएसँगै बिरामीहरूलाई काठमाडौं वा अन्य शहर जानु नपर्ने अवस्था सिर्जना भएको छ। भरतपुर अस्पतालका प्रवक्ता डा. रामप्रसाद सापकोटाले सम्बन्धित सेवाग्राहीहरूलाई अब स्थानीयस्तरमै विशेषज्ञ सेवा उपलब्ध हुने जानकारी दिएका छन्।
स्वास्थ्य तथा जनसंख्या मन्त्रालयअन्तर्गत सञ्चालन हुने यस सरकारी अस्पतालमा, आधुनिक उपकरण तथा दक्ष जनशक्तिमार्फत सेवा सञ्चालनमा आएको जनाइएको छ।
सामाग्री श्रोत :
swasthyakhabar
काठमाडौँ । दक्षिण कोरियाली प्रविधि कम्पनी सामसङले आफ्नो आगामी ‘मल्टीफोल्ड’ डिभाइसको डिजाइन अनायासै सार्वजनिक गरेको हुनसक्ने सङ्केत देखिएको छ । हालैको वन यूआई ८ बिल्ड अपडेटमा देखिएका केही एनिमेसनहरूले ट्राइफोल्ड सामसङ फ्ल्यागशिप फोन कस्तो देखिन सक्छ भन्नेबारे पहिलो झलक प्रदान गरेको उल्लेख छ ।
यो डिभाइस आगामी हप्ता सार्वजनिक हुने तयारीमा रहेको ह्वावेको डुअल-हिन्ज्ड फोल्डेबल फोनको प्रतिस्पर्धी हुने अपेक्षा गरिएको छ । लिक भएका एनिमेसनले डिभाइसको डुअल-हिन्ज्ड फोल्डिङ मेकानिजम, डिस्प्लेको संरचना, क्यामेरा सेटअप र एनएफसी चिपको स्थान स्पष्ट हुन्छ ।
यो डिभाइसको नाम ग्यालेक्सी जी फोल्ड नाम रहन सक्ने अनुमान गरिएको छ । यद्यपि वन यूआई ८ एनिमेसन फाइलहरूमा यसलाई मल्टीफोल्ड ७ को रूपमा लेबल गरिएको छ । सामसङले यस वर्षको जनवरीमा भएको आफ्नो अनप्याक्ड इभेन्टमा नयाँ फोल्डेबल फोनको पहिलो झलक देखाएको थियो, जसमा तीन स्क्रिन भएको फोनको सामान्य चित्रण पनि समावेश थियो । जुन हाल लिक भएको डिजाइनसँग मेल खान्छ ।
लिक भएको डिजाइनमा तीन ओटा प्यानल भएको डिभाइस देखिन्छ । यसको पछाडि ठुलो ट्रिपल-क्यामेरा सेटअप रहेको छ, जुन पूर्ण रूपमा अनफोल्ड गर्दा दायाँ-हातको प्यानलमा अवस्थित हुन्छ । एनिमेसनहरू हेर्दा एनएफसी चिप पनि यसै प्यानलमा राखिने सङ्केत दिन्छ ।
बीचको प्यानललाई कभर डिस्प्लेको रूपमा देखाइएको छ । यसमा फ्रन्ट-फेसिङ क्यामेरा पनि छ । जुन डिभाइस फोल्ड गरिएको बेला प्रयोग गर्न सकिन्छ । पूर्ण रूपमा अनफोल्ड गर्दा, फ्रन्ट-फेसिङ क्यामेरा पनि दायाँ पट्टि, अर्थात् पछाडिको ट्रिपल-क्यामेरा रहेको प्यानलमै अवस्थित हुन्छ ।
एक एनिमेसनले डिभाइस कसरी फोल्ड हुनेछ भनेर देखाएको छ । यसमा दुई फरक-फरक आकारका कब्जा (हिन्ज) देखिन्छन्, जसमा बायाँ-हातको डिस्प्ले भित्रतिर फोल्ड हुन्छ । जसले दायाँ-हातको डिस्प्ले माथिबाट स्यान्डविच हुने सङ्केत गर्दछ ।
अर्को एनिमेसनले प्रयोगकर्ताहरूलाई दायाँ-हातको प्यानल सुरुमा फोल्ड नगर्न चेतावनी दिन्छ । किनकि क्यामेरा मोड्युलले डिस्प्लेलाई समतल फोल्ड हुनबाट रोक्नेछ र बायाँ-हातको डिस्प्ले पुरै फोल्ड नभई डिभाइसलाई क्षति पुग्न सक्नेछ ।
भिडिओ स्रोत: एन्ड्रोइड अथोरिटी
रोचक कुरा के छ भने बायाँ-हातको प्यानलको पछाडिपट्टि पूर्ण रूपमा खाली देखिन्छ । जसले दायाँ-हातको प्यानललाई फोल्ड गर्न समतल सतह प्रदान गर्दछ ।
सामसङको यो फोल्डिङ मेकानिजम ह्वावे मेट एक्सटी अल्टिमेट डिजाइनले प्रयोग गरेको Z-आकारको फोल्डिङ मेकानिजमभन्दा फरक छ । ह्वावे मेट एक्सटी व्यावसायिक रूपमा उपलब्ध पहिलो ट्राइफोल्ड फोनको रूपमा गत सेप्टेम्बरमा सार्वजनिक भएको थियो ।
मेट एक्सटी यस्तो तरिकाले फोल्ड हुन्छ कि एक, दुई वा सबै तीन डिस्प्ले प्यानलहरू एकै पटक प्रयोग गर्न सम्भव हुन्छ । जसले गर्दा यो सामसङको अनुमानित डिजाइनभन्दा बढी बहुआयामिक छ । यद्यपि, ह्वावेको डिजाइनले प्यानलको केही भाग सधैँ खुला राख्छ ।
यो सामसङको आगामी फोल्डेबल फोनको अन्तिम डिजाइन नहुन सक्छ । र यसको बारेमा त्यति धेरै जानकारी उपलब्ध छैनन् । सामसङले आगामी हप्ता ९ जुलाईका लागि तय गरेको आफ्नो अनप्याक्ड इभेन्टमा यो डिभाइस समेत सार्वजनिक गर्ने चर्चा छ । उक्त कार्यक्रममा कम्पनीले आफ्नो जेड फोल्ड र जेड फ्लिप डिभाइसहरूको पछिल्लो भर्सन पनि सार्वजनिक गर्ने अनुमान छ ।
पछिल्लो अध्यावधिक: असार २०, २०८२ १५:५३
सामाग्री श्रोत :
टेक पाना
काठमाडौँ– आगामी आर्थिक वर्ष २०८२/०८३ देखि नियुक्त हुने कर्मचारीहरूलाई पेन्सन तथा उपदानको सट्टा योगदानमा आधारित सामाजिक सुरक्षा प्रणाली लागू हुने भएको छ।
शुक्रबार अर्थ मन्त्रालयले सामाजिक सुरक्षा प्रणाली लागू गर्न आवश्यक व्यवस्था मिलाउन सबै मन्त्रालय, नियामक निकाय, सार्वजनिक संस्थान, बोर्ड, समिति तथा प्रतिष्ठानहरूलाई परिपत्र गरेको छ।
योगदानमा आधारित सामाजिक सुरक्षा प्रणाली लागू नगरेका कारण सिर्जना हुने दायित्व नेपाल सरकारले नबेहोर्ने जानकारी गराउन पनि अर्थ मन्त्रालयले अनुरोध गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौं – नेपालको वैज्ञानिक तथा शैक्षिक समुदायका लागि ऐतिहासिक कदमका रूपमा शिमाड्जु एशिया प्यासिफिक, प्यासिफिक कमर्सियल कम्पनी र मदन भण्डारी विज्ञान तथा प्रविधि विश्वविद्यालय (एमबीयुएसटी)ले नेपालमा अनुसन्धान, नवप्रवर्तन र शैक्षिक उत्कृष्टता सुदृढ पार्न सम्झौता पत्रमा हस्ताक्षर गरेका छन्।
समारोह काठमाडौँमा आयोजना गरिएको थियो, जहाँ तीनै संस्थाका प्रतिनिधिहरूको उपस्थिति थियो। मबीयुएसटीका अध्यक्ष प्रा राजेन्द्रध्वज जोशी, शिमाड्जु एशिया प्यासिफिकका कार्यकारी अधिकारी तथा सिनियर महाप्रबन्धक श्री डेभ चुवा र प्यासिफिक कमर्सियल कम्पनीका निर्देशक विजेन्द्र श्रेष्ठले शैक्षिक, अनुसन्धानकर्ता, नियामक अधिकारी, औषधि तथा आयुर्वेद उद्योगका प्रतिनिधि र सञ्चारकर्मीहरूको बीचमा औपचारिक रूपमा सम्झौतामा हस्ताक्षर गरे।
विज्ञान तथा प्रविधि सचिव श्री विश्व बाबु पौडासैनीले मदन भण्डारी विज्ञान तथा प्रविधि विश्वविद्यालय र शिमाड्जुको पहललाई प्रशंसा गर्दै प्यासिफिक कमर्सियललाई यस सहकार्यको नेतृत्व गरेकोमा धन्यवाद दिए। उनले यस्ता सहकार्यहरूले नेपालमा अनुसन्धान, विज्ञान र प्रविधिको स्तर उकास्न सहयोग गर्नेमा आफू विश्वस्त रहेको बताए।
कार्यक्रममा डा. राजेन्द्रध्वज जोशीले विश्वविद्यालयको अनुसन्धान र नवप्रवर्तनलाई प्रोत्साहन गर्ने प्रतिवद्धता व्यक्त गर्दै भने, ‘शिमाड्जु र प्यासिफिक कमर्सियल कम्पनीसँगको यो सहकार्यले नेपालको वैज्ञानिक उन्नतिमा महत्वपूर्ण मोड ल्याउनेछ, जसले विश्वस्तरीय पूर्वाधार र अन्तर्राष्ट्रिय सहकार्यका ढोका खोल्नेछ।’
समारोहमा शिमाड्जुको वर्ल्ड ल्याब नेटवर्ककोको प्रस्तुति समेत प्रस्तुत गरिएको थियो, जुन एशिया प्यासिफिक र दक्षिण एसियाभरका ३४ सहकार्य प्रयोगशालालाई जोड्ने विश्वव्यापी प्लेटफर्म हो र अब नेपाल ३५औं सदस्यका रूपमा यसमा समावेश भएको छ। कार्यक्रममा विश्वविद्यालयको दृष्टिकोण र उपलब्धिहरूको बारेमा भिडियो प्रस्तुति पनि गरिएको थियो।
१५० वर्षभन्दा लामो इतिहास बोकेको शिमाड्जु कर्पोरेसन विश्वकै अग्रणी वैज्ञानिक तथा विश्लेषणात्मक उपकरण निर्माता हो, जसले मानव स्वास्थ्य, खाद्य सुरक्षा र वातावरणीय दिगोपनमा योगदान पुर्याउँदै आएको छ। त्यसैगरी, शिमाड्जुको नेपालका लागि २५ वर्षभन्दा लामो समयदेखि विशेष वितरकको रूपमा रहेको प्यासिफिक कमर्सियल कम्पनीले नेपालमा अत्याधुनिक प्रविधि र समाधान ल्याउँदै आएको छ।
शिमाड्जु एशिया प्यासिफिकका प्रतिनिधि डेभ चुवाले भने, ‘हामी सहकार्यको शक्तिमाथि विश्वास गर्छौं। यस सम्झौता मार्फत नेपाललाई अनुसन्धान क्षमता वृद्धि गर्न र विश्व वैज्ञानिक समुदायसँग जोडिन सहयोग गर्न पाउँदा हामी उत्साहित छौं।’
त्यस्तै, प्यासिफिक कमर्सियल कम्पनीका श्री विजेन्द्र श्रेष्ठले सिफिकको रूपमा हामी केवल उपकरण आपूर्तिकर्ता होइन, एक सम्पूर्ण समाधान प्रदायक बन्न पाउँदा गर्व लाागेको उल्लेख गरे। ‘यो सहकार्यले नेपाललाई विश्व अनुसन्धान र नवप्रवर्तनको नक्सामा अझ माथि पुर्याउने हाम्रो प्रतिवद्धतालाई पुनः पुष्टि गरेको छ।” उनको सपना भनेको विज्ञानलाई व्यवसायिक बनाउँदै अनुसन्धानलाई अर्थपूर्ण र ठोस उत्पादनमा रूपान्तरण गर्नु हो,’ उनले भने।
यस अवसरमा औषधि प्रशासन विभाग (डीडीए)का प्रमुखनारायण ढकालले शैक्षिक–उद्योग सहकार्यको व्यापक महत्व रहेको बताए। उनले भने, ‘यस प्रकारको सहकार्यले नेपालको औषधि क्षेत्रको विकासमा टेवा पुर्याउनेछ। औषधि व्यवसायमा दक्ष र जानकार जनशक्ति विकास गर्न शैक्षिक र उद्योगबीचको सहकार्य अत्यावश्यक छ। यस्ता पहलहरूले हाम्रो जनशक्तिलाई राष्ट्रिय र अन्तर्राष्ट्रिय चुनौतीहरू सामना गर्न तयार पार्छ।’
सामाग्री श्रोत :
swasthyakhabar
काठमाडौँ । सूचना प्रविधि विभागको काठमाडौँको तीनकुने-गैह्री गाउँमा रहेको कार्यालय अचानक बन्द भएको छ । घरधनीले खाली गराउन ताकेता गरेपछि विभागको कार्यालय हतार-हतार अन्तै सर्न लागेको हो ।
असार मसान्त अगावै देशभरका सरकारी निकायका वेबसाइटहरू विभागको सिस्टममा नल्याए बन्द हुने समयसीमा छ । जसले गर्दा विभागको कार्यालय खोज्दै पुग्नेहरूलाई थप अन्योल र असहज बनेको गुनासो सुनिन थालेको छ ।
कार्यालय सर्ने क्रममा रहेकाले टेलिफोन लाइनहरू जडान हुन बाँकी रहेको विभागका महानिर्देशक रमेश शर्माले जानकारी दिए । यस बीचमा सेवाग्राहीले मोबाइल नम्बर वा विभागको ईमेलमार्फत सम्पर्क गर्न सक्ने उनको भनाइ छ ।
गैह्री गाउँ कार्यालय बन्द भएपछि विभाग बबरमहलस्थित वाणिज्य विभाग नजिकैको सरकारी भवनमा सामान सार्ने क्रम चलिरहेको छ । अब केन्द्रीय धनादेश कार्यालयको भवनबाटै विभागको कार्यालय सञ्चालनमा आउनेछ ।
विभागका अधिकारीहरूका अनुसार गैह्री गाउँस्थित भाडाका घरधनीले गत वैशाखसम्म खाली गरिदिन अग्रिम सूचना दिएका थिए । तर नयाँ कार्यालय राख्ने भवनको टुङ्गो लगाउन र भवन यकिन भइसकेपछि मर्मत सम्भार गर्नु पर्दा ढिलाइ भएको हो । घरधनीलाई दिइएको आर्थिक वर्षको भाका समेत सकिन लागेपछि यतिखेर हतार हतार विभागका सरसामान सार्ने काम भइरहेको छ ।
सेवाग्राही अन्योलमा परेपछि वेबसाइटमा सम्पर्कका लागि मोबाइल नम्बर राख्ने तयारी विभागले गरिरहेको छ । यस सम्बन्धी सार्वजनिक सूचना समेत प्रकाशित गरेर सार्वजनिक रूपमा जानकारी दिइने कुरा महानिर्देशक शर्माले बताए ।
विभागले सरकारी निकायहरूको आईटी सिस्टम, वेब एप्लिकेसन र वेबसाइटको सेक्युरिटी अडिट, केन्द्रीकृत विद्युतीय हाजिरी जडान, एकीकृत एसएमएस गेट-वे जस्ता महत्त्वपूर्ण सेवाहरू दिँदै आएको छ । यति मात्र नभई पछिल्लो समय त राष्ट्रिय सूचना प्रविधि केन्द्र तथा एकीकृत सरकारी डेटा सेन्टर (जीआईडीसी) समेत विभाग मातहत आएका छन् ।
सम्पूर्ण सरकारी निकायको एकीकृत कार्यालय व्यवस्थापन प्रणाली (जीआईओएमएस), गभर्मेन्ट क्लाउड सेवा, एकीकृत वेबसाइट व्यवस्थापन प्रणाली जस्ता महत्त्वपूर्ण सेवाका लागि विभागकै सहयोग र समन्वय चाहिन्छ । यस बाहेक प्राविधिक परामर्श, सरकारी कर्मचारीहरूलाई आईटी सम्बन्धी तालिम लगायतका काममा पनि विभाग संलग्नता हुने गर्छ ।
पछिल्लो अध्यावधिक: असार २०, २०८२ १४:५१
सामाग्री श्रोत :
टेक पाना
सुशासनका लागि प्राधिकरण टुक्रयाउन खोजेको हाे : मन्त्री पाण्डे (भिडियो)
सामाग्री श्रोत :
नेपाललाइभ
‘किराले पोल्यो’, ‘छालामा रातो डाम पर्यो’, ‘आँखा सुन्नियो’ — पछिल्लो केही समययता यस्तो सुनिन थालेको छ, जुन सामान्य टोकेको जस्तो देखिए पनि खासमा एउटा विशेष किराको कारणले भएको हो, जसलाई भनिन्छ — नैरोबी फ्लाइ।
नेपालमा पछिल्ला केही वर्षयता नैरोबी फ्लाइको संक्रमणका घटनाहरू उल्लेख्य रूपमा बढेका छन्। विशेषगरी पूर्वी तराईका झापा, मोरङ, सुनसरी, र पछिल्लो समय काठमाण्डौं, बर्दिया, बाँके, र म्याग्दी जस्ता पहाडी तथा तराईका जिल्लाहरूमा समेत यसको प्रभाव देखिएको छ ।
नैरोबी फ्लाइ के हो?
नैरोबी फ्लाइ (Paederus beetle) स–सानो, कालो र रातो/खैरो रंगको कीरा हो, जसलाई स्थानीय रूपमा ’एसिड किरा’ वा ’केन्याली किरा’ पनि भनिन्छ। यो किरा पूर्वी अफ्रिकाबाट उत्पत्ति भएको भए पनि पछिल्ला वर्षहरूमा भारत हुँदै नेपालमा फैलिएको छ। यी कीराहरू प्रायः बढी वर्षा हुने, तातो र आद्र्र स्थानमा पाइन्छन्।
संक्रमण कसरी हुन्छ?
नैरोबी फ्लाइले मानिसलाई टोक्दैन वा डस्दैन। तर, यदि यो किरा छालामा बसेको बेला थिचियो वा मिचियो भने, यसले पेडेरिन नामक विषाक्त एसिड छोड्छ, जसले छालामा जलन, एलर्जी, रातोपन, फोका, घाउ, र चिलाउने समस्या निम्त्याउँछ। लक्षणहरू प्रायः १२ घण्टा देखि २ दिनभित्र देखिन थाल्छन्। कहिलेकाहीँ संक्रमण फैलिँदा ज्वरो, स्नायु तथा जोर्नी दुख्ने, वान्ता हुने जस्ता लक्षणसमेत देखिन सक्छ।
पछिल्ला वर्षहरूमा नेपालमा देखिएको प्रभाव
२०२२ देखि २०२५ सम्म झापा, मोरङ, सुनसरी, बाँके, बर्दिया, कञ्चनपुर, काठमाण्डौं, म्याग्दी लगायतका जिल्लाहरूमा सयौं संक्रमित बिरामी स्वास्थ्य संस्थामा पुगेका छन् ।
• झापामा एकै दिन ५० भन्दा बढी बिरामी उपचारका लागि आउने गरेको स्वास्थ्यकर्मीहरूले बताएका छन् ।
• काठमाण्डौंमा समेत नागरिक अस्पतालमा गम्भीर छालामा संक्रमण भएका बिरामी भेटिएका छन्।
• बर्दिया, बाँके, म्याग्दी जस्ता जिल्लामा रोपाइँको समयमा, बढी वर्षा भएका ठाउँमा किसानहरूमा बढी संक्रमण देखिएको छ।
• नेपालगञ्ज, बर्दिया, बाँकेमा छालामा डढेलो, फोका, घाउ, चिलाउने समस्या लिएर अस्पताल पुग्ने बिरामीको संख्या बढेको छ।
रोकथाम र सावधानी
• यी किरा उज्यालो तर्फ आकर्षित हुने भएकाले राति घरको बत्ती कम बाल्ने, झ्यालमा जाली लगाउने, लामो बाहुला भएका कपडा लगाउने, झुलमा सुत्ने।
• किरालाई मिच्नु हुँदैन। शरीरमा बसेको भए फुकेर उडाउनुहोस् वा कपडाले बिस्तारै झार्ने।
• छालामा एसिड लागेको खण्डमा तुरून्त साबुन पानीले सफा गर्ने।
• हात–मुख नछुनुहोस्। विशेषगरी आँखा जोगाउनु अत्यावश्यक हुन्छ।
• संक्रमण गम्भीर भएमा छाला रोग विशेषज्ञसँग सम्पर्क गर्ने।
चिकित्सक वा छाला रोग विशेषज्ञसँग कहिले परामर्श लिने ?
• छालामा अत्यधिक पोलाइ, डाम वा असह्य जलन भएमा ।
• फोका गहिरो भएर पस आउनु, घाउ बढ्दै गएमा ।
• आँखामा सूजन, रातोपन आउनु वा दृष्टिमा असर परेमा ।
• ज्वरो, टाउको दुखाइ, स्नायु वा जोर्नी दुख्ने, वान्ता जस्ता संक्रमणका संकेत देखिएमा ।
डराउनु पर्दैन — समयमै उपचारले समस्या समाधान हुन्छ।
अन्त्यमा,
नैरोबी फ्लाइको संक्रमण नेपालमा पछिल्ला वर्षहरूमा बढ्दो छ, विशेष गरी वर्षायाममा। यद्यपि, यो संक्रमण महामारीको रूपमा फैलिने छैन र अधिकांश संक्रमितहरू बिना उपचार नै निको हुन्छन्४। तर, सावधानी अपनाउन आवश्यक छ, विशेष गरी कृषक, बालबालिका र संवेदनशील छालाका व्यक्तिहरूले।
( डा बराल चिकित्सक तथा स्वास्थ्य सन्देश लेखक हुन् र जोशी एमबीबीएस अन्तिम बर्ष तथा स्वास्थ्य सन्देश लेखक हुन्) ।
स्रोतहरूमा आधारित
1. https://english.onlinekhabar.com/nairobi-fly-nepal.html
2. https://myrepublica.nagariknetwork.com/news/a-patient-with-symptoms-similar-to-nairobi-fly-infection-found-in-beni
3. https://www.myrepublica.nagariknetwork.com/news/effect-of-nairobi-fly-in-nepalgunj
4. https://myrepublica.nagariknetwork.com/news/infection-of-nairobi-fly-surfaces-with-start-of-monsoon-season
5. https://pmc.ncbi.nlm.nih.gov/articles/PMC9641253/
6. https://publichealthupdate.com/health-advisory-on-nairobi-fly/
7. https://risingnepaldaily.com/news/14020
8. https://journals.lww.com/annals-of-medicine-and-surgery/fulltext/2022/09000/nairobi_fly_in_south_asia__a_catastrophic_threat.46.aspx
9. https://thehimalayantimes.com/nepal/nairobi-fly-infection-detected-in-ilam
10. https://www.instagram.com/tv/CftEk2Zq7Mo/
सामाग्री श्रोत :
swasthyakhabar
काठमाडौँ । राइड हेलिङ र लजिस्टिक सेवा प्रदायक पठाओ नेपालले आफ्नो डेलिभरी सेवा ‘पठाओ पार्सल’ अन्तर्गत ‘डेलिभरीको ग्यारेन्टी’ शीर्षकमा नयाँ योजना सार्वजनिक गरेको छ । आगामी १५ साउनसम्म सञ्चालन हुने यस योजना अन्तर्गत पठाइएका सामान तोकिएको समयमा ग्राहकसम्म नपुगी अर्डर रद्द भएमा सम्बन्धित मर्चेन्टले उक्त सामान बराबरको रकम र सामान दुवै फिर्ता पाउने पठाओले जनाएको छ ।
तर, डेलिभरी प्रयासका क्रममा ग्राहक सम्पर्कमा नआउने, फोन नउठाउने वा अर्डर लिन अस्वीकार गरेमा भने यो सुविधा लागु हुने छैन ।
बाढी, पहिरो, यातायात अवरोध वा हड्तालजस्ता बाह्य कारणले डेलिभरी ढिलाइ भएमा पनि ग्यारेन्टी योजना लागु नहुने कम्पनीले उल्लेख गरेको छ । यो योजना केवल पठाओको त्रुटिका कारण समयमै डेलिभरी हुन नसकेका अवस्थाका लागि प्रयोगमा आउनेछ ।
पठाओ नेपालकी निर्देशक सुरक्षा हमालले भनिन्, “हामी हाम्रो सेवालाई अझ जिम्मेवार र भरपर्दो बनाउन प्रतिबद्ध छौँ । ‘डेलिभरीको ग्यारेन्टी’ जस्ता पहलमार्फत हामी व्यवसायी र ग्राहक दुवैको कारोबारलाई सहज, सुरक्षित र भरोसायोग्य बनाउनेछौँ ।”
कम्पनीले यो योजनाले व्यवसायी र ग्राहकबिच डेलिभरीप्रति विश्वास बढाउने विश्वास व्यक्त गरेको छ । अब व्यवसायीहरूले सामान समयमै पुग्ला कि नपुग्ला भन्ने चिन्ता गर्नु नपर्ने बताइएको छ ।
योजना अन्तर्गत नयाँ मर्चेन्टहरूलाई लक्षित गरी विशेष अफर पनि ल्याइएको छ । अभियान अवधिभर नयाँ दर्ता हुने मर्चेन्टहरूले पहिलो एक हप्ताभित्र पठाएका १०० अर्डरसम्म निःशुल्क डेलिभरी सुविधा पाउनेछन् ।
पठाओ नेपालले हाल देशभर आफ्नो डेलिभरी सञ्जाल विस्तार गरिरहेको जनाएको छ । यो अभियानले पठाओलाई अझ ग्राहक केन्द्रित र व्यवसायमैत्री डेलिभरी प्लेटफर्मको रूपमा स्थापित गर्न सहयोग गर्ने विश्वास कम्पनीले व्यक्त गरेको छ ।
व्यवसायी तथा व्यापारीहरूले यहाँ गई वा पठाओ मर्चेन्ट एप डाउनलोड गरी सेवा दर्ता गर्न सक्नेछन् ।
पछिल्लो अध्यावधिक: असार २०, २०८२ १३:५१
सामाग्री श्रोत :
टेक पाना
काठमाडौं– संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेले कपिलवस्तुको तिलौराकोटलाई विश्व सम्पदा सूचीमा सूचिकृतका लागि पहल गर्न फ्रान्स जान लागेको बताएका छन्।
शुक्रबार अन्तर्राष्ट्रिय सम्बन्ध र पर्यटन समितिको बैठकमा बोल्दै उनले यस्तो बताएका हुन्।
उनले तिलौराकोटलाई विश्व सम्पदा सूचीमा राख्ने सरकारको एजेण्डा रहेको र पेरिसमा हुने वर्ल्ड हेरिटेज कमिटीको बैठकमा सहभागी हुन आफू त्यसतर्फ जान लागेको बताए।
उनले सरकारले तिलौराकोटलाई विश्व सम्पदा सूचीमा राख्न विगत लामो समयदेखि पहल गरिरहेको बताए।
२१ वटा देश सम्मिलित कमिटीमा कमिटीको बहुमतले निर्णय गर्नुपर्ने हुन्छ। त्यसमा एसियाबाट भारत, कतार, जापान, कोरिया लगायतका देशहरू रहेको मन्त्री पाण्डेले बताए।
तिलौराकोटमा धेरै पुरातात्विक वस्तुहरू फेला परेको, त्यही बेलै औद्योगिकीकरण भएको, व्यवस्थित सिटी, पार्कहरू थिए, आधुनिक सहरमा हुने पूर्वाधार सबै थिए त्यही बेलामै भन्ने कुरा वैज्ञानिकहरूले पुष्टि गरेको अवस्था रहेको बताए।
मन्त्री पाण्डेले भने, ‘तिलौराकोटलाई विश्व सम्पदा सूचीमा राख्नेगरी हाम्रो एजेण्डा छ। वर्ल्ड हेरिटेज कमिटीको मिटिङ पेरिसमा छ। हामी १० वर्ष यता त्यो प्रयासमा छौं। त्यसमा पनि थुप्रै जटिलताहरू छन्। कसले सपोर्ट गर्ने, कसले नगर्ने भन्ने। २१ वटा देश सम्मिलित कमिटी छ। त्यो कमिटीको बहुमतले निर्णय गर्नुपर्छ। त्यसमा भारत, कतार, जापान, कोरिया लगायतका एसियन देशहरू छन्। अरू देशहरू पनि छन्। त्यसमा हामी धेरै वर्षदेखि साधन स्रोत पनि धेरै लागिसकेको अध्ययन पनि धेरै भइसकेको छ। तिलौराकोटमा धेरै पुरातात्विक वस्तुहरू फेला परेको, त्यही बेलै औद्योगिकीकरण भएको, व्यवस्थित सिटी, पार्कहरू थिए, आधुनिक सहरमा हुने पूर्वाधार सबै थिए त्यही बेलामै भन्नेकुरा वैज्ञानिकहरूले पुष्टि गरेको अवस्था छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
काठमाडौँ । एप्पलको नयाँ लाइनअप आईफोन १७ सिरिजमा अहिलेसम्मकै सबैभन्दा ठुलो ब्याट्री हुने भएको छ । चिनियाँ सामाजिक सञ्जालमा चर्चित लिकर ‘इन्स्ट्यान्ट डिजिटल’ले आईफोन १७ प्रो म्याक्समा ५००० एमएएच क्षमताको ब्याट्री हुने खुलासा गरेको हो ।
पोस्टमा आईफोन ११ प्रो म्याक्सदेखि आईफोन १६ प्रो म्याक्स हुँदै आईफोन १७ प्रो म्याक्समा भएको ब्याट्री क्षमता उल्लेख गरेको छ ।
-
आईफोन ११ प्रो म्याक्सः ३,९६९ एमएएच
-
आईफोन १२ प्रो म्याक्सः ३,६८७ एमएएच
-
आईफोन १३ प्रो म्याक्सः ४,३५२ एमएएच
-
आईफोन १४ प्रो म्याक्सः ४,३२३ एमएएच
-
आईफोन १५ प्रो म्याक्सः ४,४२२ एमएएच
-
आईफोन १६ प्रो म्याक्सः ४,६७६ एमएएच
-
आईफोन १७ प्रो म्याक्सः ~५००० एमएएच
एप्पलका अनुसार आईफोन १६ प्रो म्याक्सको ब्याट्री-लाइफ झण्डै ३३ घण्टा छ । आईफोन १४ प्रोमा २९ घण्टा र आईफोन १३ प्रो म्याक्समा २८ घण्टा रहेको छ । त्यसैगरी आईफोन १२ प्रो म्याक्सको ब्याट्री लाइफ २० घण्टा छ ।
लिक भएको जानकारीलाई आधार मान्ने हो भने आईफोन १७ प्रो म्याक्समा आईफोन १६ प्रो म्याक्सभन्दा करिब ३०० एमएएच थप ब्याट्री हुनेछ । यो भनेको ३५ घण्टाको ब्याट्री लाइफ हो । यसमा हुने नयाँ ए१९ चिपले पनि ब्याट्रीको पर्फमेन्स सुधार गर्ने बताइएको छ ।
इन्स्ट्यान्ट डिजिटलले लिक गरेका प्रायः जानकारी मिल्ने गरेको छ । यस प्लेटफर्मले सन् २०२३ मा एप्पलले पहेँलो कलर भेरियन्टको आईफोन १४ ल्याउने जानकारी लिक गरेको थियो । पछि एप्पलले त्यही मोडेल बजारमा ल्याएको थियो । त्यस्तै आईफोन १५ प्रोमा आउने स्पेसल भिडिओ क्याप्चर, वाच सिरिज नाइनको नयाँ डिजाइन, आईफोन एयरको क्यामेरा डिजाइन र पछिल्लो समय आईफोन १६ प्रोको ब्याट्री क्षमता पनि लिक गरेको थियो । ती सबै फिचर पछि एप्पलले ल्याएका फिचर र परिवर्तनसँग मेल खाएको थियो ।
पछिल्लो अध्यावधिक: असार २०, २०८२ १२:३५
सामाग्री श्रोत :
टेक पाना
