काठमाडौँ । फेसबुकले तपाईँको फ्रेन्ड लिस्टको आधारमा फ्रेन्ड सजेस्ट अर्थात् नयाँ नयाँ साथीहरूको नाम सुझाउँछ जसलाई तपाईँ आफ्नो साथी बनाउन सक्नुहुन्छ । तर कहिलेकाही आफ्नो फिडमा आवश्यक कुरा भन्दा पनि ‘पिपल यु मे नो’ (तपाईँले चिन्नसक्ने व्यक्ति) भन्ने फेसबुकको सजेसन (सल्लाह) आएर नै हैरान भइन्छ । हुन त साथीको दायरा बढाउनका लागि यस्ता फिचर काम पनि लाग्छ । तर फिड नै हेर्न दिक्क समेत बनाउँछ । नचाहेको व्यक्तिको प्रोफाइल बारम्बार फिडमा आइरहँदा दिक्क लाग्नसक्छ । यसकै लागि भनेर मेटाले एउटा राम्रो काम भने गरेको छ । यदि तपाईँलाई पिपुल यु मे नो भनेर आउने फ्रेन्ड सजेसन मन पर्दैन भने तपाईँ सहजै यो सजेसनलाई बन्द पनि गर्न सक्नुहुन्छ । 

कसरी बन्द गर्ने फेसबुक फ्रेन्ड सजेसन ?

– आफ्नो फेसबुक प्रोफाइल खोलेर सेटिङ एन्ड प्राइभेसी (Setting & Privacy) अप्सनमा जानुहोस् । यसका लागि आईफोन प्रयोगकर्ताले आफ्नो फेसबुक प्रोफाइलको दायाँतिर सबैभन्दा तल भएको प्रोफाइल पिक्चर देखिने आइकनमा ट्याप गर्नसक्नुहुन्छ । यस्तै एन्ड्रोइड प्रयोगकर्ताले भने फोनको सबैभन्दा माथि दायाँतिर भएको प्रोफाइल आइकनमा ट्याप गर्न सक्नुहुन्छ । 

– यसपछि सेटिङमा ट्याप गर्नुहोस् 

– प्रिफरेन्स (Preferences) सेक्सनभित्र भएको नोटिफिकेसन (Notification) मा ट्याप गर्नुहोस्

– यहाँ गएर पिपुल यु मे नो (People You May Know) मा ट्याप गर्नुहोस् ।

– यहाँ Push, e-mail र sms गरेर तीन ओटा अप्सन देख्न सक्नुहुन्छ । आफ्नो आवश्यकता अनुरुप कुन तरिकाले तपाईँ फ्रेन्ड सजेसन बन्द होस् भन्ने चाहनुहुन्छ त्यही अप्सनको टोगल अफ गरिदिनुहोस् । अथवा सबै बन्द गर्नका लागि सुरुमा नै भएको ‘Allow notifications on Facebook’ को टोगल अफ गरिदिनुहोस् ।  

यसरी तपाईँले आफ्नो फिडमा आउने फ्रेन्ड सजेसन बन्द गर्न सक्नुहुन्छ । यदि तपाईँ पुन: सजेसन आओस् भन्ने चाहनुहुन्छ भने, यही प्रक्रिया दोहोर्‍याएर टोगल अन गर्न सक्नुहुन्छ ।

पछिल्लो अध्यावधिक: जेठ १३, २०८२ १४:२०

काठमाडौँ–मङ्गलबारको प्रतिनिधिसभा बैठक दिउँसो साढे दुई बजेसम्मका लागि स्थगित भएको छ। 

बिहान साढे ११ बजे बसेको बैठकमा विपक्षी दलहरूले भिजिट भिसा सेटिङ प्रकरणमा गृहमन्त्री रमेश लेखकले राजीनामा दिनुपर्ने माग गर्दै नाराबाजी गरेपछि आधा घण्टाका लागि स्थगित भएको बैठक सूचना टाँस गरेर साढे दुई बजेसम्मका लागि स्थगित गरिएको हो। 

सङ्घीय संसद् सचिवालयका महासचिव पद्मप्रसाद पाण्डेले बैठक सूचना टाँसेर साढे दुई बजेसम्मका लागि स्थगित गरिएको जानकारी दिएका छन्। 

विपक्षी दलहरूले भिजिट भिसा प्रकरणमा छानबिन गर्न उच्चस्तरीय छानबिन समिति नबन्दासम्म सदन चल्न नदिने बताइरहेका छन्। बिहान बैठक सुरु हुने बित्तिकै विपक्षी सांसदहरूले उठेर विरोध जनाए।

त्यसपछि बोलेका प्रमुख प्रतिपक्षी दल नेकपा (माओवादी केन्द्र)का सांसद वर्षमान पुन र राष्ट्रिय स्वतन्त्र पार्टीका सांसद शिशिर खनालले घटनाको छानबिनका लागि उच्च स्तरीय छानबिन आयोग नबन्दासम्म संसद् चल्न नदिने बताएका थिए।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । संस्कृति, पर्यटन तथा नागरिक उड्डयन मन्त्री बद्री प्रसाद पाण्डेले हिमालको संरक्षण हामी सबैको साझा कर्तव्य रहेको उद्घोष गरेका छन्।

एभरेष्ट समिटियर सम्मेलनको अवसरमा मंगलबार आयोजित कार्यक्रमलाई सम्बोधन गर्दै मन्त्री पाण्डेले हिमाल आरोहणमा सफलता हासिल गर्ने सम्पूर्ण समिटियरहरूप्रति बधाई दिँदै हिमाली संस्कृतिको संरक्षण र भविष्यका पुस्ताका लागि हिमाल सुरक्षित राख्नुपर्ने आवश्यकता औंल्याएका हुन्।

पाण्डेले भने, ‘हामी केवल संसारको शिखर चुम्नेहरूलाई बधाई दिन यहाँ आएका होइनौं, उहाँहरूको साहस, समर्पण र दृढताप्रति सम्मान प्रकट गर्न पनि यहाँ छौं।’

उनले शेर्पा समुदाय, गाइड, उद्धार टोली र हिमाली क्षेत्रमा निरन्तर खटिएर सेवा पुर्‍याउने सबैप्रति विशेष सम्मानसमेत व्यक्त गरे। ‘उहाँहरूको समर्पणले पर्वतीय यात्राहरूलाई सुरक्षित, प्रकृतिप्रति संवेदनशील र अझ अर्थपूर्ण बनाएको छ,’ मन्त्री पाण्डेले थपे।

सरकार पर्वतारोहणको प्रवर्द्धनका लागि पूर्वाधार, तालिम र वातावरणीय सुरक्षालाई प्राथमिकतामा राखेर काम गरिरहेको मन्त्री पाण्डेले बताए। साथै, पर्वतीय पर्यटनसँगै स्थानीय समुदायको समृद्धि र जीवनस्तरमा सुधार ल्याउन प्रतिबद्ध रहेको पनि उनले जनाए।

मन्त्री पाण्डेले हिमालयलाई केवल भौगोलिक पर्वत नभई सभ्यता, संस्कृति र सहजीवनको सेतुका रूपमा चित्रित गर्दै भने, ‘यी हिमालहरू पवित्र छन्, र तिनीहरूलाई सुरक्षित राख्नु हाम्रो साझा जिम्मेवारी हो।’

जलवायु परिवर्तन र ग्लोबल वार्मिङका कारण हिमाली भविष्य संकटमा परेको उल्लेख गर्दै उनले भने, ‘अब समय आएको छ, हामीले सावधानी, बुद्धिमत्ता र सम्मानपूर्वक यी हिमालहरूको संरक्षण गर्न आवश्यक छ।’

उनले सम्पूर्ण मानव समाजलाई हिमालप्रतिको प्रतिबद्धता नवीकरण गर्न प्रेरणा दिने विश्वास व्यक्त गरे। सम्मेलनका क्रममा स्वदेशीदेखि विदेशी पर्वतारोहीलाई सम्मानसमेतत गरेका थिए।

काठमाडौँ । इन्टरनेट सेवा प्रदायक चेरी वर्ल्ड कम्युनिकेसन प्रालिको सञ्चालन अनुमति प्राप्त (लाइसेन्स) खारेज भएको छ ।

नियामक नेपाल दूरसञ्चार प्राधिकरणले मङ्गलबार एक सूचना सार्वजनिक गर्दै चेरी वर्ल्डको इन्टरनेट (ईमेल सहित) सेवा सञ्चालन अनुमति पत्र खारेज भएको जानकारी दिएको हो ।

नवीकरणका लागि तोकिएको समयावधिभित्र नियमानुसार निवेदन पेश नगरेकोले दूरसञ्चार ऐन, २०५३ को दफा २५ (५) बमोजिम गएको २९ वैशाखदेखि अनुमतिपत्र स्वतः खारेज भएको प्राधिकरणले उल्लेख गरेको छ ।

चेरी वर्ल्डले नियमानुसार तिर्न/बुझाउनुपर्ने रकमका सम्बन्धमा एक महिनाभित्र दूरसञ्चार प्राधिकरणमा अनुमतिपत्र व्यवस्थापन शाखामा सम्पर्क गर्न सूचित गरिएको छ । अन्यथा, प्रचलित कानून अनुसार कारबाही प्रक्रिया अगाडि बढाइने चेतावनी दिइएको छ ।

पछिल्लो अध्यावधिक: जेठ १३, २०८२ ८:४५

कैलाली–बाजुरामा मंगलबार नेपाल टेलिकमको जिप दुर्घटना हुँदा तीन जनाको घटनास्थलमै मृत्यु भएको छ।  

बा ५च २२०९ नम्बरको जिप दुर्घटनामा परेको हो।

जिल्ला प्रहरी कार्यालय बाजुराका अनुसार जगन्नाथ गाउँपालिका–३ मा टेलिकमको जिप दुर्घटना भएको खबर प्राप्त भएपछि प्रहरी टोली घटना स्थलतर्फ गएको छ।

मृतकको पहिचान हुन बाँकी रहेको तथा दुई जना घाइते भएका जिल्ला प्रहरी कार्यालय बाजुराका डीएसपी इकपाल हवारीले जानकारी दिए। घटनाबारे थप जानकारी आउन बाँकी छ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । गृहमन्त्रीको राजीनामा माग्दै विपक्षी दलका सांसदहरूको नाराबाजीपछि प्रतिनिधि सभाको बैठक स्थगित भएको छ।

मंगलबार बसेको प्रतिनिधि सभाको बैठकमा भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने माग बैठक सुरू हुनासाथ माओवादी, रास्वपा र राप्रपाका सांससहरुले संसद अवरोध गरेका थिए।

त्यसपछि सभामुख देवराज घिमिरेले बैठक आधा घण्टाको लागि स्थगित भएको जानकारी गराए।

काठमाडौँ । आर्टिफिसियल इन्टेलिजेन्स (एआई) आफैँ प्रविधिको उपलब्धि हो । तर पछिल्लो समय उसैले प्राविधिकको रोजगारी जोखिममा पारेको बहस तीव्र छ । ठुला प्रविधि कम्पनीहरूले सामान्य डेभलपरले गर्नसक्ने काम समेत एआईले सहजै गर्न सक्ने भन्दै कर्मचारी कटौती गर्दैछन् ।

वास्तवमा अहिले बजारमा यस्ता परिष्कृत एआई टुलहरू आएका छन्, जसले कुनै सामान्य वेबसाइट वा मोबाइल एप निर्माणका लागि आवश्यक कोडिङ क्षणभरमै तयार गरिदिन्छन् । प्रयोगकर्ताले दिइएको सानो निर्देशनकै आधारमा यस्ता टुलहरूले पूर्ण कोड लेखिदिन्छन् । यस्तै प्रविधिलाई ‘भाइब कोडिङ’ भनिन्छ ।

यो नयाँ शैलीको प्रोग्रामिङ विधि हो । विदेशका केही कम्पनीहरू त भाइब कोडिङमा मात्र केन्द्रित भएर व्यवसाय गरिरहेका छन् ।​

भाइब कोडिङ के हो, कसरी काम गर्छ, यसका राम्रा र नराम्रा काम के छन् अनि यसलाई कसरी उपयोग गर्न सकिन्छ लगायतका विषयमा तल उल्लेख गरिएको छ:

भाइब कोडिङ के हो ?

भाइब कोडिङ एआईमा आधारित नयाँ प्रोग्रामिङ शैली हो । जहाँ प्रयोगकर्ताले प्राकृतिक भाषामा आफूले चाहेको कुरा लेख्छन् र एआईले त्यसकै आधारमा आवश्यक कोड लेखिदिन्छ ।

यो शब्द ‘भाइब कोडिङ’ एन्ड्रेज कारपाथी नामक एआई विज्ञले २०२५ को फेब्रुअरी २ मा आफ्नो एक्स (ट्वीटर) पोस्टमार्फत सार्वजनिक गरेका थिए । उनी ओपनएआईका सहसंस्थापक र टेस्लाका पूर्व एआई प्रमुख हुन् ।

उनका अनुसार भाइब कोडिङ भन्नाले ‘पूर्ण रूपमा भाइब्समा बग्ने’ कोडिङ शैलीलाई जनाइन्छ, जहाँ कोडिङ प्रक्रियालाई बिर्सिएर एआईसँगको संवादकै भरमा काम सम्पन्न गरिन्छ । उनी भन्छन्, “कोडिङ अब संवादमार्फत सम्भव छ । तपाईं चाहनुहुन्छ, एआईले त्यसको कोड तयार पारिदिन्छ ।”

उनले यो शब्द प्रयोग गरेसँगै भाइब कोडिङ शब्द अन्तर्राष्ट्रिय चर्चाको विषय बन्यो र मरियम वेबस्टर डिक्सनरी मा ‘स्ल्याङ एन्ड ट्रेन्डिङ नाउन’ (Slang&Trending noun) को रूपमा स्थान पायो ।

There’s a new kind of coding I call “vibe coding”, where you fully give in to the vibes, embrace exponentials, and forget that the code even exists. It’s possible because the LLMs (e.g. Cursor Composer w Sonnet) are getting too good. Also I just talk to Composer with SuperWhisper…

— Andrej Karpathy (@karpathy) February 2, 2025

भाइब कोडिङका फाइदा र चुनौती

एआई प्रविधिको आफ्नै त राम्रो र नराम्रो पक्ष छ, झन् यसले गर्ने कामको राम्रो र नराम्रो पक्ष नहुने त कुरा नै भएन । पहिले राम्रो पक्षको कुरा गरौं । यसको सबैभन्दा राम्रो पक्ष भनेको यसले कोडिङको कामलाई सहज र छिटो बनाएको छ । वेबसाइट वा एप तयार गर्न लाग्ने घण्टौँ घण्टाको समय एक घण्टा भन्दा पनि कम समयमा झरेको छ । यो भनेको कोडिङ सुपरपावर हुनुजत्तिकै हो । छिटो काम सकिनु मात्र भाइब कोडिङको फाइदा होइन, यसले नजानेका अनि भर्खर कोडिङ सिक्दै गरेका व्यक्तिहरूलाई पनि धेरै सहयोग गर्नसक्छ । अर्कोतिर कस्तो वेबसाइट बनाउने भन्ने अवधारणा छ तर कसरी बनाउने भन्ने थाहा नभएकाहरूका लागि यो उपयोगी छ ।   

तर भाइब कोडिङ जति सहज छ उत्ति नै जोखिमपूर्ण पनि छ । एआईले बनाएको कोडिङ सुरक्षित छ कि छैन भन्ने नै मुख्य प्रश्न हुन्छ । कोड त तयार भयो, तपाईँले यसलाई आफ्नो क्लाइन्टलाई पनि बेच्नुभयो तर यसमा सुरक्षा कमजोरीहरू धेरै देखिन सक्छ, यसले डेभलपरको विश्वसनियतामाथि प्रश्न उठ्छ । डेभलपरले घण्टौँ समय लगाएर, धेरै अनुसन्धान र मेहनत गरेर तयार गरेको जस्तो विश्वासिलो नहुन पनि सक्छ । यो जोखिमबाट जोगिनका लागि पनि भाइब कोडिङमा पूर्ण रुपमा विश्वास नगर्न पनि सकिन्छ । 

यसबाट बच्न बरु सुरुवात कसरी गर्ने अथवा आफू कतै अल्झियो भने यसलाई कसरी समाधान गर्न सकिन्छ भन्ने लगायतका विषयमा परामर्श लिन सकिन्छ । 

भाइब कोडिङ कहाँ प्रयोग हुन्छ ?

यद्यपि भाइब कोडिङ नयाँ अभ्यास हो, विभिन्न क्षेत्रहरूमा यसको प्रयोग व्यापक हुँदै गइरहेको छ :

• वेब डेभलपमेन्ट: ​फ्रन्टइन्ड तथा ब्याकइन्ड डेभलपरहरूले एचटीएमएल, सीएसएस तथा जाभास्क्रिप्ट कोड लगायतका लागि एआई टुल प्रयोग गरिरहेका छन् ।

• डेटा साइन्स: ​डेटा साइन्टिस्टहरले जटिल अल्गोरिदमहरू तयार गर्न, ठुला डेटासेट डिलिट गर्न तथा डेटाको समिक्षा र प्रस्तुतिकरण नयाँ नयाँ तरिकाबाट गर्नका लागि एआई टुल प्रयोग गरिरहेका छन् । 

  
  

• गेम डेभलपमेन्ट: पछिल्लो समय गेम डिजाइनरहरूले पनि भाइब कोडिङ प्रयोग गरेको पाइन्छ । स्क्रिप्टहरू तयार गर्न, कार्यक्षमताको समिक्षा गर्न तथा गेमप्ले मेकानिक्सहरू तयार गर्नका लागि एआई टुल प्रयोग हुने गरेको छ ।

• आर्थिक क्षेत्र: ​आर्थिक क्षेत्रमा प्रयोग हुने विभिन्न फाइनान्सियल टेक्नोलोजीहरूमा पनि एआई कोडिङ प्रयोग भएको पाइन्छ । सुरक्षित कारोबार प्रणालीका लागि फ्रड डिटेक्ट गर्न, अस्वभाविक कारोबार पत्ता लगाउन लगायतका कामका लागि एआई टुल प्रयोग भइरहेको छ ।  

  
  

• स्वास्थ्य क्षेत्र: ​स्वास्थ्य क्षेत्रमा पनि एआई टुल निकै प्रयोग हुन थालेको छ । विभिन्न तथ्याङ्क व्यवस्थापन तथा रोगहरू पत्ता लगाउने टुल तयार गर्नका लागि भाइब कोडिङ प्रयोग गरिन्छ ।

भाइब कोडिङका लागि लोकप्रिय एआई टुलहरू

भाइब कोडिङका लागि हाल प्रयोगमा रहेका केही प्रमुख टुलहरू:

• ChatGPT

• GitHub Copilot

• Replit Ghostwriter

• Cursor

• Claude (Anthropic)

• Google Gemini

भाइब कोडिङले प्रविधिको दुनियाँमा एक प्रकारको रूपान्तरण ल्याइरहेको छ । यसले कोडिङको ढोका सबैका लागि खुला बनाइदिएको छ । तैपनि यसको प्रयोग सजग ढंगले गर्नु आवश्यक छ, ताकि सुरक्षा, विश्वसनीयता र कार्यक्षमतामा सम्झौता नहोस् ।

पछिल्लो अध्यावधिक: जेठ १३, २०८२ ११:८

काठमाडौं – सत्तारुढ दल नेपाली कांग्रेसले विपक्षी दलहरूले आफ्नो कुरा सुन्नुपर्ने बताएको छ। 

प्रतिनिधिसभाको बैठकमा माओवादीबाट वर्षमान पुन र रास्वपाबाट शिशिर खनालले बोलेपछि आफूहरूले पनि बोल्न पाउनुपर्ने कांग्रेसका प्रमुख सचेतक श्याम घिमिरेले बताएका हुन्।

विपक्षी दलका दुई सांसदले बोलेपछि सभामुखले घिमिरेलाई बोल्न दिएका थिए।

घिमिरेले भने, ‘उहाँहरूले संसदमा जे कुरा उठाउनुभएको छ, त्यो हामीले गम्भीरतापूर्वक सुन्यौँ। त्यसैले उहाँहरूले हाम्रो कुरा पनि सुन्नुपर्ने दायित्व हुन्छ।’

विपक्षीको होहल्लापछि सभामुखले घिमिरेलाई बोल्न रोके। विपक्षी दलहरूले भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय छानबिन आयोग नबनेसम्म सदन चल्न नदिने घोषणा गरेका छन्।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।