‘कोरोनाबारे चीनले ६ वर्षदेखि शोध गरिरहेको थियो, यसलाई जैविक हतियार बनाउन चाहन्थ्यो’

काठमाडौं। कोरोनाभाइरस अचानक मानवमा फैलिएको नभइ यसलाई चीनले जानीजानी जैविक हतियारको रुपमा मानिसमा फैलाएको हुन सक्ने अस्ट्रेलियाको एक प्रतिष्ठित अखबारले दावी गरेको छ । अखबारका अनुसार कोरोनाभाइरस २०२० मा अचानक आएको नभइ यसको तयारी चीनले ६ वर्षअघि २०१५ देखि नै गरिरहेको थियो । द विकेन्ड अस्ट्रेलियनले आफ्नो एक रिपोर्टमा चीनले २०१५ देखि नै कोरोनाभाइरसलाई जैविक हतियारको रुपमा विकास गरेको दावी गरेको छ ।

अखबारले चीनको एक शोधपत्रलाई आधार बनाएर यस्तो दावी गरेको हो । यो शोधपत्रमा चीनले २०१५ देखि नै सार्स भाइरसको प्रयोग गरेर जैविक हतियार बनाउने कोसिस गरिरहेको दावी गरिएको छ । रिपोर्टका अनुसार चिनियाँ वैज्ञानिक र स्वास्थ्य अधिकारीहरुले २०१५ देखि नै कोरोनाका अलग अलग स्ट्रेनबारे चर्चा गरिरहेका थिए । त्यतिबेला चिनियाँ वैज्ञानिकले तेस्रो विश्वयुद्धमा यसलाई जैविक हतियारको रुपमा प्रयोग गरिने बताएका थिए । त्यतिबेला यो भाइरसलाई हेराफेरि गरेर कसरी यसलाई महामारीको रुपमा परिणत गर्न सकिन्छ भन्ने विषयमा पनि चर्चा भएको थियो ।

रिपोर्टमा हरेक पटक भाइरसको जाँच गर्ने कुरा आएपछि चीन पछि हट्ने विषयमा पनि प्रश्न उठाइएको छ । अस्ट्रेलियाली साइबर सेक्युरिटी विशेषज्ञ रोबर्ट पटरका अनुसार यो भाइरस कुनै चमेरा बजारबाट फैलिन सक्दैन र यो थ्योरी पूरै गलत हो । चिनियाँ शोधपत्रको गहिरो अध्ययन गरेपछि रोबर्टले भने ‘यो शोधपत्र एकदमै सही छ । हामी चीनको शोधपत्रमाथि अध्ययन गरिरहन्छौं । यसबाट थाहा हुन्छ कि चीनका वैज्ञानिक के सोचिरहेका छन् ।’