काठमाडौँ – जनता समाजवादी पार्टी (जसपा) नेपालको केन्द्रीय कार्यकारिणी समिति बैठक आज बस्ने भएको छ । वर्तमान राजनीतिक परिस्थिति र पार्टीको सङ्गठनात्मक समीक्षा तथा भावी कार्ययोजना लगायतका एजेन्डामा छलफल गरी आवश्यक निर्णय गर्न बैठक बस्न लागेको प्रचार प्रसार तथा प्रकाशन विभाग प्रमुख पूर्ण बस्नेतले जानकारी दिएका छन् । 

बैठक पार्टी केन्द्रीय कार्यालय बालकुमारीमा बिहान ११ बजे सुरु हुने बस्नेतले बताए ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । सरकारले देशभरका सबै सामुदायिक तथा संस्थागत विद्यालयका शिक्षकलाई ‘सिकाइ चौतारी’ लर्निङ पोर्टलबाट अनलाइन अभिमुखीकरण कोर्स पूरा पूरा गर्न अनुरोध गरेको छ । शिक्षा, विज्ञान तथा प्रविधि मन्त्रालय अन्तर्गतको शिक्षा तथा मानव स्रोत विकास केन्द्रले एक सूचना प्रकाशित गर्दै यस्तो आग्रह गरेको हो ।

शिक्षण सिकाइ प्रक्रियालाई सहजीकरण गर्ने उद्देश्यले विकास गरिएको अनलाइन लर्निङ पोर्टलमा शिक्षकहरूका लागि अभिमुखीकरण कोर्स उपलब्ध गराइएको केन्द्रको भनाइ छ । उक्त कोर्स पूरा गर्ने शिक्षकहरूले अनलाइन प्रमाणपत्र समेत प्राप्त गर्नेछन् ।

केन्द्रले प्रत्येक विद्यालयबाट कम्तीमा पाँच जना शिक्षकहरूलाई अनिवार्य रूपमा पोर्टलमा दर्ता गराउन समेत अनुरोध गरेको छ । 

“शिक्षण सिकाइमा सहजीकरण गर्न केन्द्रबाट सिकाइ चौतारीलाई व्यवस्थित गर्दै विभिन्न सामग्रीहरू एउटै पोर्टलमार्फत प्राप्त हुने गरी सञ्चालनमा ल्याइएको हुँदा सबै विद्यालयहरूले यसको प्रयोगमा जोड दिन तथा प्रत्येक विद्यालयबाट कम्तीमा पाँच जना शिक्षकहरूलाई अनिवार्य रूपमा पोर्टलमा दर्ता गर्न गराउनुहुन समेत अनुरोध छ,” सूचनामा भनिएको छ ।

केन्द्रले सबै शिक्षा विकास तथा समन्वय एकाइ, स्थानीय तह र विद्यालयहरूलाई यो व्यवस्था कार्यान्वयन गराउन आग्रह गरेको छ । साथै, शिक्षकहरूलाई सिकाइ चौतारीको प्रयोगबारे विद्यार्थी तथा अभिभावकहरूलाई समेत आवश्यक जानकारी दिन अनुरोध गरिएको छ ।

सिकाइ चौतारीमा दर्ता गर्ने तरिका र अभिमुखीकरण कोर्ससम्बन्धी थप जानकारी तथा निर्देशनहरू केन्द्रको आधिकारिक वेबसाइट cehrd.gov.np र लर्निङ पोर्टल cehrd.gov.np मा राखिएको जनाएको छ ।

पछिल्लो अध्यावधिक: असार ७, २०८२ ७:५५

काठमाडौं – संघीय संसद अन्तर्गत प्रतिनिधिसभाको बैठक आज (शनिबार) पनि बस्दैछ । बैठक बिहान ११ बजे संसद भवन नयाँबानेश्वरमा बस्ने संसद सचिवालयले जनाएको छ । 

बैठकमा सरकारले गत जेठ १५ गते संसदमा प्रस्तुत गरेको ‘विनियोजन विधेयक, २०८२’ माथिको छलफल जारी रहने छ । आजको बैठकमा विभिन्न १० वटा मन्त्रालयको बजेट प्रस्ताव माथि छलफल हुने सम्भावित कार्यसूची रहेको छ ।

बैठकमा सङ्घीय मामिला तथा सामान्य प्रशासन मन्त्रालय, ऊर्जा, जलस्रोत तथा सिँचाइ मन्त्रालय, रक्षा मन्त्रालय, खानेपानी मन्त्रालय र स्वास्थ्य तथा जनसङ्ख्या मन्त्रालयको वार्षिक विनियोजन माथि छलफल हुनेछ । त्यस्तै, शिक्षा, विज्ञान तथा प्रविधि मन्त्रालय, परराष्ट्र मन्त्रालय, श्रम, रोजगार तथा सामाजिक सुरक्षा मन्त्रालय, गृह मन्त्रालय र सञ्चार तथा सूचना प्रविधि मन्त्रालयको आगामी आर्थिक वर्षको बजेट प्रस्ताव माथि छलफल हुने कार्यसूची छ ।

त्यस्तै, विनियोजन विधेयक, २०८२ अन्तर्गत विभिन्न मन्त्रालयको खर्च कटौतीको प्रस्ताव पनि आजको बैठकमा प्रस्तुत हुनेछन् । जसमा सांसद डा अमरेशकुमार सिंहले विनियोजन विधेयक, २०८२ अन्तर्गत सङ्घीय मामिला, ऊर्जा, रक्षा, स्वास्थ्य, शिक्षा, परराष्ट्र, श्रम, गृह र सञ्चार मन्त्रालय शीर्षकको खर्च रकमलाई घटाइ रू एक कायम गरियोस् भन्ने प्रस्ताव प्रस्तुत गर्ने कार्यसूची रहेको छ ।

त्यस्तै, सांसद प्रेम सुवालले पनि विनियोजन विधेयक, २०८२ अन्तर्गत सङ्घीय मामिला, ऊर्जा, रक्षा, स्वास्थ्य, खानेपानी, शिक्षा, परराष्ट्र, श्रम, गृह र सञ्चार मन्त्रालय शीर्षकको खर्च रकमलाई घटाइ रू एक कायम गरियोस् भन्ने प्रस्ताव प्रस्तुत गर्नेछन् । 

संसद् सचिवालयका अनुसार सांसद अमनलाल मोदीले विनियोजन विधेयक, २०८२ अन्तर्गत सङ्घीय मामिला तथा सामान्य प्रशासन मन्त्रालयको शीर्षकको खर्च रकमलाई घटाइ रू एक कायम गरियोस् भन्ने प्रस्ताव प्रस्तुत गर्ने कार्यसूची रहेको छ । 

त्यस्तै, सांसद प्रभु साहले ऊर्जा, स्वास्थ्य र खानेपानी मन्त्रालयको शीर्षकको खर्च रकमलाई घटाइ रू एक कायम गरियोस् भन्ने प्रस्ताव प्रस्तुत गर्नेछन् । 

सांसद माधव सापकोटाले ऊर्जा, जलस्रोत तथा सिंचाई मन्त्रालय शीर्षकको खर्च रकममा रू एक सय घटाइयोस् भन्ने प्रस्ताव र सांसद रणेन्द्र बरालीले रक्षा मन्त्रालय शीर्षकको खर्च रकममा रू १०० घटाइयोस् भन्ने प्रस्ताव प्रस्तुत गर्नेछन् ।

त्यसैगरी, सांसद ज्ञानु बस्नेत सुवेदीले स्वास्थ्य तथा जनसंख्या मन्त्रालय शीर्षकको खर्च रकममा रू १०० घटाइयोस् भन्ने प्रस्ताव र सांसद उर्मिला माझीले खानेपानी मन्त्रालयको शीर्षकको खर्च रकममा घटाइ रु एक कायम गरियोस् भन्ने प्रस्ताव प्रस्तुत गर्नुहुनेछ । सांसद हितबहादुर तामाङ्गले शिक्षा मन्त्रालयको शीर्षकको खर्च रकमलाई घटाइ रू एक कायम गरियोस् भन्ने प्रस्ताव प्रस्तुत गर्नुहुने कार्यसूची छ ।

आजको बैठकमा सांसद अम्मरबहादुर थापाले विनियोजन विधेयक, २०८२ अन्तर्गत शिक्षा, विज्ञान तथा प्रविधि मन्त्रालय शीर्षकको खर्च रकममा रू १०० घटाइयोस् भन्ने प्रस्ताव प्रस्तुत गर्ने सम्भावित कार्यसूचि रहेको छ ।

त्यस्तै, सांसद छिरिङ ल्हामुलामा तामाङले परराष्ट्र मन्त्रालय र नारायणी शर्माले श्रम मन्त्रालयको शीर्षकको खर्च रकमलाई घटाइ रू एक कायम गरियोस् भन्ने प्रस्ताव प्रस्तुत गर्नेछन् । 

सांसद चित्र बहादुर केसीले विनियोजन विधेयक, २०८२ अन्तर्गत गृह मन्त्रालयको शीर्षकको खर्च रकममा उल्लिखित रकम घटाइयोस् भन्ने प्रस्ताव प्रस्तुत गर्नुहुने  र सांसद गृह मन्त्रालय शीर्षकको खर्च रकममा रू १०० घटाइयोस् भन्ने प्रस्ताव प्रस्तुत गर्ने कार्यसूची तय भएको संसद सचिवालयले जानकारी दिएको छ । 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ – नेपाल राष्ट्र बैङ्कले शनीबारका लागि विदेशी मुद्राको सटहीदर निर्धारण गरेको छ । राष्ट्र बैङ्कका अनुसार आज अमेरिकी डलर केहि घटेर एकको खरिददर १३८ रूपैयाँ २४ पैसा र बिक्रीदर १३८ रूपैयाँ ८४ पैसा कायम भएको छ । युरोपियन युरो आज एकको खरिददर १५९ रुपैयाँ २० पैसा र बिक्रीदर १५९ रुपैयाँ ८९ पैसा रहनेछ । युरो हिजोको भन्दा केहि बढेको हो । शुक्रबार युरो एकको खरिददर १५९ रुपैयाँ र बिक्रीदर १५९ रुपैयाँ ६९ पैसा कायम भएको थियो ।

आज पाउन्ड स्टर्लिङ एकको खरिददर १८६ रूपैयाँ ५१ पैसा र बिक्रीदर १८७ रूपैयाँ ३२ पैसा, स्विस फ्र्याङ्क एकको खरिददर १६९ रूपैयाँ ०७ पैसा र बिक्रीदर १६९ रूपैयाँ ८० पैसा कायम गरिएको छ ।

अष्ट्रेलियन डलर एकको खरिददर ८९ रूपैयाँ ६४ पैसा र बिक्रीदर ९० रूपैयाँ ०३ पैसा, क्यानेडियन डलर एकको खरिददर १०० रूपैयाँ ८६ पैसा र बिक्रीदर १०१ रूपैयाँ ३० पैसा, सिङ्गापुर डलर एकको खरिददर १०७ रूपैयाँ ५८ पैसा र बिक्रीदर १०८ रूपैयाँ ०५ पैसा निर्धारण गरिएको छ ।

यस्तै, जापानी येन १० को खरिददर नौ रूपैयाँ ५० पैसा र बिक्रीदर नौ रूपैयाँ ५४ पैसा तोकिएको छ । चिनियाँ युआन एकको खरिददर १९ रूपैयाँ २५ पैसा र बिक्रीदर १९ रूपैयाँ ३४ पैसा, साउदी अरेबियन रियाल एकको खरिददर ३६ रूपैयाँ ८४ पैसा र बिक्रीदर ३७ रूपैयाँ, कतारी रियाल एकको खरिददर ३७ रूपैयाँ ९२ पैसा र बिक्रीदर ३८ रूपैयाँ ०९ कायम भएको छ ।

केन्द्रीय बैङ्कका अनुसार थाई भाट एकको खरिददर चार रूपैयाँ २२ पैसा र बिक्रीदर चार रूपैयाँ २४ पैसा, युएई दिराम एकको खरिददर ३७ रूपैयाँ ६४ पैसा र बिक्रीदर ३७ रूपैयाँ ८१ पैसा, मलेसियन रिङ्गेट एकको खरिददर ३२ रूपैयाँ ५१ पैसा र बिक्रीदर ३२ रूपैयाँ ६५ पैसामा विनिमय हुनेछ ।

साउथ कोरियन वन १०० को खरिददर १० रूपैयाँ १० पैसा र बिक्रीदर १० रूपैयाँ १५ पैसा, स्वीडिस क्रोनर एकको खरिददर १४ रूपैयाँ ३२ पैसा र बिक्रीदर १४ रूपैयाँ ३८ पैसा र डेनिस क्रोनर एकको खरिददर २१ रूपैयाँ ३४ पैसा र बिक्रीदर २१ रूपैयाँ ४३ पैसा तोकिएको छ ।

त्यस्तै, हङकङ डलर एकको खरिददर १७ रूपैयाँ ६१ पैसा र बिक्रीदर १७ रूपैयाँ ६९ पैसा, कुवेती दिनार एकको खरिददर ४५१ रूपैयाँ ४० पैसा र बिक्रीदर ४५३ रूपैयाँ ३६ पैसा, बहराइन दिनार एकको खरिददर ३६६ रुपैयाँ ५४ पैसा र बिक्रीदर ३६४ रूपैयाँ १३ पैसा, ओमनी रियाल एकको खरिददर ३५९ रूपैयाँ ०५ पैसा र बिक्रीदर ३६० रूपैयाँ ६० पैसा रहेको छ । भारतीय रूपैयाँ १०० को खरिददर १६० रूपैयाँ र बिक्रीदर १६० रूपैयाँ १५ पैसा तोकिएको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । सोधेको प्रश्नको जवाफ, कागजात विश्लेषण, लामा अनुच्छेदहरूको सारांश, अध्ययन/अनुसन्धान लगायत अन्य धेरै कामहरूका लागि अत्यावश्यक जस्तै बनिसकेको च्याटजीपीटी अब टु-डु लिस्ट (गर्न बाँकी रहेका कामहरूको लिखित रुपमा राख्ने काम) र रिमाइन्डरको रुपमा पनि प्रयोग गर्न सकिने भएको छ ।

हालसम्म च्याटजीपीटीमा रिमाइन्डर सेट गर्ने सुविधा थिएन । तर अब भने यो फिचर पनि उपलब्ध हुने भएको हो । यसो भएपछि प्रयोगकर्ताले च्याटजीपीटीमा काम गरेर कुनै अर्को एपमा गएर रिमाइन्डर राख्नुपर्ने झन्झट हट्नेछ । च्याटजीपीटीमा नै रिमाइन्डर राख्नका लागि प्रम्प्ट दिन सकिन्छ । 

यसका लागि कम्पनीले एनी डट डु (Any.do) नामक टु-डु लिस्ट एपसँग सहकार्य गरेको छ । यो एउटा टु-डु लिस्ट, क्यालेन्डर, र रिमाइन्डर एप हो जसले प्रयोगकर्तालाई दैनिक कार्य व्यवस्थापन गर्न मद्दत गर्छ । च्याटजीपीटी यो एप जोडिएसँगै अब प्रयोगकर्ताले च्याटजीपीटीलाई “भोलि बिहान ५ बजे मलाई उठाउने रिमाइन्डर राख,” वा “आइतबार मिटिङको योजना बनाऊ।” भन्ने जस्ता प्रम्प्ट दिन सक्नुहुन्छ । 

प्रम्प्टको आधारमा तपाईँको रिमाइन्डर सेड्युल सेट हुनेछ । यसका लागि प्रयोगकर्ताले च्याटजीपीटी र एनी डट डु दुवैको अकाउन्ट बनाउनुपर्ने हुन्छ । आफ्नो अकाउन्ट क्रियट गर्नका लागि यहाँ क्लिक गर्नुहोस् । अकाउन्ट लिंक भइसकेपछि च्याटजीपीटी खोल्दा स्क्रिनको बायाँतिर माथि एनी डट डु भनेर लेखिएको देख्न सकिन्छ । यसपछि आफ्नो आवश्यकता अनुसार तपाईँले रिमाइन्डर सेट गर्नसक्नुहुन्छ । 

पछिल्लो अध्यावधिक: असार ६, २०८२ १३:४४

काठमाडौं– स्कटल्यान्डमा जारी त्रिदेशीय टी–२० आई सिरिज अन्तर्गत अन्तिम खेलमा नेपालले घरेलु टोली स्कटल्यान्डसँग ३४ रनको फराकिलो अन्तरले पराजित भएको छ । 

स्कटल्यान्डले दिएको १९४ रनको विशाल लक्ष्य पछ्याउने क्रममा नेपाल १८ दशमलव ५ ओभरमा अलआउट हुँदै १५९ रनमै समेटियो । पहिलो ओभरमै विकेट गुमाएको नेपालका लागि लगातार विकेट जान थालेपछि तस्रो जित दर्ता गर्नबाट चुक्यो । 

अन्तिम ८ बलमा ३६ रन आवश्यक हुँदा रुपेशसँग दुई रन लिने क्रममा ललित राजवंशी रनआउट भएपछि नेपाल अलआउट हुँदै पराजित भयो । नेपालका लागि रुपेश सिंहले सर्वाधिक ४३ रनको नटआउट पारी खेले । उनले २२ बलमा तीन छक्का र एक चौका प्रहार गरे । त्यसपछि उपक्तान दिपेन्द्र सिंह ऐरीले ३४ रन प्रहार गरे । यस्तै कप्तान रोहितकुमार पौडेलले २७, रुपेशकुमार सिंहले २९ आशिफ शेखले १४ र भीम शार्कीले १२ रन प्रहार गरे ।

बलिङतर्फ स्कटल्यान्डका क्रिस जार्भेजले सर्वाधिक ३ विकेट लिँदा, सफयान सरिफले २, ब्रान्डन म्याकमुलेन, मार्क वाट र माइकल लिस्कले एक/एक विकेट लिए । 

त्यसअघि टस जितेर पहिले ब्याटिङ रोजेको स्कटल्यान्डले निर्धारित २० ओभरमा मात्र पाँच विकेट गुमाउँदै १९३ रनको विशाल स्कोर बनाएको थियो । 

स्कटल्यान्डको स्कोर ठूलो बनाउनका लागि ओपनर जर्ज मुन्जी र तेस्रो नम्बरमा आएका ब्रान्डन म्याकमुलेनबीच एक सय रनको साझेदारी बन्यो । 

मुन्जीले सर्वाधिक ७८ रन बनाए । उनले मात्र ३९ बलमा ६ छक्का र ५ चौका प्रहार गरे । यस्तै म्याकमुलेनले ३० बलमा चार चौका र एक छक्काको सहयोगमा ४२ रनको योदान दिए । 

माइकल लिस्कले दुई छक्का र एक चौकासहित १७ बलमा नटआउट २६ रन बनाउँदा म्याथु क्रसले १३ बलमा दुई चौका प्रहार गर्दै नटआउट १७ रनको योगदान दिए । 

नेपालका सन्दीप लामिछाने र ललित राजवंशीले मध्यम बलिङ गरे पनि अन्य कुनै पनि बलरले रन रोक्न सकेनन् । कुशल भुर्तेलले २ ओभरमा २० रन खर्चेर २ विकेट लिए । चार ओभरमा २५ रन खर्चिएका सन्दीप लामिछानेले १ विकेट तथा चार ओभर नै बलिङ गरेका ललितले २७ रन खर्चिएर एक विकेट लिए । यस्तै रुपेश सिंहले ३ ओभरमा ३२ रन खर्चिँदै एक विकेट लिए । 

सबैभन्दा महँगा दीपेन्द्र सिंह ऐरी बने । उनले चार ओभरमा ५० रन खर्चिए । यस्तै रिजन ढकाललले ३ ओभरमा ३५ रन खर्चिए । 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । सामाजिक सञ्जालमार्फत चिनजान भएका एक व्यक्तिलाई भेट्न गएकी सुस्त मनस्थितिकी एक १५ वर्षीया नाबालिकामाथि पटकपटक बलात्कार भएको पाइएको छ ।  फेसबुक मेसेन्जर मार्फत भेट्न बोलाई नाबालिका बलात्कार गरेको आरोपमा झापा जिल्लाको अर्जुनधारा-१० बुद्धचौकका ३५ वर्षीय हस्तबहादुर भट्टराईविरुद्ध जबरजस्ती करणीको मुद्‍दा दायर भएको हो । 

सरकारी वकिल कार्यालय, झापाले झापा जिल्ला अदालतको बाल इजलासमा भट्टराई विरुद्ध अभियोग पत्र दायर गरेको छ । जसमा मुलुकी मुलुकी अपराध संहिता, फौजदारी कार्यविधि नियमावली र बालबालिका सम्बन्धी ऐन बमोजिम कारबाही तथा क्षतिपूर्तिको माग राखिएको छ । 

पीडित नाबालिका (परिवर्तित नाम अनारमनी) को मानसिक अवस्था सामान्य छैन । उनी एक पटकमा कुनै पनि कुरा बुझ्दिनन् र पटक-पटक दोहोर्‍याउँदा बुझे पनि एकछिनपछि बिर्सिहाल्छिन् । उनी बोल्दा पनि भकभकाएर बोल्ने गर्छिन् । करिब दुई महिना अगाडि हस्तबहादुर भट्टराईसँग फेसबुक मेसेन्जरमार्फत उनको चिनजान भएको थियो । उनले ‘नेपाली कुमार’ नामक फेसबुक आईडी प्रयोग गर्थे । सोही आईडीबाट उनले ‘फ्रेन्ड रिक्वेस्ट’ पठाए, अनारमनीले एसेप्ट गरिन् र दुवै जनाबिच चिनजान सुरु भयो । त्यसपछि भिडिओ कल मार्फत कुराकानी हुँदै आएको पीडित र उनका परिवारको बयानमा उल्लेख छ ।

१२ वैशाख २०८२ का दिन बिहान भट्टराईले अनारमनीलाई भिडिओ कल गरे र भाटभटेनी मल घुम्न जाने प्रलोभनमा देखाए । उनले मोबाइल किनिदिने वा बिग्रेको मोबाइल बनाइदिने भन्दै लोभ देखाएको प्रतिवादी भट्टराई स्वयंले बयानमा उल्लेख गरेका छन् । त्यसपछि भट्टराईले आफूलाई मोटरसाइकलमा चढाएर झापा, बिर्तामोड-३ सैनिक मोडमा रहेको एमएस होटल एण्ड लजको एक कोठामा लगेर जबरजस्ती करणी गरेको पीडितको भनाइ छ । 

अनारमनीका दाइले दिएको जाहेरी दरखास्त अनुसार पहिलो दिन ५०० रुपैयाँ दिएर घर पठाएपछि, भोलिपल्ट वैशाख १३ गते पनि सोही होटेलमा लगेर भट्टराईले करणी गरेका थिए । त्यस क्रममा मोबाइलबाट नग्न फोटो र भिडिओ समेत खिचेका थिए । कसैलाई पनि यसबारे नबताउन भन्दै त्यस दिन ६०० रुपैयाँ दिएर पठाएको पीडित अनारमनीले बताएकी छिन् ।

वैशाख १६ गते बिहान पनि भट्टराईले त्यसैगरी भेट्न बोलाए । अनारमनीले भेट्न अस्वीकार गर्दा उनले ‘तँ आइसन, मैले भनेको मानिस भने तेरो नाङ्गो भिडिओ सामाजिक सञ्जालमा पोस्ट गरी, तेरो घर परिवारको मानिसहरूलाई पठाई तेरो बदनाम गरी दिन्छु’ भनी धम्क्याएपछि डरले पुनः सोही होटेलमा जान बाध्य भएको जाहेरी दरखास्त र पीडितको कागजमा उल्लेख छ । यसरी प्रतिवादीले पटकपटक करणी गरेको पीडित पक्षको दाबी छ ।

तर प्रतिवादी हस्तबहादुरले भने आफ्नो बयानमा अनारमनीसँग फेसबुक मार्फत चिनजान भएको र होटेलमा दुवैको सहमतिमा शारीरिक सम्बन्ध भएको दाबी गरेका छन् । उनले जबरजस्ती करणी गरेको आरोप अस्वीकार गरेका छन् ।

प्रहरी अनुसन्धान, घटनास्थल मुचुल्का, जाहेरी दरखास्त, पीडितको शारीरिक परीक्षण प्रतिवेदन, प्रतिवादीको बयान र घटना विवरण कागज लगायतका आधारमा भट्टराईले १५ वर्षीया नाबालिकालाई ललाई फकाई पटकपटक करणी गरेको प्रमाणित भएको अभियोग पत्रमा उल्लेख छ ।

पछिल्लो अध्यावधिक: असार ६, २०८२ १५:५५

काठमाडौं– स्कटल्यान्डमा जारी त्रिदेशीय टी–२० आई सिरिज अन्तर्गत अन्तिम खेलमा नेपालले १९४ रनको विशाल लक्ष्य पाएको छ । 

टस जितेर पहिले ब्याटिङ रोजेको स्कटल्यान्डले निर्धारित २० ओभरमा मात्र पाँच विकेट गुमाउँदै १९३ रनको विशाल स्कोर बनाएको हो । 

स्कटल्यान्डको स्कोर ठूलो बनाउनका लागि ओपनर जर्ज मुन्जी र तेस्रो नम्बरमा आएका ब्रान्डन म्याकमुलेनबीच एक सय रनको साझेदारी बन्यो । 

मुन्जीले सर्वाधिक ७८ रन बनाए । उनले मात्र ३९ बलमा ६ छक्का र ५ चौका प्रहार गरे । यस्तै म्याकमुलेनले ३० बलमा चार चौका र एक छक्काको सहयोगमा ४२ रनको योदान दिए । 

माइकल लिस्कले दुई छक्का र एक चौकासहित १७ बलमा नटआउट २६ रन बनाउँदा म्याथु क्रसले १३ बलमा दुई चौका प्रहार गर्दै नटआउट १७ रनको योगदान दिए । 

नेपालका सन्दीप लामिछाने र ललित राजवंशीले मध्यम बलिङ गरे पनि अन्य कुनै पनि बलरले रन रोक्न सकेनन् । कुशल भुर्तेलले २ ओभरमा २० रन खर्चेर २ विकेट लिए । चार ओभरमा २५ रन खर्चिएका सन्दीप लामिछानेले १ विकेट तथा चार ओभर नै बलिङ गरेका ललितले २७ रन खर्चिएर एक विकेट लिए । यस्तै रुपेश सिंहले ३ ओभरमा ३२ रन खर्चिँदै एक विकेट लिए । 

सबैभन्दा महँगा दीपेन्द्र सिंह ऐरी बने । उनले चार ओभरमा ५० रन खर्चिए । यस्तै रिजन ढकाललले ३ ओभरमा ३५ रन खर्चिए । 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । गुगलले आफ्नो शक्तिशाली आर्टिफिसियल इन्टेलिजेन्स (एआई) मोडेलहरूलाई तालिम दिन युट्युबमा भएका अर्बौं भिडिओहरू प्रयोग गरिरहेको खुलासा भएको छ । अमेरिकी समाचार संस्था सीएनबीसी सार्वजनिक गरेको एक रिपोर्टअनुसार गुगलको जेमिनाई र र भिडिओ बनाउने भियो थ्री (Veo 3) जस्ता एआईलाई सिकाउन कम्पनीले युट्युबको विशाल भिडिओ लाइब्रेरी प्रयोग गरिरहेको हो ।

गुगलले यो कुरा स्वीकारेको छ । तर, कम्पनीको भनाइअनुसार उसले तालिमका लागि सबै भिडिओ नभई केही भिडिओ मात्र प्रयोग गर्छ र भिडिओ निर्माता (क्रिएटर) हरूसँग भएको सम्झौताको सम्मान गर्छ । युट्युबका एक प्रवक्ताले भने, “हामीले हाम्रा उत्पादनहरूलाई राम्रो बनाउन सधैं युट्युब सामग्री प्रयोग गर्दै आएका छौं र एआईको युगमा पनि यो परिवर्तन भएको छैन ।”

तर, विज्ञहरूले यसले बौद्धिक सम्पत्तिमाथि ठुलो संकट निम्त्याउन सक्ने चेतावनी दिएका छन् । सीएनबीसीले कुरा गरेका अधिकांश क्रिएटर र मिडिया कम्पनीहरूलाई गुगलले आफ्नो एआई तालिमका लागि उनीहरूको सामग्री प्रयोग गरिरहेकोबारे जानकारी नै थिएन । प्रयोगकर्ताले युट्युबमा भिडिओ अपलोड गर्दा गुगललाई आफ्नो एआई तालिमका लागि सामग्री प्रयोग गर्नबाट रोक्ने कुनै विकल्प छैन ।

गुगलको नयाँ एआई भियो थ्रीले सिनेमाको जस्तै गुणस्तरीय भिडिओ बनाउन सक्छ । यही एआईलाई तालिम दिन युट्युबका भिडिओ प्रयोग भएको हो । यसले गर्दा भिडिओ निर्माताहरूमा चिन्ता बढेको छ । उनीहरूले थाहै नपाई आफ्नै प्रतिस्पर्धी वा आफूलाई विस्थापित गर्न सक्ने प्रविधि तयार पार्न मद्दत गरिरहेका छन् । उनीहरूलाई यसको लागि न कुनै जानकारी दिइएको छ, न सहमति लिइएको छ, न त कुनै क्षतिपूर्ति नै ।

युट्युबको सेवाका सर्तहरू (टर्म्स अफ सर्भिस) अनुसार, प्रयोगकर्ताले भिडिओ अपलोड गर्दा युट्युबलाई आफ्नो सामग्री प्रयोग गर्न, अरूलाई प्रयोग गर्न दिन र त्यसलाई परिवर्तन गर्नका लागि विश्वव्यापी रूपमा रोयल्टी-रहित लाइसेन्स दिएको हुन्छ । यही सर्तका आधारमा गुगलले भिडिओहरू प्रयोग गरिरहेको देखिन्छ ।

यता, केही क्रिएटरहरूले यसलाई सकारात्मक प्रतिस्पर्धाको रूपमा लिएका छन् । गुगलले आफ्नो एआईले बनाएको सामग्रीमाथि कपिराइटको मुद्दा आएमा त्यसको कानुनी जिम्मेवारी लिने बताएको छ । तर, यो विवाद बढ्दै गएको छ र अन्य कम्पनीहरूले पनि यस्तै किसिमका मुद्दा खेपिरहेका छन् । यसले गर्दा एआई युगमा प्रविधि कम्पनी र क्रिएटरबिचको द्वन्द्व बढ्ने विश्लेषण गरिएको छ । 

युट्युबले आफ्नो प्लेटफर्ममा भएका २० अर्ब भिडिओमध्ये कति र कुन भिडिओहरू एआई तालिमका लागि प्रयोग गरिएका छन् भन्नेबारे खुलाएको छैन । तर, विज्ञहरूका अनुसार यसको १ प्रतिशत मात्र भिडिओ प्रयोग गर्दा पनि २.३ अर्ब मिनेटको सामग्री हुन जान्छ, जुन प्रतिस्पर्धी एआई मोडेलहरूले प्रयोग गर्ने तालिम डेटाभन्दा ४० गुणा बढी हो ।

पछिल्लो अध्यावधिक: असार ६, २०८२ २१:४९