काठमाडौं–काठमाडौं महानगरापलिकाले खुला स्थानमा फोहोर नबाल्न महानगरवासीलाई आग्रह गरेको छ।

प्लास्टिकजन्य फोहरबाट निस्कने धुँवा मानव स्वास्थ्यका लागि हानिकारक हुने भएकाले जथाभावी फोहोर नबाल्न महानगरले आग्रह गरेको हो।

महानगरको वातावरण व्यवस्थापन विभागका प्रमुख सरीता राईले प्रद्रषित वायुले बालबालिका, ज्येष्ठ नागरिक, श्वासप्रश्वास र मुटुका रोगीलाई सबैभन्दा बढी हानि गर्ने बताइन्।

महानगरबाट फोहर सङ्कलन गर्न आउने सवारी साधनमा सबै किसिमका फोहर विसर्जन गर्न उनले महानगरवासीलाई अनुरोध गरिन्। उद्योग कलकारखानालाई ‘प्रदूषण नियन्त्रण मापदण्ड,२०८१’ अनुसार गर्न पनि विभाग प्रमुख राईले आग्रह गरिन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं । नेकपा एमालेकी उपाध्यक्ष अष्टलक्ष्मी शाक्यले सक्षम, इमान्दार र असल भएकैले विद्या भट्टराईले शिक्षामन्त्रीबाट राजीनामा दिनुपरेको हो भन्दै प्रश्न गरेकी छन्।

भट्टराईले सोमबार शिक्षामन्त्रीबाट राजीनामा दिएपछि विभिन्न टिकाटिप्पणी भइरहेको बेला शाक्यले यस्तो प्रश्न गरेकी हुन्। पार्टी अध्यक्ष रहेका प्रधानमन्त्री केपी शर्मा ओलीबाटै असहयोग भएकाले भट्टराईले राजीनामा दिनु परेको उनको भनाइ छ।

‘शिक्षक आन्दोलन चलिराखेको बेला शिक्षामन्त्री भट्टराईले राजीनामा किन दिनुपर्‍यो?, विद्या भट्टराई सक्षम, इमान्दार, नैतिकता उच्च भएको, एउटा असल नेता भएको कारणले राजीनामा दिनुपरेको हो? उहाँलाई सहयोग किन भएन?,’ उनले प्रश्न गरेकी छन्।

भट्टराईको राजीनामाले उनको नैतिक धरातल कमजोर नभक्ष थप उच्च बनाएको शाक्यले टिप्पणी गरिन्। ‘विद्या! तपाईंको इमान र नैतिकता सबैको लागि सधैँ प्रेरणा बनोस्,’ शाक्यले सामाजिक सञ्जालमा भनेकी छन्।

काठमाडौँ–सातै प्रदेशका मुख्यमन्त्री र प्रदेश प्रमुख विरुद्ध सर्वोच्च अदालतमा दायर रिटमाथि आज सुनुवाइ हुँदैछ।

न्यायाधीशद्वय महेश शर्मा पौडेल र बालकृष्ण ढकालको इजलासमा एघारौँ नम्बरमा पेसी तोकिएको छ।

अधिवक्ता चन्द्रप्रकाश भुसालले केन्द्र र प्रदेश गरी मुख्यमन्त्री र प्रदेश प्रमुखलाई दोहोरो सुविधा प्रदान गरी आर्थिक अनुशासनको गम्भीर उल्लङ्घन गरेको भन्दै चैत १३ गते  रिट निवेदन दर्ता गरेका थिए।

ललितपुर जिल्ला, ललितपुर महानगरपालिका वडा नं. १८ र वडा नं. २५  भैंसेपाटीमा सातै प्रदेशका मुख्यमन्त्री र प्रदेश प्रमुखहरूका लागि २७ रोपनी १२ आनाभन्दा बढी क्षेत्रफलमा अत्यधिक विलासितायुक्त आवास निर्माण गरी दोहोरो सुविधा प्रदान गरिएको छ। 

भुसालले दोहोरो सुविधा निषेध गर्ने स्पष्ट कानुनी व्यवस्था गर्न सरकारका नाममा परमादेश जारी अनावश्यक रूपमा लिइएका आवास सुविधाको वित्तीय अडिट गरी राज्य कोषमा फिर्ता गराउन र राज्य स्रोतको सदुपयोग सुनिश्चित गर्दै आर्थिक अनुशासन कायम राख्न सरकारका नाममा परमादेश जारी गर्न रिट निवेदनमा माग गरेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौँ । फेसबुकका संस्थापक मार्क जुकरबर्गले गुगलले इन्स्टाग्राम किन्न सक्ने डर व्यक्त गरेको गोप्य ईमेल सार्वजनिक भएको छ । अमेरिकी अदालतमा प्रतिस्पर्धा ऐन उल्लङ्घनसम्बन्धी मुद्दाको सुनुवाइ भइरहेका क्रममा संघीय व्यापार आयोग (एफटीसी) ले अदालतमा ती ईमेल प्रस्तुत गरेको हो । 

सन् २०११ र २०१२ मा पठाइएका ती आन्तरिक ईमेलमा जुकरबर्गले इन्स्टाग्राम मोबाइल एपको बजारमा तीव्र रूपमा बढिरहेको र यदि गुगलले यसलाई किन्यो भने आउने केही वर्षमा फेसबुकले प्रदान गरिरहेका जस्तै सेवाहरू सजिलै थप्न सक्ने चिन्ता व्यक्त गरेका छन् ।

सार्वजनिक ईमेलहरूमा जुकरबर्गले इन्स्टाग्रामको प्रयोगकर्ता संख्या र फोटो शेयरिङ सुविधामा भइरहेको तीव्र वृद्धिलाई नजिकबाट नियाल्नुपर्ने बताएका छन् । 

जुकरबर्गले २०११ को सेप्टेम्बरमा पठाएको ईमेलमा लेखेका छन्, “यदि इन्स्टाग्रामले मोबाइलमा यस्तै राम्रो गरिरह्यो वा गुगलले उनीहरूलाई किन्यो भने आउँदो केही वर्षमा उनीहरूले सजिलैसँग हाम्रो जस्तै सेवा थप्न सक्छन् । अनि यदि उनीहरूसँग धेरै मानिसहरूको फोटो जम्मा हुँदै गयो भने त्यो हाम्रो लागि ठूलो समस्या बन्छ । अहिले उनीहरू अत्यन्तै छिटो बढिरहेका छन् । जस्तो लाग्छ, हरेक दुई–तीन महिनामा उनीहरूको प्रयोगकर्ता संख्या दोब्बर भइरहेको छ र अहिले नै उनीहरूसँग झण्डै ५० देखि १० लाख प्रयोगकर्ता छन् । जब हामीले राम्रो उत्पादन ल्याउँछौं, धेरै मानिसहरूले हाम्रो सेवा प्रयोग गर्नेछन् र भविष्यका इन्स्टाग्राम प्रयोगकर्ताहरूलाई त्यहाँ जान कुनै कारण नै रहने छैन । तर, अहिलेको गतिमा, हरेक केही महिनाको ढिलाइले उनीहरूको संख्या दोब्बर गराइरहेको छ र हाम्रो लागि स्थिति झन् अप्ठ्यारो बनाइरहेको छ ।” 

त्यसअघि सोही वर्षको फेब्रुअरीमा जुकरबर्गले पठाएको ईमेलमा इन्स्टाग्रामको वृद्धिलाई नजिकबाट नियाल्नुपर्ने उल्लेख गरेका थिए । उनले लेखका छन्,  “इन्स्टाग्राम छिट्टै बढिरहेको जस्तो देखिन्छ । चार महिनामा उनीहरूका २० लाख प्रयोगकर्ता र दैनिक ३० हजार फोटो अपलोड भएका छन् । यो धेरै हो । हामीले यसलाई नजिकबाट नियाल्नुपर्छ । साथै, स्पष्ट रूपमा ड्रपबक्सको अर्को ठुलो योजना फोटो शेयरिङमा हुनेछ ।”

एफटीसीले अदालतमा पेश गरेको कागजातअनुसार फेसबुकले इन्स्टाग्रामलाई प्रतिस्पर्धीको रूपमा हेर्दै सन् २०१२ मा एक अर्ब अमेरिकी डलरमा किनेको थियो । ​जुकरबर्गले प्रतिस्पर्धी एपहरू किन्दा कम्तीमा एक-दुई वर्ष समयभित्रै किन्ने र त्यसबिचमा अरू प्रतिस्पर्धीलाई ठुलो स्तरमा पुग्न नदिने योजना बनाएको एफटीसीको आरोप छ ।

अमेरिकी सरकारले मेटामाथि प्रतिस्पर्धा कानुन उल्लङ्घन गर्दै सम्भावित प्रतिस्पर्धीहरूलाई किनेर बजार कब्जा गर्ने रणनीति अपनाएको दाबी गरेको छ । यसपछि एफटीसीले मेटालाई इन्स्टाग्राम र ह्वाट्सएप जस्ता एपहरू बिक्री गर्न लगाउनुपर्ने माग गर्दै मुद्दा दायर गरेको हो । 

यदि एफटीसीका वकिलहरू सफल भएमा अमेरिकी सरकारले मेटालाई इन्स्टाग्राम र ह्वाट्सएप बेचेर उसको व्यवसाय टुक्र्याउन बाध्य पार्न सक्छ ।

-विभिन्न अन्तर्राष्ट्रिय सञ्चारमाध्यमको सहयोगमा

पछिल्लो अध्यावधिक: बैशाख ९, २०८२ ११:१६

काठमाडौँ – नेपाली बजारमा सुनको मूल्य अहिले सम्मकै उच्च बिन्दुमा परेको छ । मंगलबार एकैदिन तोलामा ६ हजार ९०० रुपैयाँ बढेर २ लाख रुपैयाँ नजिक पुगेको हो । 

नेपाल सुनचाँदी व्यवसायी महासंघका अनुसार सोमबार तोलामा १ लाख ९१ हजार रुपैयाँ कायम भएको छापावाल सुनको मूल्य मंगलबार बढेर तोलामा १ लाख ९७ हजार ९०० रुपैयाँ कायम भएको हो । 

यसैबिच चाँदीको मूल्य पनि सामान्य बढेको छ । सोमबार तोलामा १ हजार ९६० रुपैयाँ कायम भएको चाँदीको मूल्य मंगलबार बढेर तोलामा १ हजार ९७० रुपैयाँ कायम भएको हो । 

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। कक्षा १२ को परीक्षाबारे निर्णय गर्न बसेकाे परीक्षा बोर्डको बैठकले परीक्षा सञ्चालन गर्ने निर्णय गरेकाे छ। शिक्षकहरूको निरन्तर आन्दोलनका कारण कक्षा १२ को परीक्षा अन्यौलमा परेपछि बिहान बसेकाे बोर्ड बैठकले परीक्षा नराेक्ने निर्णय लिएकाे हाे।

आजको बैठकले कक्षा १२ को परीक्षा सञ्चालन नराेक्ने निर्णय गरेकाे बोर्डका अध्यक्ष डा महाश्रम शर्माले जानकारी दिए।

शिक्षक महासंघको आह्वानमा गत २० चैतदेखि सडक आन्दोलनमा रहेका शिक्षकहरूले माइतीघरबानेश्वर सडक खण्डमा प्रदर्शन गरिरहेका छन्, शिक्षा ऐन जारी नभएसम्मका आन्दोलन नरोकिने उनीहरूको भनाइ कायमै रहेकाे बेला बाेर्डले याे निर्णय लिएकाे हाे।

उनीहरू आन्दोलनमा नै रहेको खण्डमा प्लस टुको परिक्षा प्रभावित हुन सक्ने देखिएकाे छ। साथै, शिक्षकहरू माग पूरा नभएसम्म कक्षा १२ को परीक्षामा सहभागी नहुने अडानमा उनीहरू कायमै रहेका छन्।

काठमाडौँ । आजकल मोबाइल, क्यामेरा, ड्रोन, गेमिङ कन्सोल चलाउने प्रायः सबैलाई मेमोरी कार्ड चाहिन्छ । ठुलाे डेटा स्टोर गर्न, भिडिओ खिच्न, गेम खेल्न मेमोरी कार्डले नै काम गर्छ । तर बजारमा कतिपय नक्कली मेमोरी कार्ड पनि छन्, जसले तपाईँको डेटाको सुरक्षा गर्ने नभइ हराइदिने, बिगारिदिने वा करप्ट गरिदिन सक्छन् ।

धेरैलाई लाग्छ- ‘कार्ड त हेर्दा ठिकै छ नि ! प्याकेट पनि राम्राे छ । ब्राण्डको लोगो छ । अनि साइज पनि लेखिएको छ’ । तर त्यहीँबाट त नक्कली मेमोरी कार्डको खेल सुरु हुन्छ । नक्कली कार्ड बनाउनेहरू यति चलाख भइसकेका छन् कि प्याकेजिङदेखि कार्डको छाप, लेबल, ब्राण्ड सबै नक्कल गरिदिन्छन् । अनि कार्ड भित्र चाहिँ सस्तो वा नकम्मा चिप राखिदिन्छन् ।

धेरैजसो अवस्थामा नक्कली कार्डमा क्षमता बढी देखाइन्छ । जस्तो : १२८ जीबी लेखिएको छ तर भित्र १६ जीबी मात्र काम गर्छ । सुरुमा तपाईंले काम चलाउँदा केही थाहा हुन्न, तर कुनै दिन तपाईँले भिडिओ, फोटो धेरै सेभ गरिसक्नुभयो भने अब कार्ड फुल भयो भन्छ । तर साँचोमा त्यो कार्डले त्यो साइजकै डेटा समात्न सक्दैन । नतिजा ? डेटा करप्ट हुन्छ, हराउँछ वा रेकर्ड नै बन्द हुन्छ ।

धेरैजसो गेम खेल्ने र भिडिओ खिच्नेहरूले त झन् मेमोरी कार्डको स्पिड हेरेर किन्छन् । केही कार्डमा‘Ultra High Speed’ समेत लेखेको पाइन्छ । तर नक्कली कार्डले त्यो स्पिड दिन सक्दैन । ड्रोनले त यस्तै कार्ड पाएपछि फोरके भिडिओ खिच्नै नदिने गर्छ ।

अब कसरी थाहा पाउने त ? सबैभन्दा पहिले त प्याकेट हेर्नुहोस् । ब्राण्डको स्पेलिङ मिल्यो ? लोगो राम्रो छ ? छाप सफा छ ? केही टेडा-मेडा छ भने शंका गरिहाल्नुहोस् । अनि कार्डको साइज पनि मिल्यो कि मिलेन हेर्नुहोस् ।

धातुको भाग (मेटल कन्ट्याक्ट) राम्रोसँग मिलेको छ कि छैन हेर्नुहोस् । धेरै पटक पुनः प्याक गरेर बेचिएको भए कन्ट्याक्ट बिग्रिएको देखिन सक्छ । 

धेरैजसो राम्रा कम्पनीहरूले कार्डमा सिरियल नम्बर राख्छन् । सिरियल नम्बर छैन भने वा अलि अचम्मको देखियो भने नक्कली हुनसक्छ ।

अर्को उपाय चाहिँ कार्डमा ठुलो फाइल राखेर टेस्ट गर्नु हो । सब ठीक छ कि छैन भनेर भिडिओ वा ठुलो डेटा सेभ गरेर त्यसलाई फेरि खोलेर हेर्नुहोस्  । कपी गर्दा कतिसम्म राइट हुन्छ भनेर स्पिड पनि हेर्न सकिन्छ ।

सबैभन्दा भरपर्दो उपाय त भनेको कार्ड खरिद गर्दा ब्राण्डको आधिकारिक डिलर वा विश्वसनीय सप्लायर्सबाट मात्र किन्न हो । खासगरी अनलाइन शपिङ गर्दा झन् धेरै होसियार हुनु पर्छ । किनकि सस्तोको लोभमा फसेर नक्कली कार्ड किनियो भने पछि डेटा गयो गयो ।

एउटा राम्रो कुरा के भने अहिले मोबाइल र कम्प्युटरका लागि केही निःशुल्क एप पनि छन्, जसले कार्डको क्षमतादेखि स्पिड टेस्ट गर्छन् । जस्तै : कम्प्युटरका लागि ‘H2testw’ र मोबाइलका लागि  ‘True SD Card Capacity’ जस्ता टुलले यस्तो स्पिड टेस्ट गर्छन् । केही नकली कार्डले देखाउने क्षमता बढी हुन्छ तर वास्तविक क्षमता कम हुन्छ ।

यसकारण कार्ड सस्तो पाइयो भनेर खुसी नहोस् । सस्तो वा भारी छुट देखेपछि सोधपुछ नगरी नकिन्नुहोस् ।

सस्तोको लोभले तपाईंको महत्त्वपूर्ण फोटो, भिडिओ र डेटा सधैँका लागि हराउन सक्छ । नक्कली सामानले त तपाईंलाई ढाँट्छ नै, साथसाथै फोन, क्यामेरा, ड्रोन जस्ता तपाईँका डिभाइसलाई समेत बिगार्छ ।

–एन्ड्रोइड पुलिसको सहयोगमा

पछिल्लो अध्यावधिक: बैशाख ९, २०८२ ९:३७